RAIMANDRENY
7: Ataova Raha Hahavy iro ho Tsara Toetry
KARAKORY MA ZEN̈Y?
Mampianatra tsaiky hahay han̈avaka raha mety atao ndreky tsy mety atao. Ohatra, ampianarin̈y han̈ano ny marin̈y iro.
Tsara ampianarin̈y man̈ano raha koa tsaiky amy zen̈y iro hazoto hiasa, tsy han̈avakavaka olo, ndreky hahay hahinakinaka olo. Rango iro mbala hely efa tokony zanarin̈y man̈ano zen̈y.
TOROHEVITRINY BAIBOLY: “Rango iro mbala tsaiky efa zara mandeha amy lalan̈a tokony himboandro edy, ke na iro efa matoe, iro tsy hiala amy zen̈y eky.”—Ohabolana 22:6.
NAN̈INO MA RAHA ZEN̈Y TEN̈A ILAIN̈A?
Mandroso mare izioty teknolozy, ke ten̈a mila mahay man̈avaka ny tsara ndreky ratsy iro tsaiky aby io. Karaha ty ho Karina: ‘Mora amindro tsaiky aby io mahita raha ratsy izioty, iro koa fa mampiasa telefony na tablety. Raha zen̈y mety hahavy iro han̈ano raha ratsy koa. Misy aby iro mipetraka marikitry atsika iô mizaha sary vetaveta fa tsy arakantsika aby.’
TOROHEVITRINY BAIBOLY: “Olo matotro manan̈a fahaizan̈a misain̈y efa nizarin̈y han̈avaka ny tsara ndreky ratsy.’—Hebreo 5:14.
Mila mahay mahinakinaka olo koa iro. Tafiditry amy zen̈y mahalala fomba, ke man̈ano “azafady” na “mersy.” Olo zioty fa tsy mijery olo eky fa fitaovan̈a elektroniky fo mahasetry iro.
TOROHEVITRINY BAIBOLY: “Zay raha tianaro hatao aminaro, mba ataova aminolo koa.”—Lioka 6:31.
INO HEVITRY?
Hazavà tsarabe amindro raha mety ndreky tsy mety. Koran̈indro manampahaizan̈a aby io fa tsaiky koa ampianarin̈y fa olo fivadiany fo tokony han̈ano firaisan̈a, iro tsy ho mora voatarikinolo han̈ano zen̈y.
SOSOKEVITRY: Mampiasà raha mandalo amy fiain̈ana hampianaran̈a raha iro. Ohatra izikoa misy vaovao mikoran̈a olo nivonenolo, anaro mety mivolan̈a: “Karaha io edy ataonolo koa tsy mahatana heloko e. Fahitanao izy, nan̈ino ma olo manjary man̈ano karaha zen̈y?”
“Hahaisarotro amindro tsaiky aby io fo hahay raha tokotro hataondro, izikoa tsy haindro man̈avaka ny mety ndreky tsy mety.”—Bruno.
Ampianara zanakanaro baka hahay hahinakinaka olo. Ndray iro mbala hely efa mety ampianarin̈y man̈ano “azafady” ndreky “mersy”, avio ho tsara fan̈ahy aminolo. “Tokony hatao raha hahaizandro tsaiky aby io fa tsy iro zaraiky fo olo fa mbala misy olo maro koa an̈y. Ohatra zioty lafamìndro, tsaiky lekoly araiky amindro, ndreky jiranindro. Ho tsara fan̈ahy aminolo iro koa mahay zen̈y.”—Fitaizan̈a Tsaiky amy Tany Isankarazany. (angiley).
SOSOKEVITRY: Ampan̈anova asa antran̈o izy, amy zen̈y hainy fa ten̈a mila mitatahy olo izy.
“Iro zanakantsika aby io koa fa zatra miasa rango iro mbala hely, tsy ho sahiran̈a eky iro lera iro mitokantran̈o an̈y. Efa zatra mandray andraikitry baka iro.”—Maria.
