1. Man̈iraka atsika han̈ino ma Filipianina 2:3, baka io ino vokany izikoa atsika man̈ano zen̈y?

MANETRY TEN̈A atsika ke man̈araka taridalan̈any Jehovah. Haintsika baka fa Jehovah fo ten̈a mahay raha mahatsara atsika. (Efes. 4:22-24) Atsika koa manetry ten̈a, raha tiany Jehovah ny raha ten̈a maventy amintsika fa tsy raha tiany fontsika. Ho tsara fihavanan̈a aminany ndreky amy piaramanompo atsika izikoa man̈ano zen̈y.—Vakia Filipianina 2:3.

2. Ino raha efa hainy Paoly, baka io ino raha hidinihintsika amy lahatsoratra ty ato?

² Mety ho voataon̈onolo amy doniany Satana ty han̈ambony ten̈a ndreky ho tia ten̈a * atsika izikoa tsy mitandrin̈y. Efa tatranizen̈y iro Kristianin̈y tamy taonjato voanalohany tan̈y. Karaha ty ho apostoly Paoly tamindro ta Roma: ‘Zen̈y haviako mivolan̈a aminaro karaha ty: Aza miheviten̈a ho raha mandilatrany tokony ho izy, fa ataova raha hahavy anaro hisain̈y tsarabe.’ (Rom. 12:3) Hainy Paoly tsarabe fa misy lera atsika mba mila matoky valerantsika. Kanefa, fanetrenten̈a han̈ampy atsika hahay handanjalanja, ke tsy hihevitry ain̈intsika ho raha mare mandilatrany tokony ho izy. Afaka man̈ano zen̈y atsika lera: 1) Mifandray amy vady, 2) mahazo tombontsoampanompoan̈a, na lera 3) mampiasa tranonkala fifaneraseran̈a. Zen̈y raha hidinihintsika ato.

3. Nan̈ino ma olo fivadiany mety tsy hifan̈araka? Ino raha iritriretindro fa mahavaha problemondro?

³ Tiany Jehovah ho sambatra mare olo fivadiany. Kanefa mety tsy hifan̈araka iro, fotony iro tsy lavorary. Zen̈y nahavy Paoly nivolan̈a fa hanan̈a fahorian̈a amy nofotro olo manambady. (1 Kor. 7:28) Misy olo sasany nanen̈iny nanambady, fotony raha miasa mimalo fo iro roe fivadiany. Toetsain̈iny donia ty lastio: Izikoa fa tsy fan̈araka, man̈ano “pamba maiky, samy mibôn̈o.” Mety hifindra amy Kristianin̈y manambady koa toetsain̈y zen̈y, ke iro mety hieritreritry fa efa fisarahan̈a edy raha mahavaha problemondro ndreky hampasambatra iro.

4. Ino raha mila tandremantsika?

⁴ Mila mitandrin̈y fo atsika tsao tafihieritreritry fa efa tsy avotro eky vadian̈antsika. Haintsika baka fa, fijangajangan̈a zaraiky fo antony volan̈iny Soratra Masin̈y fa mety hisarahan̈a. (Mat. 5:32) Ke atsika koa fa miatriky problemo maventy, atsika tsy tokony han̈ambony ten̈a ke hieritreritry karaha ty: ‘Efa empaka zaho amy vadian̈a tsy nanjary ty! Tsy fitiavan̈a hely, tsy fahasambaran̈a! Tsy sitrany zaho mitady olo hampasambatra zaho zalahy?’ Izikoa zen̈y raha tsapanao, dikanizen̈y, anao tsy mandiniky raha mahatsara vadinao fa ninao fo. Jehovah ndraiky mandrisiky anao ‘hizaha raha mahatsara vadinao fa tsy raha mahatsara ain̈inao tompiny fo.’ (Fil. 2:4) Tiany Jehovah hiaraka fo anaro fa tsy hisaraka. (Mat. 19:6) Alohany anao handiniky ain̈inao, Jehovah antsendriky diniha. Zen̈y raha tiany hataonao.

