1-2. Ino ma raha araiky antin̈ainy panompony Jehovah mare?

FAN̈ANTINAN̈A an̈isany raha ten̈a maventy tokony hanan̈antsika. Maro olo man̈anten̈a hanan̈a tokantran̈o sambatra, hiteraka zaza salama. Sasany ndraiky marary mare, ke iro man̈anten̈a ho janga. Ndray atsika Kristianin̈y koa mba man̈anten̈a zen̈y. Kanefa misy raha araiky ten̈a antin̈aintsika mare. Tsy ino zen̈y fa fiain̈ana mandrakizay aminy hoavy. Amy leranizen̈y, ho hitantsika ndraiky iro havantsika efa naty aby in̈y.

² Apostoly Paoly nivolan̈a: ‘Zaho man̈anten̈a amy Zan̈ahary, fa olo marin̈y ndreky tsy marin̈y samby mbala hivilomin̈y.’ (Asa. 24:15) Ndray zen̈y, tsy Paoly olo voanalohany nikoran̈a momba familoman̈a olo maty. Joba koa mba nikoran̈a momba izio. Natoky mare izy, fa Zan̈ahary tsy han̈adin̈a izy sady mbala hamelon̈o izy.​—Joba 14:7-10, 12-15.

3. Nan̈ino mahatsara atsika raha koran̈iny 1 Korintianina toko 15?

³ An̈isany ‘fampianaran̈a fototro’ ioren̈any finoan̈any Kristianin̈y fampianaran̈a momba familoman̈a olo maty io. (Heb. 6:1, 2) Amy 1 Korintianina toko 15 ahitantsika raha nikoran̈iny Paoly momba izio. Hay be fa nankahery iro Kristianin̈y tamy zen̈y raha nisoratiny tao! Mety hankahery atsika ndreky hampafatatra finoan̈antsika koa fandinihan̈a toko io, ndray efa ela atsika nino familoman̈a olo maty io ndray vo tsy ela.

4. Ino mahavy atsika matoky fa olo maty mbala hivilomin̈y?

⁴ Nan̈ino atsika matoky fa mbala hivilomin̈y iro havantsika ndreky namantsika efa naty aby in̈y, na izikoa san̈atria atsika maty, mbala hivilominy Zan̈ahary? Fotony Jehovah efa namelon̈o Jesosy Kristy. Izio an̈isany “vaovao tsara” nikoran̈iny Paoly tamindro Kristianin̈y ta Korinto. (1 Kor. 15:1, 2) Nivolan̈a  foeky izy fa tsisy varany finoan̈any Kristianin̈y araiky, izikoa izy tsy mino fa olo maty hivilomin̈y. (1 Kor. 15:17) Fatokisantsika fa Jesosy ten̈a nivilomin̈y ankitin̈y, mahavy atsika mino fa mbala ho hisy olo hafa koa hivilominy Zan̈ahary.

5-6. Nan̈ino mankahery atsika 1 Korintianina 15:3, 4?

⁵ Talohany Paoly nanoratra mikasiky familoman̈a olo maty io, izy nikoran̈a momba raha telo ten̈a nisy aby ty: 1) Kristy naty baka tamy fahotan̈antsika. 2) Izy nalevin̈y. 3) Izy nivilomin̈y taminy andra fahatelo, eraka raha koran̈iny Soratra Masin̈y.​—Vakia 1 Korintianina 15:3, 4.

⁶ Paminan̈y Isaia efa nan̈ambara fa Mesia io ‘hadoso hiala amy taninolo velon̈o’ ndreky ‘hamezan̈a fasan̈a marikitry olo ratsy fan̈ahy.’ Mesia io koa ho izy, ‘hitondra fahotan̈anolo maro.’ Zen̈y raha nataony Jesosy taminizy nan̈ano soron̈o ain̈inany. (Isaia 53:8, 9, 12; Mat. 20:28; Rom. 5:8) Ke ino ma tokony ho vokatranizen̈y amintsika? Fahaizantsika fa Jesosy naty, nalevin̈y, avio nivilomin̈y io man̈amia toky atsika fa mbala ho afaka amy fahotan̈a ndreky fahafatesan̈a fo atsika. Matoky koa atsika fa mbala hifankahita amindry havantsika efa naty aby in̈y.

