Ratsy jery mare olo ta Ninive tao. Izio tanàna araiky ta Asyria tan̈y. Nan̈iraka Jona paminan̈y Jehovah, hivolan̈a amindro fa iro mila miova. Jona nilefa tantany hafa. Izy niondran̈a sambo nandeha ta Tarsisy.

Sambo io koa fa tan̈aty ranomasin̈y, nihetsiky mare rano sady naresaka tsiko. Navozo iro piasany sambo io, ke samy nikaiky zan̈aharinany. Ho iro: ‘Ino mahavy raha karaha ty?’ Farany, ho Jona tamindro: ‘Baka aminaka fo mahavy izio. Nilefa zaho, fa tsy nan̈araka volan̈a Jehovah. Atsipia an̈aty ranomasin̈y zaho, fa mijanon̈o edy andra ratsy io.’ Piasany sambo aby io tsy tihanipy Jona tan̈y, fa Jona tsy nety. Izy koa fa natsipindro tan̈y, nijanon̈o andra ratsy io.

Nieritreritry Jona fa hofoaty izy. Nivavaka tamy Jehovah izy koa fa nahainilentiky tan̈aty rano. Jehovah nandefa loko maventy. Natelin̈y loko io Jona, fa izy tsy naty. Jona tan̈aty kibony loko tao nivavaka: ‘Ataoko aby zay raha an̈irahanao zaho.’ Telo andra Jona tan̈aty kibony loko io, fa Jehovah niaro izy. Nirahiny Jehovah naboakany loko io tantanety Jona baka tio.

Jehovah nan̈avotro Jona. Dikanizen̈y ma Jona fa tsy nila nandeha ta Ninive eky? Aha. Jehovah nan̈iraka izy nandeha tan̈y ndraiky.  Nan̈eky eky Jona. Hoizy taminolo ta Ninive tao: ‘Afaka 40 andra ravan̈a Ninive.’ Tsy nampoizin̈y foeky fa nitandren̈y izy iro Ninivita aby io, ke niova. Panjakandro nivolan̈a: ‘Atsika mila mivavaka amy Zan̈ahary, ndreky miova. Izy mety tsy handripaka atsika.’ Koa fa hitany Jehovah fa niova iro olo aby io, tsy niravan̈iny Ninive.

Jona neloko, izikoa fa tsy niravan̈iny Jehovah Ninive. Diniha hely baka! Jehovah nandefitry ndreky namindra fô tamy Jona, fa Jona tsy tihamindra fô olo ta Ninive tao. Jona nontson̈o mare nialokaloko tambaniny mataviloha naniry tambelan̈a tanàna io. Naty raha maniry io baka tio, nahaineloko fo Jona. Ke ho Jehovah taminany: ‘Ndray raha maniry io mampahinakinaka anao, ke zaho tsy tokony hahinakinaka olo a Ninive ao? Zaho namindra fô tamindro, ke iro tsy naty.’ Nan̈ino Jehovah nivolan̈a zen̈y? Olo ta Ninive tao misimisy valerany tamy Jehovah toizay raha maniry.