Miniminia hely baka ty: Davida nandeha tamy tany tsiary nimboany. Hitany tsy mifan̈araka amy tany andihanany an̈aran̈a lalan̈a ndreky raha hitany. Hainy fa very izy. Tsy maintsy diso lalan̈a fo izy talohaloha tan̈y fa tsy azony onon̈o fo.

Izikoa anao Davida, akory hataonao?

Manan̈a safidy maro anao:

1. A. Man̈ontany lalan̈a olo.

2. B. Mizaha sarintany na mampiasa GPS.

3. D. Manohy mandeha fo, ke man̈anten̈a fa mbala ho hitanao fo lalan̈anao.

Safidy araiky D io farany tsy mahomby.

Sadidy araiky B io ndraiky tsara mandilatra araiky voanalohany io. Fotony na sarintany na GPS samy fitaovan̈a man̈ampy hahitan̈a lalan̈a tokony himboan̈a aby koa fa mandeha lavitry.

Baiboly io koa karaha zen̈y!

Boky ten̈a maro pivanga izio sady mahavita

• man̈ampy anao izikoa fa misy raha manahiran̈a

• man̈ampy anao hahay toetrinao ndreky hanan̈a toetry tsara

• man̈ampy anao hanan̈a fiain̈ana tsara tsisy ambaka izy

Atsika koa fa mahay mivolan̈a, atsika efa tia man̈ontany edy.

• Nan̈ino ma lan̈itry io mahitso e?

• Nan̈ino ma lakintan̈a aby io mipindapinda e?

Atsika koa fa mahaibe, manomboko man̈ontan̈y raha hita amy fiain̈ana.

• Nan̈ino ma tsy sakanany Zan̈ahary raha ratsy?

• Nan̈ino ma olo maty?

Izio ma amy Baiboly ao marin̈y misy valiny fan̈ontanian̈a aby io?

Maro olo mivolan̈a fa Baiboly io raha angano ndreky vandivandy fo, izio zen̈y efa lany daty, tsisy olo zen̈y mahadiniky izio. Kanefa, Baiboly io ma ny ten̈a sarotro, sa raha volan̈inolo momba izio mahavy olo mieritreritry zen̈y? Tsao fo mba diso hevitry iro e?

Sambaranolo amy Baiboly ao baka mivolan̈a fa Zan̈ahary manjaka amy tany ty. Raha mba marin̈y ma zen̈y? Mikorontan̈a mare donia misy atsika ty izioty. Maro raha mampiory ndreky mampijaly. Maro aretin̈y ndreky olo maty, olo masikiny ndreky antambo. Ke Zan̈ahary ten̈a tia atsika io, hampijaly atsika karaha ty?

Azovy ma manjaka amy donia ty? Asa mba tianao hahay valinizen̈y? Mety ho gaga anao koa mahita valiny ambarany Baiboly ao!

Mety efa hitanao tamy bokikely ty fa baka amy Baiboly aby torohevitry jiaby ato. Vavolombelon̈o Jehovah resy lahatra fa efa amy Baiboly ao edy ahitan̈a taridalan̈a azo atokisan̈a, fotony izio “baka amy fan̈ahy masin̈y Zan̈ahary. Natao hampianaran̈a, han̈anaran̈a, han̈itsian̈a ny tsy mety.” (2 Timoty 3:16, 17) Baiboly io boky efa ela kanefa mbala mahatsara atsika firaka izioty raha koran̈iny. Ke zen̈y mahavy anao tokony hianatra izio.