1, 2. Ino raha tsy maintsy fidintsika, baka io nan̈ino zen̈y ten̈a ilain̈y?

ANAO koa fa nianatra Baiboly, hainao fa maro olo miaboko manompo Zan̈ahary, mampianatra ndreky man̈ano raha tsy tiany Zan̈ahary. (2 Korintianina 6:17) Zen̈y mahavy Jehovah man̈iraka atsika hiala amy fivavahan̈a diso, na “Babylony Be.” (Apokalypsy 18:2, 4) Ino raha mila atao? Atsika tsiaraikiaraiky mila mifidy na han̈ano fanompoan̈a tiany Zan̈ahary, na han̈ano fanompoan̈a tiantsika tompiny fo.

² Efa tsara anao izikoa efa niala tamy fivavahan̈a diso na namafa an̈aranao tan̈y. Mety misy fo fomba na raha sasany fataony fivavahan̈a diso mety mbala tianao. Atsika handiniky sasany amy zen̈y, baka io hizahavantsika nan̈ino atsika mila mitovy hevitry amy Jehovah.

3. a) Nan̈ino mety ho sarotro aminolo sasany tsy hampiasa sary, koa fa mivavaka? b) Ino raha koran̈iny Baiboly momba fampiasan̈a sary, koa fa mivavaka?

³ Maro olo mampiasa sary na tany masin̈y koa fa hivavaka amy Zan̈ahary, tan̈atiny taon̈o taon̈o. Mety ho karaha zen̈y koa anao, ke mety ho hafahafa aminao tsy hampiasa raha aby io eky. Aleva onon̈o, Jehovah mampianatra atsika fomba tiany hanompoan̈a izy. Baiboly man̈ambara mazava fa tsy tiany Jehovah atsika mampiasa sary, koa fa mivavaka aminany.—Vakia  Eksodosy 20:4, 5; Salamo 115:4-8; Isaia 42:8; 1 Jaona 5:21.

4. a) Nan̈ino atsika tsy tokony hanompo razan̈a? b) Nan̈ino Jehovah tsy nan̈omba olonany hikoran̈a aminolo maty?

⁴ Olo maro koa mandany fotoan̈a ndreky angovo hamparavoravoan̈a razan̈andro. Izio tompoendro. Atsika ndraiky efa nianatra fa olo maty tsy mahavita mitahy na mampijaly atsika. Iro tsy velon̈o antany hafa. Ten̈a ratsy mikoran̈a aminolo maty, fotony demony fo mamaly fa tsy olo maty io. Zen̈y nahavy Jehovah tsy nan̈omba Israelita aby io hikoran̈a aminolo maty na han̈ano raha misy ifandraisany amy demony.—Deoteronomia 18:10-12; zahava Fan̈azavan̈a 26 ndreky 31.

5. Ino raha mety han̈ampy anao tsy hampiasa sary, koa fa mivavaka ndreky tsy hivavaka amy razan̈a eky?

⁵ Ino raha mety han̈ampy anao tsy hampiasa sary, koa fa mivavaka ndreky tsy hivavaka amy razan̈a eky? Anao mila mamaky Baiboly, baka io mangala onon̈o hevitry Jehovah momba raha aby io. “Mamparikoriko” izy raha aby io. (Deoteronomia 27:15) Mivavaha amy Jehovah isanandra, baka anao han̈eky hevitrinany ndreky hanompo izy amy fomba tiany. (Isaia 55:9) Matokisa fa Jehovah han̈amia anao angovo hialan̈a amy raha jiaby fataony fivavahan̈a diso.

6. Nan̈ino 25 Desambra io nifidin̈y ankalazan̈a andra nitirahany Jesosy?

⁶ An̈isany fety ten̈a malaza erantany Noely io, ke maro olo mihevitry fa izio fankalazan̈a andra nitirahany Jesosy. Izio misy ifandraisany amy fivavahan̈a  diso. Misy boky man̈azava fa iro panompo sampy romanin̈y aby io nankalaza fetiny masoandra, koa fa 25 Desambra. Tiandro pitariky fivavahan̈a aby tamy zen̈y hanjary kristianin̈y iro panompo sampy aby io, ke nataondro andra nitirahany Jesosy 25 Desambra io, nata Jesosy tsy teraka taminio. (Lioka 2:8-12) Pianatra Jesosy tsy nan̈ano Noely. Misy boky araiky man̈azava fa 200 taon̈o tafarany Jesosy teraka, ‘tsisy olo nahay daty nitirahany Jesosy, baka io vitsy fo olo nangala onon̈o zen̈y.’ (Hevitry Lalin̈y Baka Tamy Raha Masin̈y, amy volan̈a angiley) Efa 300 taon̈o tafarany nitirahany Jesosy olo vo nan̈ano Noely io.

