1. Ino ma vavaka hainolo maro hianarantsika?

MARO olo mahay Vavaka Nampianariny Tompo in̈y. Misy dikany maventy vavaka in̈y. Atsika hianatra raha telo nirahiny Jesosy nangatahin̈y, baka ho haintsika raha ten̈a tiany Baiboly ampianarin̈y.

2. Ino raha telo nirahiny Jesosy nangatahiny pianatranany?

² Amy voanalohany amy vavaka io, Jesosy nivolan̈a: “Karaha ty ataova koa fa mivavaka: ‘Anao Babanay andan̈itry an̈y. Irarian̈a an̈aranao ho masin̈y. Irarian̈a ho avy Fanjakan̈anao. Irarian̈a hatao ambony tany eto koa sitraponao, karaha andan̈itry an̈y.’ ” (Matio 6:9-13) Ino ma ten̈a dikany fangatahan̈a telo io?

3. Ino aby raha tokony ho haintsika momba Fanjakan̈any Zan̈ahary?

³ Efa maro raha nianarantsika momba an̈aran̈a Zan̈ahary Jehovah io. Atsika koa efa nianatra raha momba fikasan̈anany, an̈isanizen̈y raha efa vitany ndreky raha mbala hataony amintsika olombelon̈o. Ino fo raha tiany Jesosy koran̈iny aminy “Irarian̈a ho avy Fanjakan̈anao” zen̈y? Ino ma Fanjakan̈any Zan̈ahary zen̈y? Karakory hataonizio hankamasin̈y an̈aran̈a Zan̈ahary? Ino raha hataony  Fanjakan̈a io, baka sitrapony Zan̈ahary ho vita ambony tany eto?

4. Ino ma Fanjakan̈any Zan̈ahary zen̈y? Azovy ma panjakanizio?

⁴ Fanjakan̈any Zan̈ahary zen̈y fanjakan̈a natsangana Zan̈ahary Jehovah. Izy nifidy panjaka araiky hitondra izio. Tsy azovy Panjaka io fa Jesosy Kristy. Amy Baiboly, ‘Panjakany panjaka’ ivolan̈ana izy. Dikanizen̈y, izy mbala an̈abon̈abony pitondra jiaby ambony tany eto. (1 Timoty 6:15) Tsisy pitondra olombelon̈o hahavita raha tsara mandilatra Jesosy.

5. Baka aia ma Fanjakan̈any Zan̈ahary io hitondra? Aia fo olo indesiny mipetraka?

⁵ Baka aia ma Fanjakan̈any Zan̈ahary io hitondra? Aleva onon̈o baka ty: Jesosy koa fa baka nivilominy Jehovah ma nandeha aia? Nimpody andan̈itry an̈y, tsy zen̈y? (Asan’ny Apostoly 2:33) Dikanizen̈y, baka andan̈itry an̈y Fanjakan̈any Zan̈ahary io hitondra. Zen̈y mahavy Baiboly mivolan̈a izio “Fanjakan̈a andan̈itry an̈y.” (2 Timoty 4:18) Fanjakan̈any Zan̈ahary io andan̈itry an̈y, fa olo indesiny fo ambony tany eto.—Vakia Apokalypsy 11:15.

6, 7. Ino ma raha ahaizantsika fa Jesosy io tsy mira panjaka olombelon̈o?

⁶ Nan̈ino ma Jesosy tsy mira panjaka olombelon̈o? Fotony izy efa tsy hofoaty eky. Baiboly man̈ambara fa ‘izy zaraiky fo tsy mety maty.’ (1 Timoty 6:16) Zen̈y mivolan̈a fa izy koa fa mitondra, tsy ho hisy farany hatsaran̈a ho azonolonany. Izy ten̈a han̈ano raha hahafapo olombelon̈o jiaby.

