Vaovao Tsara Nisoratin’i Marka 9:1-50
-
Jesosy niova endriky (1-13)
-
Jesosy nampajanga tsaiky lelahy hely nisazaohan’ny demony (14-29)
-
“Tsisy raha tsy vitan’olo manan̈a finoan̈a” (23)
-
-
Jesosy nimpody nan̈ambara ndraiky fa izy hivonen̈a (30-32)
-
Irô mpianatra aby io nimalo momba azôvy ny farany be amindrô (33-37)
-
“Lan̈iany olo tsy manohitry atsika, miaraka amintsika” (38-41)
-
Fan̈anaovan̈a raha mahavy olo hiala amy finoan̈a (42-48)
-
“Manàn̈a sira an̈atinarô ao” (49, 50)
9 Ho izy tamindrô koa: “Ambarako anarô marin̈y tsarabe fa, sasany amin’olo aby mitsangana eto tsy ho foaty foeky izikoa tsy efa mahita Fanjakan̈an’ny Zan̈ahary mitondra.”
2 Tsiota andra tafaran’izen̈y, nindesin’i Jesosy nitaokan̈a tamy bongo araiky an̈abo mare Petera, aviô Jakoba ndreky Jaona. Niova endriky nan̈oloan̈a irô tiô izy:
3 Lambanany* nanjary nangilangilatra sady nalandy jiaka. Izikoa mbala ambony tany fo, tsisy mpanasa lamba mahavita mamotsy lamba ambaka zen̈y.
4 Aviô irô nahita Elia ndreky Mosesy nikoran̈a tamy Jesosy.
5 Ke ho Petera tamy Jesosy: “A Raby, pare amintsika tsarabe eto. Ambilà zahay hanangana tran̈olay telo, ke araiky ninao, araiky nin’i Mosesy, baka iô araiky nin’i Elia.”
6 Ny marin̈y aminany, ndray raha sambôriny tsy hainy, fôtony irô navozo mare.
7 Aviô nisy rôndro nifôron̈o ke nandrakotro irô, baka iô nisy feo baka tamy rôndro io nivolan̈a karaha ty: “Io Zanako, tiako mare izy. Tandrin̈esa izy.”
8 Tiô fo, irô koa fa nizaha nan̈odidin̈y irô, tsisy olo hitandrô izikoa tsy Jesosy zaraiky fo.
9 An̈atin’irô nijotso baka tamy bongo in̈y, irô nifeperin’i Jesosy mare tsy hitantara amin’olo raha hitandrô in̈y, izikoa tsy efa hatsangana amy maty Zanak’olo.
10 Nitanandrô tam-pôndrô tao volan̈a* zen̈y. Fa irô fo nifampikoran̈a momba ino raha tian’i Jesosy havian̈a tamin’izy nikoran̈a momba fitsanganany amy maty.
11 Ke irô nan̈ontany izy: “Nan̈ino ma irô mpanoratra lalàn̈a aby io mivolan̈a fa Elia antsendriky tsy maintsy ho avy, zay vo Kristy?”
12 Ho izy tamindrô: “Ho avy ankitin̈y Elia, ke izy han̈ampody raha jiaby amy plasiny. Kanefa nan̈ino fo basy efa voasoratra fa Zanak’olo tsy maintsy hiaritry fijalian̈a maro aviô tsy hasian̈a fôtiny?
13 Fa zaho ndraiky man̈ambara anarô fa Elia efa navy, aviô nataondrô taminany aby zay raha tiandrô, karaha raha efa voasoratra momba izy.”
14 Irô koa fa ho avy amy tany nisy irô mpianatra hafa aby in̈y, irô nahita olo marobe nan̈odidin̈y irô tarỳ, ndreky mpanoratra lalàn̈a nimalo tamindrô.
15 Fa niaraka izy hitandrô vahoaka aby io, irô gaga, aviô irô nilomoay taminany tarỳ han̈ano mbalatsara izy.
16 Izy nan̈ontany irô: “Ino ma raha mampimalo anarô?”
17 Nisy araiky tamindrô olo aby io nivolan̈a taminany: “A Mpampianatra, nindesiko aminao atỳ zanako lelahy fôtony izy misy demony mampamoa.
18 Ndray aia ndray aia tany anambaoran’ny demony io tsaiky io, izy arampiny amy tany; ranivin’ny tsaiky io mifaorafaora aviô izy mampan̈ena nify, ke lonja mare izy. Zaho niangavy irô mpianatranao aby io han̈aboaka izio, fa izio fo tsy vitandrô.”
19 Fa ho izy tamindrô: “Taranaka tsisy finoan̈a ty! Ziska ombian̈a ma zaho tsy maintsy hidôko aminarô eto? Ziska ombian̈a ma zaho tsy maintsy handefitry aminarô? Indesa aminaka atỳ izy.”
20 Ke nindesindrô taminany tiô tsaiky lelahy io. Fa niaraka demony io nahita Jesosy, tsaiky io nataony nitsipatsipaka. Ke tsaiky io lavo baka iô nihôsihôsy tamy tany sady nifaorafaora ranivy.
21 Jesosy nan̈ontany baban’ny tsaiky io: “Rango ombian̈a ma navoazany izio?” Ho izy: “Rango izy mbala hely.
22 Matetiky izy atsipin’ny demony io an̈atin’ny môtro aviô koa an̈atin’ny rano, misy hamonoany izy. Ke izikoa mba misy raha mety vitanao, mamindrà fô aminay ke ampia zahay e!”
23 Ho Jesosy taminany: “Nan̈ino ma anao mivolan̈a: ‘Izikoa misy raha mety vitanao?’ Tsisy raha tsy vitan’olo manan̈a finoan̈a.”
