NY marin̈y momba ino ma zen̈y ? Ny marin̈y momba fan̈ontanian̈a maventy amy fiain̈ana. Anao koa mety efa navy nan̈ontany karaha ty:

• Zan̈ahary ma mijery atsika?

• Jaly ndreky ady io ma mbala ho afaka?

• Olo maty ma mbala misy raha vitany?

• Olo maty ma mbala ho velon̈o?

• Karakory vavaka tandrin̈esany Zan̈ahary?

• Ino ma raha ten̈a mampasambatra?

Aia ahitantsika valiny fan̈ontanian̈a aby io? Anao mety hahita boky maro mikoran̈a momba izio, kanefa iro io samy amy raha volan̈iny. Sasany mety lany daty na matetiky avaozin̈y na soloan̈a hafa foeky.

Misy boky araiky ten̈a mahavaly fan̈ontanian̈a aby io. Izio zaraiky fo boky ahitan̈a ny marin̈y. Misy vavaka nataony Jesosy zay mivolan̈a karaha ty: “Volan̈anao zaraiky fo marin̈y.” (Jaona 17:17) Aminandra izioty, ‘Volan̈a’ io Baiboly Masin̈y. Ho hitanao ato valiny baka amy Baiboly momba fan̈ontanian̈a tsiota an̈abo io. Mazava ndreky marin̈y raha koran̈iny Baiboly momba iro io.

NAN̈INO OLO MAN̈OTANY ZEN̈Y: Tany ty feno olo kafiry ndreky tsy man̈ano ny marin̈y. Maro fivavahan̈a mampianatra fa jaly io lahatra Zan̈ahary.

INO RAHA AMPIANARINY BAIBOLY: Tsy baka amy Zan̈ahary raha ratsy jiaby. Koran̈iny Baiboly amy Joba 34:10 ao: “San̈atria araiky ten̈a Zan̈ahary io han̈ano ny ratsy. San̈atria izy Farany Mahery io han̈ano raha tsy marin̈y!” Raha tsara fo tiany Zan̈ahary hatao amy tany ty. Zen̈y nahavy Jesosy nan̈iraka atsika hivavaka karaha ty: “Anao Babanay andan̈itry an̈y, .⁠.⁠. irarian̈a ho avy Fanjakan̈anao. Irarian̈a hatao ambony tany eto koa sitraponao, karaha andan̈itry an̈y.” (Matio 6:​9, 10) Zan̈ahary ten̈a tia atsika, ke izy han̈ano raha han̈atantirahan̈a sitraponany io.​—Jaona 3:​16.

Zahava koa Genesisy 1:​26-​28; Jakoba 1:13 ndreky 1 Petera 5:​6, 7.

NAN̈INO OLO MAN̈OTANY ZEN̈Y: Mbala maro izioty olo matiny ady. Atsika jiaby io koa samy amy raha mampijaly atsika.

INO RAHA AMPIANARINY BAIBOLY: Zan̈ahary efa nan̈ambara amy Baiboly ao fa izy hampisy fiadan̈ana ambony tany eto. Fanjakan̈anany andan̈itry an̈y koa fa mitondra, olo “tsy hianatra ady eky.” Olo amy zen̈y “hanefy sabatrandro hatao angadinaomby.” (Isaia 2:⁠4) Zan̈ahary han̈adoso jaly jiaby ndreky raha tsy marin̈y jiaby. Karaha ty volan̈iny Baiboly momba zen̈y: “[Zan̈ahary] hamafa ranomaso jiaby amy masondro, fahafatesan̈a tsy ho hisy eky, alahelo tsy ho hisy, tarain̈y tsy ho hisy, tehotehoko tsy ho hisy, fotony zen̈y [an̈atinizen̈y jaly ndreky raha tsy marin̈y jiaby] efa kabaro taloha.”—Apokalypsy 21:​3, 4.

Zahava koa Salamo 37:​10, 11; 46:⁠9 ndreky Mika 4:​1-4.

NAN̈INO OLO MAN̈OTANY ZEN̈Y: Ankamarozany fivavahan̈a mampianatra fa olo koa fa maty, vatan̈a fo maty fa fan̈ahy tsy maty. Sasany mino fa olo maty mbala mahavita mampijaly olo velon̈o, baka io koa Zan̈ahary zen̈y mampijaly olo ratsy fan̈ahy amy motrobe.

INO RAHA AMPIANARINY BAIBOLY: Olo koa fa maty, tsisy raha vitany eky. Koran̈iny Baiboly amy Mpitoriteny 9:⁠5 ao fa ‘olo maty tsisy raha hainy eky.’ Dikanizen̈y, olo maty tsy mahavita mitahy olo ndreky tsy mahavita mampijaly olo.​—Salamo 146:​3, 4.

Zahava koa Genesisy 3:​19 ndreky Mpitoriteny 9:​6, 10.

NAN̈INO OLO MAN̈OTANY ZEN̈Y: Tiantsika ho velon̈o fo atsika, hiaraka aminy havantsika ndreky namantsika jiaby. Ngoma mare atsika, ke mbala tihahita iro havantsika efa naty aby in̈y fo.

