Demony aby io Pamono Olo!
Rango zay Satana ndreky demony aby io efa kafiry ndreky ratsy fan̈ahy mare. Taloha tan̈y, nivoneny Satana biby jiaby nitariminy Joba ndreky panomponany jiaby. Joba io olo marin̈y. Baka io izy nandefa ‘tsiko mare’ nandrongana tran̈o nisy iro zanaka Joba folo, ke naty iro jiaby. Avio amy zay nataony Satana ‘bay rango tantampondohany Joba ziska tampelambitinany.’—Joba 1:7-19; 2:7.
Taminy andrany Jesosy, nisy olo sasany nataondro demony aby io moa salakady gila. (Matio 9:32, 33; 12:22) Nampijalindro mare koa lelahy araiky, ke nataondro raha hahavy izy hanetitetiky ain̈inany tamy vato. (Marka 5:5) Baka tamindro koa nahavy tsaiky lelahy hely araiky niafatrafatra, nantsipitsipy tamy tany, baka io “nifanintosinton̈o mare koa.”—Lioka 9:42.
Taloha tan̈y, nisy olo sasany nampararindro demony aby io, baka io sasany nataondro nifanintosinton̈o mare
Nahainiaho fo Satana ndreky demony aby io, rango iro niroasin̈y niala tandan̈itry tan̈y in̈y. Ke iro amy zioty mbala von̈ono hamono olo fo. Raha mandalo erantany izioty ahitan̈a haratsiany jerindro zen̈y. Baka amindro mahavy olo sasany marary. Sasany ndraiky ampitahorindro fo isaka alin̈y, ataondro tsy tafandry na koa man̈inofy ratsy. Olo sasany araraotindro amy resaka firaisan̈a. Misy ndraiky ataondro mivadiky adala foeky, na mamono olo, na koa mamono ten̈a.
Amy zioty, ataondro demony aby io raha mahavy olo sasany manjary kafiry, tsy azontoro fa man̈inofy ratsy
Mitantara Lintina, mipetraka a Suriname, fa nisy demony araiky namono havany 16, baka io nampijaly izy arabatan̈a ndreky aratsain̈y tan̈atiny 18 taon̈o. Baka tamy raha niain̈any in̈y mahavy izy masaky mivolan̈a fa demony aby io “ravoravo mampijaly ndreky mamono olo foeky, kanefa olo aby io mampalahelo azondro.”
Jehovah mahavita miaro panomponany amy fan̈afihan̈a ataony Satana.—Ohabolana 18:10.
