Zan̈ahary koa fa baka niasa Adama ndreky Eva, izy nampitambatra iroroe nanjary fivadiany. Taminio voanalohany nisiany vadian̈a. Lelahy araiky ndreky man̈angy araiky nataony afaka miteraka, ke tiany ho sambatra iro an̈atiny tokantran̈ondro.​—Genesisy 1:27, 28; 2:18.

 Tiany Zan̈ahary ho sambatra olo fivadiany. (Ohabolana 5:18) Nisy fitsipiky momba izio nataony amy Baiboly ao, ndreky toro lalan̈a han̈ampy olo fivadiany ho sambatra.

Amy lahatsoratra ty

•  Ino ma fitsipikiny Zan̈ahary momba vadian̈a?

•  Karakory resaka fisintahan̈a ndreky fisarahan̈a?

•  Mila vita mariazy amy fanjakan̈a ma vadian̈anolo zay vo ikeny Zan̈ahary?

•  Ino aby andraikitriny lelahy ndreky man̈angy koran̈iny Baiboly an̈atiny tokantran̈o?

•  Olo fivadiany aminy andra izioty ma tsy maintsy miteraka ho Zan̈ahary?

•  Akory hataony Baiboly han̈ampy zaho amy tokantran̈onaka?

•  Toko sy andininy amy Baiboly momba vadian̈a

 Rango tamy voanalohany tan̈y, lelahy araiky ndreky man̈angy araiky fo nataony Zan̈ahary nanjary fivadiany. (Genesisy 2:24) Tsy ikeny Zan̈ahary olo manan̈a vady maro, lelahy manambady lelahy na man̈angy manambady man̈angy, avio olo tsy vita mariazy kanefa man̈ano tran̈o araiky? (1 Tesalonianina 4:3) Jesosy nampianatra pan̈aradia izy fa iro tokony han̈araka fitsipiky momba vadian̈a, napetrakany Zan̈ahary tamy voanalohany io fo.​—Marka 10:6-8.

 Vadian̈a io nataony Zan̈ahary hahadin̈y ela. Lelahy araiky ndreky man̈angy araiky koa fa man̈ano mariazy, iro mampan̈anten̈a fa samy tsy hivadiky, ndreky hiaraka fo iro koa mbala velon̈o. Tiany Zan̈ahary hitanandro vava nataondro zen̈y.​—Marka 10:9.

 Ndraikindraiky mety hisy raha hahavy olo fivadiany tsy ho tran̈o araiky hely. Ohatra, mety misy marary tampoko fianakavian̈any araiky amindro, ke tsy maintsy mandeha araiky. Fa Baiboly ndraiky tsy mandrisiky olo fivadiany hifampisintaka, izikoa misy olan̈a an̈atiny vadian̈andro. Fa Baiboly mandrisiky olo fivadiany efa nifampisintaka hifan̈ampody ndraiky koa.​—1 Korintianina 7:10.

 Fijangajangan̈a zaraiky fo antony amy Baiboly mety hisarahan̈a. (Matio 19:9) Ke izikoa misy olo fivadiany nifampisintaka na nisaraka nohony antony tsy mifan̈araka amy Soratra Masin̈y, iro samy tsy mahazo miaraka aminolo hafa na manambady olo hafa.​—Matio 5:32; 1 Korintianina 7:11.

 Tiany Zan̈ahary izikoa olo fivadiany man̈araka lalàn̈any fanjakan̈a momba vadian̈a. (Titosy 3:1) Izikoa olo fivadiany man̈ano mariazy arapanjakan̈a, aboakandro amy zen̈y fa man̈aja manampahifan̈a iro avio man̈aja fitsipikiny Zan̈ahary hifanambady mahadin̈y ela. a

•   Miaraka mandray andraikitry. Olo fivadiany tokony hifankatia ndreky hifan̈aja. (Efesianina 5:33) Mila mizaha fomba an̈aboahan̈a fitiavan̈a koa iro amy resaka firaisan̈a, avio tsy tokony han̈ano firaisan̈a aminolo tsy vadindro. (1 Korintianina 7:3; Hebreo 13:4) Iro koa mananjanaka, andraikitrindro miaraka mitarimy zanakandro.​—Ohabolana 6:20.

