Vaovao Tsara Nisoratin’i Lioka 22:1-71
-
Irô mpisôron̈o aby io nitady tetiky hamonoan̈a Jesosy (1-6)
-
Fan̈oman̈ana Pasky farany (7-13)
-
Sakafo Harivan’ny Tômpo voanalohany (14-20)
-
“Olo hamadiky zaho efa miaraka aminaka amy latabatra eto” (21-23)
-
‘Irô nimalo mare momba azôvy ny farany be amindrô’ (24-27)
-
Jesosy nan̈ano fifan̈ikian̈a momba fanjakan̈a (28-30)
-
Jesosy efa nan̈ambara fa Petera han̈ano sary tsy hahay izy (31-34)
-
Mila man̈oman̈a tsialohaloha; sabatra aroe (35-38)
-
Vavaka nataon’i Jesosy tan̈abon’ny Bongo Olivy (39-46)
-
Jesosy nisambôrin̈y (47-53)
-
Petera nan̈ano sary tsy nahay Jesosy (54-62)
-
Jesosy nadroedroen̈a (63-65)
-
Jesosy nan̈oloan̈a Fitsaran̈a An̈abo (66-71)
22 Efa narikitry Fetin’ny Môfo Tsisy Levira; Pasky ikahian̈a fety io.
2 Navozo vahoaka irô lohandohan’ny mpisôron̈o ndreky irô mpanoratra lalàn̈a aby io, ke irô nitady tetiky mety tsarabe hamonoan̈a Jesosy.
3 Baka iô Satana niditry tamy Jodasy, araiky kahian̈a Iskariota in̈y; izio araiky tamindrô 12 Lahy.
4 Ke lôso izy nandeha nikoran̈a tamindrô lohandohan’ny mpisôron̈o ndreky irô sefon’ny mpiambin̈y tempoly aby io mikasiky fomba hamadihany Jesosy ke hanolorany izy amindrô.
5 Irô ravoravo mare, ke irô nifan̈araka fa han̈amia izy vola volafotsy.
6 Izy nan̈eky, aviô izy nanomboko nitady fotoan̈a mety tsarabe hamadihan̈a Jesosy ke hanolorany izy amindrô, amy fotoan̈a tsisy olo in̈y.
7 Navy andra voanalohany hankalazan̈a Fetin’ny Môfo Tsisy Levira; amin’ny andra io tsy maintsy hanoloran̈a biby atao sôron̈o amy Pasky.
8 Ke Jesosy nan̈iraka Petera ndreky Jaona; ho izy: “Mindao karakarà raha hoanintsika amy Pasky.”
9 Ho irô taminany: “Aia tany tianao hikarakaranay izio?”
10 Ho izy tamindrô: “Hitanarô, lera anarô miditry an-tanàna ao, hisy lelahy araiky mitondra sajoa* feno rano han̈aton̈o anarô. Areha firaka amy tran̈o hidirany izy.
11 Baka iô volàn̈a amy tômpin-tran̈o: ‘Karaha ty ho Mpampianatra: “Aia efitry* mety ihinanako Pasky miaraka amy mpianatranaka?”’
12 Ke lelahy io han̈aboaka anarô efitry araiky malalaka salakady efa misy entan̈a, an̈abo etazy. Karakarà ao Pasky.”
13 Ke lôso irô, aviô hitandrô aby raha nivolan̈iny tamindrô in̈y. Ke nikarakaraindrô aby raha nilain̈a tamy Pasky.
14 Izikoa fa navy lera, izy nangala fipitrahan̈a* nan̈odidin̈y latabatra tiô niaraka tamindrô apostoly aby io.
15 Ho izy tamindrô: “Zaho nan̈iry mare hihina Pasky ty miaraka aminarô, alohan’ny zaho hijaly.
16 Fôtony zaho man̈ambara anarô fa, zaho efa tsy hihina Pasky eky izikoa tsy efa tanteraka izio amy Fanjakan̈an’ny Zan̈ahary.”
17 Izy koa fa baka nangala kôpy namezan̈a izy, izy nan̈ano mersy Zan̈ahary aviô ho izy: “Alaiva ty ke igiaha, baka iô ampandalaova aminarô tsiaraikiaraiky.
18 Fôtony zaho man̈ambara anarô fa manomboko iziô, zaho efa tsy higiaka divain eky firaka Fanjakan̈an’ny Zan̈ahary avy.”
19 Nangala môfo koa izy, baka iô nan̈ano mersy Zan̈ahary. Nitapahany izio ke nirasainy tamindrô, aviô ho izy: “Izy ty manôndro vatan̈anaka* handeha hamezan̈a anarô. Ataova fo ty ho fahatsiaraovan̈a zaho.”
20 Karaha zen̈y koa nataony tamy kôpy, irô koa fa baka nihinan̈a hanin̈y hariva. Ho izy: “Kôpy ty manôndro fifan̈ikian̈a vaovao miôrin̈y amy lionaka, handeha halatsaka ninarô.
