1. Ino raha nivolan̈iny Davida momba fanetrenten̈any Jehovah?

JEHOVAH manetry ten̈a. Nan̈ino atsika mivolan̈a zen̈y? Karaha ty ho Davida tandraraiky: “Amezanao zaho ampinganao baka izio hiaro zaho; baka amy fanetrenten̈anao mampanonga voninahitrinaka.” (2 Sam. 22:36; Sal. 18:35) Mety mbala azony Davida onon̈o donko tamy paminan̈y Samoela navy tantran̈ony babany tan̈y, handeha han̈ano izy ho panjakany Israely. Valo mirahalahy iry Davida. Izy faralahy tamindro, kanefa izy nifidiny Jehovah hisoatra Panjaka Saoly.​—1 Sam. 16:1, 10-13.

2. Handiniky ino atsika amy lahatsoratra ty ato?

² Nisy panoratra salamo araiky koa nikoran̈a karaha ty momba Jehovah: “Miondriky izy mizaha raha andan̈itry an̈y ndreky ambony tany atỳ. Izy mampitsangana olo ambany hiala amy fotaka, baka io izy koa man̈arin̈y olo masikiny ... hiaraka mipetraka aminolo an̈abo.” (Sal. 113:6-8) Hay be fa nitovy hevitry taminany Davida. Hidinihintsika ato fomba nan̈aboahany Jehovah fanetrenten̈a, ndreky leson maventy ianarantsika momba zen̈y. Handiniky ohatrany Panjaka Saoly ndreky paminan̈y Daniela, baka io Jesosy koa atsika ato.

3. Ino raha ianarantsika momba Jehovah baka amy fomba itondrasany atsika? Nan̈ino?

³ Manetry ten̈a ankitin̈y Jehovah izikoa zahan̈a fomba itondrasany panomponany tsy lavorary. Iro baka tsy vitany imboany manompo izy fo fa, ambelany hikamarady aminany koa. (Sal. 25:14) Izy lastio koa nan̈ano raha baka atsika hahavita  hinaman̈a aminany. Nambelany hofoaty Zanany, baka atsika ho afaka amy fahotan̈antsika. Manetry ten̈a ankitin̈y Jehovah, fotony izy ten̈a mamindra fô sady mitepô atsika.

4. Karakory fomba namoron̈any Jehovah atsika? Ino antony?

⁴ Akory koa ahitan̈a fa Jehovah manetry ten̈a? Diniha baka ty: Amy maha Pamoron̈o izy, atsika mety direkty niforon̈iny han̈araka bekonany fo, fa tsy zen̈y raha nataony. Atsika nataony afaka mifidy raha tiantsika hatao. Ary ten̈a raha maventy aminany safidy ataontsika, ndray atsika hely sady tsisy angovo izikoa ampiran̈iny aminany. Tiany izikoa baka amy fitiavantsika izy mahavy atsika mifidy hanompo izy, sady haintsika fa mahatsara atsika man̈ano raha zen̈y. (Deot. 10:12; Isaia 48:17, 18) Mankasitraka Jehovah mare atsika fotony izy manetry ten̈a!

5. Karakory ataony Jehovah mampianatra atsika hanetry ten̈a? (Zahava sary amy fon̈ony gazety ty.)

⁵ Jehovah mampianatra atsika hanetry ten̈a, ke amezany modely atsika. Tsisy olo na anjely manan̈a fahendrena mandilatra Jehovah, kanefa izy mbala mitandren̈y sosokevitriny hafa fo. Ohatra, taminizy namoron̈o raha jiaby, nambelany han̈ampy izy Zanany. (Ohab. 8:27-30; Kol. 1:15, 16) Izy ndray farany mahery, tsy tanàny ninany zaraiky fahifan̈a fa mandrasa andraikitry aminolo hafa koa izy. Zen̈y iziô nataony, izy koa fa nifidy Jesosy hanjary Panjakany Fanjakan̈anany, baka io misy olo 144 000 koa hiaraka manjaka amy Jesosy. (Lioka 12:32) Hay be fa tsy maintsy nampiofan̈a Jesosy hanjary Panjaka ndreky Pisoron̈obe izy. (Heb. 5:8, 9) Mampiofan̈a iro hiaraka manjaka amy Zanany koa izy, amy zen̈y iro hahavita tsara asa an̈irahany iro. Fa ndray izy man̈ano zen̈y, izy tsy  mibekobeko iro amy fomba han̈atantirahandro asandro. Izy baka matoky fa han̈ano sitraponany fo iro io!​—Apok. 5:10.