INO RAHA AMPIANARINY BAIBOLY: Maro olo maty hivilomin̈y. Jesosy nivolan̈a fa ‘iro jiaby ampasan̈a an̈y hiboaka.’ (Jaona 5:​28, 29) Mifan̈araka amy fikasan̈any Zan̈ahary tamy voanalohany tan̈y raha zen̈y, fotony olo jiaby hivilomin̈y amy zen̈y hiain̈y amy paradisa ambony tany eto. (Lioka 23:43) Lan̈iany olo man̈araka volan̈a Zan̈ahary, ho salama vatan̈a ndreky hiain̈y tsisy farany. Karaha ty volan̈iny Baiboly: “Olo marin̈y handova tany ty, ke hipetraka io tsisy farany.”—Salamo 37:⁠29.

Zahava koa Joba 14:14, 15; Lioka 7:11-17 ndreky Asan’ny Apostoly 24:15.

NAN̈INO OLO MAN̈OTANY ZEN̈Y: Maro olo tia mivavaka. Mbala maro koa olo mivolan̈a fa karaha tsy mivaly vavakandro.

INO RAHA AMPIANARINY BAIBOLY: Tamy Jesosy nampianatra olo hivavaka, izy nivolan̈a fa tsy mety man̈ano vavaka tsianjery. Volan̈iny: ‘Anaro koa mivavaka, aza man̈ampodipody volan̈a mitovy fo.’ (Matio 6:7) Atsika tsy maintsy man̈araka raha volan̈iny Zan̈ahary momba vavaka ikeny, baka tandrin̈esany vavakantsika. Atsika mila mianatra sitraponany, baka io man̈ano vavaka mifan̈araka amy zen̈y. Karaha ty koran̈iny 1 Jaona 5:​14: “Zay raha angatahintsika aminany, izikoa mifan̈araka amy [sitrapony Zan̈ahary], izy mitandren̈y atsika.”

Zahava koa Salamo 65:2; Jaona 14:6, 14 ndreky 1 Jaona 3:22.

NAN̈INO OLO MAN̈OTANY ZEN̈Y: Maro olo mivolan̈a fa olo misy vola, olo malaza, na olo tsara sora ten̈a sambatra. Zen̈y mahavy olo maro mifen̈y mitady raha aby io, kanefa iro tsy sambatra aby.

INO RAHA AMPIANARINY BAIBOLY: Jesosy nivolan̈a: “Sambatra lan̈iany mahatsiaro fa mila Zan̈ahary.” (Matio 5:⁠3) Dikanizen̈y, atsika mila mahatsiaro fa mila mianatra ny marin̈y momba Zan̈ahary ndreky fikasan̈anany. Amy Baiboly ao misy ny marin̈y io. Izikoa atsika mahay izio, atsika hahay han̈avaka raha ten̈a maventy ndreky raha tsy dia ilain̈y. Hahay ho sambatra fo atsika izikoa man̈araka ny marin̈y koran̈iny Baiboly, koa fa manapakevitry ndreky amy raha jiaby ataontsika.​—Lioka 11:⁠28.

Zahava koa Ohabolana 3:5, 6, 13-18 ndreky 1 Timoty 6:​9, 10.

 Sasany amy raha koran̈iny Baiboly fo namaliantsika fan̈ontanian̈a tsiota aby in̈y. Asa tianao hahazo fan̈ampiny fan̈azavan̈a momba fan̈ontanian̈a aby io? Zahay matoky fa anao mba an̈isanolo “mahatsiaro fa mila Zan̈ahary.” Anao mety efa nan̈ontany karaha ty: ‘Izikoa Zan̈ahary mijery atsika, nan̈ino tsy adosony jaly ndreky raha ratsy jiaby? Karakory hataoko hankatsara fiain̈ana an̈aty tokantran̈onaka?’ Amy Baiboly ao misy valiny mahafapo momba fan̈ontanian̈a zen̈y ndreky fan̈ontanian̈a maro koa.

Ankamarozanolo aminandra izioty misalasala hianatra izio. Iro mahita izio maventy, ke mieritreritry fa izio sarotro dinihin̈y. Asa mba tianao hahay valiny fan̈ontanian̈a aby tio in̈y baka amy Baiboly? Vavolombelon̈o Jehovah von̈ono han̈ampy anao.

Iro mety man̈amia anao boky Ino ma Raha Ten̈a Ampianariny Baiboly? Izio natao ninolo tsy dia misy fotoan̈a. Dinihin̈y ao valiny mazava amy fan̈ontanian̈a maro maventy. Vavolombelon̈o Jehovah koa mampianatra Baiboly. Tsy man̈efa mianatra izio. Misy Vavolombelon̈o Jehovah tsy lavitry anao mety avy antran̈onao na amy zay tany tianao hianaran̈a, amy fotoan̈a mety aminao isaka herin̈iandra. Efa misy antapitrisany olo erantany nahazo hatsaran̈a baka tamy fianaran̈a io. Maro amindro nivolan̈a karaha ty: “Haiko eky ny marin̈y e!”

Maro hatsaran̈a ho azonao, izikoa anao mianatra Baiboly. Anao ho afaka amy finoan̈a raha tsisy, tsy hikorontantsain̈y, tsy havozovozondraha. Anao han̈anten̈a raha tsara aminy amaray an̈y, hanan̈a tanjon̈o tsara amy fiain̈ana, ndreky ho ravoravo. Jesosy nivolan̈a: “Anaro hahay ny marin̈y, ke ny marin̈y io hankafaka anaro.”—Jaona 8:32.