Anao mety efa nikoran̈a tamy Vavolombelon̈o Jehovah, fotony iro io mety olo fohitanao isanandra fo. Asa iro io mety jiraninao, olo miaraka miasa aminao, na olo miaraka mianatra aminao. Na iro koa efa navy nikoran̈a raha momba Baiboly taminao. Azovy marin̈y ma zahay? Nan̈ino ma zahay mikoran̈a aminolo raha inoanay?

Zahay karaha olo jiaby fo. Zahay ao samy amy tany faviany, samy amy velonten̈anany. Sasany aminay taloha tsy Vavolombelon̈o Jehovah, sasany tsy nino Zan̈ahary zen̈y foeky. Alohany olo araiky hanjary Vavolombelon̈o Jehovah, izy tsy maintsy ampianarin̈y Baiboly. Zen̈y tsy vitany andra araiky. (Asan’ny Apostoly 17:11) Tsy nitiren̈y iro nanompo Jehovah fa amy sitrapo.

Mahatsara zahay man̈araka raha volan̈iny Baiboly. Zahay jiaby ao samy amy raha manahiran̈a izy. Zahay koa mety tafan̈ano raha tsy mety, karaha olo jiaby fo. Ndray izy man̈ano zen̈y, zahay mifen̈y man̈araka toro lalan̈a Baiboly, fotony hitanay fa mahatsara toetry fan̈arahan̈a izio. (Salamo 128:1, 2) Zen̈y mahavy zahay mazoto mikoran̈a aminolo jiaby raha nianaranay tamy Baiboly.

Zahay man̈araka raha koran̈iny Baiboly. Mahatsara fahasalaman̈a ndreky mahasambatra man̈araka raha koran̈iny Baiboly. Izio koa mandrisiky olo hifan̈aja, ho tsara fan̈ahy amy naman̈a, ndreky han̈ano ny marin̈y. Raha jiaby zen̈y mahavy olo tran̈o araiky mifankatia, salama vatan̈a, ndreky mahay mihavan̈a. Zahay koa man̈eky fa ‘Zan̈ahary tsy man̈avaka’, ke zen̈y mahavy zahay tsy man̈avaka olo ndreky tsy man̈ano politiky, na aia na aia tany misy zahay. Zahay ndray samy amy tany faviany, zahay mahay miaraka.—Asan’ny Apostoly 4:13; 10:34, 35.

• Olo karakory ma Vavolombelon̈o Jehovah zen̈y?

• Ino aby ma raha hitanay mahatsara man̈araka raha koran̈iny Baiboly?