6-7. Ino raha ianarany lohany fianakavian̈a, antipan̈ahy ndreky raimandreny baka amy Jehovah?

⁶ Jehovah tsy mila fan̈ampian̈a baka aminolo koa fa han̈ano raha. Kanefa ny raha misy, izy mandrasa fahifan̈a. Ke ndray Babantsika andan̈itry an̈y fo man̈ano zen̈y, intsaka eky atsika! Lohany fianakavian̈a ma anao sa antipan̈ahy? Aleva tahaka Jehovah, ke mahaiza mandrasa fahifan̈a aminolo, avio aza mibekobeko iro amy fomba han̈atantirahandro raha zen̈y. Anao koa man̈ano zen̈y, tsy raha asa io fo ho vita, fa hahavita hampiofan̈a izy ndreky han̈ampy izy hatoky ten̈a koa anao. (Isaia 41:10) Izikoa anao namezany Jehovah fahifan̈a, ino koa raha mety ianaranao baka amy raha nataony?

⁷ Koran̈iny Baiboly fa Jehovah tia mitandren̈y hevitrindro zanany andan̈itry an̈y. (1 Mpanj. 22:19-22) Anaro raimandreny, akory fomba hangalanaro tahaka Jehovah, lera anaro han̈iraka zanakanaro han̈ano asa araiky? Izikoa mety, han̈ontania zanakanaro fomba iritriretindro han̈anovan̈a izio. Areha hevitrindro, izikoa tsara.

8. Akory ahitan̈a fa Jehovah naharidraha taminy Abrahama ndreky Saraha?

⁸ Akory koa ahitan̈a fa Jehovah manetry ten̈a? Izy maharidraha. Ahitan̈a zen̈y iziô lera misy panomponany man̈ontany izy ampan̈ajan̈a antony mahavy izy man̈ano raha araiky. Ohatra iziô, nitandrin̈esany tsarabe hevitriny Abrahama, taminy Abrahama nidaon̈o tsao tsy mety fanapahankevitrinany handravan̈a Sodoma ndreky Gomora. (Gen. 18:22-33) Jehovah koa naharidraha tamy Saraha. Izy nampan̈anten̈a fa Saraha hiteraka, ndray efa natoe. Nitokiky Saraha koa fa naharen̈y zen̈y, fa Jehovah tsy neloko. (Gen. 18:10-14) Jehovah nan̈aja Saraha fo izikoa zahavan̈a fomba nitondrasany izy.

9. Ino raha mety ianarany raimandreny ndreky antipan̈ahy baka amy Jehovah?

⁹ Ino mety ianarany raimandreny ndreky antipan̈ahy baka amy Jehovah? Akory iziô ataonao izikoa zanakanao na olo fiangonan̈a araiky aminao tsy man̈eky fanapahankevitrinao? Direkty ma anao hasiaka? Sa anao hangala onon̈o raha tiandro koran̈iny? Ten̈a hahazo hatsaran̈a fiangonan̈a ndreky fianakavian̈a izikoa olo manan̈a fahifan̈a mangala tahaka Jehovah. Nikoran̈a momba modeliny Jehovah fo atsika firaka teto, fa iziô ndraiky atsika hizaha ino koa fianaran̈a azontsika baka aminolo aby koran̈iny Baiboly ao.

10. Akory fomba hampianarany Jehovah atsika?

¹⁰ Tsisy olo mahay mampianatra mandilatra Jehovah. Izy “Papianatra Be Voninahitry.” Mampiasa tantaranolo amy Baiboly ao izy hampianaran̈a atsika. (Isaia 30:20, 21) Ohatra iziô, mampianatra atsika izy lera atsika misaintsain̈y tantaranolo nanan̈a toetry tiany, karaha ataony fanetrenten̈a, ndreky lera atsika mandiniky raha navoa olo tsy nanan̈a toetry karaha zen̈y.​—Sal. 37:37; 1 Kor. 10:11.

