1, 2. Karakory nataony Balama nitaon̈o olony Zan̈ahary hanota?

MATETIKY olo pamintan̈a efa mandiniky tsialohaloha loko tiany ho azo ndreky tany mety hazahoany loko io. Fidiny tsarabe maisa hampiasainy. Hatsipiny an̈aty rano amy zay lelambitan̈anany. Tsy ela, efa mihetsiky edy tadimbintan̈a. Antsoritiny malaky tandimbintan̈a io, farany, azony fo loko io! Ravoravo mare izy koa fa azony loko aby io, fotony nahomby maisa nampiasainy io.

² Karaha zen̈y koa nataony Balama, velon̈o tamy taon̈o 1473 Talohany Kristy (T.K.). Olony Zan̈ahary ndraiky tiany fandrihin̈y io. Iro tamy zen̈y nipetraka tamy Lemaka Moaba, marikitry Tany Nampan̈antinain̈y. Balama nivolan̈a izy paminan̈iny Jehovah, kanefa fitiavambola fo tan̈aty jerinany. Nisy olo nampan̈anten̈a izy han̈amia volabe izikoa izy man̈eky han̈ozon̈o Israelita aby io. Tsy nahomby tetiky Balama zen̈y, fotony Jehovah niaro olonany. Ke ozon̈o tokony nataony tamindro in̈y nanjary tsodrano. Tsy nafaka tamy jeriny Balama foeky karama be in̈y, ke izy nitady hevitry baka Jehovah han̈ozon̈o olonany. Izy nitsapa jery iro. Ino maisa nampiasainy? Iro tsaiky man̈angy tsara sora ta Moaba tao.—Nomery 22:1-7; 31:15, 16; Apokalypsy 2:14.

3. Ino ivolan̈ana fa nahomby tetiky Balama in̈y?

³ Nahomby ma tetiky Balama zen̈y? Nisy Israelita 24 000  ripaka, fotony iro “nijangajanga tamindro man̈angy moabita” aby io, baka io nivavaka tamy Balany Peora, zan̈ahariny Moabita. Iro tsy vitany nanompo zan̈ahary tsisy dikany io fa narehandro koa fombafomba fanompoan̈a misy ifandraisany amy firaisan̈a. Iro tamy zen̈y efa narikitry Tany Nampan̈antinain̈y. Antambo tsisy ambaka zay!—Nomery 25:1-9.

4. Ino nahavy Israelita andrivony voataon̈o hijangajanga?

⁴ Ino nahavy iro voataon̈o hijangajanga? Fotony iro nanjary nanan̈a fo ratsy. Iro niala tamy Jehovah, Zan̈ahary nitondra iro baka ta Ezipta, kanefa Jehovah nan̈amia hanin̈y iro taminy iro tamy tany paiky tan̈y. Izy koa nitariky iro firaka iro navy tamy lemaka io, efa marikitry Tany Nampan̈antinain̈y. (Hebreo 3:12) Zen̈y nahavy Paoly nivolan̈a: “Mitandrema tsao anaro hijangajanga, karaha nataonolo sasany tamindro in̈y nijangajanga, ke nisy ropolo telo amby arivo naty.” *—1 Korintianina 10:8.

5, 6. Nan̈ino ma mahatsara atsika mandiniky tantarandro Israelita tamy Lemaka Moaba in̈y?

⁵ Ino raha ianarantsika baka amy tantara io? Efa hely fotoan̈a tavela hidirantsika amy tany paradisa ho avy io. (1 Korintianina  10:11) Mbala ratsy mandilatra iro Moabita aby io olo amy donia ty, fotony iro io efa adalany firaisan̈a. Isaka taon̈o, andrivony Kristianin̈y voataon̈o hijangajanga. Mbala maisa nahavoa iro Israelita aby io fo nahavoa iro. (2 Korintianina 2:11) Tsy nen̈atra foeky Zimry nitsakatsaka tobindro Israelita aby io, nitondra man̈angy midianita tamy tran̈olainany. Amy zioty, misy olo amy fiangonan̈a koa mitaon̈o naman̈a hijangajanga.—Nomery 25:6, 14; Joda 4.

