Naro Israelita nody ta Jerosalema, fa sasany tamindro ndraiky nipetraka tamy faritry maro tamy Fanjakan̈any Persy, 70 taon̈o tafaranizen̈y. An̈isanizen̈y Ezra pisoron̈o. Izy nampianatra Lalàn̈any Jehovah. Ren̈iny Ezra fa olo ta Jerosalema tao tsy nan̈araka Lalàn̈a eky, ke izy tihandeha han̈ampy iro tan̈y. Ho Artaksersesy panjakany Persy taminany: ‘Anao nataony Zan̈ahary mahay mampianatra Lalàn̈anany. Mindao anao, baka io indesa man̈araka anao lan̈iany olo tihandeha.’ Nikahiny Ezra lan̈iany olo tihody ta Jerosalema. Iro nivavaka tamy Jehovah, baka izy hiaro iro amy lalan̈a. Iro baka tio nandeha.

Efatra fanjava tafara, iro navy ta Jerosalema. Volan̈indro andriana aby io taminy Ezra: ‘Efa tsy nan̈araka volan̈a Jehovah eky Israelita aby io, baka io nanambady man̈angy panompo sampy.’ Akory eky nataony Ezra? Izy nandohaliky nan̈oloan̈a vahoaka sady nivavaka : ‘Jehovah, efa be ny vitanao taminay zay, fa zahay ndraiky mbala manota aminao fo.’ Nifono iro vahoaka aby io, fa iro ndraiky mbala nan̈ano raha ratsy fo. Ezra nifidy antipan̈ahy ndreky pitsara han̈ampy iro. Nafaka tsiota fanjava, niroasin̈y lan̈iany olo tsy nanompo Jehovah.

Tan̈atiny folo aroe amby taon̈o, namboarin̈y ndraiky riba nikodidin̈y Jerosalema. Ke Ezra namory vahoaka tamy tany araiky malalaka, baka io namaky tamindro Lalàn̈any Jehovah. Ezra koa fa nan̈abian̈a boky io, olo jiaby nitsangana. Nidera Jehovah izy, ke olo jiaby nampanonga tan̈ana, han̈ikian̈a zen̈y. Olo jiaby nitandren̈y tsarabe Ezra namaky ndreky nan̈azava Lalàn̈a io. Tontohitry iro fa niala Jehovah, ke iro tomoan̈y. Kiakanizin̈y, Ezra mbala nanohy namaky izio tamindro koa. Hitandro tamy zen̈y fa efa tsy ela tokony hankalazan̈a Fetiny Tran̈o Rantsakazo. Iro baka tio nan̈oman̈a fety io.

Ravoravo mare iro olo aby io nan̈ano fety io tan̈atiny fito andra, ke iro nan̈ano mersy Jehovah nitahy  tsabondro. Mbala tsiary nisy fankalazan̈a Fetiny Tran̈o Rantsakazo karaha io, tafarany Josoa. Koa fa vita fety io, nivory vahoaka sady nivavaka: ‘Anao Jehovah nan̈avotro zahay tamy zahay andevo, anao nan̈amia zahay hanin̈y tamy tany paiky tan̈y, baka io koa anao nan̈amia zahay tany tsara. Impiry impiry zahay tsy nan̈araka volan̈anao. Anao nandefa paminan̈y taminay, fa tsy nijirenay. Anao mbala naharidraha taminay fo. Tsy nadin̈anao volan̈anao taminy Abrahama, ke zahay izioty han̈araka volan̈anao eky e.’ Nisoratindro volan̈andro jiaby zen̈y, baka io iro andriana, Levita, ndreky pisoron̈o aby io nan̈ano tampon izio.