5. Izikoa dinihin̈y Efesianina 5:33, ino raha tokony hataonolo fivadiany?

⁵ Olo fivadiany tokony hifankatia ndreky hifan̈aja fo. (Vakia Efesianina 5:33.) Koran̈iny Baiboly fa atsika tokony ho zatra man̈amia  fa tsy miambin̈y amian̈a fo. (Asa. 20:35) Ino toetry han̈ampy iro hifankatia ndreky hifan̈aja fo? Fanetrenten̈a. Lelahy ndreky man̈angy koa samby manetry ten̈a, iro samby hitady raha mahatsara ny andaniny ndreky ny ankilany fo.—1 Kor. 10:24.

6. Ino raha ianarantsika baka amy raha nikoran̈iny Steven ndreky Stéphanie?

⁶ Maro Kristianin̈y manambady nifen̈y hanetry ten̈a, ke nanjary sambatra tokantran̈ondro. Karaha zen̈y iziô Steven. Ho izy: “Karaha ataony ekipy in̈y, anaro roe fivadiany mila mifan̈ampy, intsaka eky izikoa fa misy problemo. Aza mieritreritry karaha ty: ‘Ino raha mahatsara zaho?’ Fa diniha, ‘ino raha mahatsara zahay?’ ” Zen̈y koa raha nikoran̈iny Stéphanie, vadiny Steven. Ho izy: “Tsisy olo tiho tran̈o araiky amy fahavalonany zen̈y. Izikoa misy raha tsy mampifan̈araka zahay, dinihinay ino raha nahavy izio. Zahay miaraka mivavaka, man̈ano fikarohan̈a, baka io miaraka mamaha problemo io. Problemonay fo niadivanay, fa zahay tsy niady.” Ho sambatra olo fivadiany izikoa iro samby mandiniky raha mahatsara vadindro.

7. Karakory tokony ho toetsain̈iny rahalahy araiky izikoa fa mahazo tombontsoampanompoan̈a?

⁷ Ten̈a tombontsoa manompo Jehovah amy fomba ankasitrahiny. (Sal. 27:4; 84:10) Ke izikoa misy rahalahy tihahazo tombontsoampanompoan̈a, ten̈a mendriky derain̈a izy. Baiboly mivolan̈a: “Izikoa misy lelahy mifen̈y hanjary piandraikitry, dikanizen̈y izy man̈iry asa tsara.” (1 Tim. 3:1) Fa izy koa fa mahazo tombontsoampanompoan̈a, izy tokony hanetry ten̈a fo fa tsy hieritreritry ain̈inany ho raha mare mandilatra olo hafa. (Lioka 17:7-10) Han̈ampy olo ny ten̈a tokony tanjon̈onany.—2 Kor. 12:15.

8. Ino raha ianarantsika baka amy Diotrefa, Ozia, baka io Absaloma?

⁸ Koran̈iny Baiboly fa nisy olo niheviten̈a ho raha mare, ke ratsy vokany. Araiky amy zen̈y Diotrefa. Izy tsy nanetry ten̈a foeky sady tihibekobeko antipan̈ahy tamy fiangonan̈a. (3 Jaona 9) Ozia koa nan̈ambony ten̈a ke nan̈ano raha tsy nan̈irahany Jehovah izy. (2 Tan. 26:16-21) Absaloma ndraiky tiho panjaka, ke nataony sary tian̈a vahoaka aby io baka iro hanohan̈a izy amy tetikinany io. (2 Sam. 15:2-6) Ohatra aby io ahitan̈a tsarabe fa halany Jehovah olo mitady voninahitry niny ain̈inany tompiny. (Ohab. 25:27) Ratsy fo vokany izikoa olo araiky man̈ambony ten̈a na mitady voninahitry baka aminolo.—Ohab. 16:18.