⁶ Efa karaha amy Lemaka Moaba koa atsika. Hely tavela, hanjary paradisa tany ty. Ataova raha tsy hialanao amy fitiavany Zan̈ahary, ke “milifisa fijangajangan̈a.”—1 Korintianina 6:18.

7, 8. Ino ma “fijangajangan̈a” zen̈y? Ino ivolan̈ana fa mandrora mantsilan̈y olo araiky izikoa mijangajanga?

⁷ Dikany “fijangajangan̈a” zen̈y amy volan̈a griky, pôrneia. Amy Baiboly ao, izio ivolan̈ana karazan̈a firaisan̈a jiaby ataonolo tsy fivadiany man̈oloan̈a Zan̈ahary. Mijangajanga olo araiky izikoa mandiadia vady, man̈ano makorely, man̈ano firaisan̈a aminolo tsy vadiny (an̈isanizen̈y fan̈anovan̈a firaisan̈a amy vava ndreky lavabody), baka io manafosafo mahalelahy ndreky mahaman̈angy aminolo tsy vadiny. Mijangajanga koa lelahy manambady lelahy, na man̈angy manambady man̈angy, na olo manambady biby. *

⁸ Mazava raha koran̈iny Baiboly: Tsy iken̈y ho an̈isany fiangonan̈a olo man̈ano raha aby io, sady tsy hahazo fiain̈ana mandrakizay. (1Korintianina 6:9; Apokalypsy 22:15) Rango izio, iro efa mijinja vokatra raha ratsy ataondro. Iro mahatsiaro ten̈a tsisy dikany, tokantran̈ondro mikorontan̈a, iro injehiny eritreritry. Sasany ndraiky mahazo vesatra tsy nirin̈y, azony aretin̈y, na mety hofoaty foeky. (Vakia  Galatianina 6:7, 8.) Ke raha efa hay tsy manjary karaha zen̈y mbala hidiran̈a fo? Mampalahelo fa maro olo tsy mandiniky lavitry ke nanjary tafan̈ano raha karaha zen̈y, baka amy fizahan̈a sary vetaveta fo.

9. Ino maharatsy mizaha sary vetaveta?

⁹ Ahitan̈a sary vetaveta aby, na amy tany fivarotan̈a boky na amy lamoziky, na amy tele na aminy Internet. * Maro olo mivolan̈a fa tsy mampan̈ino mizaha sary vetaveta. Tsy marin̈y zen̈y! Izikoa olo araiky zatra mizaha sary vetaveta, izy mety ho loso zatra manafosafo mahalelahy na mahaman̈angy izy. Tsy ho voafehiny eky ‘fan̈irian̈any nofotro mampamen̈atra’ zen̈y, ke mety hanjary adalany firaisan̈a izy, na han̈iry han̈ano raha tsy manjary. Hikorontan̈a tokantran̈onany, na mety hisaraka foeky iro fivadiany. * (Romanina 1:24-27; Efesianina 4:19) Nisy manampahaizan̈a nivolan̈a fa mira kansera fan̈irian̈anolo adalany firaisan̈a io. Karaha ty nambarany: ‘Mahaimitombo ndreky miparitaka izio, ke mahalan̈a fo izio vo mihen̈y. Sarotro tahan̈a foeky aretin̈y io.’

10. Karakory han̈arahantsika toro lalan̈a amy Jakoba 1:​14, 15? (Zahava koa efajoro “ Nahazo Angovo ke Nanjary Nadio Fitondranten̈a.”)

¹⁰ Amy Jakoba 1:14, 15 mivolan̈a fa ‘raha irinolo fo mitsapa jerinany, ke zen̈y mamandriky izy, fotony raha irin̈y io koa tsy adoso an̈aty jery, manjary fahotan̈a. Fahotan̈a io koa tantirahin̈y, manjary fahafatesan̈a.’ Izikoa misy fan̈irian̈a ratsy mihelan̈a amy jerinao, adosoa malaky! Anao koa sendra mahita sary vetaveta: Avilia masonao, na vonia ordinateranao, na ovoa programo zahanao amy tele. Ataova fo  raha hahavy anao tsy ho resiny fan̈irian̈a maloto io. Aza miambin̈y izio efa tsy voafehinao vo han̈ano raha!—Vakia Matio 5:29-30.

