FIANARAN̈A 5
Nan̈ino ma Zan̈ahary Niasa Tany Ty?
1. Ino ma dikany niasany Zan̈ahary tany ty?
Dikany niasany Zan̈ahary tany ty hipitrahan̈a. Adama ndreky Eva olo voanalohany nipetraka teto. Iro tsy nipetraka tandan̈itry, fotony anjely fo mipetraka an̈y. (Joba 38:4, 7) Efa tamy paradisa tao edy nan̈apitrahany Zan̈ahary iro. Zaridain̈y Edena an̈aranizio. (Genesisy 2:15-17) Tiany Jehovah iro ndreky ry zanakandro ho ravoravo ambony tany eto tsisy farany.—Vakia Salamo 37:29; 115:16.
Tamy zen̈y tsy tany jiaby paradisa fa zaridain̈y Edena io fo. Nila niteraka Adama ndreky Eva, baka tany ty feno olo. Tokony ho iro ndreky zanakandro amy zay nan̈ano tany jiaby ty paradisa. (Genesisy 1:28) Tany ty tsy ho ravan̈a. Hisy olo fo hipetraka eto.—Vakia Salamo 104:5.
Zahava video Ino ma Dikany Niasany Zan̈ahary Tany Ty?
2. Nan̈ino ma tany jiaby tsy nanjary paradisa?
Adama ndreky Eva niroasiny Zan̈ahary niala tamy zaridain̈y tao, fotony iro tsy nan̈araka volan̈anany. Paradisa io efa tsisy eky, fotony tsisy olo nahavita nan̈apody izy karaha taloha in̈y eky. Rango tamy zen̈y, tany ty nanjary feno olo ratsy fan̈ahy.—Joba 9:24; Vakia Genesisy 3:23, 24.
Mbala ho vitany Zan̈ahary ma han̈ano tany ty paradisa? Vitany, fotony izy Zan̈ahary farany mahery. Tsisy mahadin̈y angovonany. (Isaia 45:18) Mbala ho feno olo sambatra fo tany ty andra araiky an̈y.—Vakia Salamo 37:11, 34.
3. Karakory ma han̈apodianan̈a paradisa in̈y?
Jesosy Panjaka nifidiny Zan̈ahary han̈apody tany ty paradisa. Aminy Aramagedona, izy ndreky anjeliny Zan̈ahary marobe handripaka olo jiaby tsy tia Zan̈ahary. Satana higadrainy an̈atiny 1 000 taon̈o. Olony Zan̈ahary fo tavela eto, fotony Jesosy hiaro iro amy zen̈y. Iro ho velon̈o tsisy farany amy Paradisa ambony tany eto.—Vakia Apokalypsy 20:1-3; 21:3, 4.
4. Ombian̈a marin̈y ma jaly ty ho afaka?
Ombian̈a marin̈y ma Zan̈ahary han̈adoso jaly mahazo atsika ty? Efa tsy ho ela, fotony raha jiaby nivolan̈iny Jesosy ahaizan̈a izio efa marikitry, efa miboaka aby.”—Vakia Matio 24:3, 7-14, 21, 22.
Jesosy hanjaka an̈atiny 1 000 taon̈o. Amy zen̈y izy han̈adoso jaly jiaby. (Isaia 9:6, 7; 11:9) Jesosy koa Pisoron̈obe. Izy han̈adoso fahotan̈anolo jiaby tia Zan̈ahary. Zen̈y mahavy atsika amy zen̈y tsy harary, tsy hatoe ndreky tsy hofoaty eky.—Vakia Isaia 25:8; 33:24.
5. Olo karakory ma hipetraka amy paradisa ao?
Aminy Tran̈o Fivoriany Vavolombelon̈o Jehovah an̈y ahitanao olo tia Zan̈ahary ndreky man̈ano raha tiany
Olo man̈araka volan̈a Zan̈ahary fo hipetraka ao. (1 Jaona 2:17) Jesosy nan̈iraka pianatranany hampianatra olo raha tokony hatao, baka Zan̈ahary ravoravo. Aminandra izioty, Jehovah mbala man̈ano raha fo, baka olo maro ho velon̈o amy paradisa ambony tany eto. (Zefania 2:3) Amy Tran̈o Fivoriany Vavolombelon̈o Jehovah an̈y, Jehovah mampianatra olo fivadiany hahay hifankatia tsarabe, raimandreny ndreky zanaka koa hifan̈aja tsarabe.—Vakia Mika 4:1-4.