7-8. Ino raha nan̈ampy iro Kristianin̈y aby io ho resy lahatra fa nivilominy Jehovah ankitin̈y Jesosy?

⁷ Izikoa atsika tsy mino fa Jesosy efa nivilomin̈y, ho sarotro amintsika koa han̈eky fa olo maty mbala hivilomin̈y. Ino marin̈y ma mahavy atsika resy lahatra fa ten̈a nivilominy Jehovah ankitin̈y Jesosy?

⁸ Maro vavolombelon̈o nahita Jesosy velon̈o ndraiky, ke nitantaraindro taminolo hafa raha zen̈y. (1 Kor. 15:5-7) Apostoly Petera na Kefasy vavolombelon̈o voanalohany nikoran̈iny Paoly. Nisy pianatra vitsivitsy koa nankamarin̈y fa hitany Petera ankitin̈y Jesosy velon̈o. (Lioka 24:33, 34) Sôsoko zen̈y, iro apostoly “folo aroe amby” aby io koa mba nahita Jesosy, tafarany namilomany Jehovah izy. Tafaranizen̈y, Kristy ‘niboaka tamy rahalahy mandilatra 500, ary raha zen̈y tan̈atiny fotoan̈a araiky fo.’ Mety tamy fivorian̈a namparavoravo ta Galilia, araiky koran̈iny Matio 28:16-20 ao donko izio. Jesosy koa “niboaka tamy Jakoba” rahalahiny. Tsy nino Jesosy foeky Jakoba io taloha. (Jaona 7:5) Fa izy koa fa nahita Jesosy velon̈o ndraiky, izy nanjary resy lahatra fa Jesosy ankitin̈y Mesia. Alaiva onon̈o fa tamy Paoly nanoratra 1 Korintianina io, kadiriny tamy taon̈o 55, mbala velon̈o aby ankamarozanolo nahita Jesosy nimpody velon̈o. Ke lan̈iany olo tsy nino fa Jesosy efa nivilominy Jehovah, iro nety nan̈ontany araiky tamindro vavolombelon̈o mafatoky aby io fo.

9. Izikoa zahan̈a Asan’ny Apostoly 9:3-5, ino raha niain̈any Paoly ke man̈aporofo fa nivilominy Zan̈ahary ankitin̈y Jesosy?

⁹ Tafaranizen̈y, Jesosy niboaka tamy Paoly na Saoly. (1 Kor. 15:8) Paoly taminio tamy lalan̈a handeha a Damaskosy. Ren̈iny Paoly feony Jesosy, baka io hitany koa Jesosy tamy voninahitrinany tandan̈itry an̈y. (Vakia Asan’ny Apostoly 9:3-5.) Hita baka tamy raha niain̈any Paoly io fa tsy angano familoman̈a Jesosy io fa raha ten̈a nisy ankitin̈y.​—Asa. 26:12-15.

10. Ino raha nataony Paoly, izy koa fa resy lahatra fa Jesosy efa velon̈o?

¹⁰ Misaora tianolo nitandren̈y raha nikoran̈iny Paoly momba familoman̈a Jesosy io, fotony izy taloha nan̈enjiky Kristianin̈y. Ke izy koa fa resy lahatra fa Jesosy efa nivilominy Jehovah, nifen̈y koa izy nandresy lahatra olo. Maro raha niaretany Paoly, izy koa fa nan̈ambara taminolo ny marin̈y io, an̈isanizen̈y popòko, gadra, baka io vaky sambo. (1 Kor. 15:9-11; 2 Kor. 11:23-27) Resy lahatra mare Paoly fa  Jesosy efa nivilomin̈y, ke von̈ono hofoaty foeky izy hiarovan̈a finoan̈anany. Maro porofo hitantsika tio. Fa asa anao mba resy lahatra fa ten̈a nivilominy Zan̈ahary ankitin̈y Jesosy? Matoky ma anao fa mbala hamelon̈o olo maty koa Zan̈ahary amy donia vaovao?

