Ta Filipy tan̈y, nisy tsaiky man̈angy andevo araiky zay nisy demony. Baka tamy demony io nahavy izy nahavita nan̈ambara raha mbala hoavy, ke iro sefony tsaiky man̈angy io nahazo volabe baka tamizio. Paoly ndreky Silasy koa fa navy ta Filipy, tsaiky man̈angy io nan̈araka tany misy iro fo, sady nandronton̈o: “Iro lelahy aby io panompony Zan̈ahary Farany An̈abo.” Tan̈atiny andra maro karaha zen̈y fo nataony, ke farany, ho Paoly tamy demony io: ‘Aminy an̈arany Jesosy, miboaha anao!’ Niala tamy tsaiky man̈angy io demony in̈y.

Neloko mare iro sefony tsaiky man̈angy io, fotony efa tsy nazahoandro vola eky tsaiky io. Nindesindro tamy fanjakan̈a Paoly ndreky Silasy, ke ho iro tan̈y: ‘Lelahy aby ty tsy man̈araka lalàn̈a. Olo jiaby mialamboetry azondro.’ Nirahindro pitsara aby io nivangoan̈a kobay Paoly ndreky Silasy, baka io nigadraindro. Nataony piambin̈y gadra io tamy farany tan̈aty tamy prizon tao iro, avio nigadrain̈y kakazo vitindro. Nahiziky mare tany nasian̈a iro io.

Nihira niny Jehovah ry Paoly ndreky Silasy, ke gadra tao nitandren̈y hirandro. Sasakalin̈izin̈y, tio fo nisy horohorontany mare nan̈ozongozon̈o prizon io. Nidan̈adan̈a varavaran̈a jiaby, avio niala hoazy silisily ndreky kakazo tamindro gadra aby io. Piambin̈y gadra io nilomoay mare. Izy koa fa navy tan̈aty tan̈y, zahany varavaran̈a aby io nibian̈a. Sambarany tsy tao eky gadra jiaby, ke izy tseky hamono ten̈a.

Tamy zen̈y Paoly nivolan̈a tamy piambin̈y gadra io: ‘Aza ratravin̈y ain̈inao, fa zahay jiaby mbala ato!’ Nilomoay lelahy in̈y nan̈aton̈o Paoly ndreky Silasy, baka io nankohoko tamindro. Iro baka tio nan̈ontaniany: “Ino eky raha mila ataoko, baka zaho voavonjy?” Iro nivolan̈a taminany: ‘Anao ndreky olo jiaby tran̈o araiky aminao mila mino Jesosy.’ Paoly ndreky Silasy amy zay nampianatra iro volan̈a Jehovah, ke natao batisa iro jiaby.