INO raha tsapanao izikoa fa mahazo taratasy mampahery baka amy namanao? Ravoravo anao. Tsy zen̈y? Karaha zen̈y koa Timoty, izy koa fa nahazo taratasy baka taminy apostoly Paoly. Bokiny Timoty faha-2 fahaizantsika izio. Karaha fa hitantsika in̈y izy nitady tany mangin̈y. Misaora efa tsy din̈iny Timoty aby hamaky taratasy baka amy kamaradiny io! Mety loso diniky foeky izy: ‘Asa akory naniny Paoly zay? Asa misy torohevitry mety han̈ampy zaho han̈ano tsara raha nan̈irahan̈a zaho ato? Han̈ampy zaho hahay hitory ndreky hampianatra ma izity?’ Hainy Timoty valiny fan̈ontanian̈a aby zen̈y ndreky raha hafa ten̈a ilain̈a, izy koa fa namaky taratasy io.

Niaraka Timoty namaky taratasy io, direkty tsapany fa tia izy ankitin̈y Paoly. “Zanako tiako” fikahiany i Timoty. (2 Tim. 1:2) Kadiriny tamy taon̈o 65 tan̈y Timoty nahazo taratasy io; izy tamy zen̈y kadiriny 30 taon̈o. Efa ten̈a antipan̈ahy zadraharaha izy tamy zen̈y. Nan̈ino ma atsika mivolan̈a zen̈y? Fotony izy niaraka niasa tamy Paoly tan̈atiny folo taon̈o mandilatra tio, ke efa maro raha nianarany taminany.

Misaora nampahery Timoty mare naharen̈y fa nifen̈y tsy nivadiky i Paoly, ndray tan̈atiny raha farany sarotro. Paoly tamy zen̈y nigadra ta Roma, ary efa tsy ela fotoan̈a namonoan̈a izy. (2 Tim. 1:15, 16; 4:6-8) Tsapany Timoty baka tamy raha nivolan̈iny Paoly fa ten̈a nisy korazy apostoly Paoly. Karaha ty baka ho Paoly: “Zaho efa niaritry raha jiaby.” (2 Tim. 2:8-13) Ten̈a nampahery Timoty raha zen̈y, ary hay be fa hampahery atsika koa modely miavaka nambelany io.

Tiany Paoly ho tsapany Timoty fa ten̈a valera fanompoan̈a nankin̈iny Zan̈ahary io. Zen̈y nahavy izy nampirisiky Timoty han̈ano raha ‘hampizelazela izio karaha môtro’, tan̈atiny fonany tao. (2 Tim. 1:6) Karisma volan̈a griky nampiasainy Paoly taminizy nikoran̈a momba “kadô” io. Karisma io ivolan̈ana kadô namian̈a olo araiky, ndray izy tsy mendriky hahazo izio. Nahazo kadô io Timoty taminizy nahazo fanendrena manokan̈a hikarakara fiangonan̈a.​—1 Tim. 4:14.

Tokony hataony Timoty karakory ma kadô namezan̈a izy io? Nampirisihiny Paoly izy han̈ano raha ‘hampizelazela izio karaha môtro.’ Karakory  ma ataonolo baka hizelazela fo môtrony lokinany? Tsy maintsy sosaohany sarbon na hazomaty izio, amy zen̈y hiredaka fo lelany môtro. Izikoa adika arabakiteny volan̈a griky a·na·zo·py·reʹo nampiasainy Paoly io, karaha ty han̈azavany diksionera araiky izio: “Mamelon̈o ndraiky, na mikepakepa môtro ziska izio miredaka.” Fa volan̈a io koa misy dikany hafa, “mazoto na mafana fô man̈ano raha araiky.” Zen̈y nahavy Paoly nampirisiky Timoty karaha ty: ‘Ataova tsara raha nan̈irahan̈a anao io!’ Karaha zen̈y koa tokony hataontsika amy zioty. Atsika tokony hazoto mare han̈ano fanompoan̈a nankin̈iny tamintsika.

