“Nisy havanay zay nankany taminaka. Direkty izy nisamboriko tamy vozon̈o akanjo. Efa tihivoneko fo izy!”—Paul.

“Izikoa fa tsy tiako raha hataonolo tran̈o araiky aminaka, ndray hely fo, zaho raha fa meloko edy. Zay raha azony tan̈ako aminin̈y, na saoma zen̈y na entan̈a antran̈o, efa arampiko aminany edy.”—Marco.

Atsika ndraiky marin̈y mety tsy han̈ano raha mandolombo karaha nindro roe lahy io, fa mety ho sarotro amintsika koa hifehy ten̈a ndraikindraiky. Nandova fahotan̈a baka taminy Adama baka atsika. (Rom. 5:12) Ambaka ataonolo sasany, sarotro amindro mifehy helokondro, karaha nataony Paul ndreky Marco in̈y. Sasany ndraiky tsy mahafehy raha iritriretiny. Iro mieritreritry raha mampavozo fo na raha mampakivy. Ny hafa ndraiky tsy mahafehy fan̈irian̈andro han̈ano firaisan̈a, na higiaka toaka, na hiala amy fihinanan̈a jamala.

Olo araiky koa tsy mahafehy eritreritrinany na fan̈irian̈anany na raha ataony, mety ho ratsy mare vokany. Tsy voatery hahavoa atsika raha zen̈y, izikoa atsika mahafehy ten̈a. Ty fan̈ontanian̈a telo mety han̈ampy atsika hahafehy ten̈a: 1) Karakory ma olo mahafehy ten̈a zen̈y? 2) Nan̈ino ma raha zen̈y ten̈a ilain̈a? 3) Akory hanan̈ana toetry an̈isany “vokatrany fan̈ahy” io? (Gal. 5:22, 23) Hizahavantsika koa raha tokony hataontsika izikoa atsika sendra tsy mahafehy ten̈a.

Mahafehy ten̈a olo araiky izikoa mahafehy fihetsehamponany ndreky fan̈irian̈anany. Mifen̈y fo koa izy tsy hivolan̈a ndreky tsy han̈ano raha halany Zan̈ahary.

Tamy Jesosy tambony tany teto, naboakany karakory olo mahafehy ten̈a zen̈y. Baiboly mivolan̈a: “Izikoa fa nisy olo nanihitihy izy, izy tsy nanihitihy iro. Izy koa fa nijaly, izy tsy nasiaka fa nankin̈iny taminy araiky mitsara erakany hitsiny fo fiain̈ananany.” (1 Pet. 2:23) Iro pitondra fivavahan̈a aby io nitady hamitaka Jesosy baka izy hivolan̈a raha tsy marin̈y, fa Jesosy nifehy ten̈a fo. (Mat. 22:15-22) Tsy zen̈y fo. Tandraraiky, sasany tamindro Jiosy aby io neloko mare tamy Jesosy, ke efa mila hitorabato izy foeky. Ino raha nataony? Izy tsy namaly faty fa ‘nisitriky avio niala tamy tempoly tao.’ (Jaona 8:57-59) Firaka Jesosy taminy hazofijalian̈a, izy mbala nahavita nifehy ten̈a fo ndray olo aby io nan̈adroadro izy.—Mat. 27:39-44.

Akory hangalantsika tahaka Jesosy? Apostoly Petera nivolan̈a: ‘Kristy nijaly han̈avotan̈a anaro, ke nan̈ambela modely harehanaro baka anaro hahavita han̈araka dianany tsarabe.’ (1 Pet. 2:21) Dikanizen̈y ndray atsika tsy lavorary, vitantsika fo hangala tahaka Jesosy ke hifehy ten̈a. Nan̈ino ankitin̈y ma atsika mila mahafehy ten̈a?

Hahazo rady amy Jehovah atsika izikoa mahafehy ten̈a. Ndray efa ela nanompoantsika Jehovah, mety ho robaka fihavanan̈antsika aminany izikoa atsika tsy mitandrin̈y amy raha ataontsika ndreky raha volan̈intsika.

Aleva onon̈o baka Mosesy! “Koa mbala olombelon̈o tambony tany teto” tamy fotoan̈anizen̈y, “tsisy nahay nandefitry ambaka” izy. (Nom. 12:3) Tan̈atiny taon̈o taon̈o iro Israelita aby io nin̈on̈on̈o taminany, fa izy tsy neloko foeky ke nahavita niaritry. Tandraraiky amy zay, tsy din̈iny eky raha zen̈y. Iro Israelita aby io nitretre taminany mare fa sakara zen̈y iro, tsisy rano. Neloko angovo jiaby Mosesy ke ho izy tamindro: “E vahoaka mierin̈y olo be aby ty! Zahay ma tsy maintsy man̈aboaka rano baka amy lampimbato ty hamian̈a anaro?”—Nom. 20:2-11.

Mosesy tsy nahafehy ten̈a. Izy tsy nan̈amia voninahitry Jehovah foeky. Nivolan̈a izy fa baka tamindro roeny Arona zen̈y rano io, kanefa ny marin̈y aminany izio baka tamy Jehovah. (Sal. 106:32, 33) Ino vokany? Tsy nambelany Jehovah niditry tamy Tany Nampan̈antinain̈y izy. (Nom. 20:12) Hay be fa nanin̈enany Mosesy mare raha zen̈y.—Deot. 3:23-27.