11. Izikoa misy fan̈irian̈a ratsy sendra mandalo amy jerinao, akory han̈aboahanao fa anao matoky Jehovah?

¹¹ Jehovah mahay atsika mandilatra ain̈intsika tompiny. Misy antony matoa izy man̈iraka atsika ‘hamono raha jiaby mety hitariky rantsambatan̈antsika hijangajanga, han̈ano fahalotoan̈a, han̈iry han̈ano raha tsy manjary, han̈iry han̈ano ny ratsy, ndreky han̈iry mare raha tsy mety ho azonaro, fotony manompo sampy olo man̈iry raha karaha zen̈y.’ (Kolosianina 3:5) Mety tsy ho mora man̈ano zen̈y, kanefa Jehovah Babantsika io ten̈a tia atsika sady mahambindraha, ke atsika mety mivavaka aminany. (Salamo 68:19) Izikoa misy fan̈irian̈a ratsy mihelan̈a amy jerinao, mivavaha baka  Jehovah han̈amia anao “angovo fan̈ampiny.” Avilia amy raha hafa jerinao.—2 Korintianina 4:7; 1 Korintianina 9:27; zahava efajoro “ Akory Hialako amy Raha Ratsy Mahazatra Zaho?”

12. Ino ma raha tiany Soratra Masin̈y koran̈iny amy ‘fo’ io? Nan̈ino ma fontsika io tsy maintsy arovantsika?

¹² Panjaka Solomona nivolan̈a: “Arova fonao, mandilatra raha hafa jiaby tokony harovan̈a, fotony baka amy fo ao loharanony fahin̈ana io.” (Ohabolana 4:23) Ny maha atsika atsika eraka fahitany Zan̈ahary atsika raha tiany koran̈iny amy ‘fo’ io. Miankiny amy fahitany Jehovah fontsika io hazahoantsika na tsy hazahoantsika fiain̈ana mandrakizay, fa tsy miankiny amy fahitanolo atsika. Zahan̈a karaha tsotra koran̈a zen̈y, kanefa ten̈a matomboko. Nisy lelahy araiky tsy nivadiky taloha tan̈y nan̈ambela modely tsara arehantsika. Joba an̈arany. Izy nan̈ano fan̈ikian̈a tamy masony, baka izy tsy hizaha man̈angy hafa ke han̈iry han̈ano firaisan̈a aminany. (Joba 31:1) Nitovy tamy raha nataony Joba zen̈y koa nataony panoratra salamo. Izy koa fa nivavaka, karaha ty nambarany: “Aza ambela hizaha raha tsisy dikany masonaka.”—Salamo 119:37.

13. Azovy ma Dina io? Ino ivolan̈ana fa tsy nahay nifidy naman̈a izy?

¹³ Hitantsika tamy Toko faha-3 fa mety handrisiky atsika han̈ano ny tsara na han̈ano ny ratsy namantsika. (Ohabolana 13:20; vakia 1 Korintianina 15:33.) Aleva onon̈o Dina zanaka Jakoba. (Genesisy 34:1) Raimandreniny Dina nifen̈y nitarimy izy tamy lalan̈a tsara, fa izy tsy nitandrin̈y. Iro tsaiky man̈angy kananita aby io nataony naman̈a, kanefa iro io nalaza ratsy fitondranten̈a, karaha iro Moabita aby io fo. (Levitikosy 18:6-25) Karaha tsaiky man̈angy mora hangolen̈y fahitandro lelahy kananita aby io Dina. An̈isanizen̈y Sekema, lelahy ‘farany nanankaja tamy zanaka babany.’—Genesisy 34:18, 19.

14. Ino raha nahazo Dina, izy koa fa tsy nahay nifidy naman̈a?

 ¹⁴ Tamy voanalohany Dina nahita Sekema, izy tsy nieritreritry hijangajanga taminany. Fa Sekema ndraiky, niaraka izy nahita Dina efa firaisan̈a edy raha tan̈aty jerinany, karaha lelahy kananita jiaby fo. Efa tara loatra Dina nanohitry! Koran̈iny Baiboly fa “nalainy” Sekema izy, baka io “naholany.” Tafaranizen̈y Sekema nanjary “tia” Dina mare fa zen̈y tsy nan̈ova raha ratsy vitany taminany. ( Vakia Genesisy 34:​1-4.) Baka tamy raha nataony zen̈y nahavy babany ndreky ry havany tojy raha manahiran̈a. Maro koa olo tatrany raha karaha zen̈y fa tsy Dina zaraiky fo.​—⁠Genesisy 34:​7, 25-31; Galatianina 6:​7, 8.