11. Ino raha ianarantsika baka amy Saoly?

¹¹ Diniha baka raha navoa Panjaka Saoly. Farandraha nanetry ten̈a eky izy mbala tanora. Hainy fa misy erany raha mety ho vitany ndreky hataony, ke zen̈y nahavy izy nisalasala han̈eky andraikitry sasany. (1 Sam. 9:21; 10:20-22) Kanefa tsy elanizy nanjary panjaka, nanomboko nan̈ambony ten̈a izy ke nan̈ano raha tsy nanan̈any fahifan̈a. Tandraraiky izy tokony niambin̈y paminan̈y Samoela. Tamy leranizen̈y izy tokony nanetry ten̈a ke natoky fa Jehovah hiaro vahoakanany. Kanefa ny  raha nisy, izy nan̈ano soron̈o kanefa tsy anjaranany nan̈ano zen̈y. Ino vokany? Nanjary halany Jehovah izy, ke nadosony tsy ho panjaka foeky izy tafara tatỳ. (1 Sam. 13:8-14) Ino raha ianarantsika baka amy zen̈y? Mila mitandrin̈y fo atsika tsao han̈ano raha tsy anan̈antsika zò na fahifan̈a. Misy jery atsika koa man̈ano zen̈y!

12. Akory ahitan̈a fa Daniela nanetry ten̈a?

¹² Diniha koa baka ohatra tsarany paminan̈y Daniela. Tsy nitovy tamy Saoly foeky toetrinany. Tamy fiain̈ananany jiaby, nifen̈y fo Daniela hanetry ten̈a ke nitady taridalan̈any Jehovah. Nisy fotoan̈a, ohatra, izy nampiasainy Jehovah han̈ambara dikany nofiny Nebokadnezara. Daniela tsy nipoera tamy raha zen̈y, fa izy nan̈amia voninahitry Jehovah fo. (Dan. 2:26-28) Ino raha ianarantsika baka amy zen̈y? Izikoa misy piaramanompo midera anao fotony tiandro kabaro nataonao, na koa nahita vokatra tamy fanompoan̈a anao, ty raha tsara tadidianao: Jehovah fo tokony hamian̈a voninahitry. Mila ikentsika fa nohony fan̈ampiany Jehovah nahavitantsika raha aby zen̈y. (Fil. 4:13) Mangala tahaka Jesosy atsika izikoa man̈ano zen̈y. Fotony nan̈ino?

13. Ino raha ianarantsika baka amy raha nivolan̈iny Jesosy amy Jaona 5:19, 30 ao?

¹³ Ndray Jesosy Zanaka Zan̈ahary sady lavorary, izy nitavandra Jehovah fo. (Vakia Jaona 5:19, 30.) Izy tsiary ndraiky niady fahifan̈a tamy Babany io. ‘Tsy tan̈atiny eritreritriny Jesosy foeky hiady fahifan̈a, ke hitovy amy Zan̈ahary zen̈y.’ (Fil. 2:6) Hainy Jesosy ino raha mety ataony ndreky tsy mety ataony. Izy koa nan̈aja fahifan̈any Babany.

14. Karakory nataony Jesosy izy koa fa nirahinolo nan̈ano raha tsy nanan̈any fahifan̈a?

¹⁴ Nisy fotoan̈a Jakoba ndreky Jaona niaraka mamandro nan̈aton̈o Jesosy ke nangataka raha taminany, kanefa raha io tsy nanan̈any Jesosy fahifan̈a. Hainao ino raha nataony Jesosy? Direkty izy nivolan̈a fa Babany andan̈itry an̈y zaraiky fo afaka manapakevitry azovy hipetraka ankavanan̈a na ankavianany lera izy panjaka. (Mat. 20:20-23) Naboakany Jesosy fa tsy raha jiaby zay anan̈any fahifan̈a. Izy nanetry ten̈a, ke izy tsy nan̈ano raha tsy nan̈omboany Jehovah izy. (Jaona 12:49) Akory hangalantsika tahaka modely tsarany Jesosy zen̈y?

15-16. Akory mety han̈arehantsika torohevitriny Baiboly amy 1 Korintianina 4:6 ao?

