Atsika izioty hizaha raha nandalo taminandrany Nehemia. Izy Israelita nipetraka ta Sosana, ta Persy, ndreky piasany Panjaka Artaksersesy. Navy baka ta Joda rahalahiny Nehemia, ke nivolan̈a vaovao ratsy ty: ‘Tsy voaro olo nody a Jerosalema, fotony mbala tsy vita riba ndreky varavaran̈a tanàna io, niravan̈iny Babylony in̈y.’ Nalahelo Nehemia ke izy tihandeha ta Jerosalema. Nivavaka izy baka hahazo lalan̈a amy panjaka.

Tafara tatỳ, hitany panjaka Nehemia nalahelo. Hoizy taminany: ‘Zaho mbala tsy nahita anao karaha io. Nan̈ino ma anao?’ Ho Nehemia: ‘Malahelo zaho fotony mbala ravan̈a Jerosalema tanànanay.’ Panjaka nan̈ontany: ‘Ino raha tianao hataoko?’ Niaraka tamy zen̈y Nehemia nivavaka nangin̈y. Baka tio izy nivolan̈a: ‘Mba ameza lalan̈a zaho handeha a Jerosalema, han̈amboatra ribanizio.’ Nambelany panjaka nandeha Nehemia, sady namiany maramila hiaro izy tamy lalan̈a. Nataony panjaka governerany Joda koa izy, sady namiany kakazo han̈amboaran̈a varavaran̈any Jerosalema.

Nehemia koa fa navy ta Jerosalema tan̈y, nizahavany tsarabe ribany tanàna io. Nikahiny amy zay iro pisoron̈o ndreky andriana aby io. Hoizy tamindro: ‘Mila amboarin̈y mare ribany tanàna ty!’ Nan̈eky zen̈y vahoaka, ke nanomboko nan̈amboatra riba io.

Nisy fahavalony Israely nankadala iro. Volan̈indro: ‘Ndray fosa efa mahavita mandrongana riba amboarinaro io. Tsy nijireny Israelita aby io volan̈andro zen̈y, fa nitohizandro fo asandro. Nahainanonga ndreky nahaifatatra fo riba io.

Nan̈ano tetiky fahavalo aby io. Iro nivolan̈a: ‘Alo kodidin̈intsika Jerosalema, baka io tafihintsika tampoko iro.’ Ren̈indro Jiosy aby io tetiky zen̈y, ke navozo iro. Nehemia nivolan̈a: ‘Aza mavozo fa atsika ampiany Jehovah.’ Nasiany Nehemia olo piambin̈y hiaro piasa aby io, ke tsy nahavita nanafiky fahavalo.

 Tan̈atiny 52 andra fo efa vita riba ndreky varavaran̈a io. Nan̈ano fety Nehemia, ke nikahiny ta Jerosalema tan̈y Levita aby io. Nirasainy iro, ke nataony andiany pihira aroe. Nanonga tan̈abony riba io iro, tamy leskalie narikitry Vava Rano. Iro baka tio nisaraka, ke Ezra niaraka taminy andiany araiky, fa Nehemia ndraiky niaraka taminy andiany araiky. Samy nan̈ano hira niny Jehovah iro andiany aby io. Iro nitsoko trompetra ndreky nitendry kipantsona, baka io harpa. Iro amy zay nifanojy tamy tempoly tio tamy farany. Nan̈ano soron̈o namian̈a Jehovah olo jiaby na lelahy, na man̈angy, na tsaiky. Ravoravo mare iro ke ren̈inolo baka lavitry feondro.