11. Ino aby antony mety nahavy olo sasany ta Korinto ho diso hevitry momba familoman̈a olo maty?

¹¹ Ta Gresy tan̈y nisy tanànany Korinto io. Misy taminolo tan̈y diso hevitry momba familoman̈a olo maty. Sasany nivolan̈a raha zen̈y tsisy foeky. (1 Kor. 15:12) Nan̈ino? Mety nisy vokany tamindro donko raha nampianarindro filôzaofy ta Atena, tanàna araiky hafa ta Gresy tan̈y. Iro filôzaofy aby io koa fa naharen̈y momba familoman̈a Jesosy io, nadroadroendro mare iro Kristianin̈y aby io. (Asa. 17:18, 31, 32) Olo sasany ndraiky nihevitry fa familoman̈a olo maty io tsy arabakiteny. Tan̈atiny dinikindro, mety koran̈iny “maty” olo araiky fotony panota, fa “velon̈o” ndraiky izy koa fa manjary Kristianin̈y. Ndray ino ndray ino antony nahavy iro olo aby io tsy nino familoman̈a olo maty io, hita tsarabe fa an̈arany fo iro nisy finoan̈a. Miniminia hely baka! Izikoa Jesosy tsy nivilomin̈y, tsy ho voaefa vidipan̈avotan̈a, ary tsisy olo hahazo familankeloko baka amy Jehovah. Hitantsika baka amy zen̈y fa tsy ho avotro olo araiky izikoa tsy mino familoman̈a olo maty io.​—1 Kor. 15:13-19; Heb. 9:12, 14.

12. Izikoa 1 Petera 3:18, 22 dinihin̈y, ino ma raha ten̈a nampiavaka familoman̈a Jesosy?

¹² Hainy Paoly fa tsy Kristy zaraiky fo olo efa nivilominy Jehovah. Fa ino ma raha ten̈a nampiavaka niny Jesosy? Iro olo nivilomin̈y aby in̈y koa fa ela ny ela, mbala naty fo. Fa Jesosy ndraiky ho Paoly, “voalohambokatra aminolo maty.” Ino ma dikanizen̈y? Jesosy olo voanalohany nivilominy Jehovah nanonga tandan̈itry, ke nanjary fan̈ahy.​—1 Kor. 15:20; Asa. 26:23; vakia 1 Petera 3:18, 22.

13. Ino ma raha nivolan̈iny Paoly fa tsy mampiran̈a Adama ndreky Jesosy?

¹³ Olo araiky fo naty, ampy han̈avotan̈a olo antapitrisany maro! ‘Raha mba posibla?’, ho anao. Mazava sady marin̈y tsarabe fomba namaliany Paoly fan̈ontanian̈a io. Nazavainy ino raha tsy mampiran̈a vokatrany raha nataony Adama ndreky vokatrany raha nataony Kristy, amintsika olombelon̈o. Mbala mijinja vokatrany raha nataony Adama fo atsika firaka iziô. Karaha ty raha nisoratiny Paoly momba Adama: “Baka taminolo araiky fo naviany fahafatesan̈a.” Nakiry izy Jehovah efa namelon̈o Jesosy Zanany, ke afaka man̈anten̈a raha tsara mare atsika aminy amaray. Baka tamy raha nataony Adama mahavy olo jiaby maty, fa baka tamy Kristy ndraiky mahavy olo jiaby ho velon̈o ndraiky.​—1 Kor. 15:21, 22.