⁷ Zahava koa raha nikoran̈iny paminan̈y Isaia ty: “Fan̈ahy masin̈y Jehovah aminany, ke zen̈y mahavy izy misain̈y, mahazo onondraha, mahery, mahay raha, mahay man̈amia torohevitry ndreky matahotro Jehovah. Izy man̈ano  raha mamparavoravo Jehovah, fotony izy matahotro Jehovah. Izy koa fa mitsara, mandiniky tsarabe, fa tsy ankadalainy raha hitany masonany ndreky raha ren̈iny sofin̈inany. Izy koa fa hitsara olo masikiny, tsarainy eraka ny marin̈y. Eraka ny rariny koa han̈anarany olo, baka pandefitry ambony tany hahazo rady. Izy hamango fotaka amy tongozony vavanany, baka io raha aboakany vavanany fo hamonoany hofoaty olo ratsy fan̈ahy.” (Isaia 11:2-4) Zen̈y mivolan̈a fa Jesosy io Panjaka tsara fan̈ahy ndreky mahay mahinakinaka olo indesiny. Panjaka karaha zen̈y ten̈a tiantsika, sa karakory?

8. Azovy aby ma hiaraka hitondra amy Jesosy?

⁸ Tsy Jesosy zaraiky fo hitondra amy Fanjakan̈any Zan̈ahary io, fa misy olo hafa koa. Zen̈y nahavy Paoly nivolan̈a karaha ty tamy Timoty: “Atsika koa mahadin̈y miaritry, atsika hiaraka hanjaka aminany.” (2 Timoty 2:12) Ankoatrany Paoly ndreky Timoty, mbala misy olo tsy mivadiky hafa koa hiaraka manjaka amy Jesosy. Firy ma iro io?

9. Firy ma olo hiaraka hitondra amy Jesosy? Ombian̈a ma Zan̈ahary nanomboko nifidy iro io?

⁹ Nianarantsika tamy Toko faha-7 tamy boky ty fa apostoly Jaona nahita “Zanaka Ondrikondriky nitsangana tamy Bongo Ziona, baka io nisy zato efapolo efatra amby arivo koa niaraka taminany, nisy an̈aran̈a Zanaka Ondrikondriky ndreky an̈aran̈a Baba andan̈itry an̈y tamy laharandro.” Azovy ma iro 144 000 io? Volan̈iny apostoly Jaona: ‘Iro nan̈araka zay tany nimboany Zanaka Ondrikondriky io. Iro nivangain̈y, natao voanalohany vokatra Zan̈ahary ndreky Zanaka Ondrikondriky io.’ (Apokalypsy 14:1, 4) Iro io pianatra Jesosy tsy nivadiky, hiaraka hitondra aminany andan̈itry an̈y ndreky “hanjary panjaka hitondra tany.” (Apokalypsy 5:10) Rango tamy faha apostoly, Zan̈ahary nanomboko nifidy olo an̈isany 144 000 io.

10. Nan̈ino atsika mivolan̈a fa ten̈a nahay Jehovah nifidy Jesosy ndreky iro 144 000 aby io?

 ¹⁰ Ten̈a nahay Zan̈ahary nifidy Jesosy ndreky iro 144 000 hitondra io. Karaha ataony Jesosy, izy efa niain̈y tambony tany teto, ke hainy tsarabe karakory mijaly zen̈y. Apostoly Paoly nivolan̈a fa Jesosy io ‘pisoron̈obe mahay mahinakinaka atsika amy raha mampalemy atsika, fotony izy efa nitsapain̈y tamy raha maro karaha atsika koa, fa izy tsy nanota.’ (Hebreo 4:15; 5:8) Iro hiaraka hitondra aminany io koa efa nijaly ndreky niaritry raha maro. Haindro tsarabe raha iain̈anolo tsy lavorary ndreky olo marary zen̈y. Ke zen̈y mahavy atsika matoky fa ho haindro tsarabe raha jiaby manahiran̈a atsika io!

