LESON 53
Mifidiana Fangalan̈a Diandian̈a Mamparavoravo Jehovah
Jehovah io “Zan̈ahary ravoravo.” (1 Timoty 1:11) Tiany koa atsika ho ravoravo ndreky hankafy fiain̈ana. Tiany izikoa atsika mba manokana fotoan̈a hangalan̈a kajo. Amy leson ty, atsika hahita karakory hataontsika han̈ano fangalan̈a diandian̈a hamparavoravo atsika sady hamparavoravo Jehovah.
1. Ino ma raha tsara dinihintsika izikoa fa hifidy fangalan̈a diandian̈a?
Ino ma fangalan̈a diandian̈a tianao? Sasany midoko antran̈o fo mamaky boky, mitandren̈y hira, mizaha tele, na mizahazaha raha aminy Internet. Sasany ndraiky tia miaraka amy kamarady mandeha laplazy, na misoma baskety. Tsy man̈ino zay fangalan̈a diandian̈a tiantsika, izikoa mifan̈araka amy “raha tiany Tompo.” (Efesianina 5:10) Ten̈a mila man̈ano karaha zen̈y atsika, fotony olo amy donia ty tia mizaha, mitandren̈y ndreky man̈ano fangalan̈a diandian̈a misy hakafirianan̈a, fijangajangan̈a ndreky fifandraisan̈a amy fan̈ahy ratsy. Halany Jehovah raha jiaby zen̈y. (Vakia Salamo 11:5.) Ino ma raha han̈ampy atsika hahay hifidy fangalan̈a diandian̈a?
Izikoa atsika mifidy kamarady tia Jehovah, mandrisiky atsika han̈ano ny tsara iro io, ke han̈ampy atsika hahay hifidy fangalan̈a diandian̈a koa. Efa nianarantsika fa “lan̈iany olo miaraka aminolo misy jery hanjary ho hisy jery.” Fa izikoa ndraiky atsika mikamarady aminolo tsy tia fitsipikiny Jehovah, “hidirany antambo.”—Ohabolana 13:20.
2. Nan̈ino atsika ten̈a mila mandiniky fotoan̈a hilanintsika amy fangalan̈a diandian̈a?
Ndray tsara fangalan̈a diandian̈a fidintsika, mila mitandrin̈y fo atsika tsao be loatra fotoan̈a lanintsika amizio. Atsika koa tsy man̈ano zen̈y, tsy ho hisy fotoan̈a han̈anovan̈a raha ten̈a maventy atsika. Baiboly mivolan̈a fa atsika mila ‘mahay mampiasa fotoan̈antsika tsarabe.’—Vakia Efesianina 5:15, 16.
ALEVA ONON̈O
Diniha akory hataonao hahay hanapakevitry amy fangalan̈a diandian̈a hataonao.
3. Aza man̈ano fangalan̈a diandian̈a tsy manjary
Nan̈ino ma atsika mila mitandrin̈y izikoa fa mifidy fangalan̈a diandian̈a? Alifasa VIDEO io, avio iaraha dinihin̈y fan̈ontanian̈a aby io.
-
Ino mampitovy gladiatera amy fangalan̈a diandian̈a sasany ataonolo izioty?
-
Tamy video in̈y, ino raha nianarany Danny momba fangalan̈a diandian̈a?
Vakia Romanina 12:9, avio iaraha dinihin̈y fan̈ontanian̈a ty:
-
Nan̈ino andininy io man̈ampy anao hahay hifidy fangalan̈a diandian̈a tsara?
Ino aby ma raha sasany halany Jehovah? Vakia Ohabolana 6:16, 17 ndreky Galatianina 5:19-21. Isaka baka mamaky andininy araiky, iaraha dinihin̈y fan̈ontanian̈a ty:
-
Ino amy raha koran̈iny andininy ty ten̈a misy amy fangalan̈a diandian̈a tianolo izioty?
Ino aby fan̈ontanian̈a man̈ampy anao hahay hifidy fangalan̈a diandian̈a?
