Zan̈ahary fo ten̈a mahay raha mahatsara atsika, fotony izy niasa atsika. Izy mikarakara atsika, mira baba araiky ten̈a tia zanaka in̈y. Hainy tsarabe fa tsisy olombelon̈o mahavita ten̈a. (Jeremia 10:23) Karaha ataony tsaiky mila olobe mamalavala izy, atsika koa mila Zan̈ahary mamalavala atsika. (Isaia 48:17, 18) Zen̈y mahavy Zan̈ahary nan̈amia atsika toro lalan̈a amy Baiboly ao.—Vakia 2 Timoty 3:16.

Atsika koa man̈araka lalàn̈any Jehovah ndreky toro lalan̈anany, ho haintsika mitondra fiain̈anantsika, rango izioty. Hahazo fiain̈ana tsisy farany koa atsika amaray an̈y. Dikanizen̈y, atsika tsy tokony hijijy tamban̈a han̈araka toro lalan̈a Zan̈ahary, fotony izy niasa atsika.—Vakia Salamo 19:7, 11; Apokalypsy 4:11.

Toro lalan̈a zen̈y tsy mira lalàn̈a, fotony lalàn̈a mikoran̈a mazava raha mety atao ndreky tsy mety atao. (Deoteronomia 22:8) Atsika mila mandiniky antsendriky vo mahay raha tiany toro lalan̈a koran̈iny. (Ohabolana 2:10-12) Karaha ataony amy Baiboly, misy toro lalan̈a mivolan̈a karaha ty: ‘Fahin̈ana io baka amy Zan̈ahary.’ Raha tiany volan̈iny amy zen̈y, atsika koa man̈aja Zan̈ahary nan̈amia fahin̈ana io, mila mitandrin̈y amy raha mety handratra na hamono.—Vakia Salamo 36:9.

Jesosy nikoran̈a didy aroe ten̈a ilaintsika amy fiain̈ana. Araiky mikoran̈a fa atsika mila tia Jehovah. Dikanizen̈y, atsika mila mianatra raha momba izy ndreky manompo izy zaraiky fo. Atsika koa fa hanapakevitry, tsy tokony hadin̈antsika didy io. (Ohabolana 3:6) Atsika koa man̈ano zen̈y,  ho tsara fihavan̈ana amy Zan̈ahary, ho sambatra ankitin̈y ndreky ho velon̈o tsisy farany.—Vakia Matio 22:36-38.

Araiky faharoe mampianatra atsika hiavan̈a aminolo. (1 Korintianina 13:4-7) Izikoa tiantsika han̈araka izio, atsika mila mangala tahaka fitiavany Zan̈ahary olo.—Vakia Matio 7:12; 22:39, 40.

Mampilamin̈y tokantran̈o man̈araka toro lalan̈a Baiboly io. (Kolosianina 3:12-14) Izio koa miaro tokantran̈o tsy ho ravan̈a, fotony volan̈iny ao fa vadian̈a io raha natao haharitry.—Vakia Genesisy 2:24.

Baiboly mandrisiky atsika hazoto miasa ndreky han̈ano ny marin̈y. Tsy ho afaka asa atsika, izikoa man̈araka zen̈y. (Ohabolana 10:4, 26; Hebreo 13:18) Atsika mila mamelonten̈a, kanefa fihavan̈antsika amy Zan̈ahary tokony hataontsika voanalohany amy fiain̈ana.—Vakia Matio 6:24, 25, 33; 1 Timoty 6:8-10.

Anao koa man̈araka toro lalan̈a Baiboly, tsy ho azony aretin̈y baka amy tsy fitandreman̈a. (Ohabolana 14:30; 22:24, 25) Karaha ataony Baiboly mivolan̈a fa tsy tsara migiaka toaka be loatra. Atsika koa man̈araka zen̈y, tsy hofoaty boriny ndreky tsy ho azony aretin̈y baka amy figiahan̈a toaka be loatra. (Ohabolana 23:20) Jehovah tsy mandrova atsika migiaka toaka, fa mamo fo tsy tiany. (Salamo 104:15; 1 Korintianina 6:10) Toro lalan̈a Baiboly koa mandrisiky atsika hitandrin̈y amy raha iritriretintsika ndreky raha ataontsika. (Salamo 119:97-100) Tokony fitiavantsika Jehovah ndreky fan̈ajantsika izy ten̈a mahavy atsika man̈araka toro lalan̈a Baiboly, fa tsy fitiavanten̈a.—Vakia Matio 5:14-16.