15, 16. Karakory tokony hataontsika izikoa tiantsika hahazo fahendrena baka amy Jehovah? (Zahava koa efajoro “ Andininy Tsara Iritriretin̈y.”)

¹⁵ Efa tara loatra Dina vo tontohitry. Tsy karaha zen̈y ndraiky olo tia Jehovah. Iro mifidy naman̈a mandrisiky iro han̈ano ny tsara, fotony iro man̈araka volan̈a Zan̈ahary. (Ohabolana 13:20a) Zen̈y koa nan̈ampy iro hahay tsarabe raha karakory ma “tsara” zen̈y, ke iro tsy tojy raha  mampalahelo ndreky manahiran̈a karaha navoa Dina in̈y.—Ohabolana 2:6-9; Salamo 1:1-3.

¹⁶ Izikoa atsika tsy voly mivavaka, mianatra Baiboly ndreky boky na gazety baka amy panompo atokisan̈a, atsika hahazo fahendrena baka amy Jehovah. (Matio 24:45; Jakoba 1:⁠5) Fan̈ampinizen̈y koa, atsika mila manetry ten̈a, baka io man̈araka torohevitry Zan̈ahary amy Baiboly ao. (2 Mpanjaka 22:​18, 19) Baiboly mivolan̈a fa ‘fo io mamitaka sady  sarotro fihezin̈y.’ Mety hitovy hevitry amy zen̈y atsika. Fa karakory hataontsika izikoa misy olo man̈amia torohevitry atsika? Izikoa atsika manetry ten̈a ankitin̈y, atsika von̈ono fo han̈araka anatra amian̈a atsika zen̈y.​—⁠Jeremia 17:⁠9.

17. Ino ma raha mety hanahiran̈a raimandreny sasany koa fa mananjanaka efa bebe? Man̈ameza ohatra. Karakory mety han̈ampiany babany izy handiniky tsarabe?

¹⁷ Ohatra izio misy tsaiky man̈angy mangataka lalan̈a amy babany hitsangatsangan̈a miaraka amy tsaiky lelahy araiky tiany, fa babany tsy man̈eky. Izy mety hivolan̈a: ‘A Papa, anao ma tsy matoky zaho? Zahay kony tsy han̈ano raha tsy manjary e!’ Marin̈y ndraiky fa izy mety ho tia Jehovah sady von̈ono hitandrin̈y, kanefa ho mora aminany edy ‘hilefa fijangajangan̈a’ zen̈y? Tsao mba “matoky fonany” fo izy, ke tsy ‘fahendrena’ baka amy Jehovah mibeko sain̈inany! Izikoa zen̈y raha misy, tsy misain̈y izy. (Ohabolana 28:26) Ke asa ino toro lalan̈a hitanao fa mety han̈ampy iro roe mianaka io handamin̈y raha manahiran̈a iro zen̈y?—Zahava Ohabolana 22:3; Matio 6:13; 26:41.

18, 19. Ino raha nitsapa jery Josefa, kanefa karakory nataony?

¹⁸ Josefa an̈isany anadahiny Dina, baba araiky aminany. Josefa ten̈a tia Jehovah. (Genesisy 30:​20-24) Taminy izy mbala hely, hitany alahelony babany ndreky ry havany baka tamy raha nataony Dina in̈y. Tsy nadin̈any foeky raha nandalo zen̈y, ke niaro izy raha zen̈y izy koa fa nipetraka ta Ezipta. “Isanandra”, vadiny Potifara sefonany nitaon̈o izy hoandry hiaraka aminany, kanefa izy tsy afaka niala taminy asanany fotony izy andevo. Karakory nataony Josefa? Izy tsy nan̈eky han̈ano firaisan̈a tamy vadiny Potifara, fotony izy tsy tihiala tamy fitiavany Zan̈ahary. Izy nandiniky tsarabe raha handeha hataony fa izy tsy navozo foeky. Farany, izy nilefa.—Vakia Genesisy 39:7-12.

