Vaovao Tsara Nisoratin’i Marka 8:1-38
-
Jesosy nan̈amia hanin̈y olo 4 000 (1-9)
-
Irô Fariseo aby io nangataka fahagagan̈a (10-13)
-
Leviran’ny Fariseo ndreky leviran’i Heroda (14-21)
-
Jesosy nampajanga lelahy gila araiky ta Betsaïda (22-26)
-
Petera nivolan̈a fa Jesosy io Kristy (27-30)
-
Jesosy efa nan̈ambara fa izy hivonen̈a (31-33)
-
Ten̈a mpianatran’i Jesosy (34-38)
8 Tamin’ny andra aby zen̈y, nisy vahoaka marobe nivory nan̈odidin̈y Jesosy ndraiky koa. Irô io tsisy raha hoanin̈y. Ke nikahiany han̈aton̈o izy tiô mpianatranany, aviô ho izy tamindrô:
2 “Mampahinakinaka zaho zalahy irô olo aby ty ay! Efa telo andra baka irô zay nidôko taminaka teto, sady efa tsisy hanin̈y eky amindrô ao.
3 Izikoa irô alefako mody kanefa irô silaon̈o,* irô ho fanin̈y* amy lalan̈a an̈y. Sasany amindrô io amin’io baka lavitry.”
4 Kanefa ho irô mpianatranany aby io taminany: “Atsika ty kony amy tany mitaokan̈a ay! Aia tany hahitantsika môfo hahavoky irô olo aby io?”
5 Ke irô nan̈ontaniany karaha ty: “Firy ma môfo aminarô ao?” Ho irô: “Fito.”
6 Nirahiny nipetraka tamy tany irô olo aby io. Nalainy môfo fito aby io, baka iô izy koa fa baka nivavaka,* nitapahany irô môfo aby io aviô nirasainy tamy mpianatranany. Ke irô am’izay nandrasa raha aby io tamin’olo jiaby.
7 Nisy laoko madiniky vitsivitsy koa tamindrô. Izy koa fa baka nivavaka, nirahiny nirasaindrô koa laoko aby io.
8 Olo jiaby nihina ke voky. Izikoa fa navory lambilambin’ny hanin̈y tavela, irô io nahafeno antômby fito maro maventy.*
9 Kanefa, nisy lelahy kadiriny 4 000 nihinan̈a tiô tam’izen̈y. Irô olo aby io baka tiô niravan̈iny.
10 Direkty izy niondran̈a sambo niaraka tamy mpianatranany, ke irô nandeha tamy faritry Dalmanota.
11 Tan̈y, nisy Fariseo nan̈aton̈o izy ndreky niady hevitry taminany. Irô nangataka izy han̈ano fahagagan̈a baka an-dan̈itry, fôtony irô tihitsapa jery izy.
12 Nalahelo mare izy sady nihaimbe, ke ho izy: “Nan̈ino ma taranaka ty mitady fahagagan̈a? Ambarako anarô marin̈y tsarabe fa, tsisy fahagagan̈a foeky hamezan̈a taranaka ty.”
13 Irô baka iô nialàny, aviô izy niondran̈a sambo ndraiky koa ke nandeha nitsaka tandaforehy.
14 Kanefa irô nan̈adin̈a nitondra môfo. Tsisy hanin̈y foeky tamindrô tan̈atin’ny sambo io tao izikoa tsy môfo araiky fo.
15 Jesosy nampitandrin̈y irô mazava tsarabe karaha ty: “Anarô mila mahimahin̈y fo,* ke mitandrema amy leviran’ny Fariseo ndreky leviran’i Heroda.”
16 Ke irô nifan̈ady fôtony irô tsisy nitondra môfo.
17 Hitan’i Jesosy raha zen̈y, ke ho izy tamindrô: “Nan̈ino ma anarô mifan̈ady fôtony anarô tsy nitondra môfo? Mbala tsy mazava aminarô fo ma raha volan̈iko zen̈y? Mbala tsy azonarô fo? Mbala donto fo ma fônarô ke tsy hainarô dikan’ny raha zen̈y?
18 ‘Anarô misy maso, kanefa tsy mahita? Aviô anarô misy sofin̈y, kanefa tsy maharen̈y?’ Tsy azonarô onon̈o
19 tamy zaho nanapaka môfo dimy nirasain̈a tamy lelahy 5 000 in̈y? Nahafeno tanty firy lambilambiny navoavorinarô?” Ho irô taminany: “Folo aroe amby.”
20 “Aviô tamy zaho nanapaka môfo fito nirasain̈a tamy lelahy 4 000 in̈y, nahafeno antômby maventy* firy lambilambiny navoavorinarô?” Ho irô taminany: “Fito.”
