Faomba Fampianaran’i Jesosy
Tantara 95
Faomba Fampianaran’i Jesosy
ANDRA araiky, Jesosy nivolan̈a tamy lelahy zay fa izy tôkony tia namany. Lelahy io nan̈ontany Jesosy: ‘Azôvy ma namako?’ Jesosy nahay raha tan̈aty jerinany tao. Lelahy io nieritreritry fa olo karazan̈a araiky na fivavahan̈a araiky aminany fo namany. Kanefa, nisy raha hafa nivolan̈in’i Jesosy taminany. Alô zahavatsika zen̈y.
Ndraikindraiky, Jesosy koa fa mampianatra mitantara raha. Zen̈y edy raha ataony iziô io. Izy nitantara Jiosy araiky ndreky Samaritana araiky. Atsika fa nianatra fa ankamaraozan’ny Jiosy tsy tia Samaritana, tsy zen̈y? Ty amy zay raha nitantarain’i Jesosy:
Andra araiky, nisy Jiosy araiky nan̈araka lalan̈a nijotso amy bongo mandeha a Jerikô. Izy koa fa nandeha, niravain’olo. Nalain-drô volanany jiaby, baka iô izy nivangoen-drô zisk’izy toran̈a.
Koa fa refindrefiny, nandalo tamy lalan̈a io mpisôron̈o jiosy araiky. Hitany tsarabe lelahy maratra in̈y. Hainao ino raha nataony? Izy nitsaka lalan̈a, dianany fo nitohizany. Nisy lelahy mpivavaka be zay koa nandalo, Levita izio. Nijanon̈o edy izy? Izy tsy nijanon̈o, lalan̈anany fo koa nitohizany. Hitanao amy sary io mpisôron̈o ndreky Levita in̈y nandeha.
Zahava amy zay lelahy araiky miaraka amy lelahy maratra io. Samaritana izio. Izy namonjy Jiosy io. Nasiany aody bainany. Koa fa vita zen̈y, Jiosy io nindesiny tamy tran̈o mety nandriany, beky janga.
Jesosy koa fa boaka nitantara zen̈y, nan̈ontany lelahy io: ‘Azôvy amin-drô telo io naman’ny lelahy naratra in̈y? Mpisôron̈o in̈y, sa araiky Levita in̈y sa Samaritana in̈y?’
Lelahy io namaly: ‘Samaritana in̈y, fôtony izy tsara fan̈ahy tamy lelahy naratra io.’
Jesosy nivolan̈a: ‘Marin̈y ninao. Mindao amy zay, man̈anaova karaha zen̈y koa amin’olo hafa.’
Tianao faomba fampianaran’i Jesosy? Atsika hahay raha maro sady misy valerany, izikoa mamaky raha jiaby nivolan̈in’i Jesosy amy Baiboly ao.