Man̈ontania ten̈a:
-
Ino? Fangalan̈a diandian̈a hataoko io ma misy raha halany Jehovah?
-
Ombian̈a? Izio ma fananjo amy fotoan̈a tokony han̈anovako raha ten̈a maventy?
-
Azovy? Mety hahavy zaho hifandray aminolo tsy manompo Jehovah ma izio?
Mila mitandrin̈y fo atsika baka tsy ho voa raha. Ke fangalan̈a diandian̈a tiantsika hatao io koa hitantsika fa tsy hahatsara atsika, sitrany atsika tsy man̈ano
4. Mahaiza mampiasa fotoan̈a
Alifasa VIDEO io, avio iaraha dinihin̈y fan̈ontanian̈a ambany io.
-
Rahalahy tamy video in̈y ndray tsy nizaha raha ratsy, nan̈ino nisy vokany taminany fotoan̈a laniny tamizio?
Vakia Filipianina 1:10, avio iaraha dinihin̈y fan̈ontanian̈a ty:
-
Nan̈ino andininy io man̈ampy atsika hanapakevitry amy fotoan̈a lanintsika amy fangalan̈a diandian̈a?
5. Mifidiana fangalan̈a diandian̈a tsara
Ndray maro fangalan̈a diandian̈a tsy mamparavoravo Jehovah, mbala maro fo koa fangalan̈a diandian̈a tsara mety ataontsika. Vakia Mpitoriteny 8:15 ndreky Filipianina 4:8, avio iaraha dinihin̈y fan̈ontanian̈a ty:
-
Ino ma fangalan̈a diandian̈a tsara mba tianao?
Maro fangalan̈a diandian̈a tsara mety hataonao
MISY OLO MIVOLAN̈A: “Tsisy maharatsy fangalan̈a diandian̈a misy olo miady, fitondranten̈a ratsy, ndreky fifandraisan̈a amy fan̈ahy ratsy zen̈y, izikoa anao tsy man̈araka raha ataondro.”
-
Akory fahitanao zen̈y?
INO RAHA NIANARANAO TATO?
Tiany Jehovah atsika ho ravoravo ndreky han̈ano fangalan̈a diandian̈a tsara.
Fan̈ontanian̈a Fameren̈ana
-
Fangalan̈a diandian̈a karakory tsy tokony hataony Kristianin̈y?
-
Nan̈ino atsika tokony hitandrin̈y amy fotoan̈a lanintsika amy fangalan̈a diandian̈a?
-
Nan̈ino atsika mila mifidy fangalan̈a diandian̈a mamparavoravo Jehovah?
ZAHAVA
Diniha azovy tompinandraikitry amy fangalan̈a diandian̈a ataonao.
Ino han̈ampy anao han̈ano fanapahankevitry tsara momba fangalan̈a diandian̈a fidinao?
“Mahatsara Anao ma Fangalan̈a Diandian̈a Ataonao?” (Tilikambo Fiambesan̈a 15 Oktobra 2011)
Zahava amy tantarany lelahy araiky ty, titranany “Nahavita Tsy Nan̈avakavaka Fo Zaho”, akory nataony nan̈ova fangalan̈a diandian̈a nifidiny.
Zahava raha nataony reniny tsaiky araiky baka izy tsy nizaha filma malaza kanefa misy ifandraisany amy fan̈ahy ratsy.
Aza Man̈ano Fangalan̈a Diandian̈a Misy Fifandraisan̈a amy Fan̈ahy Ratsy (2:02)
Mety ho Tianao Koa
RAHA MATETIKY AN̈ONTANIANOLO
Karakory ma Atao Mianatra Baiboly Zen̈y?
Tsy man̈efa mianatra Baiboly amy Vavolombelon̈o Jehovah. Mety tahominao miaraka mianatra aminao koa havanao ndreky kamaradinao. Lera anao mianatra, anao afaka mampiasa zay fandikanteniny Baiboly tianao.
