Nisy tsaiky viavy hely israelita araiky ta Syria. Lavitry be fianakavian̈anany izy. Nan̈ino eky? Nindesiny maramila syrianin̈y tan̈y izy, baka io nanjary piasany vadiny Namàna. Sefony maramila syrianin̈y Namàna. Nivavaka tamy Jehovah tsaiky viavy hely io, fa olo ta Syria tsy nanompo Jehovah.

Namàna narary hoditry. Tsy nety janga raha io. Tihan̈ampy izy tsaiky viavy hely io, ke hoizy tamy vadiny Namàna: ‘Zaho mahay olo mahavita mampahivan̈a aretin̈y vadinao io. Elisa an̈arany, izy paminan̈iny Jehovah a Israely an̈y.’

Nivolan̈iny man̈angy io tamy vadiny raha nivolan̈iny tsaiky hely io. Efa tihahivan̈a mare Namàna, ke izy nandeha tamy tran̈ony Elisa ta Israely. Nieritreritry Namàna fa han̈aja izy mare Elisa. Elisa tsy nan̈aton̈o Namàna, fa piasanany fo nalefany taminany. Nivolan̈iny piasa io tamy Namàna: ‘Mindao miseky impito amy Ten̈aranony Jordana, fa hahivan̈a edy anao.’

 Ho Namàna: ‘Zaho nihevitry izy hivavaka amy Zan̈aharinany, baka io han̈ano fahagagan̈a ke hampajanga zaho. Tsy sitrany zaho mandeha amy ten̈arano a Syria an̈y! Ten̈aranonay an̈y tsaratsara toizay ten̈arano a Israely eto.’ Neloko mare Namàna, ke loso izy nandeha.

Nahatsara izy, nisy piasanany nivolan̈a taminany: ‘Anao ma tsy tihahivan̈a? Raha hely karaha zen̈y hirahiny paminan̈y io ataonao, ke tsy hataonao?’ Tontohitry Namàna, ke nandeha tamy Ten̈aranony Jordana tan̈y fo izy. Nideky impito tan̈aty rano tao izy, ke nahivan̈a. Ravoravo mare izy ke nandeha nan̈ano mersy Elisa. Izy nivolan̈a: ‘Zioty zaho mahay fa Jehovah ankitin̈y ten̈a Zan̈ahary.’ Ravoravo mare donko tsaiky viavy hely in̈y koa fa nahivan̈a Namàna e?