21 Ke ho izy tamindrô: “Mbala tsy mazava aminarô fo?”
22 Irô baka tiô navy ta Betsaïda. Tan̈y, nisy lelahy gila nindesin’olo taminany; irô niangavy izy hikasiky lelahy io.
23 Nisambôrin’i Jesosy tan̈anan’ny lelahy io, baka iô izy nindesiny tambelan̈an’ny tanàna. Izy koa fa baka nandraora tamy mason’ny lelahy io, izy nametra-tan̈ana taminany aviô izy nan̈ontaniany karaha ty: “Misy raha hitanao?”
24 Ke lelahy io nisan̈andra, baka iô ho izy: “Zaho mahita olo, kanefa karaha kakazo mandehandeha in̈y fahitako irô.”
25 Napetrany tamy mason’ny lelahy io ndraiky koa tan̈anany, ke lelahy io nahita tsarabe. Janga* izy, ke nanjary hitany mazava tsarabe raha jiaby.
26 Nalefan’i Jesosy nody lelahy io, fa ho izy taminany fo: “Aza bendriky miditry an-tanàna ao anao.”
27 Jesosy ndreky mpianatranany aby io baka tiô niala tiô, ke irô lôso tamindrô tanàna ta Kaisaria-Filipo tan̈y. Irô koa fa tan-dalan̈a, izy nan̈ontany mpianatranany karaha ty: “Azôvy ma fahaizan’olo zaho?”
28 Ho irô taminany: “Jaona Mpan̈ano Batisa. Sasany ndraiky mivolan̈a: Elia. Fa misy koa mivolan̈a: Araiky amindrô mpaminan̈y aby io.”
29 Baka iô izy nan̈ontany irô: “Anarô ke, azôvy fahaizanarô zaho?” Ho Petera taminany: “Anao Kristy.”
30 Ke nifeperiny mare irô mpianatranany aby io tsy hikoran̈a raha momba izy amin’olo.
31 Nanomboko nampianatra irô koa izy fa Zanak’olo tsy maintsy hiaritry fijalian̈a maro, baka iô irô anti-pan̈ahy ndreky lohandohan’ny mpisôron̈o aviô mpanoratra lalàn̈a aby io tsy han̈eky* izy. Hivonen̈a izy, baka iô izy hatsangana afaka telo andra.
32 Tsy nivakavaka foeky izy nivolan̈a raha zen̈y tamindrô. Fa izy baka tiô nindesin’i Petera nitaokan̈a hely, aviô izy nivolan̈iny mare.
33 Fa Jesosy nitodiky, baka iô izy nizaha irô mpianatranany aby io, aviô Petera nivolan̈iny mare karaha ty: “Mandihana an̈y anao Satana, fôtony fomba fisain̈ananao tsy fomba fisain̈anan’ny Zan̈ahary fa nin’olombelon̈o.”
34 Baka iô vahoaka aby io ndreky irô mpianatranany aby io nikahiany han̈aton̈o izy, ke ho izy tamindrô: “Izikoa misy olo tihan̈ara-dia zaho, izy tsy tôkony han̈eky ain̈inany* eky fa, izy tôkony hitondra hazofijalian̈anany* ke han̈araka zaho fo.
35 Fôtony ho foaty lan̈iany olo mitady fomba han̈avaotany ain̈inany, fa lan̈iany olo mahafoe ain̈inany fôtony izy mpan̈ara-dia zaho sady man̈eky vaovao tsara, han̈avotro izio.*
36 Ino edy varany izikoa olo araiky mahazo raha jiaby amy donia ty, kanefa fahin̈ananany very?
37 Vôn̈ono han̈amia ino olo araiky hatao takalon’ny fahin̈ananany?
38 Fôtony lan̈iany olo men̈atra aminaka ndreky amy volan̈anaka an̈ivon’ny taranaka mivadiky amy Zan̈ahary* sady mpanota ty, lera Zanak’olo avy amy voninahitrin’ny Babany miaraka amin’ny anjely masin̈y, izy koa ho men̈atra amin’olo io.”
Lamariky amy Pazy Ambany
^ Na: “tsy nihinan̈a.”
^ Na mety ho: “matin’ny hakajoan̈a; toran̈a.”
^ Na: “nan̈ano mersy Zan̈ahary.”
^ Na: “antômby fito fitondrasan̈a vatsy.”
^ Abt: “Biafa fo masonarô.”
^ Na: “antômby fitondrasan̈a vatsy.”
^ Abt: “Nimpody nahita ndraiky.”
^ Na: “hanohitry.”
^ Na: “han̈ano raha tiany.”
^ Na: “ho velon̈o ndraiky.”
^ Abt: “taranaka mandiadia vady.”
