Mitadiava Fan̈ampian̈a

“Olo araiky mety ho resinolo araiky, fa olo aroe ndraiky hahatohitry izy.”—Mpitoriteny 4:12.

HO MORAMORA amintsika handresy fahavalo izikoa atsika misy naman̈a man̈ampy. Izikoa anao tihiala amy sigarety, ten̈a tsara mangataka fan̈ampian̈a aminolo karaha ataony havan̈a ndreky naman̈a von̈ono han̈ampy. Ilain̈y koa faharetan̈a koa fa man̈ano zen̈y.

Anao koa mety mikoran̈a aminolo efa nahavita niala tamy sigarety, fotony iro in̈y ten̈a mahay tsarabe raha mahazo anao sady afaka man̈ampy anao. Karaha ty ho Torben, Kristianin̈y araiky a Danemark an̈y: “Ten̈a nilaiko fan̈ampian̈a baka taminolo hafa.” Karaha ty koa ho Abraham, baka an Inde: “Ten̈a tia zaho mare fianakavian̈anaka ndreky iro Kristianin̈y namako aby io, ke iro nan̈ampy zaho hiala tamy sigarety.” Kanefa ndray io raha jiaby zen̈y, mety mbala tsy tafiala fo anao.

Karaha ty nivolan̈iny lelahy araiky, Bhagwandas an̈arany: “Zaho nifima sigarety tan̈atiny 27 taon̈o. Zaho koa fa nianatra Baiboly, zaho tapakevitry fa hiala tamy fahazaran̈a mandoto ain̈y. Nifen̈y zaho niala, niova naman̈a koa zaho, baka io nan̈aton̈o dokotera spesialisty. Tsisy nahomby raha jiaby nataoko zen̈y. Taminy alin̈y araiky zay, naboakako tamy Jehovah raha jiaby tan̈atiny fonaka tao, ke zaho nivavaka mare nangataka fan̈ampian̈a taminany. Zen̈y nan̈ampy zaho ho afaka tamy sigarety!”

Ilain̈y mare koa efa man̈oman̈a amy problemo mety handalo. Zen̈y iziô raha handeha hikoran̈intsika amy lahatsoratra man̈araka.

[Efajoro]

ANAO MA TOKONY HAMPIASA AODY?

Maro olo mampiasa aody baka hialan̈a amy sigarety, karaha ataony aody misy nikotiny apetaka aminy hoditry. Fa tsara dinihinao antsendriky iro fan̈ontanian̈a aby ty:

Ino ma mahatsara fampiasan̈a aody zen̈y? Maro fitahan̈a mety ampiasain̈y hialan̈a amy sigarety fotony mampihen̈y fihinjan̈ana baka aminy antena tihifima in̈y. Kanefa, maro koa olo misalasala amy fahombiazandro in̈y.

Ino maharatsy izy? Aody sasany mety hiteraka vokany ratsy. Ohatra, mety hangolisoly olo io, na ho kivy mare ke mety tihamono ten̈a foeky. Aza adin̈a fa anao koa mihina aody aby io mampiditry nikotiny amy vava, mety hamparary raha zen̈y. Mbala ten̈a man̈andevo iro in̈y.

Mbala misy hevitry hafa koa ma? Nisy fandinihan̈a natao, ke hitandro pikaroko aby io fa 88 isanjatonolo pifima sigarety nahavita niala sigarety nivolan̈a fa niala tampoko fo iro fa tsy nampiasa aody.