Olo von̈ono han̈ano fo izikoa fa misy asa tokony hataony. Tia miasa mare izy, baka mahazo raha ilainy ndreky baka afaka man̈ampy olo. Ataony fo ndray asa tsy maro olo tia.

Na tianao na tsy tianao, maro adidy miambin̈y anao. Hahatsara anao afara an̈y anao koa mazoto miasa rango izioty, fotony tsy maro olo mazoto miasa.—Mpitoriteny 3:13.

“Ny raha hitako, loso ravoravo ndreky afapo olo araiky koa mazoto miasa, ke zaho nifen̈y hazoto miasa. Halaza tsara koa anao izikoa mazoto miasa.”—Rolland.

TOROHEVITRINY BAIBOLY: “Asa mare jiaby azahoan̈a tombony.”—Ohabolana 14:23.

Izikoa tianao hahita haravoan̈a aminy asanao, areha dingana aby ty:

Ankifà tsarabe lan̈iany raha ampan̈anovin̈y anao. Ataova amy fô jiaby asa ataonao, na asa antran̈o zen̈y, na devoara, na velonten̈a. Ndray fa hainao asanao io, mitadiava fomba hankatsaran̈a fahaizanao izio ndreky han̈anovan̈a izio malakilaky. Mahay ho tianao fo man̈ano izio, arakaraka fahaizanao asa io.

TOROHEVITRINY BAIBOLY: “Asa anao mba efa nahita olo mahay miasa tsarabe? Man̈oloan̈a panjaka izy mitsangana, fa tsy man̈oloan̈a olo tsotra.”—Ohabolana 22:29.

Aza adin̈a fa mahatsara olo hafa asanao io. Loso mba mihen̈y asa ataonolo hafa izikoa anao mazoto miasa.

TOROHEVITRINY BAIBOLY: “Man̈amia raha olo ten̈a mampasambatra toizay mahazo raha baka aminolo.”—Asan’ny Apostoly 20:35.

Man̈anova mandilatra raha angatahin̈y aminao. Tsy raha tsy maintsy ataonao fo ataova fa mifen̈a man̈ano mandilatra zen̈y. Anao koa man̈ano zen̈y, anao tsy hitseky fotony sitraponao nan̈ano izio fa tsy raha niforsen̈a.—Matio 5:41.

TOROHEVITRINY BAIBOLY: ‘Baka mba amy sitraponao ny tsara ataonao fa tsy forsen̈a.’—Filemona 14.

Mahaiza mipezipezy. Olo mazoto miasa zen̈y von̈ono hiasa fo kanefa tsy adalany asa. Misy fotoan̈a izy mba mangala kajo fa tsy miasa fo.

TOROHEVITRINY BAIBOLY: “Sitrasitrany koa fangalan̈a diandian̈a tan̈ana araiky tozay asa fen̈o tan̈ana aroe, kanefa manambotro tsiko fo.”—Mpitoriteny 4:6.