Jesosy koa fa vita batisa, nindesiny fan̈ahy masin̈y tamy tany paiky tan̈y . Izy tsy nihina tan̈atiny 40 andra, ke mosary mare. Navy hitsapa jery izy amy zay Devoly, ke nivolan̈a: ‘Anao koa Zanaka Zan̈ahary ankitin̈y, ivoà mofo vato aby io.’ Jesosy nivolan̈a andininy amy Soratra Masin̈y ty: ‘Voasoratra fa tsy mofo fo raha mety hivilomanolo, fa izy koa mila mitandren̈y volan̈a Jehovah.’

Devoly koa mbala nivolan̈a tamy Jesosy: ‘Anao koa Zan̈aka Zan̈ahary ankitin̈y, mitsambokìna baka amy tampony tempoly iô. Voasoratra fa handefa anjely hiaro anao Zan̈ahary.’ Jesosy nivolan̈a andininy amy Soratra Masin̈y ty koa: ‘Voasoratra ao koa, aza mitsapa jery Jehovah Zan̈aharinao.’

Farany, naboakany Satana Jesosy fanjakan̈a jiaby tambony tany. Misy harian̈a maro fanjakan̈a aby io sady malaza. Izy amy zay nivolan̈a: ‘Hamiako anao fanjakan̈a jiaby io, izikoa anao mivavaka aminaka indraiky fo.’ Ho Jesosy: ‘Mandihana an̈y anao Satana! Voasoratra fa Jehovah zaraiky fo tokony hivavahanao.’

Loso amy zay Devoly baka tio. Nisy anjely navy nan̈amia hanin̈y Jesosy. Nanomboko tio, nitory vaovao tsarany Fanjakan̈a io Jesosy. Zen̈y baka iraka Jehovah nataony tambony tany teto. Tianolo aby io mare raha nampianariny, ke nan̈araka zay tany nimboany iro.