Tantara 39

Nanirian’ny Folera Tongozon’Arona

ZAHAVA folera misy voany maniry amy tongozo io. Tongozon’Arona izio. Alin̈y araiky fo tongozon’Arona fa nanirian’ny folera nisy voany! Alô zahavatsika nahavy zen̈y.

Mbala tamy tany paiky tan̈y Israelita aby io. Sasany tamin-drô nieritreritry fa tsy tôkony Mosesy mitariky irô, aviô koa Arona tsy tôkony mpisôron̈obe. Kora an̈isan’olo aby zen̈y, baka iô Datana ndreky Abirama, baka iô koa sojabe 250 amin-drô Israelita aby io. Irô jiaby navy tamy Mosesy, nivolan̈a: ‘Nan̈ino ma anao man̈ano anao an̈abon̈abotsika jiaby?’

Mosesy nivolan̈a tamy Kora ndreky mpan̈araka izy jiaby: ‘Amaray marandrain̈y, mangalà raha fasian̈a môtro, asiava emboko. Mavia amy tabernakelin’i Jehovah amy zay. An̈y atsika mahita zay hifidin’i Jehovah.’

Amarain’izin̈y, Kora ndreky olo 250 niaraka taminany, navy tamy tabernakely tan̈y. Maro koa olo hafa navy, nanaohan̈a lelahy aby io. Neloko mare Jehovah. Mosesy nivolan̈a: ‘Mialà marikitry tran̈olain’olo ratsy fan̈ahy aby io. Aza mitanatana rahan-drô foeky.’ Olo amy zay niala lavitry tran̈olain-dry Kora ndreky Datana ndreky Abirama.

Koa fa vita zen̈y, Mosesy nivolan̈a: ‘Ty hahaizanarô olo nifidin’i Jehovah. Tany hisaokatra, hanelin̈y lelahy ratsy fan̈ahy aby io.’

Niaraka volan̈a Mosesy tapitry, nisaokatra tany. Tototro tany tao tran̈olain’i Kora ndreky rahanany jiaby, ndreky Datana ndreky Abirama, ndreky olo jiaby niaraka tamin-drô. Izikoa fa ren̈in’olo afatrafatran’olo aby tototro tany in̈y, irô nivolan̈a: ‘Milifasa tsao atsika tototro tany koa!’

Kora ndreky olo 250 nan̈araka izy tamy zen̈y mbala narikitry tabernakely tiô. Ke Jehovah nandefa môtro nan̈ôro irô jiaby. Baka iô Jehovah nan̈iraka Eleazara zanak’Arona, hangala fasian̈a môtron’olo jiaby naty in̈y. Izin̈y amy zay niravan̈iny, natao matify, andrakaofan̈a talatala. Dikany an̈anaovan̈a zen̈y, ampitandreman̈a Israelita aby io fa tsisy olo hafa eky mpisôron̈on’i Jehovah koa tsy Arona ndreky ry zanany fo.

Kanefa tian’i Jehovah hain’olo tsarabe fa, Arona ndreky ry zanany fo nifidiny mpisôron̈o. Ke volan̈iny tamy Mosesy: ‘Iraha mitaondra tongozo sojabe jiaby amy fokon’Israely. Boaka amy taranaka Levy fo, Arona mitaondra tongozo. Baka iô tongozo jiaby apitraha fananjò fiaran’ny fanekena an̈atin’ny tabernakely ao. Hanirian’ny folera tongozon’olo nifidiko mpisôron̈o.’

Amarain’izin̈y, Mosesy koa fa nizaha, tongozon’Arona nanirian’ny folera nisy voany! Hainao amy zay iziô nahavy Jehovah nampaniry folera tamy tongozon’Arona in̈y?

Nomery 16–17:4; 26:10.