OLO mino Zan̈ahary tokana olo telo io mivolan̈a fa Baba, Zanaka, ndreky Fan̈ahy Masin̈y io olo araiky fo. Iro mivolan̈a fa iro telo io mira fo, samy mahery ndreky samy tsisy olo niasa iro. Ke amindro, Jehovah io Zan̈ahary, Jesosy io Zan̈ahary, Fan̈ahy Masin̈y koa mbala Zan̈ahary.

 Iro mino izio fotony iro mieritreritry fa zen̈y raha ampianariny Baiboly, kanefa tsisy amindro mahay man̈azava hevitrindro io. Amy Baiboly ao tsisy fivolan̈ana momba Zan̈ahary tokana olo telo zen̈y. Sa misy hevitry mety manohan̈a zen̈y amy Baiboly ao? Atsika hizaha toko ndreky andininy ivolan̈anolo fa marin̈y Zan̈ahary tokana olo telo zen̈y.

Karaha ty volan̈iny Jaona 1:1: ‘Tamy voanalohany, Teny io tamy Zan̈ahary, ke Teny io Zan̈ahary.’ (Fandikanteny Protestant) Mbala amy toko io fo apostoly Jaona mivolan̈a mazava fa Jesosy “Teny” tiany koran̈iny io. (Jaona 1:14) Olo koa fa mahita volan̈a ‘Teny io Zan̈ahary’, iro mivolan̈a fa araiky fo Zan̈ahary ndreky Jesosy io.

Aleva onon̈o fa bokiny Jaona io nisoratin̈y tamy volan̈a griky antsendriky, zay vo nadika tamy volan̈a hafa. Maro pandika teny tsy nampiasa fivolan̈ana fa “Teny io Zan̈ahary” zen̈y. Nan̈ino? Fotony haindro volan̈a griky nanoratan̈a Baiboly io, ke tsy tokony ho karaha zen̈y nandikan̈a andininy io. Tokony ho natao karakory fo basy nandikan̈a izio? Ty raha sasany mety nandikan̈a izy: “Logos [Teny] io karaha Zan̈ahary.” (Fandikanteny Vaovaony Baiboly) “Teny io zan̈ahary.” (Testamenta Vaovao—Dikanteny Nankatsarain̈y) “Teny io niaraka tamy Zan̈ahary sady nira karazan̈a taminany.” (Testamenta Vaovaony Pandika Teny) Izikoa zen̈y zahan̈a, Teny io tsy Zan̈ahary zen̈y. * Mety koran̈iny zan̈ahary (“z” madiniky) izy, fotony izy farany an̈abo amy raha jiaby niasainy Jehovah. “Mahery” dikany “zan̈ahary” zen̈y eto.

Ankamarozanolo tsy mahay volan̈a griky nanoratan̈a Baiboly. Akory fo ahaizan̈a raha tiany apostoly Jaona koran̈iny? Ohatra misy papianatra araiky man̈azava raha amy pianatra nany. Mety tsy ho mira fazahoany pianatra aby io raha koran̈iny. Karakory ahaizandro ny ten̈a marin̈y? Iro mety man̈ontany papianatra hafa. Mety tsy hisalasala iro izikoa hitandro fa mitovy fo fan̈azavan̈a baka amy papianatra aroe io. Ke izikoa tianao ho hay dikany volan̈a amy Jaona 1:1 io, anao tokony hitady fan̈azavan̈a hafa momba toeran̈a Jesosy, koran̈iny Filazantsarany Jaona. Anao koa man̈ano zen̈y, ho hainao tsarabe ny marin̈y.

Zahava baka raha misoratra amy Jaona toko 1, andininy 18: “Tsiary nisy olo nahita Zan̈ahary [Farany Mahery].” Tsy Jesosy tiany volan̈iny io, fotony Jesosy efa hitanolo. Zen̈y koran̈iny Jaona ty: “Teny [Jesosy] io nanjary nofotro, ke nipetraka tamintsika taty; voninahitrinany hitanay.” (Jaona 1:14, Prot.) Hitantsika baka amy zen̈y fa tsy mira Jehovah ndreky Jesosy. Mivolan̈a koa Jaona fa “Teny io tamy Zan̈ahary tao” na “niaraka tamy Zan̈ahary”, koran̈iny Fandikan-tenin’ny Tontolo Vaovao. Izikoa olo araiky fo iro io, tsy niaraka zen̈y fivolan̈ana izy. Izikoa zahan̈a koa Jaona 17:3, Jesosy nivolan̈a tsarabe fa iro ndreky Jehovah tsy olo araiky. Volan̈iny ao fa Jehovah io “Zan̈ahary tokana sady marin̈y.” Karaha ty nambarany Jaona, amy farany Filazantsaranany: ‘Nisoratin̈y raha aby io, baka anaro hino fa Jesosy io Kristy, Zanaka Zan̈ahary.’ (Jaona 20:31) Volan̈iny io fa Jesosy tsy Zan̈ahary, fa Zanaka Zan̈ahary. Mazava amintsika amy zay raha koran̈iny Jaona 1:1, ke haintsika fa baka amy toeran̈anany ivolan̈ana fa izy “zan̈ahary”, fa izy tsy Zan̈ahary Farany Mahery.

Tohizantsika hely ohatra in̈y. Papianatra io namango nan̈azava, fa iro mbala misalasala fo. Ino raha mety ataondro? Iro mety han̈ontany papianatra hafa ndraiky. Izikoa hitandro fa mira fo raha nazavainy papianatra aroe io, iro tsy hisalasala eky. Izikoa mbala mampisalasala anao raha nikoran̈iny Jaona momba Jehovah ndreky Jesosy, zahava koa raha nikoran̈inolo hafa nanoratra Baiboly. Zahava baka raha nisoratiny Matio.  Izy koa fa nikoran̈a momba farany donia ratsy ty, izy nan̈ampody volan̈a Jesosy ty: “Momba andra ndreky lera, tsisy olo mahay izy, na anjely andan̈itry an̈y, na Zanaka. Baba andan̈itry an̈y zaraiky fo mahay izy.” (Matio 24:36) Karakory ahaizantsika fa Jesosy tsy Zan̈ahary Farany Mahery?

Jesosy nivolan̈a fa Jehovah farany mahay raha. Izikoa Jesosy Farany Mahery, tokony ho mira fo raha haindro. Dikanizen̈y, Jehovah ndreky Jesosy tsy mira. Misy koa olo mivolan̈a karaha ty: ‘Ke Jesosy anie sady Zan̈ahary izy olo e.’ Ke karakory fo fan̈ahy masin̈y? Izikoa fan̈ahy masin̈y io mbala Jehovah, nan̈ino Jesosy tsy nivolan̈a fa raha hainy Jehovah mba hainy fan̈ahy masin̈y koa?

Anao koa mazoto mianatra Baiboly, anao hahay raha ten̈a ampianariny Baiboly momba Zan̈ahary tokana olo telo io. Ho hainao tsarabe han̈avaka Jehovah ndreky Jesosy, ndreky fan̈ahy masin̈y.—Salamo 90:2; Asan’ny Apostoly 7:55; Kolosianina 1:15.