Vaovao Tsara Nisoratin’i Lioka 15:1-32
15 Irô mpamory hetra ndreky irô mpanota aby io jiaby vory nan̈odidin̈y Jesosy tiô hitandren̈y izy.
2 Fa irô Fariseo ndreky irô mpanoratra lalàn̈a aby io nin̈on̈on̈o karaha ty: “Lelahy ty mandray mpanota ndreky miaraka mihinan̈a amindrô.”
3 Ke izy nivolan̈a fan̈oharan̈a ty tamindrô:
4 “Izikoa misy aminarô manan̈a ôndrikôndriky 100 kanefa very araiky, tsy ambelany amy tany paiky an̈y antsendriky irô 99 aby io, baka iô lôso izy mitady araiky very in̈y parapahitany izy?
5 Lera izio hitany, izio hataony amy sôrokonany sady ho ravoravo izy.
6 Lera izy avy an-tran̈o, izy hikaiky kamaradinany ndreky jiràninany, ke ho izy amindrô: ‘Miravoravoa miaraka aminaka, fôtony ôndrikôndrikinaka very in̈y efa hitako.’
7 Karaha zen̈y koa, ambarako anarô fa, ho bebe haravoan̈andrô an-dan̈itry an̈y amy mpanota araiky mibebaka, tozay amin’olo marin̈y 99 tsy mila mibebaka.
8 “Baka iô, azôvy ma man̈angy manan̈a drakma folo kanefa very araiky, ke tsy handrehitry lalampon̈o baka iô hamafa tran̈onany ndreky hitsakaraka tsarabe firaka izio hitany?
9 Aviô lera izio hitany, izy hikaiky kamaradinany* ndreky jiràninany, ke ho izy amindrô: ‘Miravoravoa miaraka aminaka, fôtony drakma very in̈y efa hitako.’
10 Ambarako anarô fa, ravoravo karaha zen̈y koa irô anjelin’ny Zan̈ahary aby io lera misy mpanota araiky mibebaka.”
11 Baka iô ho izy: “Nisy lelahy araiky nanan-janaka aroe lahy.
12 Ho araiky zandry tamy babany: ‘Papa, ameza zaho anjara fanan̈ana tôkony ninaka.’ Ke fanan̈anan’ny babany io nirasainy tamindrô.
13 Andra vitsivitsy tafaran’izen̈y, navorin’ny araiky zandry io fanan̈ananany jiaby, aviô lôso izy nandeha amy tany lavitry. Nandavỳ mare* izy tan̈y ke nilanilaniany fanan̈ananany.
14 Izikoa fa laniny fanan̈ananany jiaby, nisy mosary mare nan̈eran̈a tany io ke nanjary sahiran̈a* mare izy.
15 Ndray izy aby nandeha nisisiky hiasa tamin’olo araiky nipetraka tamy tany io, ke izy nalefan’olo io hiambin̈y komankory tam-bilonany tan̈y.
16 Tiany izikoa izy mba vokin’ny voan’ny kakazo karobie nihoanindrô* komankory aby io, kanefa tsisy olo nan̈amia raha izy foeky.
17 “Izy koa fa tontohitry, ho izy: ‘Maro edy olo karamain’ny babako an̈y zay mahazo hanin̈y* mahampy irô tsarabe, kanefa zaho atỳ matin’ny mafo!
18 Zaho handeha hody amy babako an̈y, aviô zaho hivolan̈a aminany: “Papa, zaho nanota tamy lan̈itry ndreky taminao.
19 Zaho efa tsy man̈eva kahian̈a zanakanao eky. Ataova karaha araiky amindrô mpiasanao aby io fo zaho.”’
20 Ke lôso izy nandeha tamy babany tan̈y. Mbala lavidavitry izy efa tazan̈an’ny babany; babany io nahinakinaka, ke lôso izy nilomoay, nitolon̈iny* izy, baka iô izy nirôfiny tam-pitiavan̈a.
21 Ke ho zanany io taminany: ‘Papa, zaho nanota tamy lan̈itry ndreky taminao. Zaho efa tsy man̈eva kahian̈a zanakanao eky.’
22 Fa ho babany io tamy mpanomponany: ‘Mindao malaky mangala rôbo lava, araiky farany tsara, ke ampisikìna izy. Asia peratra amy tan̈ananany, baka iô asia savaty amy vitinany.
23 Indesa atỳ koa zanak’aomby nankavondrahin̈y in̈y; vonia izio, aviô alô atsika hihina ndreky han̈ano fety,
24 fôtony zanako ty efa naty kanefa nimpody velon̈o, aviô izy efa very kanefa hita.’ Ke irô nanomboko nan̈ano fety.
25 “Zanany talan̈olo tamy zen̈y tam-bilo tan̈y. Izy koa fa nody, ke navy narikitry tran̈o, izy naharen̈y lamoziky ndreky olo nitsinjaka.
26 Ke izy nikaiky mpanompo araiky, baka iô nan̈ontaniany izy ino raha nandalo.
27 Ho mpanompo io taminany: ‘Rahalahinao navy, ke babanao namono zanak’aomby nankavondrahin̈y in̈y, fôtony izy salama tsara izikoa fa tafimpody taminany tiô.’
28 Fa izy neloko ke tsy nety niditry. Ke babany niboaka, aviô izy niangavy izy hiditry.
29 Kanefa ho izy tamy babany: ‘Hitanao, taon̈otaon̈o zaho zay nanompo anao, ary zaho tsiary ndraiky tsy nan̈araka didinao na indraiky. Kanefa na indraiky, zaho tsiary namezanao zanaka bengy han̈anaovako fety miaraka amin’iry namako.
30 Fa miaraka zanakanao io navy, izy namonoanao zanak’aomby nankavondrahin̈y in̈y, kanefa fanan̈ananao nilanilaniany tamy makorely tan̈y.’
31 Fa ho babany taminany: ‘A zanako, anao ma tsy raha niaraka taminaka teto fo? Aviô tsy ninao aby ma raha jiaby anan̈ako?
32 Fa atsika tsy maintsy man̈ano fety ndreky miravoravo, fôtony rahalahinao efa naty kanefa nimpody velon̈o, aviô efa very kanefa hita.’”
Lamariky amy Pazy Ambany
^ Na: “kamaradinany man̈angy.”
^ Na: “Nidepansy mare; Naditry mare.”
^ Na: “masikiny.”
^ Na: “vokin’ny hanin̈indrô.”
^ Abt: “môfo.”
^ Abt: “nantaoraka tamy vozon̈onany.”