¹⁹ Izikoa tsy nafaka tamy jeriny Josefa man̈angy io, na koa izy zatra nan̈inofinofy momba firaisan̈a, mety  tafijangajanga izy. Tsy zen̈y raha nataony fa nadosony tan̈aty jerinany foeky eritreritry maloto zen̈y, fotony izy tiany ho tsara fihavan̈ana tamy Jehovah. Zen̈y nahavy izy nivolan̈a tamy vadiny Potifara: “Sefonaka efa tsy miasa loha amy raha antran̈o ato foeky, fotony fanan̈ananany jiaby efa nankininy taminaka. Tsisy olo manan̈a fahifan̈a mandilatra zaho an̈atiny tran̈o ty. Sefonaka tsy nandrova zaho hikasiky raha jiaby ato, izikoa tsy anao fo, fotony anao vadiny. Ke hataoko akory han̈ano raha ratsy be zen̈y, ke hanota amy Zan̈ahary?”—Genesisy 39:8, 9.

20. Ino hatsaran̈a nazony Josefa, izy koa fa tsy nivadiky tamy Jehovah?

²⁰ Josefa tsy tankilany babany ndreky ry havany, kanefa isanandra izy nifen̈y fo tsy nivadiky tamy Jehovah. Zen̈y nahavy Jehovah ravoravo taminany. (Ohabolana 27:11) Nigadra Josefa, kanefa Jehovah nan̈ano raha baka izy afaka gadra. Izy nanjary nanan̈a fahifan̈a man̈arakaraka panjaka, ke andraikitrinany nikarakara raha mifototro firasan̈a hanin̈y ta Ezipta tan̈y. (Genesisy 41:​39-49) Izikoa fa dinihin̈y tantarany Josefa zen̈y, marin̈y ankitin̈y raha volan̈iny Salamo 97:10 ty: ‘Anaro tia Jehovah, aza tia raha ratsy. Jehovah miaro olo tsy mivadiky aminany, ndreky man̈avotro izy tsy ho azonolo ratsy fan̈ahy.’

21. Ino raha nataony rahalahy tanora araiky izikoa fa nisy nitaon̈o izy hijangajanga?

²¹ Amy zioty, maro amy panompony Jehovah nahavita  nan̈aboaka fa ‘halandro raha ratsy, baka io tiandro raha tsara.’ (Amosa 5:15) Nisy rahalahy tanora araiky mipetraka an̈y Afrika nivolan̈a fa nisy tsaiky man̈angy lekoly araiky taminany nampan̈anten̈a han̈ano firaisan̈a taminany, izikoa izy man̈eky han̈ambara valiny fan̈adin̈ana matematiky nataondro. Karaha ty nambarany: “Zaho tsy nan̈eky foeky. Zaho tsy nivadiky ke vitako fo nan̈aboaka taminolo fa zaho man̈aja ten̈a ndreky atokisan̈a. Tsisy raha atakaloko zen̈y, na volamena na volafotsy.” Mety ho ‘ravoravo betibety’ olo araiky izikoa manota, kanefa mihelan̈a fo haravoan̈a zen̈y, fotony izy hijaly fo. (Hebreo 11:25) Tsisy dikany haravoan̈a mandalo zen̈y, izikoa ampitovisin̈y aminy hasambaran̈a maharitry azontsika izikoa man̈araka lalàn̈any Jehovah.—Ohabolana 10:22.

22, 23. a) Olo araiky koa ma nan̈ano fahotan̈a maventy, izy efa tsy avotro eky? Hazavà. b) Azovy afaka man̈ampy izy amy raha zen̈y?

²² Izikoa tiantsika han̈ano raha mahitsy man̈oloan̈a Zan̈ahary, atsika mila mifen̈y fo baka tsy ho resiny fan̈irian̈any nofotro, fotony atsika tsy lavorary. (Romanina 7:21-25) Hainy Jehovah raha zen̈y, fotony “tsaroany fa atsika io fotaka.” (Salamo 103:14) Kristianin̈y araiky koa nan̈ano fahotan̈a maventy, izy tsy maintsy hijinja raha nataony. Zen̈y tsy mivolan̈a fa izy efa tsy avotro eky. Jehovah ‘von̈ono hamafa helokonany’ izikoa izy manen̈iny ke ‘man̈ambara hadisovan̈anany’, karaha nataony Panjaka Davida in̈y.—Salamo 86:5; Jakoba 5:16; vakia Ohabolana 28:13.

