Vaovao Tsara Nisoratin’i Matio 14:1-36
14 Tamy fotoan̈an’izen̈y, Heroda* nanjaka tamy faritry Galilia. Ren̈in’i Heroda lazan’i Jesosy,
2 ke ho izy tamy mpanomponany aby io: “Jaony Mpan̈ano Batisa fo zen̈y! Izy natsangana tamy maty, ke zen̈y ahavitany man̈ano fahagagan̈a aby zen̈y.”
3 Nirahin’i Heroda nisambôrin̈y i Jaony, baka iô izy nirahiny nifihezin̈y silisily aviô nigadrain̈a, fôtony izy tihan̈ano raha mamparavoravo Herodiasy, vadin’i Filipo rahalahiny.
4 Matetiky baka Jaony nivolan̈a tamin’i Heroda: “Anao tsy mahazo manambady man̈angy io.”
5 Heroda tihamono Jaony, kanefa izy navozo vahoaka, fôtony irô olo aby io nihevitry fa Jaony io mpaminan̈y.
6 Izikoa fa navy fotoan̈a hankalazan̈a aniverseran’i* Heroda, zanakan’i Herodiasy man̈angy nitsinjaka tamy fety io. Namparavoravo Heroda mare raha zen̈y,
7 ke izy nan̈ano vava fa zay raha hangatahan’ny tsaiky man̈angy io hamezany izy.
8 Ke tsaiky man̈angy io koa fa baka nangataka hevitry tamy mamany, ho izy: “Ameza zaho an̈atin’ny platô lohan’i Jaony Mpan̈ano Batisa.”
9 Nalahelo mare mpanjaka izikoa fa naharen̈y zen̈y, kanefa nirahiny nitapahan̈a fo lohan’i Jaony, fôtony efa ren̈in’olo nihinan̈a* niaraka taminany tiô vava nataony.
10 Ke izy nan̈iraka olo handeha tamy prizon tan̈y hanapaka lohan’i Jaony.
11 Lohan’i Jaony baka tiô nindesin’olo io tamy platô, baka iô izio namezan̈a tsaiky man̈angy io. Tsaiky man̈angy io amizay nitondra izio tamy mamany tan̈y.
12 Tafaran’izen̈y, navy mpianatran’i Jaony nangala fatinany, baka iô izy nalevin̈indrô. Aviô nitantaraindrô tamy Jesosy raha nandalo io.
13 Izikoa fa ren̈in’i Jesosy raha zen̈y, izy niala tiô, baka iô izy niondran̈a sambo ke nandeha tamy tany tsisy olo, fôtony izy tihitaokan̈a. Kanefa ren̈in’olo raha zen̈y, ke nialandrô tanànandrô, baka iô irô nandeha vity nan̈araka izy.
14 Jesosy koa fa nijotso baka tamy sambo io, izy nahita olo marobe. Izy nahinakinaka irô, ke izy nampahivan̈a olo narary.
15 Andra koa fa tsôfotro, nan̈aton̈o Jesosy mpianatranany aby io ke ho irô: “Tany misy atsika ty mitaokan̈a, sady andra efa hariva, ke ravàn̈a irô olo aby io amy zen̈y irô mandeha mivanga hanin̈y an-tanàna an̈y.”
16 Kanefa ho Jesosy tamindrô: “Irô tsy mila mandeha zen̈y. Amezanarô hanin̈y irô hoanindrô.”
17 Fa ho irô taminany: “Môfo dimy ndreky laoko aroe fo kony ato ay!”
18 Ho izy tamindrô: “Indesa atỳ basy môfo ndreky laoko aby zen̈y.”
19 Ke nirahany nangala plasy tamy bozaka tiô irô olo aby io. Nalain’i Jesosy môfo dimy ndreky laoko aroe aby in̈y, aviô izy nisan̈andra lan̈itry ke nivavaka. Nitapahany amizay môfo aby io baka iô namezany mpianatranany, ke irô nandrasa izio tamin’olo jiaby tiô.
