Zahava tsaiky amy sary io mavozo, fotony tsisy naman̈a. Asa anao efa nan̈ano karaha zen̈y?... Olo jiaby koa mety han̈ano karaha zen̈y. Misy kamaradiny Jehovah maro koa koran̈iny Baiboly navozo, fotony tsisy naman̈a. Atsika hianatra araiky amindro io, Elia an̈arany.

Jesosy mbala tsendriky honohono ho teraka, Elia efa nipetraka tan̈y Israely tan̈y. Ahaba an̈arany panjakany Israely tamy zen̈y. Jezebela an̈arany vadiny. Iro tsy nanompo Jehovah. Bala io zan̈ahary nivavahandro. Naro koa Israelita nivavaka tamy Bala. Jezebela io ratsy fan̈ahy mare. Izy mila hamono olo jiaby mivavaka amy Jehovah. Elia koa mila hivoneny. Karakory eky nataony Elia?...

Elia nilefa, baka io nisitriky tamy lavabato. Nan̈ino ma izy nisitriky?... Izy navozo.  Elia tsy tokony navozo be karaha zen̈y, fotony hainy fa Jehovah mahavita miaro izy. Jehovah efa namaly vavakanany, taminizy nandatsaka motro baka tandan̈itry in̈y. Hitany Elia tamy zen̈y fa Jehovah io mahery. Jehovah koa mahavita miaro izy amy raha hataony Jezebela io.

Taminy Elia tamy lavabato tao, Jehovah nan̈ontany izy: ‘Ino ma raha ataonao ato?’ Elia nivolan̈a: ‘Zaho zaraiky fo kony olo mivavaka aminao tavela e. Zaho tsisy naman̈a foeky, ke zaho mavozo tsao vonendro.’ Sambarany Elia naty olo jiaby nivavaka tamy Jehovah. Nivolan̈iny Jehovah taminany: ‘Anao aza mavozo fa zen̈y tsy marin̈y. Mbala misy namanao fito arivo kony an̈y manompo zaho. Mbala be asa hirahiko hataonao!’ Misora ravoravo mare Elia naharen̈y zen̈y, sa karakory?...

Ino raha ianarantsika baka amy tantarany Elia io?... Anao aza mavozo, baka io anao aza mieritreritry tsisy naman̈a. Mbala maro namanao tia Jehovah ndreky tia anao. Jehovah farany mahery, ke izy han̈ampy anao fo! Mamparavoravo maharen̈y zen̈y, sa karakory?...