Olo mety atokisan̈a zen̈y man̈araka lalàn̈a, man̈atanteraka raha volan̈iny, avio mivolan̈a ny marin̈y. Manjary atokisany raimandreniny ndreky kamaradiny, avio sefonany izy.

Izikoa anao atokisany raimandreninao, iro tsy hifehifehy anao mare eky.

“Aboaha iro fa anao olo matotro sady mety atokisan̈a fo nata anao tsy ankilandro. Hatokisandro anao koa man̈ano zen̈y.”—Samira.

TOROHEVITRINY BAIBOLY: ‘Mandiniha ten̈a fo baka ho hitanaro asa olo karakory marin̈y anaro.’—2 Korintianina 13:5.

Izikoa anao izioty mahatsiaro karaha tsy atokisanolo foeky na tsy atokisandro tsarabe, areha iro dingana aby ty:

Mivolàn̈a ny marin̈y: Anao koa mavandy, tsisy olo hatoky anao eky. Fa anao koa ndraiky mivolan̈a ny marin̈y ndreky mamosa raha tsy mety nataonao, olo hatoky anao.

“Izikoa amy raha tsy mahakasiky anao, mora mivolan̈a ny marin̈y. Kanefa ndraiky anao koa mivolan̈a ny marin̈y fo ndray anao mety ho voabaraka, olo hahaihatoky anao fo.”—Clément.

TOROHEVITRINY BAIBOLY: “Zahay mba man̈iry han̈ano ny marin̈y amy raha jiaby.”—Hebreo 13:18.

Aboaha fa anao olo atokisan̈a: Hita baka tamy fan̈adikadin̈ana natao ta Etazonia tan̈y fa olo atokisan̈a fo ten̈a tadiaviny ankamarozany sosiete. Izio an̈isany raha telo zahan̈a aminolo mitady asa. Ke anao koa olo atokisan̈a rango izioty, hahatsara anao firaka anao be an̈y raha zen̈y.

“Atokisany raimandreniko zaho, fotony tsy miambin̈y irahin̈y fo zaho vo man̈ano raha.”—Sarah.

TOROHEVITRINY BAIBOLY: “Matoky zaho fa hikenao zen̈y, ... fotony haiko fa anao han̈ano mandilatra raha koran̈iko aminao.”—Filemona 21.

Mahaiza maharidraha. Mora hitanolo izikoa anao mahailava na mahaimaventy. Fa elaela ndraiky olo vo mahita fa anao nahaimatotro na nanjary efa atokisan̈a.

“Tokony hifen̈y fo anao han̈ano raha hatokisanolo anao fa tsy raha indraikindraiky fo anao man̈ano zen̈y. Mety ho elaela ry olobenao ndreky olo hafa vo hatoky anao.”—Bruno.

TOROHEVITRINY BAIBOLY: “Ke mahaiza maharidraha.”—Kolosianina 3:12.