11. Nan̈ino ma Jesosy nan̈iraka pianatranany hangataka sitrapony Zan̈ahary hatao andan̈itry an̈y?

¹¹ Jesosy koa fa nivolan̈a fa pianatranany aby io mila mivavaka baka Fanjakan̈any Zan̈ahary io ho avy, izy nan̈ambara koa fa mila angatahin̈y sitrapony Zan̈ahary hatao ‘ambony tany eto, karaha andan̈itry an̈y.’ Marin̈y ankitin̈y fa anjely jiaby andan̈itry an̈y efa man̈ano sitrapony Zan̈ahary. Kanefa, hitantsika tamy Toko faha-3 tamy boky ty, fa nisy anjely ratsy araiky tandan̈itry tan̈y tsy nan̈ano sitrapony Zan̈ahary, ke nan̈ano raha nampivadiky Adama ndreky Eva. Atsika hianatra raha maro momba anjely ratsy na Satana Devoly io, amy Toko faha-10 amy boky ty. Satana ndreky anjely aby nan̈araka izy tamy zen̈y mbala tandan̈itry tan̈y. Dikanizen̈y, tsy anjely jiaby tandan̈itry tan̈y nan̈ano sitrapony Zan̈ahary. Fanjakan̈any Zan̈ahary io koa fa nanomboko nitondra, efa nisy raha niova, fotony Panjaka Jesosy Kristy niady tamy Satana.—Vakia Apokalypsy 12:7-9.

12. Ino raha aroe maventy koran̈iny Apokalypsy 12:10?

 ¹² Rango ela Baiboly efa nan̈ambara raha nandalo tan̈y io. Volan̈iny karaha ty: “Zaho naharen̈y feo mare baka andan̈itry an̈y, nivolan̈a: ‘Navy izioty famonjian̈a ndreky angovo, ndreky Fanjakan̈any Zan̈aharintsika, baka io fitondrasan̈a Kristinany, fotony efa natsipy an̈y pan̈aratsy rahalahintsika in̈y [Satana], araiky pan̈aratsy iro mantsan̈a alin̈y man̈oloan̈a Zan̈aharintsika in̈y!’ ” (Apokalypsy 12:10) Ino raha aroe maventy volan̈iny andininy io? Voanalohany, Fanjakan̈any Zan̈ahary io efa nanomboko nitondra. Faharoe, Satana niroasin̈y baka tandan̈itry tan̈y, baka io natsipy tambony tany taty.

13. Nan̈ano karakory tandan̈itry tan̈y, Satana koa fa nadoso tan̈y?

¹³ Nan̈ano karakory ma tandan̈itry tan̈y, Satana koa fa nadoso tan̈y? Karaha ty koran̈iny Baiboly: “Miravoravoa anaro jiaby mipetraka andan̈itry an̈y!” (Apokalypsy 12:12) Ravoravo mare iro anjely tsy mivadika aby io, fotony Satana ndreky iro demony aby io efa tsy an̈y eky. Nanomboko tamy zen̈y, anjely manompo Jehovah fo tavela andan̈itry an̈y. Milamin̈y iro an̈y sady miaraka manompo Jehovah. Dikanizen̈y, efa atao andan̈itry an̈y sitrapony Zan̈ahary.

14. Nan̈ano karakory tambony tany teto, Satana koa fa natsipy baka tandan̈itry tan̈y?

¹⁴ Nan̈ano karakory fo basy tambony tany teto? Baiboly mivolan̈a karaha ty: “Antambo navy aminaro ambony tany ndreky amy ranomasin̈y jiaby an̈y, fotony Devoly loso an̈y, meloko mare. Hainy baka fa hely fo andranany tavela.” (Apokalypsy 12:12) Satana neloko mare, fotony izy niroasin̈y baka tandan̈itry tan̈y, baka io koa efa hely fo andranany tavela. Zen̈y koa mahavy “antambo” na jaly aminolo jiaby ambony tany eto. Atsika mbala hianatra momba zen̈y amy Toko faha-9 amy boky ty. Ke karakory fo han̈anovan̈a sitrapony Zan̈ahary ambony tany eto?      