Ino raha ianarantsika? Ndray efa ela nahitantsika fahamarin̈ana, atsika tokony han̈aja olo fo ndray misy raha mampameloko atsika na olo mila ahitsy. (Efes. 4:32; Kol. 3:12) Marin̈y ndraiky fa anten̈a koa fa mahaimahazo taon̈o tsy mahadin̈y raha ela, fa aleva onon̈o fo Mosesy. Tsy tiantsika ho very borin̈y foeky ezakantsika tan̈atiny taon̈o maro tsy hivadihan̈a amy Jehovah, fotony atsika tsy nahavita nifehy ten̈a. Ke ten̈a ilain̈a manan̈a toetry io. Akory hanan̈ana izio?

Mivavaha baka anao hahazo fan̈ahy masin̈y. Fifihezanten̈a io an̈isany vokatrany fan̈ahy masin̈iny Zan̈ahary. Hahazo fan̈ahy masin̈y io lan̈iany olo mangataka izio aminany. (Lioka 11:13) Hahavita hifehy ten̈a atsika izikoa mahazo fan̈ahy masin̈y io. (Fil. 4:13) Vitany Jehovah koa man̈ampy atsika hanan̈a toetry hafa an̈isany vokatrany fan̈ahy, an̈isanizen̈y fitiavan̈a. Ho moramora amintsika hifehy ten̈a izikoa atsika manan̈a fitiavan̈a.—1 Kor. 13:5.

Mitandrema amy raha jiaby mety hahavy anao tsy hahafehy ten̈a. Izikoa anao mampiasa Internet na man̈ano fangalan̈a diandian̈a hafa, tandrema tsao misy fitondranten̈a maloto amizio ao. (Efes. 5:3, 4) Ialà lavitry zay raha mety  hahavy anao han̈ano raha ratsy. (Ohab. 22:3; 1 Kor. 6:12) Ohatra, olo araiky koa mora manan̈a fan̈irian̈a ratsy, tsara aminany tsy mamaky boky na mizaha filma misy tantarampitiavan̈a foeky.

Mety ho sarotro amintsika man̈araka torohevitry zen̈y, fa izikoa atsika miezaka, Jehovah von̈ono han̈amia atsika angovo ilaintsika. (2 Pet. 1:5-8) Izy han̈ampy atsika hifehy menimenintsika, raha volan̈intsika avio raha ataontsika. Karaha zen̈y Paul ndreky Marco, nikoran̈intsika in̈y. Iro nianatra nifehy helokondro. Misy rahalahy araiky zay koa mora meloko mare izikoa fa mitondra tomabily. Refin̈y izy mankany aminolo foeky. Ino raha nataony? Ho izy: “Isanandra zaho nivavaka mare, baka io zaho nianatra lahatsoratra man̈azava resaka fifihezanten̈a. Naleko onon̈o fo andininy mety han̈ampy zaho. Ankoatranizen̈y, isaka maraindrain̈y zaho mangala onon̈o fo fa mila kalma fo zaho. Efa maromaro taon̈o zaho zay nifen̈y baka hahafehy ten̈a, kanefa firaka iziô zaho mbala mangala onon̈o raha aby zen̈y fo. Miala antran̈o bonibonera zaho izikoa fa misy lera ian̈iny, amy zen̈y zaho tsy mahinihiny lera misy sofera mandeha mora alohanaka.”

Ndraikindraiky, atsika jiaby io mety tsy hahafehy ten̈a. Ke mety ho men̈atra atsika hivavaka amy Jehovah. Kanefa amy zen̈y edy atsika ten̈a tokony hivavaka. Koa zen̈y raha mahazo anao, direkty mivavaha baka izy han̈ambela hadisovan̈anao. Mangataka fan̈ampian̈a aminany, ke mifen̈a tsy han̈ampody hadisovan̈a io. (Sal. 51:9-11) Adosoa amy jerinao foeky izy tsy hitandren̈y vavaka baka amy fô ataonao zen̈y. (Sal. 102:17) Apostoly Jaona nivolan̈a fa liony Zanaka Zan̈ahary “man̈adio atsika ho afaka amy fahotan̈a jiaby.” (1 Jaona 1:7; 2:1; Sal. 86:5) Jehovah man̈iraka panomponany han̈ambela hadisovan̈anolo nan̈ano raha nampalahelo iro. Matoa izy mitaky zen̈y amintsika, dikanizen̈y izy han̈ambela hadisovan̈antsika.—Mat. 18:21, 22; Kol. 3:13.

Mosesy koa fa tsy nahafehy ten̈a, Jehovah tsy faly taminany. Ndray zen̈y, nambelany fo hadisovan̈anany. Mivolan̈a Baiboly fa Mosesy ten̈a lelahy tsy nivadiky, ke tokony halaintsika tahaka izy. (Deot. 34:10; Heb. 11:24-28) Ndray Mosesy tsy nimboany Jehovah niditry tamy Tany Nampan̈antinain̈y, izy mbala hivilominy ke hiain̈y mandrakizay lera tany ty paradisa an̈y. Ho velon̈o tsisy farany koa atsika, izikoa mifen̈y fo hifehy ten̈a.—1 Kor. 9:25.