   Tokony samy miasa ma iro fivadiany sa karakory? Baiboly tsy mikoran̈a raha tsiaraikiaraiky momba zen̈y. Anjarandro fivadiany mandiniky ny raha ten̈a mety tokantran̈ondro.

•   Andraikitriny lelahy. Baiboly mivolan̈a fa “lelahy lohany man̈angy.” (Efesianina 5:23) Lohany man̈angy izy, fotony izy tokony hitariky an̈atiny fianakavian̈anany ndreky hangala fanapahankevitry mahatsara vadiny ndreky zanakandro.

   Izy tokony hifen̈y mare hikarakara raha ten̈a ilaindro, na aminy arabatan̈a zen̈y na arapihetsehampo ndreky aminy arapan̈ahy koa. (1 Timoty 5:8) Aboakany fa vadiny io misy valera aminany toetriny vadiny ndreky fahaizan̈anany izikoa izy miaraka miasa marikitry aminany. Avio alohany izy fa hangala fanapahankevitry, dinihiny tsara sosokevitriny vadiny ndreky fihetsehamponany. (Ohabolana 31:11, 28) Koran̈iny Baiboly fa tokony fitiavan̈a handrisiky lelahy han̈ano andraikitrinany jiaby.​—Kolosianina 3:19.

•   Andraikitriny man̈angy. Baiboly mivolan̈a fa “man̈angy mila man̈aja vadiny mare.” (Efesianina 5:33) Ravoravo Zan̈ahary izikoa man̈angy man̈araka volan̈a Zan̈ahary ke man̈aja fahifan̈any vadiny.

   Andraikitrinany mitatahy vadiny, man̈ampy izy hangala fanapahankevitry pare tsarabe, avio han̈eky izy amy maha lohany fianakavian̈a izy. (Genesisy 2:18) Baiboly mikoran̈a momba man̈angy man̈ano tsarabe andraikitrinany an̈atiny tokantran̈o.​—Ohabolana 31:10.

 Aha, tsy zen̈y. Taloha tan̈y fo panomponany sasany tsy maintsy niteraka. (Genesisy 1:28; 9:1) Kristianin̈y izioty fa tsy takin̈a zen̈y eky. Jesosy tsiary ndraiky nan̈amia beko pan̈aradia izy hiteraka zen̈y. Iro pan̈aradia izy taloha tan̈y tsiary ndraiky nanery olo fivadiany hiteraka zen̈y foeky. Anjaranolo fivadiany manapakevitry hiteraka iro sa tsy hiteraka.

 Amy Baiboly ao misy toro lalan̈a mety han̈ampy vadian̈anolo ho tsara fanombohan̈a. Toro lalan̈a aby io koa han̈ampy iro fivadiany hiary olan̈a maro ndreky han̈ampy iro hahavita hiatriky raha sarotro.

 Toro lalan̈a amy Baiboly han̈ampy olo fivadiany…

•   han̈aboaka ny ten̈a fitiavan̈a.​—1 Korintianina 13:4-7; Kolosianina 3:14.

•   han̈eky raha tsy mampitovy iro.​—1 Korintianina 10:24.

•   hifampitandren̈y tsarabe.​—Jakoba 1:19.

•   hifan̈aja.​—Romanina 12:10.

•   hifamela heloko.​—1 Petera 4:8.

•   samy tsy hivadiky.​—Marka 10:9.

•   samy haharidraha.​—Efesianina 4:2, 3.

•   han̈ano karaha ekipy araiky.​—Mpitoriteny 4:9.

•   hankafatatra vadian̈andro.​—Tononkiran’i Solomona 8:7.