21 “Fa hitanarô, olo hamadiky zaho efa miaraka aminaka amy latabatra eto.
22 Marin̈y ankitin̈y fa Zanak’olo handeha, eraka raha efa voasoratra. Kanefa, hidiran’andra lelahy hamadiky izy io!”
23 Ke irô nifan̈ontany asa azôvy amindrô mieritreritry han̈ano raha zen̈y.
24 Kanefa, nimalo mare koa irô momba azôvy ny farany be amindrô.
25 Fa ho izy tamindrô: “Mpanjaka aby io manjikiziky amy firenena indesindrô, aviô zay olo manan̈a fahifan̈a amindrô kahian̈a Mpan̈ano ny Tsara.
26 Fa anarô ndraiky tsy tôkony han̈ano karaha zen̈y. Zay olo farany be aminarô hanjary karaha farany zandry, aviô zay olo mitariky hanjary karaha mpanompo.
27 Azôvy ma bebe: Araiky mihina* sa araiky manompo?* Tsy araiky mihina* edy va? Fa zaho ankilanarô io mira mpanompo.*
28 “Kanefa anarô tsy niala zaho foeky tamy fitsapan̈a jiaby nahazo zaho.
29 Ke zaho io man̈ano fifan̈ikian̈a aminarô, karaha nataon’ny Babako nan̈ano fifan̈ikian̈a taminaka momba fanjakan̈a araiky,
30 amy zen̈y anarô hihinan̈a ndreky higiaka amy latabatranaka amy Fanjakan̈anaka, ndreky hipetraka amy sezy fiandrianan̈a ke hitsara irô foko 12 amin’Israely.
31 “Simona, a Simona, Satana nangataka baka izy hisivan̈a anarô jiaby karaha atao misivan̈a vary in̈y.
32 Kanefa zaho efa niangavy baka finoan̈anao tsy hihen̈y. Aviô lera anao tafimpody, ankafatara irô rahalahinao aby io.”
33 Ho Petera: “Tômpo, zaho vôn̈ono hiaraka aminao, na higadra anao na ho foaty.”
34 Fa ho Jesosy: “Ambarako anao Petera fa, akôholahy mbala tsendriky man̈ena niany ty, intelo aby anao han̈ano sary tsy hahay zaho.”
35 Ho izy tamindrô koa: “Tamy zaho nan̈iraka anarô tsy hitondra saka fasian̈a vola ndreky saka fatao vatsy aviô savaty in̈y, nisy raha nanky taminarô?” Ho irô: “Tsisy!”
36 Aviô ho izy tamindrô: “Fa ziôty ndraiky, lan̈iany manan̈a saka fasian̈a vola na saka fatao vatsy tôkony hitondra zen̈y, baka iô lan̈iany olo tsy manan̈a sabatra mila mandafo lambanany ambelan̈a, aviô hivanga sabatra araiky.
37 Fôtony zaho man̈ambara anarô fa raha voasoratra ty tsy maintsy ho tanteraka aminaka: ‘Izy nikonten̈a ho an̈isan’olo mpandika lalàn̈a.’ Ia, raha voasoratra momba zaho efa ho tanteraka.”
38 Ke ho irô: “Tômpo, misy sabatra aroe ty.” Ho izy tamindrô: “Ampy irô io.”
39 Izy baka tiô nandeha tamy Bongo Olivy, karaha efa fataony in̈y; nan̈araka izy koa irô mpianatra aby io.
40 Irô koa fa navy tan̈y, ho izy tamindrô: “Mivavaha fo amy zen̈y anarô tsy ho resin’ny fakam-pan̈ahy.”
41 Baka iô izy somary nihataka hely kadiriny taora-bato araiky, aviô izy nandohaliky ke nivavaka
42 karaha ty: “A Baba, izikoa tianao, adosoa aminaka kôpy ty. Fa ndray zen̈y, tsy sitrapônaka atao fa ninao.”
43 Baka iô nisy anjely baka an-dan̈itry niboaka taminany ndreky nankahery izy.
44 Kanefa izy tamy zen̈y niasaloha mare ke nahainataony naresaka fo vavakanany. Hevokonany tamy zen̈y nanjary karaha lio mitete amy tany.
45 Izy koa fa baka nivavaka, izy nitsangana aviô izy nan̈aton̈o irô mpianatra aby io; fa irô hitany sokoen-tôro fôtony irô lonjan’ny alahelo.
46 Ho izy tamindrô: “Nan̈ino ma anarô mandry? Mitsangàna aviô mivavaha fo amy zen̈y anarô tsy ho resin’ny fakam-pan̈ahy.”
47 Izy mbala nivolan̈a fo, indriô nisy vahoaka navy. Jodasy nitariky irô io; izio araiky tamindrô 12 Lahy. Izy nan̈aton̈o Jesosy aviô izy nirôfiny.
