LESON 26
Nan̈ino ma Misy Jaly Ndreky Raha Ratsy?
Izikoa fa misy raha ratsy mandalo, matetiky fan̈ontanian̈a avy an̈aty jery “nan̈ino”? Ravoravo atsika, fotony mazava valinizio amy Baiboly ao!
1. Akory nataony Satana nampiditry jaly ambony tany?
Satana Devoly nivadiky tamy Zan̈ahary. Satana tihanjaka aminolo jiaby, ke nifitahiny Adama ndreky Eva, olo voanalohany niasainy Zan̈ahary. Satana navandy taminy Eva. (Genesisy 3:1-5) Nataony raha nahavy Eva hieritreritry fa mbala misy raha tsara tsy namezany Zan̈ahary iro. Tihivolan̈a Satana fa ho sambatra olo, izikoa tsy man̈araka volan̈a Zan̈ahary. Navandy Satana ke nivolan̈a taminy Eva fa iro tsy hofoaty. Io vandy voanalohany. Ke zen̈y nahavy Baiboly mivolan̈a fa Satana io “tsy vitany pavandy fo fa izy koa babany vandy.”—Jaona 8:44.
2. Ino safidiny Adama ndreky Eva?
Jehovah tsy natity taminy Adama ndreky Eva. Izy nivolan̈a fa iro mahazo mihina voany kakazo jiaby tamy zaridain̈y tao. Araiky fo tsy mahazo hoanin̈y. (Genesisy 2:15-17) Fa iro nanapakevitry nihina voany kakazo io fo. Eva “nangala, baka io nihina.” Adama baka tio “nihina koa.” (Genesisy 3:6) Iro samy tsy nan̈araka volan̈a Zan̈ahary. Iro tamy zen̈y mbala lavorary, ke tsy sarotro tamindro nan̈ano ny tsara. Fa iro kinia tsy nan̈araka volan̈a Zan̈ahary. Nanota iro sady tsy nan̈eky fitondrasan̈anany. Baka tamy fanapahankevitrindro zen̈y nahavy iro nijaly mare.—Genesisy 3:16-19.
3. Nan̈ino misy vokany tamintsika fanapahankevitriny Adama ndreky Eva?
Adama ndreky Eva koa fa nanota, iro tsy lavorary eky, ke taranakandro jiaby tsy lavorary koa. Ho Baiboly momba Adama: “Baka taminolo araiky nidirany fahotan̈a tamy zao tontolo zao. Baka tamy fahotan̈a io nidirany fahafatesan̈a, ke fahafatesan̈a io nahazo olo jiaby.”—Romanina 5:12.
Maro antony mampijaly atsika. Ndraikindraiky baka amy fanapahankevitry ratsy nataontsika na nataonolo hafa koa mahavy izio. Misy koa jaly io baka amy raha tsy ampoizin̈y.—Vakia Mpitoriteny 9:11.
ALEVA ONON̈O
Zahava nan̈ino Zan̈ahary tsy tompinandraikitry amy jaly ndreky raha ratsy erantany io, avio karakory ataony mahita atsika mijaly.
4. Azovy tompinandraikitry amy jaly mahazo atsika?
Maro olo mino fa Zan̈ahary manjaka izioty. Marin̈y ma zen̈y? Alifasa VIDEO io.
Vakia Jakoba 1:13 ndreky 1 Jaona 5:19, avio iaraha dinihin̈y fan̈ontanian̈a ty:
-
Zan̈ahary ma tompinandraikitry amy jaly ndreky raha ratsy io?
5. Zahava vokatrany fitondrasan̈any Satana
Vakia Genesisy 3:1-6, avio iaraha dinihin̈y fan̈ontanian̈a aby ty:
-
Ino vandy nivolan̈iny Satana?—Zahava andininy 4 ndreky 5.
-
Tiany Satana olo hieritreritry fa misy raha tsara tsy amiany Jehovah olonany. Akory nan̈anovany zen̈y?
