Koran̈a handeha aminaro tia Jehovah

Jesosy nivolan̈a: “Anaro hahay ny marin̈y, ke ny marin̈y io hankafaka anaro.” (Jaona 8:32) Mankahery atsika volan̈a zen̈y, fotony “aminandra farany” izioty, vandy zen̈y efa nanjary raha mahazatra olo. (2 Timoty 3:1) Asa azonao onon̈o raha namparesy lahatra anao fa marin̈y raha nianaranao tamy Baiboly? Misaora ravo­ravo mare anao tamy zen̈y!

Marin̈y ndraiky fa ilain̈y mahay ny marin̈y amy Baiboly ao ndreky mikoran̈a izio aminolo, kanefa tsy ampy zen̈y. Raha ataontsika koa tokony hifan̈araka amy raha nianarantsika. Dikanizen̈y, atsika tsy tokony hiala amy fitiavany Zan̈ahary. Ino ma dikany tsy miala amy fitiavany Zan̈ahary zen̈y? Karaha ty nambarany Jesosy talohany izy naty: “Anaro koa man̈araka didinaka, anaro tsy hiala amy fitiavako, karaha ataoko man̈araka didiny Babako ndreky tsy ialako amy fitiavany.”—Jaona 15:10.

Aleva onon̈o baka raha nikoran̈iny Jesosy. Izy nan̈araka didiny Babany, ke zen̈y nahavy izy tsy niala tamy fitiavany Zan̈ahary. Karaha zen̈y koa atsika aminandra izioty. Mbala tamy fotoan̈a io fo koa Jesosy nivolan̈a: “Izikoa hainaro raha jiaby zen̈y, ke arehanaro, anaro ho sambatra.”—Jaona 13:17.

Matoky zahay fa boky ty han̈ampy anaro han̈ano raha mifan̈araka amy toro lalan̈a amy Baiboly sady tsy hiala amy ‘fitiavany Zan̈ahary ndreky hitsinjo fiain̈ana tsisy farany.’—Joda 21.