48 Fa ho Jesosy taminany: “A Jodasy, ôroko ma handeha hamadihanao Zanak’olo?”
49 Irô olo nan̈odidin̈y izy tiô koa fa mahimahin̈y amy raha handeha handalo, ho irô: “Tômpo, vangoenay amy sabatra irô?”
50 Araiky tamindrô namira mpanompon’ny mpisôron̈obe, ke nafaka sofin̈inany ankavanan̈a.
51 Fa ho Jesosy: “Basy!” Baka iô nikasihiny sofin̈in’ny mpanompo io ke nampahivan̈iny.
52 Aviô karaha ty ho Jesosy tamindrô lohandohan’ny mpisôron̈o ndreky irô sefon’ny mpiambin̈y tempoly baka iô irô anti-pan̈ahy navy hanambotro izy aby io: “Anarô mitondra sabatra ndreky kobay hanambotro zaho, karaha handeha hanambotro dahalo?
53 Isan’andra zaho niaraka taminarô tamy tempoly tao, kanefa anarô tsy nanambotro zaho. Fa iziô navy leranarô ndreky lera hanjakan’ny hiziky.”
54 Ke irô nanambotro izy aviô izy nindesindrô nandeha tamy tran̈on’ny mpisôron̈obe tan̈y; fa Petera ndraiky nan̈araka baka lavitry.
55 Nandrehitry môtro tan̈ivon’ny lakoro irô, baka iô irô niaraka nipetraka tiô. Niaraka nipetraka tamindrô koa Petera.
56 Fa nisy mpanompovavy araiky nahita izy nipetraka narikitry môtro io. Nizahavany tsarabe i Petera, baka iô ho izy: “Lelahy io koa niaraka taminany.”
57 Fa izy nifamatra karaha ty: “Tsy haiko foeky izy.”
58 Tafara helin’izen̈y, nisy olo hafa koa nahita izy ke nivolan̈a: “Anao koa mba namandrô.” Fa ho Petera: “Zaho tsy namandrô.”
59 Kadiriny lera araiky tafaran’izen̈y, nisy lelahy araiky hafa koa nan̈izingizin̈y karaha ty: “Lelahy io niaraka tamindrô ankitin̈y e, izio Galilianin̈y ke!”
60 Fa ho Petera: “Tsy haiko foeky raha volan̈inao zen̈y.” Tiô ny iô, izy mbala nivolan̈a fo, nisy akôholahy nan̈ena.
61 Ke Tômpo nitodiky nizaha Petera. Nazon’i Petera onon̈o raha nivolan̈in’ny Tômpo taminany ty: “Akôholahy mbala tsendriky man̈ena niany ty, intelo aby anao han̈ano sary tsy hahay zaho.”
62 Ke lôso izy niboaka sady nitomoan̈y fôtony nare loatra alahelonany.
63 Irô lelahy aby niambin̈y Jesosy in̈y nanomboko nan̈adroadro izy ndreky namopoko izy.
64 Irô koa fa baka nanaron̈o saoranany, irô tsy vôly nan̈ontany izy karaha ty: “Aboaha iô baka anao mpaminan̈y zen̈y! Azôvy namopoko anao tiô in̈y?”
65 Baka iô koa maro tihitihy nataondrô taminany.
66 Izikoa fa kiaka andra, nivory anti-pan̈ahin’ny vahoaka jiaby, tsy azôvy zen̈y fa irô lohandohan’ny mpisôron̈o ndreky irô mpanoratra lalàn̈a aby io. Nindesindrô tamy tran̈o nisy Fitsaran̈a An̈abo* izy, aviô ho irô taminany:
67 “Ambarà zahay izikoa anao Kristy.” Kanefa ho izy tamindrô: “Ndray ambarako anarô raha zen̈y, anarô tsy hino aby!
68 Aviô anarô iziô koa han̈ontaniako raha, anarô tsy hamaly.
69 Kanefa manomboko iziô, Zanak’olo hipetraka ankavanan̈an’ny Zan̈ahary mahery.”
70 Ke ho irô jiaby: “Dikan’izen̈y anao Zanakan’ny Zan̈ahary?” Ho izy tamindrô: “Efa izy edy raha volan̈inarô momba zaho zen̈y.”
71 Ke ho irô: “Ino koa ma raha mbala ilavantsika porofo? Vavanany lastiô ren̈intsika nivolan̈a zen̈y.”
Lamariky amy Pazy Ambany
^ Na: “sajoa tanimanga.”
^ Abt: “efitry fandraisam-bahiny.”
^ Na: “nandry nandriran̈a.”
^ Abt: “Izy ty vatan̈anaka.”
^ Na: “mandry mandriran̈a amy latabatra.”
^ Na: “mikarakara.”
^ Na: “mandry mandriran̈a amy latabatra.”
^ Na: “mpikarakara.”
^ Na: “Fitsaran̈a An̈abo tamindrô Jiosy aby io; Synedriona.”
