An̈aran̈a Zan̈ahary io mipody kadiriny im-7 000 amy Soratra Hebreo. Renisoratra efatra ty יהוה nanoratan̈a izio tamy volan̈a hebreo. “Jehovah” andikan̈a Litera Efatra io amy Soratra Masina—Fandikan-tenin’ny Tontolo Vaovao. Io an̈aran̈a ten̈a matetiky mipody amy Baiboly ao. Maro an̈aran̈a fan̈ajan̈a Zan̈ahary nampiasaindro panoratra Baiboly aby io, karaha ataony “Farany Mahery”, “Farany An̈abo”, baka io “Tompo.” Kanefa, Litera Efatra io fo ten̈a nampiasaindro izikoa fa nanon̈ono an̈aran̈a Zan̈ahary.

Jehovah nan̈iraka iro panoratra Baiboly aby io hampiasa an̈aranany. Izy nan̈iraka Joela paminan̈y nanoratra karaha ty: “Zay olo mikaiky an̈arany Jehovah fo ho voavonjy.” (Joela 2:32) Karaha ty koa raha nirahiny nisoratin̈y amy Salamo 83:18: “Baka olo jiaby mahay fa anao zaraiky fo, manan̈a an̈aran̈a Jehovah, Farany An̈abo amy tany jiaby.” Izikoa bokiny Salamo zahavan̈a, an̈aran̈a Zan̈ahary io mipody im-700. Kanefa, Salamo io nirahin̈y natao hira ndreky nampodipody taminy olony Zan̈ahary. Ino fo mahavy Baiboly maro tsy mampiasa an̈aran̈a Zan̈ahary? Nan̈ino Fandikan-tenin’ny Tontolo Vaovao mampiasa an̈aran̈a “Jehovah” io? Ino ma dikany an̈aran̈a io?

Nan̈ino ma Baiboly maro tsy mampiasa an̈aran̈a Zan̈ahary? Fotony misy olo mierireritry fa Zan̈ahary Farany Mahery zen̈y tsy mila an̈aran̈a manokan̈a ikahian̈a izy. Misy ndraiky olo nan̈araka lovantsofin̈y jiosy mivolan̈a fa an̈aran̈a io tsy tokony ton̈onin̈y foeky, tsao zen̈y misy olo tsy man̈isy fotiny izio. Olo sasany ndraiky mieritreritry fa tsy hay tsarabe ten̈a fanon̈onan̈a an̈aran̈a io, ke zen̈y mahavy iro nan̈ano “Tompo” na “Zan̈ahary” fo. Tsy rariny zen̈y, izikoa antony aby ty zahavan̈a:

•   An̈aran̈a Zan̈ahary io hita aminy horonamboky misy Volan̈anany. An̈isanizen̈y iro horonamboky voasoratra efa ela, talohany naviany Kristy. Zen̈y raha tokony hiritriretinolo mivolan̈a fa Zan̈ahary Farany Mahery io tsy mila an̈aran̈a manokan̈a. Fan̈ampinizen̈y koa, an̈aran̈a io nirahiny nampody im-7000 amy Volan̈anany ao. Hita baka amy zen̈y fa tiany Zan̈ahary ho haintsika ndreky hampiasaintsika an̈aran̈a io.

• Ndray iro panoratra lalàn̈a jiosy aby io tsy nety nanon̈ono an̈aran̈a io, iro tsy nan̈adoso an̈aran̈a Zan̈ahary io tamy Baibolindro. Zen̈y raha tsy tokony hadin̈anolo mivolan̈a fa tsy mety ton̈onin̈y an̈aran̈a Zan̈ahary io. Nisy horonamboky hita ta Qoumrân, marikitry Ranomasina Maty, nahitan̈a an̈aran̈a Zan̈ahary io. Matoa an̈aran̈a Zan̈ahary io nisoloandro pandika teny sasany aby io tamy “TOMPO” amy soratra maventy, zen̈y man̈ambara fa hitandro tamy soratan̈ana tamy voanalohany tan̈y an̈aran̈a io. Ke ino fo nahavy iro pandika teny aby io nasaky nan̈adoso na nan̈ova an̈aran̈a Zan̈ahary io tamy Baiboly, kanefa haindro tsarabe fa mipody andrivony an̈aran̈a io amy Baiboly ao? Azovy nan̈amia lalan̈a iro han̈ano zen̈y? Iro tompiny fo mahavaly zen̈y.

