TOKO 8

Akory Hazahoako Kamarady Tsara?

“Zaho koa fa meloko, tiako izikoa mba misy olo mahatsapa raha mavoa zaho. Zaho koa fa malahelo, tiako izikoa mba misy olo mankahery zaho. Zaho koa fa ravoravo, tiako izikoa mba misy olo miaraka ravoravo aminaka.”​—Brittany.

MISY olo mivolan̈a fa olo miaraka misaoma aminany raha ilainy tsaiky, fa kamarady ndreky raha ilainy tanora. Ino ma raha tsy mampitovy zen̈y?

Olo miaraka misaoma aminao io raha zisty olo miaraka aminao fo.

Fa kamarady zen̈y ndraiky olo mihevitry fa raha maventy aminao mba maventy aminazy koa.

Mivolan̈a koa Baiboly fa “ten̈a naman̈a zen̈y mira rahalahy von̈ono han̈ampy amy fotoan̈a jiaby, intsaka eky amy fotoan̈a isiany raha mampiory.” (Ohabolana 17:17) Hita baka amy zen̈y fa dikany kamarady zen̈y tsy raha olo miaraka misaoma fo!

Raha misy: Aminy anao efa mahaibe ziô io, anao mila kamarady:

1. Tsara toetry

2. Man̈araka fitsipikiny Baiboly

3. Mampisy jery anao

Fan̈ontanian̈a: Akory hanan̈anao kamarady mahafeno iro fepetra aby avoakoran̈a io? Alo hidinihintsika tsiaraikiaraiky iro io.

Voanalohany: Toetry Tsara

Raha tsara hainao: Tsy zay olo jiaby mivolan̈a fa kamaradinao, ten̈a kamarady aby. Baiboly mivolan̈a fa “misy kamarady von̈ono hifamotiky.” (Ohabolana 18:24) Anao mety hivolan̈a karaha ty: Mba marin̈y edy zen̈y va? Ke aleva onon̈o ty: Asa efa navy nisy olo nikamarady taminao kanefa izy tihan̈araraotro anao fo, na nitsiko anao, na nan̈odihody raha tsy nataonao? Raha aby zen̈y mety hahavy anao tsy hatoky kamaradinao aby io eky. a Aleva onon̈o fo koa fa sitrany manan̈a kamarady vitsivitsy tsara toetry, tozay kamarady maro kanefa ratsy jery.

Ty raha mety hataonao: Mifidiana kamarady manan̈a toetry tsara azonao alain̈a tahaka.

“Misy kamaradinaka zay, Fiona an̈aranany. Olo jiaby mivolan̈a fa izy zen̈y olo tsara toetry. Tiako izikoa mba karaha zen̈y koa fahitanolo zaho. Tiako koa zaho mba manan̈a laza karaha ninazy. Aminaka izy ten̈a man̈eva derain̈y.”​—Yvette, 17 taon̈o.

Ataova baka raha aby ty:

1. Vakia Galatianina 5:22, 23.

2. Man̈ontania ten̈a: ‘Mba hita amy kamaradiko ma iro toetry aby an̈isany “vokatrany fan̈ahy” io?’

3. Ataova listy an̈arandro olo ten̈a kamaradinao, avio sorata ankilanany iô koa toetry mampiavaka iro.

An̈aran̈a

․․․․․

Toetry

․․․․․

Sosokevitry: Izikoa toetry ratsy fo hitanao amindro, mitadiava kamarady hafa.

Faharoe: Man̈araka Torolalan̈any Baiboly

Raha tsara hainao: Tandrema tsao mekimeky tihahazo kamarady, tsao ndraiky tojy kamarady tsy pare. Karaha ty volan̈iny Baiboly: “Hidirany antambo ndraiky lan̈iany olo minaman̈a aminolo tsisy sain̈y.” (Ohabolana 13:20) Olo “tsisy sain̈y” io, tsy olo lefaka na olo tsy mahay raha, fa izio olo tsy man̈araka torohevitry ndreky tia man̈ano raha tsy manjary. Olo karaha zen̈y tsy tokony hataonao kamarady foeky.

Ty raha mety hataonao: Aza mikamarady aminolo jiaby fanojy anao fa mahaiza mifidy. (Salamo 26:4) Kanefa zen̈y tsy mivolan̈a fa anao tokony han̈avakavaka! Dikany mahay mifidy zen̈y, ‘ho hainao man̈avaka ny marin̈y ndreky tsy marin̈y, baka io olo manompo Zan̈ahary ndreky tsy manompo izy.’​—Malakia 3:18.

“Zaho ten̈a man̈ano mersy raimandreniko nan̈ampy zaho hahita kamarady mitovy taon̈o aminaka sady miain̈y mifan̈araka amy fitsipikiny Zan̈ahary.”​—Christopher, 13 taon̈o.

Valia fan̈ontanian̈a aby ty:

Lera zaho miaraka amy kamaradiko, zaho ma mavozo tsao fo hitirendro han̈ano raha tsy manjary?

□ Ia

□ Ehe

Tsy sakiko ambara iry raimandreniko ma azovy aby kamaradiko, fotony zaho mavozo tsao tsy himboandro mikamarady amindro?

□ Ia

□ Ehe

Sosokevitry: Izikoa ia valinteninao amy fan̈ontanian̈a aby io, mizahava kamarady mba zokizokinao sady mba mety hatao modely.