9. Ino modely nambelany Jesosy ke tokony harehantsika?

⁹ Jesosy ndraiky tsy nan̈ambony ten̈a. Koran̈iny Baiboly fa “ndray izy fan̈ahy karaha Zan̈ahary, tsy tan̈atiny eritreritrinany foeky hiady fahifan̈a, ke hitovy amy Zan̈ahary zen̈y.” (Fil. 2:6) Fan̈arakaraka Jehovah, efa Jesosy edy ny ten̈a manan̈a fahifan̈a, fa izy tsy man̈ambony ten̈a foeky. Ho Jesosy tamy pianatranany: “Lan̈iany olo miheviten̈a ho farany hely aminaro jiaby, dikanizen̈y izy ny ten̈a be.” (Lioka 9:48) Karaha nataony Jesosy in̈y, mifen̈y hanetry ten̈a koa iro pisava lalan̈a, pan̈ampy amy fanompoan̈a, antipan̈ahy ndreky piandraikitry faritry aby io, ke ten̈a mankahery manompo Jehovah miaraka amindro. Ho tiantsika iro piaramanompo aby io izikoa atsika manetry ten̈a. Salakady Jesosy efa nivolan̈a fa efa fitiavan̈a edy ahaizan̈a olo ten̈a manompo Zan̈ahary.—Jaona 13:35.

10. Ino tokony hataonao izikoa tsapanao fa karaha tsy man̈ano raha foeky antipan̈ahy handaminan̈a problemo?

¹⁰ Akory izikoa misy problemo an̈ivony fiangonan̈a, kanefa fahitanao iro antipan̈ahy  aby io karaha mitazan̈a fo? Manetry ten̈a anao izikoa tsy min̈on̈on̈o fa man̈eky iro mitariky an̈ivony fiangonan̈a. (Heb. 13:17) Ino han̈ampy anao han̈ano zen̈y? Iritrireta ty: ‘Ten̈a mila alamin̈y ankitin̈y ma problemo io? Efa fotoan̈a mety handaminan̈a izio ma iziô? Anjaranaka ma mandamin̈y raha zen̈y? Man̈ano raha hampiray sain̈y fiangonan̈a ma zaho koa man̈ano zen̈y sa hampisaratsaraka izio?’

11. Izikoa Efesianina 4:2, 3 zahan̈a, nan̈ino atsika mila manetry ten̈a?

¹¹ Olo manetry ten̈a ndreky miray sain̈y ten̈a tiany Jehovah tozay olo mahay raha ndreky mahavita raha be. Ke mifen̈a fo hanetry ten̈a izikoa fa manompo Jehovah. Hiray sain̈y fiangonan̈a izikoa anao man̈ano zen̈y. (Vakia Efesianina 4:2, 3.) Akory han̈aboahanao fa anao manetry ten̈a? Mazotoa mitory. Mitadiava fomba han̈ampian̈a olo. Mazotoa mandray vahiny, an̈isanizen̈y iro tsy manan̈a andraikitry amy fiangonan̈a. (Mat. 6:1-4; Lioka 14:12-14) Amy zen̈y tsy fahaizan̈anao fo raha ho hitandro fa fanetrenten̈anao koa.

12. Baiboly ma mandrisiky atsika hitady naman̈a? Hazavà.

¹² Atsika tiany Jehovah hankafỳ fiarahan̈a amy namantsika ndreky havantsika. (Sal. 133:1) Ndray Jesosy mba nisy kamarady. (Jaona 15:15) Baiboly mivolan̈a fa mahatsara atsika manan̈a ten̈a naman̈a. (Ohab. 17:17; 18:24) Koran̈iny Baiboly koa fa ratsy mitokantokan̈a. (Ohab. 18:1) Maro olo mieritreritry fa hahazo naman̈a maro ndreky tsy ho jerinjerin̈y iro, izikoa fa mampiasa tranonkala fifaneraseran̈a. Kanefa mila mitandrin̈y fo atsika izikoa fa mampiasa izio.

13. Nan̈ino ma olo sasany mbala jerinjerin̈y ndreky kivy fo, ndray fa mampiasa tranonkala fifaneraseran̈a?

 ¹³ Misy tatitry mivolan̈a fa maro olo mandany lera mizaha raha amy tranonkala fifaneraseran̈a, kanefa mahaijerinjerin̈y ndreky kivy fo iro. Matetiky baka, sary ampidirinolo ao sary momba raha maventy nandalo tamy fiain̈anandro, na sarindro farany tsara, na sariny namandro, na tany nandihanandro vakansy. Ke olo araiky koa fa mizaha sary aby io, izy mety hieritreritry fa tsisy dikany sady mampaempaka foeky fiain̈ananany. Karaha ty ho ranabavy araiky, 19 taon̈o zay: “Nan̈iry zaho nahita ry namako nan̈ano raha tiandro koa fa farany herin̈iandra, kanefa zaho tantran̈o fo tsisy raha hatao!”