24 Direkty baban’ny tsaiky io nivolan̈a mare karaha ty: “Zaho manan̈a finoan̈a! Ampia zaho hampitombo finoan̈anaka!”
25 Izikoa fa hitan’i Jesosy fa nan̈aton̈o irô tiô vahoaka aby io, fan̈ahy maloto io nisiahany karaha ty: “Demony mampamoa ndreky mamparen̈iny ty, zaho man̈iraka anao, miboaha baka aminany ao aviô aza miditry aminany ao eky!”
26 Demony io koa fa baka niafatrafatra ndreky nampitsipatsipaka tsaiky io mare, izy niboaka. Karaha olo maty in̈y fahitan̈a tsaiky io, ke ankamaraozan’olo nivolan̈a: “Maty izy!”
27 Kanefa izy nisambôrin’i Jesosy baka tamy tan̈any baka iô nampitsanganiny, ke izy nitsangana.
28 Jesosy koa fa tafiditry tamy tran̈o araiky, irô mpianatranany aby io nan̈ontany izy mitaokan̈a karaha ty: “Nan̈ino ma tsy vitanay nan̈aboaka izin̈y?”
29 Ho izy tamindrô: “Efa vavaka edy hahavitan̈a man̈aboaka karazan̈an’ny demony araiky in̈y.”
30 Irô baka tiô niala tiô ke nandeha namakivaky Galilia, fa raha zen̈y fo tsy tiany hain’olo,
31 fôtony izy tihampianatra irô mpianatranany aby io. Ho izy tamindrô: “Hisy olo hamadiky Zanak’olo, ke hanolotro izy am-pelantan̈anandrô fahavalo aby io. Hivonendrô izy. Fa ndray izy maty, afaka telo andra izy hatsangana.”
32 Kanefa tsy nazava tamindrô foeky raha nivolan̈iny, fa irô fo navozo han̈ontany izy.
33 Irô baka tiô navy ta Kapernaomy. Izy koa fa tafiditry tan-tran̈o, izy nan̈ontany irô: “Ino ma raha nampimalo anarô tan-dalan̈a tan̈y in̈y?”
34 Irô jay fo, fôtony irô tan̈y nimalo momba azôvy ny farany be amindrô.
35 Ke izy nipetraka, aviô nikahiany irô 12 Lahy ke ho izy tamindrô: “Zay tiho voanalohany, izy tsy maintsy farany amin’olo jiaby ndreky manompo olo jiaby.”
36 Izy baka tiô nangala tsaiky hely araiky, aviô tsaiky io nampitsanganiny tan̈ivondrô tiô; tan̈anany nataony tamy sôrokon’ny tsaiky io, ke ho izy tamindrô:
37 “Lan̈iany olo mandray tsaiky hely karaha araiky ty, baka amy fan̈ajany an̈aran̈anaka, mandray zaho koa. Aviô zay olo mandray zaho, tsy zaho fo raìsiny fa, Araiky nan̈iraka zaho koa.”
38 Ho Jaona taminany: “A Mpampianatra, zahay nahita olo zay nampiasa an̈aran̈anao izikoa fa nan̈aboaka demony. Namango zahay nisakan̈a izy fôtony izy tsy miaraka amintsika.”
39 Kanefa ho Jesosy: “Anarô aza man̈aohatra hisakan̈a izy, fôtony tsisy olo mampiasa an̈aran̈anaka lera man̈ano fahagagan̈a ke betibetiky iô hivolan̈a raha ratsy momba zaho.
40 Lan̈iany olo tsy manohitry atsika, miaraka amintsika.
41 Aviô lan̈iany olo man̈amia anarô rano vera araiky higiahan̈a, fôtony anarô nin’i Kristy, ambarako anarô marin̈y tsarabe fa, izy tsy maintsy hahazo hatsaran̈a.
42 Fa izikoa misy olo man̈ano raha hahavy araiky amindrô madiniky manan̈a finoan̈a aby ty hiala amy finoan̈a,* tsaratsara aminany asian̈a vato maventy fandisanan̈a vary* amy tendanany, baka iô izy hatsipy an-dranomasin̈y an̈y.
43 “Ke izikoa tan̈ananao mahavy anao hanota,* tapaha izio. Sitrany anao tapaka tan̈ana kanefa mahazo fiainan̈a, tozay anao manan̈a tan̈ana aroe kanefa halefa amy Gehena,* amy môtro tsy mety maty an̈y.
44 ——
45 Baka iô izikoa vitinao mahavy anao hanota,* tapaha izio. Sitrany anao tapaka vity kanefa mahazo fiainan̈a, tozay anao manan̈a vity aroe kanefa hatsipy amy Gehena.*
46 ——
47 Aviô izikoa masonao mahavy anao hanota, aria lavitry anao izio. Sitrany anao manan̈a maso araiky kanefa tafiditry amy Fanjakan̈an’ny Zan̈ahary, tozay anao manan̈a maso aroe kanefa hatsipy amy Gehena.*
48 Olitry an̈y tsy maty aviô môtro tsy mety maty.
49 “Fôtony olo jiaby tsy maintsy hirabarabàn̈a môtro, karaha atao mandrabaraba sira in̈y.
50 Tsara sira, fa izikoa sira ndraiky manjary matsatso, ino eky raha han̈ampodiananarô sironany? Manàn̈a sira an̈atinarô ao, aviô ataova fo raha mampihavan̈a anarô samby anarô.”
Lamariky amy Pazy Ambany
^ Na: “Lambanany ambelan̈a.”
^ Na mety ho: “Tsy nambarambarandrô olo foeky raha.”
^ Abt: “ho voatsikon̈o.”
^ Na: “vato fandisanan̈a vary ahodin̈in’ny borìky.”
^ Abt: “ho voatsikon̈o.”
^ Abt: “ho voatsikon̈o.”
