Adama ndreky Eva koa fa niala tamy zaridain̈y Edena tao, iro niteraka maro. Kaina talan̈olondro. Pamboly asanany. Abela fan̈araka izy. Piambin̈y ondrikondriky asanany.

Tandraraiky Kaina ndreky Abela nan̈ano fan̈atitry tamy Jehovah. Hainao ino fan̈atitry zen̈y? Izio raha manokan̈a amian̈a Zan̈ahary. Tiany Jehovah fan̈atitry nataony Abela, fa niny Kaina tsy tiany. Neloko mare Kaina. Jehovah nivolan̈a taminany, fa izikoa mbala meloko fo izy mety han̈ano raha ratsy. Kaina tsy nijery volan̈a Jehovah.

Ho Kaina taminy Abela: ‘Alo atsika andeha amy tsabo an̈y.’ Iro koa fa navy tan̈y, nivangoeny Kaina mare Abela,  ke naty. Nataony Jehovah karakory Kaina? Nisaziny. Nirahiny nandeha lavitry ry havany izy, ke tsy nahazo nimpody eky.

Ino raha ianarantsika baka amy zen̈y? Lera misy raha tsy tiantsika, atsika mety ho meloko mare. Mety atsika tompiny fo mahita fa efa mare helokontsika, na mety hisy olo hafa hivolan̈a fa atsika efa meloko mare loatra. Ke amy zen̈y atsika tokony hifehy ten̈a mare tsao fo han̈ano raha tsy mety.

Abela tsy hadin̈any Jehovah foeky, fotony tia izy ndreky nan̈ano raha tsara. Hivilominy Jehovah izy lera tany ty hataony paradisa.