²³ Jehovah ten̈a tsara fan̈ahy amintsika. Izy mampiasa iro piandraikitry amy fiangonan̈a han̈ampy atsika hihavan̈a tsarabe aminany. (Efesianina 4:8, 12; Jakoba 5: 14, 15) Tanjon̈ondro io han̈ampy atsika hanan̈a ‘fahendrena’ baka amy Zan̈ahary, ke tsy han̈ampody fahotan̈a vitantsika in̈y eky.—Ohabolana 15:32.

24, 25. a) Nan̈ino ma atsika mivolan̈a fa “tsy misain̈y” tsaiky lelahy koran̈iny Baiboly aminy Ohabolana 7:6-23? b) Ino tokony hataontsika izikoa tiantsika hanan̈a fahaizan̈a misain̈y?

²⁴ Misy karazanolo aroe koran̈iny Baiboly: Olo “tsy misain̈y” ndreky olo ‘misain̈y.’ (Ohabolana 7:7) Olo “tsy misain̈y” zen̈y olo mbala tsy maro raha nandalovan̈a tamy fiain̈ana na mbala tsy matotro, tsy mahay mandanjalanja, baka io tsy mahay man̈avaka ny tsara ndreky ratsy. Olo karaha zen̈y mety tafan̈ano fahotan̈a maventy, izikoa fa misy raha mitsapa jerinany, karaha tsaiky lelahy volan̈iny Ohabolana 7:6-23 in̈y. Olo ‘manan̈a fahaizan̈a misain̈y’ ndraiky mandiniky tsarabe koa fa man̈ano raha. Isaka izy hianatra Baiboly, izy mivavaka fo. Mitandrin̈y koa izy baka hadio fo eritreritrinany, fan̈irian̈anany, fihetsehamponany, baka io tanjon̈onany. Izikoa atsika mifen̈y fo hanan̈a fahaizan̈a misain̈y, zay raha ataontsika hahomby, ke ho maro “hatsaran̈a” ho azontsika.—Ohabolana 19:8.

²⁵ Ty fan̈ontanian̈a tsara dinihinao: ‘Zaho ty ma ten̈a resy lahatra fa marin̈y ankitin̈y fitsipiky Zan̈ahary? Zaho ty ma mba mino fa tsisy raha mampasambatra eky izikoa tsy man̈araka volan̈a Jehovah?’ (Salamo 19:8; Isaia 48:17, 18) Izikoa mbala misy raha mampisalasala anao momba fan̈ontanian̈a aby io, ndray hely fo, mangala onondraha. Diniha tsarabe ino maharatsy tsy man̈araka lalàn̈any Zan̈ahary. Areha fo volan̈a Jehovah, ke raha marin̈y, mahitsy, madio, mampatsaratsara, ndreky misy hatsaran̈a fo iritrireta. (Salamo 34:⁠8; Filipianina 4:​8, 9) Izikoa anao man̈ano zen̈y, hitombo fo fitiavanao Jehovah. Zen̈y koa handrisiky anao ho tia raha tiany Jehovah ndreky tsy han̈ano raha halany. Olo tsy lavorary mira atsika fo Josefa, kanefa nahavita ‘nilefa fijangajangan̈a.’ Toro lalan̈a Jehovah fo nambelany hitariky izy, ke zen̈y nan̈ampy izy hanan̈a fahaizan̈a misain̈y. Irarian̈a koa anao han̈ano karaha zen̈y koa! ​—⁠Isaia 64:⁠8.

26. Ino raha maventy hidinihintsika amy toko fan̈araka ty?

 ²⁶ Jehovah koa fa namoron̈o raha mahalelahy ndreky mahaman̈angy, tsy raha nataony hazahoan̈a fahafinaretan̈a fo fa baka olo fivadiany ho afaka hiteraka ndreky hankafỳ firaisan̈a aranofo. (Ohabolana 5:18) Hidinihintsika amy toko fan̈araka ty karakory fahitany Jehovah fanambadian̈a.