-
Tiany Satana ma olo han̈eky Jehovah ho Pitondra iro, baka iro ho sambatra?
Vakia Mpitoriteny 8:9, avio iaraha dinihin̈y fan̈ontanian̈a ty:
-
Ino vokany izioty, fotony mbala tsy Jehovah mitondra atsika?
-
A. Adama ndreky Eva lavorary tamy Paradisa. Fa iro nitandren̈y volan̈a Satana ke nivadiky tamy Jehovah
-
B. Tafarany iro nivadiky in̈y, tany jiaby nanjary feno fahotan̈a, jaly ndreky fahafatesan̈a
-
D. Jehovah han̈adoso fahotan̈a, jaly ndreky fahafatesan̈a. Ho lavorary ndraiky koa olo avio hiain̈y amy Paradisa
6. Jehovah mijery jalintsika
Zan̈ahary ma tsy mijery jalintsika? Zahava raha nisoratiny Panjaka Davida ndreky apostoly Petera. Vakia Salamo 31:7 ndreky 1 Petera 5:7, avio iaraha dinihin̈y fan̈ontanian̈a ty:
-
Anao izioty mahay fa hitany Jehovah jaly mahazo anao, avio izy mijery anao, ke ino raha tsapanao?
7. Mbala hadosony Zan̈ahary jaly jiaby io
Vakia Isaia 65:17 ndreky Apokalypsy 21:3, 4, avio iaraha dinihin̈y fan̈ontanian̈a ty:
-
Nan̈ino mankahery atsika mahay fa Jehovah han̈adoso jaly ndreky raha ratsy jiaby vokatrany raha nataonolombelon̈o?
Asa mba hainao?
Satana koa fa nivolan̈a vandy voanalohany in̈y, izy nankaratsy Jehovah. Nataony raha hiheveranolo fa Jehovah io tsy mahay mitondra atsika, avio izy ratsy fan̈ahy. Han̈adio an̈aranany Jehovah tsy ho ela, lera izy man̈adoso jaly jiaby mahazo atsika. Haboakany amy zen̈y fa fitondrasan̈anany farany tsara. Fankamasin̈ana an̈arany Jehovah io raha ten̈a maventy.—Matio 6:9, 10.
MISY OLO MIVOLAN̈A: “Jaly io efa lahatra Zan̈ahary.”
-
Akory hevitrinao?
INO RAHA NIANARANAO TATO?
Satana Devoly ndreky iry Adama ndreky Eva ten̈a fototrony raha ratsy erantany. Ten̈a hitany Jehovah jaly mahazo atsika io, ke efa tsy ela izio hadosony.
Fan̈ontanian̈a Fameren̈ana
-
Ino ma vandy nivolan̈iny Satana taminy Eva?
-
Adama ndreky Eva tsy nan̈araka volan̈a Jehovah, ke ino vokatrany zen̈y tamintsika?
-
Akory ahaizantsika fa hitany Jehovah jalintsika io?
ZAHAVA
Zahava, ino ma dikany fahotan̈a zen̈y amy Baiboly.
Zahava ino raha nivolan̈iny Satana Devoly tamy zaridain̈iny Edena tao.
“Nan̈ino Tsy Adosony Zan̈ahary Jaly Io?” (Tilikambo Fiambesan̈a 1 Zanvie 2014)
Zahava valiny mankahery amy fan̈ontanian̈a sarotro.
Zahava akory nataony lelahy araiky, izy koa fa nahay antony mahavy jaly hitany man̈odidin̈y izy.
Mety ho Tianao Koa
RAHA MATETIKY AN̈ONTANIANOLO
Karakory ma Atao Mianatra Baiboly Zen̈y?
Tsy man̈efa mianatra Baiboly amy Vavolombelon̈o Jehovah. Mety tahominao miaraka mianatra aminao koa havanao ndreky kamaradinao. Lera anao mianatra, anao afaka mampiasa zay fandikanteniny Baiboly tianao.