14. Adama ma mbala hivilomin̈y? Hazavà.

¹⁴ Nivolan̈a Paoly fa maty ‘aminy Adama ao’ aby olo jiaby. Ino ma raha tiany havian̈a? Olombelon̈o jiaby izy tiany koran̈iny io; nandova fahotan̈a baka taminy Adama atsika, ke nanjary tsy lavorary ndreky mety maty. (Rom. 5:12) Akory fo i Adama? Izy tsy an̈isanolo “hivilomin̈y.” Tsy maharakotro fahotan̈anany foeky soron̈o nataony Kristy. Fotony nan̈ino? Lavorary i Adama kanefa izy kinia tsy nan̈araka volan̈any Zan̈ahary. Tsisy ny hafa amy raha hahazo iro olo koran̈iny Jesosy fa miran̈a “bengy” aby io raha hahazo i Adama. Iro io hitsarainy ke tsy hivilomin̈y eky.​—Mat. 25:31-33, 46; Heb. 5:9.

15. Azovy ma iro ‘olo jiaby’ handeha ‘hivilomin̈y amy Kristy ao’ io?

¹⁵ Tsy zen̈y fo, nivolan̈a Paoly fa ‘amy Kristy ao hamiloman̈a olo jiaby.’ (1 Kor. 15:22)  Iro Kristianin̈y voahosotro ta Korinto tan̈y izy nanoratany Paoly taratasy io. Iro io hivilomin̈y hengo andan̈itry. ‘Namasin̈iny iro baka ho tafaray amy Kristy Jesosy’, ke ‘voakaiky hanjary olo masin̈y.’ Nivolan̈a Paoly fa iro io ‘naty tamy Kristy tao.’ (1 Kor. 1:2; 15:18; 2 Kor. 5:17) Koran̈iny Paoly tamy taratasy hafa nisoratiny koa fa lan̈iany olo ‘tafaray amy Jesosy amy fahafatesan̈a’, ho ‘tafaray aminany koa lera iro hivilomin̈y karaha izy in̈y.’ (Rom. 6:3-5) Jesosy koa fa nivilomin̈y, izy nanjary fan̈ahy avio nandeha tandan̈itry. Ke ho karaha zen̈y koa iro Kristianin̈y voahosotro jiaby, fotony iro ‘tafaray amy Kristy.’

16. Nan̈ino ma Paoly nivolan̈a fa Jesosy “voalohambokatra”?

¹⁶ Paoly nivolan̈a fa Kristy koa fa nivilomin̈y, izy “voalohambokatra aminolo maty.” Miniminia hely baka! Efa nisy olo nivilomin̈y taloha tan̈y fa iro koa fa velon̈o, iro niain̈y tambony tany teto fo. Ohatra araiky amy zen̈y Lazarosy. Jesosy ndraiky tsy karaha zen̈y, fotony izy olo voanalohany nivilomin̈y hanjary fan̈ahy ke hiain̈y tsisy farany. Izy mety nampiran̈iny tamy voalohambokatra namezandro Israelita aby io Zan̈ahary. Ke matoa Paoly nivolan̈a fa Jesosy “voalohambokatra”, dikanizen̈y, ho hisy olo hafa koa hivilomin̈y hengo andan̈itry an̈y. Hivilomin̈y handeha andan̈itry koa iro apostoly ndreky olo hafa tafaray amy Kristy.