7. Nan̈ino ma ten̈a Kristianin̈y tsy mankalaza Noely?

⁷ Maro olo mahay fa Noely ndreky fomba amizio baka amy panompo sampy, an̈isanizen̈y fety ataonolo ndreky fandrasan̈a kado. Ohatra, nisy fotoan̈a tsy nahazo nankalazain̈y Noely io ta Angletera tan̈y ndreky tamy faritry sasany tan̈y Ameriky, fotony izio baka amy panompo sampy. Navoasazy lan̈iany olo nankalaza izio. Nimpody nankalaza Noely koa olo izioty. Nan̈ino fo ma ten̈a Kristianin̈y tsy man̈ano Noely? Fotony iro tihamparavoravo Zan̈ahary amy raha jiaby ataondro.

8, 9. Nan̈ino iro Kristianin̈y taloha tan̈y tsy nankalaza aniversera?

⁸ Maro olo tia mankalaza aniversera. Mety amy Kristianin̈y ma man̈ano izio? Amy Baiboly ao, olo tsy nanompo Jehovah fo nankalaza izio. (Genesisy 40:20; Marka 6:21) Fankalazan̈a aniversera io taloha nanompoan̈a zan̈ahary tsy izy aby io. Zen̈y nahavy iro  Kristianin̈y taloha tan̈y “nihevitry fankalazan̈a andra nitirahan̈a io, baka amy fombany panompo sampy.”—Rakipahalalan̈a Momba Zao Tontolo Zao (angiley).

⁹ Nino iro Romanin̈y ndreky Griky taloha tan̈y fa misy fan̈ahy araiky avy lera misy tsaiky vo teraka, ke fan̈ahy io zen̈y hiaro tsaiky io amy fiain̈ananany jiaby. Misy boky mivolan̈a: “Misy raha hafahafa tamy fan̈ahy io ndreky zan̈ahary teraka taminandra nitirahanolo io.”—Lovantsofin̈y Momba Andra Nitirahan̈a (angiley).

10. Nan̈ino Kristianin̈y aminandra izioty tsy mankalaza aniversera?

¹⁰ Tsy hikeny Jehovah foeky lan̈iany fety misy ifandraisany amy fivavahan̈a diso. (Isaia 65:11, 12) Zen̈y mahavy atsika tsy tokony hankalaza aniversera na fety hafa misy ifandraisany amy fivavahan̈a diso.

11. Ino mahavy olo sasany man̈ano fety? Ino ten̈a tokony ho raha maventy aminao?

¹¹ Olo sasany mahay fa Noely ndreky fety sasany baka amy panompo sampy, fa iro mbala man̈ano fo. Iro mihevitry fa aminio edy hiarahandro aminy havandro. Asa karaha zen̈y koa anao? Marin̈y fa tsy ratsy miaraka amy fianakavian̈a. Jehovah niasa fianakavian̈a io, ke tiany atsika koa mihavan̈a tsara amindro. (Efesianina 3:14, 15) Ndray zen̈y, sitrany mihavan̈a amy Jehovah, fa tsy han̈ano raha hamparavoravo havantsika, ke han̈ano fetiny fivavahan̈a diso. Zen̈y nahavy apostoly Paoly nivolan̈a: “Zahava tsarabe fo raha tiany Tompo.”—Efesianina 5:10.

12. Ino mahavy fety sasany tsy ikeny Jehovah?

¹² Maro olo mieritreritry fa tsisy dikany tany naviany fety araiky, fa amy Jehovah tsy karaha zen̈y.  Tsy ikeny fety baka amy fivavahan̈a diso, ndreky fety an̈amezan̈a voninahitry olo na firenena. Ohatra, Ezipsianin̈y aby io nankalaza fety maro niny zan̈aharindro. Tafarany Israelita aby io niala ta Ezipty, iro nangala tahaka fetiny panompo sampy aby io, fa nataondro “fetiny Jehovah” fo. Iro nisaziny Jehovah. (Eksodosy 32:2-10) Paminan̈y Isaia nivolan̈a fa atsika tsy tokony ‘hikasiky raha maloto!’—Vakia Isaia 52:11.

13. Ino aby raha mety ho tianao hay, anao koa fa tapakevitry tsy hankalaza fety sasany eky?

¹³ Anao koa fa tapakevitry tsy hankalaza fety sasany eky, mety ho maro raha tianao hay. Ohatra: Izikoa olo miaraka miasa aminaka man̈ontany nan̈ino zaho tsy man̈ano Noely eky, ino raha hivolan̈iko? Karakory eky hataoko izikoa zaho amianolo kadony Noely? Izikoa vadiko mitaon̈o zaho han̈ano Noely, akory hataoko? Ino raha tokony hataoko, baka ry zanako tsy hahatsiaro ho matiantoko, fotony tsy mankalaza aniversera na fety hafa?

