Kornelio io sefony maramila romanin̈y ta Kaisaria tan̈y. Izy tsy Jiosy, fa Jiosy aby io nan̈aja izy mare. Izy tia nan̈ampy olo masikiny ndreky olo sahiran̈a. Nino Jehovah koa Kornelio, ndreky tsy voly nivavaka taminany. Tandraraiky, nisy anjely nivolan̈a tamy Kornelio: ‘Ren̈iny Zan̈ahary vavakanao. Man̈iraha olo mandeha a Jopa anao, mangala Petera mengo aminao atỳ.’ Nan̈iraka lelahy telo nandeha ta Jopa Kornelio. Jopa io kadiriny 48 kilometara man̈atsimo.

Nahita fahitan̈a koa Petera ta Jopa tan̈y taminio. Izy nahita biby fady Jiosy, kanefa nisy feo nan̈iraka izy hihina izio. Petera tsy nety sady nivolan̈a: ‘Zaho mbala tsiary nihina biby maloto.’ Ke ho feo io taminany: ‘Aza atao maloto biby aby io, fa efa nidioviny Zan̈ahary.’ Nivolan̈a koa feo io: ‘Misy lelahy telo ambaravaran̈anao ao, ke mindao anao miaraka amindro.’ Nibiafiny Petera iro, ke hoizy tamindro: ‘Kabaronaro?’ Iro nivolan̈a taminany: ‘Kornelio sefony maramila romanin̈y nan̈iraka zahay, hangala anao handeha aminany an̈y.’ Nirahiny Petera nidoko taminany tao iro, fa  kiakanizin̈y iro jiaby vo nandeha ta Kaisaria. Nisy Kristianin̈y sasany baka a Jopa koa dia araiky tamindro.

Kornelio koa fa nahita Petera, izy efa nandohaliky edy. Ho Petera: ‘Mitsangàna fa zaho olo mira anao fo! Marin̈y ndraiky fa Jiosy tsy miditry antran̈onolo tsy Jiosy, fa Zan̈ahary nan̈iraka zaho nan̈atỳ, ke ino raha mety han̈ampiako anao?’

Ke ho Kornelio tamy Petera: ‘Efatra andra zay loso, zaho nivavaka tamy Zan̈ahary, ke nisy anjely nan̈iraka zaho handefa olo hangala anao. Ampianara volan̈a Jehovah kony zahay.’ Nampianariny Petera raha maro momba Jesosy Kristy i Kornelio ndreky olo taminany tao. Iro jiaby baka tio nahazo fan̈ahy masin̈y, ke natao batisa.