Tantara 51

Rota Ndreky Naomy

IZIKOA anao mamadibadiky Baiboly, hitanao ao bokin’i Rota zen̈y. Izio tantaran’olo ampihavan̈a tamin’andra nisian’ny mpitsara tan’Israely. Rota io tsaiky man̈angin’i Moaba. Izio tsy Israelita. Fa izikoa izy fa nahay raha mikasiky Jehovah, izy nanjary ten̈a tia Jehovah. Naomy an̈aran̈a matoevavy nampianatra Rota raha mikasiky Jehovah.

Naomy io man̈angy israelita. Izy ndreky vadiny ndreky zanany aroe lahy nifindra ta Moaba tan̈y, tamy lera tsy nisian’ny hanin̈y tan’Israely. Tandraraiky amy zay, naty vadin’i Naomy. Baka iô, zanaka Naomy aroe lahy samy nanambady man̈angy moabita. Rota ndreky Orpa an̈aran̈a vadin-drô. Folo taon̈o tafaran’izen̈y, zanaka Naomy aroe lahy in̈y naty. Nalahelo Naomy ndreky man̈angy aroe io tamy zen̈y! Ino amy zay raha nataon’i Naomy?

Andra araiky, Naomy tapa-kevitry himpody amy tany misy havany. Rota ndreky Orpa tsy nety niala izy, ke irô nan̈araka izy koa. Irô koa fa nandeha refindrefiny, Naomy nitodiky, nivolan̈a tamin-drô: ‘Anarô mimpodiana. Sitrany anarô mipetraka miaraka amy mamanarô fo.’

Naomy baka tiô niôroko irô, nan̈ano viloma. Tomoan̈y irô tamy zen̈y, fôtony tian-drô loatra Naomy. Irô nivolan̈a: ‘Aha! Zahay han̈araka anao amy tany misy anao an̈y.’ Naomy nivolan̈a: ‘Mimpodiana anarô, zanako aby e. Sitrany anarô amy tran̈onarô an̈y.’ Ke Orpa nody, fa Rota tsy nety nody.

Naomy baka tiô nivolan̈a taminany: ‘Orpa kony efa lôso e. Indao anao mody miaraka aminany.’ Kanefa Rota nivolan̈a: ‘Zaho kaza sarahan̈a aminao ô! Ambilà zaho miaraka aminao fo. Zay tany imboanao, imboako, zay tany ipitrahanao ipitrahako. Zay havanao an̈y, havako koa, Zan̈ahary ivavahanao koa Zan̈aharinakahy. Zay tany ilivain̈anao, an̈y koa zaho milevin̈y.’ Rota koa fa nivolan̈a zen̈y, Naomy tsy nan̈iraka izy nody eky.

Farany amy zay, irô navy tan’Israely. Tan̈y irô nipetraka. Lera fiasan̈a vary tamy zen̈y, ke Rota niasa vary. Nisy lelahy araiky nanan̈a tanimbary, Boaza an̈arany. Nambelany Rota hangala lambin’ny vary tamy tanimbarinany. Hainao azôvy maman’i Boaza? Rahaba, araiky tamy tanànan’i Jerikô tan̈y in̈y.

Andra araiky, Boaza nivolan̈a tamy Rota: ‘Zaho naharen̈y raha jiaby mikasiky anao. Anao ten̈a tsara fan̈ahy tamy Naomy. Haiko anao niala babanao ndreky mamanao, ndreky tany navianao, hipetraka niaraka amin’olo tsiary hainao. Irarian̈a Jehovah hamaly ny tsara nataonao!’

Rota nan̈aja nivolan̈a taminany: ‘Anao koa mba tsara fan̈ahy taminakahy. Ndray zaho nanjary nahivan̈a aby naharen̈y volan̈a tsara jiaby nataonao taminakahy.’ Boaza ten̈a tia Rota, ke tsy ela irô nanjary fivadiany. Haravoan̈a ma nin’i Naomy tamy zen̈y! Naomy nahairavoravo fo, Rota ndreky Boaza koa fa nahazo zanaka lelahy. Obeda an̈arany. Obeda amy zay nanjary dadilahin’i Davida. Atsika mbala hianatra raha maro mikasiky Davida io.

Bokin’i Rota an̈aty Baiboly.