14, 15. Ino mety ataonao, koa misy olo miarahaba anao tatrany fety na nan̈amia kado anao?

¹⁴ Mila mandiniky tsarabe anao amy raha hivolan̈inao na raha hataonao. Ohatra, koa misy olo miarahaba anao tatrany fety, sitrany mivolan̈a “mersy” fo. Akory fo ataonao koa misy olo man̈ontany antony tsy ankalazanao fety io? Mety man̈azava anao amy zen̈y, fa mila tsara fan̈ahy, mahay mandanjalanja, ndreky man̈aja olo. Baiboly mivolan̈a: “Volan̈a tsara ndreky  mamy sira fo tokony hivolan̈inaro, baka ho hainaro raha tokony hivolan̈iny aminolo tsiaraikiaraiky.” (Kolosianina 4:6) Mety azavainao fa anao mety man̈ano fety ndreky man̈amia kado, fa fety tsy mifan̈araka amy Zan̈ahary fo tsy mety aminao.

¹⁵ Akory ataonao izikoa misy olo man̈amia kado anao? Baiboly tsy man̈amia lalàn̈a momba zen̈y, fa izio mivolan̈a fa tokony hilamin̈y fo eritreritrintsika. (1 Timoty 1:18, 19) Ndraikindraiky olo man̈amia anao kado mety tsy mahay fa anao tsy mankalaza fety io. Na izy mety hivolan̈a: “Haiko ndraiky anao tsy mankalaza fety io, fa tiako han̈amia kado ty anao.” Amy zen̈y, anjaranao manapakevitry hangala na tsy hangala kado io. Ndray zen̈y, tokony hilamin̈y tsara fo eritreritrinao. Tsy tiantsika foeky han̈ano raha handrobaka fihavan̈antsika amy Jehovah.

16. Akory tokony hataonao, izikoa fianakavian̈anao tihan̈ano fety?

¹⁶ Akory izikoa fianakavian̈anao tihan̈ano fety io? Aza miady amindro. Aleva onon̈o fa iro mety mifidy zay raha tiandro hatao. Anao mila tsara fan̈ahy fo, baka io hajà safidindro, fotony mba tianao koa iro han̈aja safidinao. (Vakia Matio 7:12.) Akory tokony hataonao, izikoa anao kahindro hiaraka han̈ano fety amindro? Alohany anao hanapakevitry, mivavaha amy Jehovah han̈ampy anao hahay hanapakevitry tsara. Diniha tsarabe raha misy, baka io man̈anova fikarohan̈a momba izio. Aza adin̈a fa anao tihan̈ano raha hamparavoravo Jehovah fo.

17. Akory tokony hataonao, baka zanakanao tsy mahatsiaro matiantoko, koa fa mahita olo man̈ano fety?

 ¹⁷ Akory tokony hataonao, baka zanakanao tsy malahelo mahita olo man̈ano fety? Anao mety miaraka misoma amindro matetiky, na mitondra iro mitsangatsangana. Amia kado iro aminandra tsy ampoizindro. Aza adin̈a fa fotoan̈anao ndreky fitiavan̈anao an̈isany kado farany tsara mety amianao zanakanao.

18. Nan̈ino ma atsika mila mivory?

¹⁸ Baka Jehovah ravoravo, atsika mila miala amy fivavahan̈a diso ndreky fomba jiaby fataondro, baka io fetindro. Mila man̈araka fivavahan̈a marin̈y koa atsika. Akory han̈anovantsika zen̈y? Mila tsy manapatapaka fivorian̈a. (Vakia Hebreo 10:24, 25.) Izio an̈isany raha ten̈a maventy amy fivavahan̈a marin̈y. (Salamo 22:22; 122:1) An̈y atsika mifankahery.—Romanina 1:12.

19. Nan̈ino ma ten̈a ilain̈y mikoran̈a aminolo raha nianaranao?

¹⁹ Man̈araka fivavahan̈a marin̈y koa anao, izikoa koran̈inao aminolo raha nianaranao tamy Baiboly. Maro olo malemy troko mahita raha mandalo erantany. Mety mahay olo karaha zen̈y anao. Ambarà izy fa mbala ho tsara fiain̈ana io aminy amaray an̈y. Ke mandihana mivory fo, baka io koràn̈a aminolo raha nianaranao. Anao koa man̈ano zen̈y, tsy ho tianao eky fivavahan̈a diso ndreky fombandro. Matokisa fa ho sambatra ndreky hitahiny Jehovah anao, koa mifidy hanompo izy amy fomba tiany.—Malakia 3:10.