Raimandreny ndreky zanaka samy tsy mihafahafa mikoran̈a raha an̈aty jerindro ndreky fihetsehampondro.

Tsaiky sasany koa fa bebe, iro tsy tia mivolan̈a, ke sarotro mampikoran̈a iro. Safe tsy hay ino raha an̈aty jerindro ndreky an̈aty fondro an̈y, ke mety tsy hainaro foeky raha hatao. Aminin̈y edy anaro ten̈a mila mikoran̈a aminany.

Tandrin̈esa fo izy isaka mikoran̈a aminaro: Ndray sasakalin̈y izy misy raha koran̈iny aminaro, tandrin̈esa fo izy.

“An̈aty jerinao an̈y: ‘Nan̈ino ma izio tsy natao bonera fa niambin̈y sasakalin̈y be ty? Zaho karaha tiô fo.’ Tokony ravoravo atsika fotony iro von̈ono hikoran̈a amintsika. Tsy zen̈y ma raha tadiavintsika raimandreny?”—Lisa.

“Zaho olo tsy tia mandry tara, kanefa zanako misy lera amy sasakalin̈y edy izy mila mikoran̈a aminaka. Milamin̈y tsara fo koran̈anay.”—Rogers.

TOROHEVITRINY BAIBOLY: “Irarian̈a anaro tsiaraikiaraiky samy hizaha raha mahatsara namanaro, fa tsy raha mahatsara anaro tompiny fo.”—1 Korintianina 10:24.

Aza mieritreritry raha hafa: Misy lelahy zay nivolan̈a: “Ndraikindraiky jerinaka loso antany hafa, lera zanako mikoran̈a aminaka. Direkty haindro fa jerinaka efa tsy amy raha koran̈indro.”

Vonia antsendriky tele na fitaovan̈a elektroniky, izikoa izio tsy ahavitanaro mitandren̈y raha koran̈iny zanakanaro aminaro. Ataova fo zen̈y, ndray raha karaha tsisy dikany koran̈indro aminaro.

“Aza atao raha hahavy zanakanaro hieritreritry fa anaro tsy mijery fihetsehamponany. Tsy hikoran̈a aminaro eky baka izy afara an̈y, fa aminolo hafa an̈y izy mikoran̈a.—Mirianda.

“Aza malaky meloko izikoa hitanao tsy marin̈y raha koran̈iny.”—Anthony.

TOROHEVITRINY BAIBOLY: “Tandrema tsarabe fomba fitandrin̈esanaro.”—Lioka 8:18.

Mikoràn̈a fo na lera karakory na lera karakory. Matetiky tsaiky tsy tia mikoran̈a izikoa fa mifan̈atriky amy raimandrenindro.

“Man̈araraotro mikoran̈a zahay izikoa fa an̈aty tomabily, fotony zahay tsy fankahita sora.”—Nicole.

Tsara koa mba mikorokoran̈a koa fa mihina.

“Isaka zahay mihina ariva, samy olo mikoran̈a raha nandalo taminy andra in̈y, na ratsy na tsara. Nampifankahazo zahay tsara raha zen̈y, avio zahay tsy miady manokan̈a koa fa misy problemo.”—Romeo.

TOROHEVITRINY BAIBOLY: “Irarian̈a olo jiaby ho von̈ono hitandren̈y, tsy ho mekimeky hivolan̈a.”—Jakoba 1:19.