• Ty raha tokony hiritriretinolo mivolan̈a fa tsy tokony hampiasain̈y an̈aran̈a Zan̈ahary io, fotony tsy hay tsarabe fanon̈onan̈a izy: Tsy mitovy fanon̈onandro apostoly aby io an̈arany Jesosy ndreky fanon̈onantsika izio aminandra izioty. Izikoa zen̈y dinihin̈y, iro tsy tokony hampiasa an̈arany Jesosy. Karaha ataony Kristianin̈y jiosy, mety Yeshoà nikahiandro an̈arany Jesosy io, baka io amindro “Kristy” zen̈y Mashiah na “Mesia.” Iro Kristianin̈y nampiasa volan̈a griky nivolan̈a Iesos Kristôs. Amindro nivolan̈a latininy ndraiky, Ieʹsus Chriʹstus. Ndray izy man̈ano zen̈y, nirahiny Zan̈ahary nisoratan̈a tamy Soratra Griky tao fo an̈arany Jesosy. Nampiasa an̈aran̈a io koa iro Kristianin̈y tamy voanalohany tan̈y, ke fanon̈onandro griky aby io an̈aran̈a io fo nikahiandro izy, fa iro tsy nampiasa an̈arany Jesosy tamy volan̈a hebreo. Zen̈y koa mahavy Komitiny Fandikan̈a Baiboliny Fandikan-tenin’ny Tontolo Vaovao hieritreritry fa mety fo mampiasa an̈aran̈a “Jehovah” io, ndray tsy mira fanon̈onandro hebreo aby io izy tamy voanalohany tan̈y fanon̈onantsika izio aminandra izioty.

Nan̈ino ma Fandikan-tenin’ny Tontolo Vaovao mampiasa an̈aran̈a “Jehovah” io? Karaha ty mety andikan̈a renisoratra hebreo efatra (יהוה) io: YHWH na JHVH. Tsisy zanatsoratra izio, fotony taloha tan̈y, volan̈a hebreo koa fa nisoratin̈y tsy nasian̈a zanatsoratra. Fa olo mamaky ndraiky mahay ino zanatsoratra tokony  hampiasain̈y, fotony tamy zen̈y olo jiaby mbala nampiasa volan̈a hebreo efa taloha tan̈y.

Kadiriny arivo taon̈o tafarany nivitany Soratra Hebreo, iro manampahaizan̈a jiosy aby io nan̈isy teboko ndreky tsipiky hely isankarazany tamy renitsoratra aby io, amy zay hainolo zanatsoratra mety miaraka aminany. Tamy zen̈y koa iro Jiosy aby io efa ninonino fo fa an̈aran̈a Zan̈ahary zen̈y tsy mety ton̈onin̈y. Ke nisoloandro an̈aran̈a fan̈ajan̈a “Tompo” an̈aran̈a io. Iro koa fa nanoratra an̈aran̈a Zan̈ahary io, zanatsoratra taminy an̈aran̈a fan̈ajan̈a aby in̈y fo natambatrandro tamy renisoratra efatra io. Ke ndray fa hita soratan̈ana misy teboko ndreky tsipiky hely aby in̈y, mbala tsy hainolo fo fanon̈onan̈a an̈aran̈a Zan̈ahary io tamy volan̈a hebreo efa taloha tan̈y. Fan̈ampinizen̈y, misy olo mivolan̈a fa “Yahveh” fanon̈onan̈a an̈aran̈a io. Misy ndraiky olo mivolan̈a fa tsy zen̈y fa hafa. Ohatra, aminy horonamboky amy volan̈a griky misy bokiny Levitikosy, hita tamy Ranomasina Maty, Iao andikan̈a an̈aran̈a Zan̈ahary io. Maro koa panoratra griky nampiasa Iae na Iabe na Iaoe. Kanefa, tsisy olo mahay akory marin̈y fanon̈onan̈a an̈aran̈a io. Tsy haintsika koa fanon̈onany olony Zan̈ahary taloha tan̈y an̈aran̈a io tamy volan̈a hebreo. (Genesisy 13:4; Eksodosy 3:15) Fa raha azontsika antoko fo, Zan̈ahary tsy maintsy nampiasa an̈aranany, koa fa nikoran̈a taminy olonany. Iro koa nikaiky izy taminy an̈aran̈a io, ndreky nampiasa izio koa fa nikoran̈a taminolo.—Eksodosy 6:2; 1 Mpanjaka 8:23; Salamo 99:9.