17. Ombian̈a ma iro olo ‘tafaray amy Kristy’ aby io nanomboko nahazo valisoandro andan̈itry an̈y?

¹⁷ Tamy Paoly nanoratra tamindro Kristianin̈y ta Korinto io, mbala tsendriky nanonga tandan̈itry iro voahosotro aby io. Efa tafara tatỳ raha zen̈y vo nisy. Nivolan̈a izy fa Jesosy Kristy antsendriky voanalohany fotony izy “voalohambokatra”, fa afaranizen̈y amy zay vo hivilomin̈y iro ‘olony Kristy’ aby io. Ombian̈a? ‘An̈atiny fan̈atrehany Kristy.’ (1 Kor. 15:23; 1 Tes. 4:15, 16) Dikanizen̈y, iro apostoly aby io ndreky iro voahosotro aby io tsy maintsy niambin̈y fan̈atrehany Kristy, zay vo nahazo valisoandro andan̈itry an̈y. Ke ‘ho tafaray aminany iro lera iro hivilomin̈y karaha izy’ in̈y. Efa an̈atiny ‘fan̈atrehany Kristy’ io atsika izioty.

18. a) Nan̈ino atsika mivolan̈a fa mbala ho hisy familoman̈a karazany hafa koa? b) Ino aby raha ho hisy koran̈iny 1 Korintianina 15:24-26?

¹⁸ Hivilomin̈y iro voahosotro aby io, an̈atiny fan̈atrehany Kristy. Ke ho efa miaraka amy Jesosy andan̈itry an̈y iro, lera izy handravan̈a fanjakan̈a jiaby, ndreky fahifan̈a jiaby, baka io angovo jiaby ambony tany eto. Hifoan̈ana firaka  amy “fahafatesan̈a, fahavalo farany io.” (Vakia 1 Korintianina 15:24-26.) Efa tsy hofoaty eky iro voahosotro aby io. Ke karakory fo lan̈iany Kristianin̈y tsy mivadiky kanefa tsy man̈anten̈a hiaraka hiain̈y amy Kristy andan̈itry an̈y? Hivilomin̈y koa iro jiaby io. Koran̈iny Baiboly fa iry Paoly ndreky iro olo hengo andan̈itry aby io nahazo familoman̈a tsialohaloha. (Fil. 3:11) Dikanizen̈y mbala ho hisy familoman̈a karazany hafa koa ankoatrany nindro io! Zen̈y tsarabe raha nivolan̈iny Joba. Natoky izy fa mbala hivilôminy Jehovah aminy hoavy.​—Joba 14:15.

19. Ino raha hantin̈ainolo hiain̈y ambony tany?

¹⁹ Man̈anten̈a ino ma iro hiain̈y ambony tany eto? Iro afaka man̈anten̈a raha koran̈iny Paoly ty: ‘Zaho man̈anten̈a amy Zan̈ahary, fa olo marin̈y ndreky tsy marin̈y samby mbala hivilomin̈y.’ (Asa. 24:15) Olo tsy marin̈y tsy mety handeha andan̈itry an̈y! Dikanizen̈y, familoman̈a olo hiain̈y ambony tany eto izy koran̈iny andininy io.

20. Nan̈ino anao afaka matoky fa ten̈a ho hisy ankitin̈y familoman̈a olo maty?

²⁰ Hivilomin̈y ankitin̈y olo maty! Afaka hiain̈y mandrakizay lan̈iany olo hivilomin̈y ambony tany. Matokisa fa ho hisy marin̈y raha zen̈y! Hankahery anao zen̈y izikoa misy havanao efa naty. Hivilomin̈y iro io lera iro voahosotro aby io hiaraka hanjaka amy Kristy, an̈atiny 1 000 taon̈o. (Apok. 20:6) Akory fo basy izikoa san̈atriany vava anao maty, alohany Fanjakan̈a Arivo Taon̈ony Kristy kanefa anao tsy nivadiky foeky? Matokisa fa anao mbala hivilominy Jehovah. Tsy ho diso fan̈antinan̈a foeky atsika. (Rom. 5:5) Hankahery anao rango zioty raha zen̈y sady hahavy anao ho ravoravo fo manompo Jehovah. Fa mbala misy raha hafa koa mety ianarantsika baka amy 1 Korintianina toko 15 io. Zen̈y raha ho hitantsika amy lahatsoratra man̈araka.