Fahatelo: Mampisy jery anao

Raha tsara hainao: Baiboly mivolan̈a fa “naman̈a ratsy mandrobaka fahazaran̈a tsara.” (1 Korintianina 15:33) Misy tanora araiky Lauren an̈aranany. Ho izy: “Nataoko aby zay raha nan̈irahandro tsaiky lekaoly araiky taminaka aby io zaho, amy zen̈y zaho mba tiandro. Zaho baka tsisy kamarady. Ke zaho nanapakevitry han̈ano zay raha tiandro, amy zen̈y zaho tiandro.” Tontohitry Lauren fa mira ataony kamaradinany aby io mira saoma fo izy, ke ampan̈anovindro zay raha tiandro. Aza man̈eky atao zen̈y anao, fotony anao mba manan̈a valeranao.

Ty raha mety hataonao: Aza minaman̈a aminolo mandrisiky anao han̈ano raha tiandro fo. Mety hanjary vitsy ndraiky kamaradinao, fa anao tsy hitseky eky. Salakady anao hahita naman̈a tsara, fotony hisy olo tihikamarady aminao fo, izikoa anao tsara toetry.​—Romanina 12:2.

“Clint kamaradiko ten̈a marikitry zaho. Izy ten̈a nankahery zaho, fotony izy olo tsara fan̈ahy sady matotro koa.”​—Jason, 21 taon̈o.

Man̈ontania ten̈a karaha ty:

Lamba sikiniko ndreky fomba fivolan̈ako ma ivoako baka zaho ho tiany kamaradiko? Zaho ma man̈ano raha ratsy baka hamparavoravo iro fo?

□ Ia

□ Ehe

Kamaradiko aby io ma mitondra zaho amy tany tsy tiako handihanan̈a, fotony ahitan̈a fitondranten̈a ratsy?

□ Ia

□ Ehe

Sosokevitry: Izikoa ia aby valinteninao, sitrany mangataha torohevitry amy raimandreninao na aminy olobe hafa matotro. Izikoa anao Vavolombelon̈o Jehovah, anao koa afaka mangataka fan̈ampian̈a aminy antipan̈ahy, baka hahaizanao mifidy naman̈a handrisiky anao han̈ano ny tsara.

VAKIA BOKY MANONTANY NY TANORA BOKY FAHA-2, TOKO 9, IZIKOA ANAO MILA FAN̈AZAVAN̈A FAN̈AMPINY

AMY TOKO FAN̈ARAKA TY

Izio ma kamaradinao mandrisiky anao han̈ano raha ratsy, sa anao foeky mitady ho resiny fakampan̈ahy?

[Lamariky amy pazy ambany]

ANDININY TSARA ALAIN̈A ONON̈O

“Misy ndraiky kamarady mbala tia mandilatra rahalahy.”​—Ohabolana 18:24.

SOSOKEVITRY

Live by upright standards, and others who are striving to do the same will be more likely to find you. They will make the best kind of friends!

ASA MBA HAINAO ...?

Zan̈ahary nata tsy man̈avaka olo, fidiny tsarabe fo olo tiany ‘han̈ano vahiny amy tran̈olainany ao.’​—Salamo 15:1-5.

RAHA IRITRIRETIKO HATAO!

Ty raha handeha hataoko, baka zaho hahazo kamarady tsara ․․․․․

Ty olo sasany bebenaka mba tiako hanajry kamaradinaka ․․․․․

Ty raha tiako an̈ontanian̈a ry olobeko momba olo tsara hataoko kamarady ․․․․․

AKORY HEVITRINAO?

● Ino toetry ten̈a tianao hanan̈anolo hataonao kamarady? Nan̈ino?

● Ino toetry mbala tianao hanan̈ana, baka anao hahaitiany kamaradinao fo?

[Volan̈a nalain̈y]

“Ry olobeko izikoa fa nivolan̈a taminaka fa zaho efa tsy tokony hikamarady tamy namako sasany eky, ho zaho tan̈aty jeriko tan̈y: ‘Efa iro io fo olo mba tiako hiarasan̈a.’ Fa hitako fa kaiky tsara fo torohevitrindro in̈y. Hitako fa misy olo maro mety atao kamarady tsara.”​—Cole

[Efajoro]

An̈ohara Baka Ty

Mikoràn̈a amy raimandreninao. An̈ontania iro olo karakory nataondro kamarady, taminy iro tamy taon̈onao io. Mba efa navy nanen̈iny ma iro fotony tsy nahay nifidy olo hatao kamarady? Izikoa ia valiny, an̈ontania iro nan̈ino. An̈ontania iro koa akory tokony hataonao, baka anao tsy ho tatrany raha navoa iro io.

Aboaha iry olobenao kamaradinao. Izikoa anao misalasala han̈ano zen̈y, man̈ontania karaha ty: ‘Nan̈ino ma iro tsy sakiko indesiko amindry olobeko an̈y’ Asa misy raha tsy tiany raimandreninao kanefa ataondro kamaradinao aby io? Koa ia valiny, tsara izikoa anao mba mitandrin̈y, lera mifidy olo hataonao kamarady.

Mahaiza mitandren̈y. Ataova tsapany fa anao tihan̈ano raha hahatsara izy fo, avio diniha ino raha mampiasaloha izy.​—Filipianina 2:4.

Mahaiza mamela heloko. Aza man̈anten̈a fa kamaradinao efa olo lavorary. ‘Tsisy olo tsy mahay diso.’​—Jakoba 3:2.

Aza miditry loatra amy fiain̈ananany. Aza ipitahan̈a loatra izy. Ho von̈ono han̈ampy anao fo izy, izikoa misy raha itadiavanao izy.​—Mpitoriteny 4:9, 10.

[Sary]

Izikoa anao man̈ano zay raha irahiny kamaradinao hataonao, hanjary mira saomandro in̈y fo anao