Tamy taratasy nisoratiny io, Paoly nivolan̈a raha mety han̈ampy Timoty han̈atanteraka tsarabe fanompoan̈anany. Karaha ty nisoratiny: “Irarian̈a fan̈ahy masin̈y, miasa an̈atintsika io, hindesinao hiaro raha tsara nankin̈iny taminao io.” (2 Tim. 1:14) Ino ma raha tsara nankin̈iny tamy Timoty io? Aminy andininy aloha hely, Paoly nikoran̈a momba “volan̈a mahatsara”, tsy ino zen̈y fa ny marin̈y amy Volan̈a Zan̈ahary ao. (2 Tim. 1:13) Nan̈ambara ny marin̈y taminolo tan̈ivony fiangonan̈a ndreky taminolo hafa i Timoty, fotony izy pitory vaovao tsara. (2 Tim. 4:1-5) Izy lastio efa navoatendry ho antipan̈ahy, nikarakara ondrikondrikiny Zan̈ahary. (1 Pet. 5:2) Akory ma nan̈aboahany Timoty fa ten̈a valera taminany ny marin̈y nankin̈iny taminany io? Izy nitavandra fan̈ahy masin̈y baka tamy Jehovah fo, avio nifen̈y izy nampiasa Volan̈a Zan̈ahary.​—2 Tim. 3:14-17.

Man̈ano karaha zen̈y koa atsika iziô, ke mitory ndreky mampianatra olo ny marin̈y. (Mat. 28:19, 20) Tsy tokony hadin̈antsika fa ten̈a valera ny marin̈y nankin̈iny tamintsika io. Ino han̈ampy atsika amy zen̈y? Atsika tsy tokony ho voly mivavaka, avio mianatra tsy tapaka Volan̈a Zan̈ahary. (Rom. 12:11, 12; 1 Tim. 4:13, 15, 16) Mety nahazo andraikitry fan̈ampiny koa sasany tamintsika, fotony iro voatendry ho antipan̈ahy na panompo manontolo andra. Kanefa tsy mila adin̈andro foeky fa tokony hanetry ten̈a ndreky hangataka fan̈ampian̈a amy Zan̈ahary iro izikoa fa man̈ano andraikitrindro io. Zen̈y ahitan̈a fa ten̈a valera amintsika asa nan̈irahany Zan̈ahary atsika.

An̈isany raha tafiditry tamy fanompoan̈a nitantirahiny Timoty fampiofanan̈a iro piaramanompo taminany aby io nan̈ano asa nankin̈iny taminany. Zen̈y nahavy Paoly nivolan̈a taminany karaha ty: “Raha jiaby ren̈inao taminaka sady nikeny vavolombelon̈o maro, mba ankìn̈a amindro lelahy mafatoky aby io koa, amy zen̈y iro mba hahay hampianatra olo hafa.” (2 Tim. 2:2) Tihivolan̈a Paoly tio fa, tokony hampitainy Timoty taminolo hafa koa raha nianarany. Zen̈y koa raha tokony hataony piandraikitry tsiaraikiaraiky an̈ivony fiangonan̈a. Piandraikitry mahay zen̈y tsy matity fahaizan̈a ke hitanany ninany zaraiky fo raha hainy momba asa araiky na andraikitry araiky. Mila mampiofan̈a olo hafa koa izy, ke tsy fomba han̈anaovan̈a asa io fo ambarany fa ampiany koa olo ampiofan̈iny io hanan̈a toetry tsara sady ilain̈a, amy zen̈y izy hanjary Kristianin̈y matotro. Izikoa izy man̈ano zen̈y, ho vitandro “lelahy mafatoky” aby io han̈ampy fiangonan̈a, ary amy fomba isankarazany.

Hay be fa ten̈a nankasitrahiny Timoty taratasy mampahery nazony taminy apostoly Paoly in̈y! Karaha fa hitantsika in̈y izy namaky izio ndreky nimpodimpody namaky iro torohevitry tan̈atinizio tao! Ke nan̈ampy izy han̈atanteraka andraikitrinany tamy fomba tsara raha zen̈y.

Tiantsika koa han̈araka torohevitry tsara aby io. Amy fomba akory? Tokony hifen̈y angovo jiaby atsika han̈ano tsarabe fanompoan̈a nankin̈iny tamintsika. Tokony ho valera amintsika koa ny marin̈y io. Atsika tsy tokony hatity fahaizan̈a fa ho von̈ono fo hampiofan̈a olo hafa. Hahavita ‘han̈ano tsara fanompoan̈antsika’ atsika, izikoa man̈ano zen̈y, karaha raha efa nampirisihiny Paoly nataony Timoty in̈y.’​—2 Tim. 4:5.