Ino nahavy Fandikan-tenin’ny Tontolo Vaovao nifidy “Jehovah” io? Fotony efa “Jehovah” edy mahazatra olo maro rango ela.

William Tyndale koa fa nandika Boky Dimy Voanalohany amy Baiboly ao taminy 1530, “Iehouah” nampiasainy. Henry Ainsworth  koa fa nandika bokiny Salamo taminy 1612, “Iehovah” nampiasainy. Izikoa fa navaozin̈y ndreky natao pirinty fandikanteny io, ndreky iro Boky Dimy Voanalohany in̈y taminy 1639, “Jehovah” amy zay nampiasain̈y. Amy Baiboly Malagasy naboakany Fikambanany Misionerany Londres (LMS) taminy 1835, mipodipody ao “Jehovah” io.

Misy manampahaizan̈a malaza araiky, Joseph Rotherham an̈arany, nandika bokiny Salamo taminy 1911. Amy boky nisoratany Fandinihan̈a Bokiny Salamo (angiley), izy nan̈azava fa “Jehovah” nampiasainy fa tsy “Yahveh”, fotony ‘io ten̈a mahazatra olo mamaky Baiboly ndreky ikenolo jiaby.’ Karaha ty koa nambarany A. Kirkpatrick, manampahaizan̈a momba Baiboly, taminy 1930: “Iro manampahaizan̈a pandalin̈y fitsipipitenenana aby io mivolan̈a fa Yahveh na Yahaveh tokony hampiasain̈y. Kanefa, JEHOVAH io ten̈a mahazatra olo letrizay. Tsy fanon̈onan̈a an̈aran̈a io raha ten̈a maventy, fa fahaizanolo fa An̈aran̈a Zan̈ahary Manokan̈a izio, fa tsy an̈aran̈a fan̈ajan̈a izy karaha ataony ‘Tompo’ in̈y.”

Ino ma dikany an̈aran̈a Jehovah io? An̈aran̈a Zan̈ahary Jehovah io baka amy matoanteny hebreo, dikany “mahavy.” Izikoa fa nandiniky iro amy Komitiny Fandikan̈a Baiboliny Fandikan-tenin’ny Tontolo Vaovao, karaha ty dikany an̈aran̈a io: “Izy Man̈ano Raha Hahavy.” Iro manampahaizan̈a aby io samy aminy hevitrindro, ke tsisy olo afaka mivolan̈a ino marin̈y ny ten̈a mety andikan̈a izio. Ndray izy man̈ano zen̈y, mety amy Jehovah an̈aranany io, fotony izy Pamoron̈o ndreky Pan̈atanteraka fikasan̈anany. Izikoa tsy izy, raha jiaby io tsisy, an̈atinizen̈y anjely ndreky olombelon̈o. Zay raha kasainy tsy maintsy vitany fo.

An̈isany dikany an̈aran̈a Jehovah io koa araiky koran̈iny Eksodosy 3:14 ty: “Haboakako tsarabe fa Zaho Araiky Mahavita Zay Raha Tiako Hatao in̈y” na koa “Zaho Han̈ano Raha Hahavy Zay Raha Tiako Hatao ho Tanteraka.” Tsy ten̈a mahafeno dikany an̈aran̈a Zan̈ahary zen̈y. Izy mahavita miovaova arakaraka raha tiany hatao, arakaraka raha mandalo, baka fikasan̈any tanteraka fo. Kanefa, mbala araiky amy toetry mampiavaka Jehovah fo zen̈y. Tsy izy fo mahavita miovaova karaha zen̈y, fa vitany koa mampiasa ndreky man̈ovaova raha niasainy, amy zay raha ilàny izy, baka fikasan̈anany tanteraka.