15. Ino ma sitrapony Zan̈ahary momba tany ty?

 ¹⁵ Asa azonao onon̈o, ino sitrapony Zan̈ahary momba tany ty? Hitantsika tamy Toko faha-3 fa Zan̈ahary koa fa niasa raha, tiany tany ty hanjary paradisa, ho feno olo marin̈y ndreky tsy hofoaty. Ndray Satana namitaka Adama ndreky Eva, fikasan̈any Zan̈ahary tsy niova. Jehovah efa nivolan̈a fa “olo marin̈y handova tany ty, ke hipetraka io tsisy farany.” (Salamo 37:29) Karakory han̈anovany Fanjakan̈any Zan̈ahary zen̈y?

16, 17. Izikoa Daniela 2:44 io zahan̈a, ino raha ianarantsika momba Fanjakan̈any Zan̈ahary?

¹⁶ Efa rango ela Baiboly efa nivolan̈a karaha ty amy Daniela 2:44: “Aminandrandro panjaka aby io, Zan̈ahariny lan̈itry hanangana fanjakan̈a tsy ho ravan̈a mandrakizay, baka io fanjakan̈a io tsy ho azonolo hafa. Izio hanorotoro ndreky han̈afoan̈a fanjakan̈a jiaby io, ke izio zaraiky fo ho tavela mandrakizay.” Ino ma raha ianarantsika baka amy zen̈y?

¹⁷ Voanalohany, nambarany fa “aminandrandro panjaka aby io”, Zan̈ahary hanangana Fanjakan̈anany. Faharoe, Fanjakan̈any Zan̈ahary io tsy ho ravan̈a. Tsisy olombelon̈o mahavita handrongana izio. Fahatelo, hiady Fanjakan̈any Zan̈ahary ndreky fanjakan̈anolombelon̈o, ke Fanjakan̈any Zan̈ahary handresy. Amy zen̈y, Fanjakan̈anany io zaraiky fo hitondra tany jiaby ty. Olo jiaby amy zen̈y ho afapo amy fitondrasan̈a io.

18. Ino an̈aran̈a ady hataony Fanjakan̈any Zan̈ahary amy fanjakan̈anolombelon̈o?

¹⁸ Maro raha koran̈iny Baiboly momba ady hataony Fanjakan̈any Zan̈ahary amy fanjakan̈anolombelon̈o io. Koran̈iny fa farany io koa fa ten̈a marikitry, anjely ratsy aby io hamitaka ‘panjaka jiaby ambony tany.’ Ino ma dikany han̈anovandro zen̈y? ‘Baka iro havory aminandra maventy iadivany Zan̈ahary Farany Mahery.’ Iro panjaka jiaby ambony tany havory ‘amy tany araiky kahin̈y amy  volan̈a hebreo Haramagedona.’ (Apokalypsy 16:14, 16) Ke Haramagedona io an̈aran̈a ady ataony Fanjakan̈any Zan̈ahary amy fanjakan̈anolombelon̈o.

19, 20. Ino ahaizantsika fa mbala tsendriky atao ambony tany eto sitrapony Zan̈ahary?

¹⁹ Haramagedona io koa fa avy, ino ma raha hataony Fanjakan̈any Zan̈ahary? Aleva onon̈o sitrapony Zan̈ahary amy tany ty. Tiany tany ty hanjary paradisa, ke ho feno olo marin̈y, tsisy fahotan̈a. Ino ahaizantsika fa raha zen̈y mbala tsendriky navy? Voanalohany, atsika izio mbala panota, mahay marary ndreky maty. Nianarantsika tamy Toko faha-5 fa Jesosy naty baka atsika ho velon̈o tsisy farany. Mety azonao onon̈o Filazantsarany Jaona nivolan̈a karaha ty: “Be ankitin̈y fitiavany Zan̈ahary olombelon̈o: Araiky fo Zanany, lelahy izio, fa mbala namiany fo, baka olo jiaby ten̈a mino izy tsy hofoaty fa hahazo fiain̈ana tsisy farany.”—Jaona 3:16.

