1. Karazany aroe fo fivavahagna volagnin’ny Baiboly. Ino aby irô io?

“MIDIRA amy varavaragna tery”, nambaran’i Jesosy, “fôtony maventy salakady malalaka lalagna mengo amy fahafataisagna, kay maro olo magnaraka izy. Fa maletry varavaragna salakady tery lalagna mengo amy fiaignana, kay vitsy fo olo mahita izy.” (Matio 7:13, 14) Izikoa Baiboly zahagna, karazany aroe fo fivavahagna: araiky marigny, araiky diso; araiky mengo amy fiaignana, araiky mengo amy fahafataisagna.

2. Akôry agnambaran’ny Baiboly mazava fa tsy fivavahagna jiaby maharavoravo Zagnahary?

² Maro olo mieritreritry fa iken’ny Zagnahary fivavahagna jiaby. Ty misy toko ndraiky andininy ahitagna fa tsy marigny zegny:

• “Zanakan’Israely aby io nagnano raha tsy tian’i Jehovah ndraiky. Irô nanompo Bala ndraiky Astarta zagnaharin’ny Syria, ndraiky zagnaharin’ny Sidaona, ndraiky zagnaharin’ny taranakan’ny Moaba, ndraiky zagnaharin’ny Amaona, boaka iô zagnaharin’ny Filistiny. Irô niala Jehovah, kay tsy nanompo izy eky. Namparin’i Jehovah tamin’Isiraely amizay helokonany.” (Mpitsara 10:6, 7) Kay izikoa atsika manompo sampy na zagnahary hafa fa tsy Jehovah, atsika tsy hahazo rady.

• “Olo aby ty magnamia voninahitry zaho [Zagnahary] amy sognin-drô fo fa fôn-drô ndraiky lavitry zaho. Tsisy varany irô manompo zaho izikoa fampianaragnan’olombelogno fo araihan-drô.” (Marka 7:6, 7) Izikoa misy olo mivolagna manompo Zagnahary kanaifa mampianatra hevitrinany tômpony fa tsy raha volagnin’ny Baiboly, tsisy varany fivavahagna ataony. Tsy iken’ny Zagnahary fivavahagnany.

• “Fagnahy Zagnahary, kay zay olo mivavaka aminany tsy maintsy mivavaka amy fagnahy ndraiky fahamarignana.” (Jaona 4:24) Faomba fivavahatsika tsy maintsy mifagnaraka amy fahamarignana amy Saoratra Masigny.

3. Ino faomba araiky agnavahagna fivavahagna marigny ndraiky diso?

³ Akôry ahaizatsika fa iken’ny Zagnahary na tsy ikeny fivavahagna araiky? Jesosy nivolagna karaha ty: “Kakazo tsara jiaby magnamia voany tsara, fa kakazo ratsy ndraiky ratsy voany. ... Kay boaka amy voany hahaizanarô izy.” Dikan’izegny, fivavahagna izikoa boaka amy Zagnahary, tsara voany, fa izikoa boaka amy Satana ndraiky, ratsy voany.—Matio 7:15-20.

4. Ino toetry tôkony hanagnan’ny mpivavaka amy Jehovah?

⁴ Fivavahagna marigny tôkony hamoa olo mifankatia, fôtony Jehovah be fitiavagna. Jesosy nivolagna: “Boaka amy zegny ahaizan’olo fa anarô mpianatranakahy marigny, izikoa mifankatia.” Mba magnaraka zegny edy fivavahagna aby iziôty?—Jaona 13:35; Lioka 10:27; 1 Jaona 4:8.

5. Akôry ikoragnan’ny boky araiky fivaraotagna andevo afirikanigny?

⁵ Iritriraita fivaraotagna andevo afirikanigny. Mivolagna karaha ty Rakipahalalagna Britannica (angiley): “Kadiriny 18 000 000 iô Afirikanigny nalaifa tamy fivaraotagna andevo nataon’ny Silamo, namakivaky Sahara ndraiky Océan Indien, tagnailagnailagna taogno 650 ndraiky 1905. Irô Erôpeanigny aby io nanomboko nangala andevo tagny tamy moron-dranomasigny andraifan’ny Afiriky tagny, tagnitagny amy taogno 1475 tagny, kay Afirikanigny 7 000 000 ziska 10 000 000 iô nalaifa andevo tan’Ameriky tamy 1867.”

6. Karakôry natafiditry fivavahagna tamy fivaraotagna andevo?

 ⁶ Nisy lelahy, magnangy ndraiky tsaiky afirikanigny maro nalaigna faorise tan-tragnon-drô tagny, nadoso tamy fianakaviagnany, nivahaoragna silisily, nasiagna lamariky tamy vy may laharan-drô, nivangaigny ndraiky nalafo karaha biby. Nino ndraiky raha nataon’ny fivavahagna tamy zegny? Bethwell Ogot, tamy gazety Firenena Isan’andra (angiley) a Nairobi, Kenya, nanaoratra karaha ty: “Kristianigny ndraiky Silamo samy mino fa olombelogno araiky fo. Kanaifa irô fo nahavy fiaraha-monigny misy andevo ndraiky fagnavakavahagna razagnan’olo. ... Tsy maintsy ikentsika fa samy diso na Silamo na Kristianigny, Tandraifa ndraiky tagny Moyen-Orient, boaka iô toetry tsara tsy niraharahian-drô, kay izegny nahavy Afirikanigny nijaly tsisy ambak’izy.”