 ¹⁵ Karaha nataony Jesosy, manetry ten̈a atsika izikoa man̈araka raha koran̈iny 1 Korintianina 4:6 ty: “Aza miala amy raha voasoratra.” Ke akory tokony hataontsika izikoa misy olo mangataka torohevitry amintsika? Atsika tsy tokony hiforse izy han̈araka hevitrintsika foeky. Torohevitry baka amy Baiboly ndreky raha naboakany fandaminan̈a fo tokony hambarantsika izy, fa tsy zay raha avy amy jerintsika. Manetry ten̈a atsika izikoa man̈ano zen̈y. Ikentsika baka fa tsy raha jiaby zay ho haintsika aby, sady torohevitriny Jehovah fo tsaratsara tozay nintsika.​—Apok. 15:3, 4.

¹⁶ Man̈amia voninahitry Jehovah atsika izikoa manetry ten̈a. Fa tsy zen̈y fo mahavy atsika mifen̈y hanan̈a toetry io. Izio man̈ampy atsika ho ravoravo ndreky ho tsara fihavanan̈a aminolo. Zen̈y raha hindihintsika iziô.

17. Nan̈ino ho ravoravo atsika izikoa manetry ten̈a?

¹⁷ Ho ravoravo fo atsika izikoa manetry ten̈a. Nan̈ino? Haintsika baka fa misy erany raha mety ho vitantsika ndreky hataontsika, ke ravoravo fo atsika izikoa fa misy olo man̈ampy atsika. Azonao onon̈o tamy Jesosy nampahivan̈a boka folo lahy in̈y? Araiky tamindro fo nimpody ke nankasitraka izy. Fatatra aretin̈iny lelahy io, ke tsy ho janga foeky izy izikoa tsy nitahany Jesosy. Nanetry ten̈a izy, ke ten̈a nankasitraka Jesosy sady nan̈amia voninahitry Jehovah.​—Lioka 17:11-19.

18. Fanetrenten̈a man̈ampy atsika ho tsara fihavanan̈a aminolo. Ino antony? (Romanina 12:10)

¹⁸ Matetiky, olo manetry ten̈a malaky mahita kamarady sady tsara fihavanan̈a aminolo. Ino antony? Fotony ravoravo izy mahita olo hafa manan̈a toetry tsara, ke atokisany iro. Ravoravo koa izy mahita olo hafa mahavita  tsara asandro. Tsy misalasala foeky izy midera ndreky man̈amia voninahitra iro.​—Vakia Romanina 12:10.

19. Nan̈ino ma atsika tsy tokony han̈ambony ten̈a?

¹⁹ Sarotro aminolo man̈ambony ten̈a ndraiky midera olo, fotony tiany izy fo derain̈a. Avio izy tia mifan̈oesa. Izy tsy mampiofan̈a olo sady tsy man̈amia fahifan̈a olo, fotony an̈atiny jerinany: “Izikoa tianao ho vita tsara asa araiky, anao tompiny fo man̈anova izy.” An̈atiny jerinany, fomba fan̈anovany raha fo mety. Matetiky koa olo man̈ambony ten̈a tihoatra olo, ke izy be fô izikoa fa misy olo nahavita raha tsaratsarany ninany. (Gal. 5:26) Ke ndray izy misy kamarady, fikamaradianan̈andro tsy mahadin̈y ela. Akory tokony hataonao izikoa hitanao fa anao man̈ambony ten̈a? Mivavaha mare amy Jehovah, baka izy han̈ampy anao ‘han̈avao sain̈inao’ ndreky han̈ampy anao hiala amy toetry ratsy io.​—Rom. 12:2.

20. Nan̈ino ma atsika mila manetry ten̈a?

²⁰ Mankasitraka Jehovah mare atsika amy modely amiany. Hita baka amy fomba fitondrasany olonany fa izy manetry ten̈a, ke tokony halaintsika tahaka. Tsara alaintsika tahaka koa iro olo manetry ten̈a avoakoran̈a amy Baiboly ao. Han̈amia voninahitry Jehovah atsika izikoa mifen̈y man̈ano zen̈y. (Apok. 4:11) Ho kamaradiny Jehovah fo koa atsika, fotony izy tia olo manetry ten̈a.