ASA MBA misy olo edy hahavita tsy hivadiky amy Zan̈ahary izikoa izy tsapain̈a farany mare? Misy olo ma hahavita tsy hivadiky izikoa tsisy raha azony amy Zan̈ahary? Zen̈y fan̈ontanian̈a maventy sady navoavaly tamy faha Joba.

Taminiro iro Israelita aby io ta Ezipty, Joba io havany Abrahama nipetraka ta Arabia izioty io. Tamy zen̈y iro anjely aby io nivory man̈oloan̈a Jehovah, ke Satana koa mba tao. Jehovah taminio nivolan̈a fa izy natoky Joba panomponany tsy nivadiky taminany. Nivolan̈a koa Jehovah fa Joba zaraiky fo olo tsy nivadiky tamy zen̈y. Tsy zen̈y ndraiky ho Satana fa, baka amy Jehovah nitahy Joba ndreky niaro izy zen̈y nahavy Joba nanompo Jehovah. Ke Satana nivolan̈a fa izikoa adoso amy Joba raha jiaby anan̈any io, Joba han̈ozon̈o Jehovah zen̈y edy.

Nambelany Zan̈ahary antsendriky Satana nitsapa Joba ke nandravan̈a fanan̈ananany jiaby, namono zanaka Joba jiaby, avio namparary Joba. Tamy zen̈y Joba tsy nahay fa baka tamy Satana nahavy raha jiaby zen̈y. Tsy nazava taminany koa nan̈ino izy nambelany Jehovah navoa raha jiaby zen̈y. Fa Joba tsiary nan̈ozon̈o Zan̈ahary.

Nisy olo niaboko kamaradiny Joba koa navy namangy izy. Amy bokiny Joba amy Baiboly ao ahitan̈a raha nivolan̈indro io. Iro taminio nan̈ano raha han̈ikiany Joba fa nanitriky fahotan̈a nataony zen̈y Joba ke nisaziny Zan̈ahary. Tsy nikeny Joba foeky hevitry disondro olo aby io. Natoky tsarabe Joba nivolan̈a fa izy tsy hivadiky amy Jehovah foeky ziska izy maty!

Fa ndray zen̈y, nisy fotoan̈a Joba nankamarinten̈a. Ke nisy lelahy tanora araiky, Eliho an̈arany, naharen̈y koran̈a jiaby in̈y. Nivolan̈a Eliho. Nataony nazava tamy Joba fa diso Joba, fotony ain̈inany fo hainy fa izy tsy nankasitraka zony Jehovah hitondra. Zen̈y raha farany maventy fa tsy fazahoany Joba voninahitry. Nivolan̈iny Eliho koa iro olo niaboko kamaradiny Joba in̈y.

Jehovah koa nan̈anatra Joba, taminy hevitry disonany io. Nikoran̈a momba raha maro mahagaga niasainy izy, baka mazava tamy Joba fa tsisy dikany olo izikoa ampiran̈iny aminy habezan̈a Jehovah. Nanetry ten̈a Joba, ke nan̈eky nanariny Jehovah. “Be fitiavan̈a sady mamindra fô” Jehovah, ke nataony nahivan̈a aretin̈iny Joba in̈y, avio namiany fanan̈ana indroeny nanan̈any taloha izy, avio nitahy izy koa Jehovah, ke nan̈amia izy zanaka folo ndraiky koa. (Jakoba 5:11) Hita baka tamy fitsapan̈a farany mare nahazo Joba in̈y fa vandy volan̈any Satana tsisy olo tsy hivadiky amy Zan̈ahary izikoa iro tojy fitsapan̈a in̈y.

​—Baka amy bokiny Joba.