20 Olo jiaby nihina ke voky. Izikoa fa navory lambin’ny hanin̈y tavela, izio nahafeno tanty 12.
21 Kadiriny 5 000 lelahy nihinan̈a, ankoatran’ny man̈angy ndreky tsaiky.
22 Tsy ela tafaran’izen̈y, direkty nirahin’i Jesosy nandeha sambo nitsaka tandaforehy mpianatranany aby io, fa izy ndraiky mbala nandravan̈a vahoaka.
23 Jesosy koa fa baka nandravan̈a olo aby io, lôso izy zaraiky nanonga tamy bongo tan̈y nivavaka. Izy zaraiky fo tan̈y izikoa fa tsôfotro andra.
24 Efa lôso lavitry mare* sambo niondran̈an’ny mpianatranany aby io tamy zen̈y. Nifen̈y mare irô nanohitry daroba, fôtony sambo io nisetra tsiko.
25 Izikoa fa kadiriny man̈ena akôho,* Jesosy nandeha tan̈abon’ny ranomasin̈y, nan̈aton̈o irô mpianatranany aby io.
26 Fombo mare irô izikoa fa nahita izy nandeha tan̈abon’ny ranomasin̈y, ke ho irô: “Irỳ misy raha hafahafa!”* Ke irô niafatrafatra fôtony irô navozo mare.
27 Tiô ny iô Jesosy nivolan̈a tamindrô karaha ty: “Anarô aza mavozo! Zaho fo ty.”
28 Ke ho Petera taminany: “Izikoa anao ankitin̈y io Tômpo, iraha man̈aton̈o anao an̈abon’ny rano arỳ zaho.”
29 Ho Jesosy tamy Petera: “Mavia edy basy!” Ke Petera nijotso baka tamy sambo io tao, aviô izy nandeha tan̈abon’ny rano nan̈aton̈o Jesosy.
30 Nanjary navozo Petera izikoa fa hitany fa naresaka mare tsiko. Nanomboko nideky tan̈atin’ny rano izy, ke izy nandronton̈o karaha ty: “Vonjia zaho, Tômpo ô!”
31 Direkty namparin’i Jesosy tan̈anany, baka iô nisambôriny izy. Ho izy tamy Petera: “Anao ty mba hely finoan̈a ay! Ino ma raha nampisalasala anao?”
32 Irô koa fa tafanonga tan̈atin’ny sambo io tao, tsiko nare be in̈y nangin̈y jay.
33 Irô jiaby tan̈atin’ny sambo io tao nankôhoko nan̈oloan̈a izy sady nivolan̈a karaha ty: “Anao Zanakan’ny Zan̈ahary ankitin̈y.”
34 Farany, irô tafitsaka ke irô navy ta Genesareta.
35 Izikoa fa hain’olo tamy faritry io fa Jesosy navy, irô nandefa hafatra tamin’olo tamy faritry jiaby man̈odidin̈y. Ke nindesin’olo taminany tiô aby lan̈iany olo narary.
36 Irô niangavy izy baka izy han̈ambela irô hikasiky ndray kirômborômbon’ny lambanany* fo. Ke janga aby lan̈iany olo nikasiky izio.
Lamariky amy Pazy Ambany
^ Na: “aniverseran’ny andra nitirahan’i.”
^ Na: “nandry nandriran̈a nihina”; fomban’olo tamin’ny andran’ny Baiboly koa fa nihina, irô nandry nandriran̈a nikodidin̈y latabatra.
^ Abt: “lôso stadio maromaro.” 1 stadio = 185 m.
^ Abt: “tamy fotoan̈a fiambesan̈a fahefatra.” Izio fotoan̈a an̈elan̈elan̈a 3h maraindrain̈y firaka masoandra mipiriaka, kadiriny 6h maraindrain̈y tiô.
^ Na: “Fahitan̈a!”
^ Na: “lambanany ambelan̈a.”