²⁰ Tsy vitanizen̈y fo fa mbala maro koa olo man̈ano ny ratsy. Iro mavandy, mikatramo, ndreky mijangajanga. Iro tsy man̈iry han̈ano sitrapony Zan̈ahary foeky. Olo jiaby man̈ano ny ratsy karaha zen̈y, hivoneny Jehovah aminy Ady Haramagedona io. ( Vakia Salamo 37:10.) Fanjakan̈anolombelon̈o koa tsy mandrisiky olo han̈ano sitrapony Zan̈ahary. Ankamarozandro tsy mahay mitondra, ratsy fan̈ahy ndreky tia man̈ano risoriso. Baiboly mivolan̈a mazava karaha ty: ‘Olombelon̈o koa fa mitondra, mijaly olo indesiny.’—Mpitoriteny 8:9.

21. Karakory han̈anovan̈a sitrapony Zan̈ahary ambony tany eto?

²¹ Afarany Haramagedona, Fanjakan̈any Zan̈ahary zaraiky fo hitondra tany ty. Fanjakan̈a io han̈ano sitrapony Zan̈ahary ndreky han̈amia hatsaran̈a olo jiaby ambony tany eto. Araiky amy raha hataonizio, han̈asazy Satana ndreky iro demony aby io. (Apokalypsy 20:1-3) Hiasa  soron̈o nataony Jesosy in̈y, ke olo tavela eto amy zen̈y tsy harary ndreky tsy hofoaty eky. Iro ho velon̈o tsisy farany. ( Vakia Apokalypsy 22:1-3.) Tany jiaby hanjary paradisa. Ho vita eky sitrapony Zan̈ahary amy tany ty ndreky fankamasin̈any an̈aranany. Ino ma dikanizen̈y? Zen̈y man̈ambara fa olo jiaby amy zen̈y han̈amia voninahitry an̈aran̈a Jehovah.

22. Ino ahaizantsika fa Jesosy mbala tsendriky nitondra, taminizy tambony tany teto? Ino ahaizantsika fa tsy niaraka Jesosy navy tandan̈itry tan̈y efa nitondra edy?

²² Tamy Jesosy tambony tany teto mbala tsendriky nitondra, fotony izy nan̈iraka pianatranany hangataka fanjakan̈a io ho avy. Ke niaraka izy navy tandan̈itry tan̈y ma efa nitondra edy? Tsendriky koa, fotony apostoly Petera ndreky Paoly nivolan̈a fa Jesosy koa fa nivilominy Zan̈ahary, tanteraka taminany raha nivolan̈iny Salamo 110:1 ty: “Volan̈iny Jehovah tamy Tompoko: ‘Mipitraha ankavanan̈anaka mandrapan̈anovako fahavalonao hanjary fipitrahany vitinao.’ ” (Asan’ny Apostoly 2:32-35; Hebreo 10:12, 13) Izy tamy zen̈y mbala niambin̈y antsendriky.

23. a) Ombian̈a ma Fanjakan̈any Zan̈ahary io nanomboko nitondra? b) Ino ma raha hianarantsika amy toko fan̈araka ty?

²³ Ombian̈a ma tapitry fiambesan̈a io? Rango tamy taon̈o 1900 tan̈y, efa nisy pianatra Baiboly nan̈ano kajy, ke iro nahita fa tapitry tamy taon̈o 1914 fiambesan̈a io.  (Ahitanao fikontian̈a daty io amy Fan̈ampiny Fan̈azavan̈a, “1914: Taon̈o Miavaka Efa Nambarany Baiboly Rango Ela”.) Mankamarin̈y zen̈y raha nandalo tambony tany teto nanomboko taminy 1914. Tanteraka koa raha maro nivolan̈iny Baiboly rango ela, ke zen̈y man̈ambara fa Kristy efa Panjaka taminy 1914, baka io Fanjakan̈any Zan̈ahary io efa nanomboko nitondra. Ke atsika io efa an̈atiny ‘andra hely tavela’ hiasany Satana. (Apokalypsy 12:12; Salamo 110:2) Matoky koa atsika fa efa tsy ho ela eky Fanjakan̈any Zan̈ahary io han̈ano sitrapony Zan̈ahary ambony tany eto. Vaovao tsara zen̈y, sa karakory? Asa anao mba man̈eky raha zen̈y? Amy toko fan̈araka ty ahitanao fa zen̈y ankitin̈y raha ampianariny Baiboly.