7. Nino anjaran’ny fivavahagna tamin’ady?

⁷ Fivavahagna diso nagnaboaka tamy faomba hafa koa fa ratsy voany. Baiboly mivolagna: “tiava namanao.” Mpitaondra fivavahagna tamy tany jiaby ndraiky nanaohagna ady, boaka iô nandrisiky olo hiady.—Matio 22:39.

8. a) Izio ma mpitaondra fivavahagna nandrisiky olo hiady koa tamin’ady an-tragno tan’Afiriky? b) Ino raha nivolagnin’ny pasitaira araiky mikasiky mpitaondra fivavahagna tamin’ady an-tragno ta Nizeria?

⁸ Nalaza ta Rwanda tamy 1994 fa nisy masaira ndraiky praitara agnisan’ny namono olo. Fivavahagna koa niditry laligny tamin’ady. Tamin’ady an-tragno ta Nizeria, mpitaondra fivavahagna tamin’andagniny ndraiky ankilany samy nandrisiky olon-drô hifamono. Nisy pasitaira araiky nivolagna fa “nambailan’ny mpitaondra fivavahagna asa namian’ny Zagnahary irô”, izikoa fa nitohy ady  io. Mbala nivolagna karaha ty koa izy: “Atsika mivolagna atsika mpanompon’ny Zagnahary kanaifa atsika nanjary mpanompon’i Satana.”

9. Ino koragnin’ny Baiboly mikasiky mpanompon’i Satana?

⁹ Baiboly koa mivolagna raha miragna zegny: “Ndray Satana fo mahay magnaova saoranany karaha anjelin’ny mazava. Kay tsy mahagaga izikoa mpanomponany koa miaboko mpanompon’ny fahamarignana.” (2 Korintianina 11:14, 15) Karaha ataon’olo araiky manitriky raha ratsy ataony magnano sary olo tsara, Satana koa mamitaka olo. Mampiasa mpanomponany izy, ataony karaha olo marigny irô, kanaifa raha ataon-drô ratsy, boaka irô mamoa voa ratsy.

10. Ino antony ivolagnana fa tsy magneky Zagnahary irô mpitaondra fivavahagna aby io?

¹⁰ Mpitaondra fivavahagna mikoragna fifankatiavagna, filaminagna, fahatsaran’ny toetry, kanaifa irô ndraiky tsy fankatia, miady boaka iô ratsy toetry. Mazava volagna Baiboly mikasiky irô: “Amin’olo maro irô mivolagna mahay Zagnahary, kanaifa ndraiky amy raha ataon-drô irô tsy magneky izy.”—Titosy 1:16.

11. Akôry ikoragnan’ny Baiboly fivavahagna diso?

¹¹ Amy bokin’Apokalypsy, amy Baiboly, ahitatsika hevitry Jehovah mikasiky fivavahagna diso. Ampitovisiny amy magnangy izio, “Babylaony Be” ikahiany izy. (Apokalypsy 17:5) Karaha ty faomba nagnambaran’i Jehovah mikasiky izy:

• “Magnangy makorely be misengy ... amy mpanjakan’ny tany igny.” (Apokalypsy 17:1, 2) Nivadiky tamy Zagnahary fivavahagna diso fôtony irô magnano pôlitiky ndraiky mikomandy mpitaondra fanjakagna.

• “Hita taminany tao lion-drô mpaminagny ndraiky nin-drô olo masigny jiaby nivoneny tambony tany.” (Apokalypsy 18:24) Fivavahagna diso nampijaly ndraiky namono mpanompon’ny Zagnahary sady irô taigna sefon’ny famonoagna olo mandaiha an-tapitrisany tamin’ady.

• “Niposy taigna izy sady farany manan-draha tsara eky tamy fiaignananany; sanjinany aifa dila loatra, kanaifa tsy mahamaignatra izy.” (Apokalypsy 18:7) Fivavahagna diso mpagnarivo, karaha zegny koa mpitaondra fivavahagna amin-drô ao.

• ‘Aody ratsinany hamitahany olo.’ (Apokalypsy 18:23) Fivavahagna diso mampianatra raha diso, fôtony irô mivolagna fa fagnahy tsy maty. Kaila nahay maro olo magnano aody, mamôriky, mavozo olo maty, manompo razagna.

12. Ino fampitandraimagna amaizan’ny Baiboly atsika mikasiky fivavahagna diso?

¹² Baiboly mampitandrigny mare fa tôkony hiala amy fivavahagna diso olo mbala agnaty ao. Karaha ty volagniny: ‘Anarô olonakahy mialà aminany beky anarô tsy avoa raha mahazo izy.’—Apokalypsy 18:4, 5.

13. Karakôry hiafaran’ny fivavahagna diso ndraiky mpagnarak’izy?

¹³ Teteky iô, Babylaony Be, fitambaran’ny fivavahagna diso airan-tany, ravagniny tsisy tavaila. Karaha ty volagnin’ny Baiboly: “Kaila fahafataisagna, alahelo, mosary amin’andra io, boaka iô koa izy ho ravagna môtro, fôtony fatatra tsarabe Zagnahary Jehovah nitsara izy.” (Apokalypsy 18:8) Kay izikoa tsy tiatsika avoa raha miaraka aminany, tsy maintsy misaraka aminany atsika, kaila tsy magnano raha fataony foeky, karaha ataon’ny fety ndraiky finoagna tsy maharavoravo Zagnahary. Tsy tôkony mangatak’andra eky atsika hagnano zegny fôtony miankigny amy zegny faignanatsika!—2 Korintianina 6:14-18.