14. Nan̈ino 1 Petera 3:8 io man̈ampy atsika hampiasa tranonkala fifaneraseran̈a amy fomba tsara?

¹⁴ Tsy voatery ho ratsy mampiasa tranonkala fifaneraseran̈a. Izio man̈ampy atsika hifandray amy lafamìntsika ndreky namantsika. Kanefa ny raha misy, maro amy sary na video na kômantaira ampidirinolo ao poerapoera fo. Iro karaha tihivolan̈a: “Zahavanaro baka zaho!” Sasany baka man̈ano kômantaira tsy manjary foeky amy sarindro na amy sarinolo hafa. Fa atsika Kristianin̈y ndraiky tsy karaha zen̈y fa tokony hanetry ten̈a ndreky han̈aja fihetsehamponolo fo.—Vakia 1 Petera 3:8.

15. Ino aby torohevitry amy Baiboly man̈ampy atsika tsy han̈ambony ten̈a?

¹⁵ Izikoa anao mampiditry raha amy tranonkala fifaneraseran̈a ao, man̈ontania ten̈a karaha ty: ‘Kômantaira, sary ndreky video ampidiriko ty ma mety hahavy olo hieritreritry fa zaho man̈ambony ten̈a na poerapoera? Hanjary be fô ma olo koa mahita izio?’ Koran̈iny Baiboly fa “raha jiaby amy donia ty, tsy ino zen̈y fa fan̈irian̈any nofotro ndreky fan̈irian̈any maso, baka io fan̈anovan̈a vantara raha anan̈ana, tsy baka amy Baba fa baka amy donia ty.” (1 Jaona 2:16) Misy Baiboly mandika “fan̈anovan̈a vantara raha anan̈ana” io karaha ty: “Man̈ano raha hahavy izy an̈abo.” Kristianin̈y tsy mitady voninahitry baka aminolo. Baiboly mivolan̈a: “Irarian̈a atsika tsy ho poerapoera ke han̈ano raha hahavy atsika samby atsika hifan̈oesa ndreky ho be fô.” (Gal. 5:26) Izikoa atsika manetry ten̈a, atsika tsy hipoerapoera karaha olo amy donia ty.

16. Nan̈ino atsika tsy tokony han̈ambony ten̈a?

¹⁶ Mila mianatra manetry ten̈a atsika, fotony olo man̈ambony ten̈a zen̈y tsy “misain̈y tsarabe.” (Rom. 12:3) Olo koa fa man̈ambony ten̈a manjary tia mifan̈oesa ndreky tia ten̈a. Fa matetiky, mbala mivaly aminany fo raha nataony ndreky toetsain̈inany in̈y, sady mety hamparary fonolo koa. Ho voafitakany Satana iro izikoa tsy man̈ova toetsain̈indro, sady hataony koa raha handrobatan̈a jerindro. (2 Kor. 4:4; 11:3) Olo manetry ten̈a ndraiky misain̈y tsarabe. Iro mahay mandanjalanja. Haindro baka fa mety hihoaranolo iro amy raha maro. (Fil. 2:3) Haindro koa fa “Zan̈ahary manohitry olo man̈ambony ten̈a, fa izy ndraiky man̈aboaka hatsarampan̈ahy tsisy ambaka izy aminolo manetry ten̈a.” (1 Pet. 5:5) Mifen̈y atsika hanetry ten̈a fotony atsika tsy tihanjary fahavalony Zan̈ahary.

17. Mila man̈ino atsika koa tihahavita hanetry ten̈a fo?

¹⁷ Hahavita hanetry ten̈a fo atsika, izikoa man̈araka torohevitriny Baiboly man̈iraka atsika ‘han̈adoso toetry taloha ndreky raha jiaby miaraka aminany sady hisikiny toetry vaovao.’ (Kol. 3:9, 10) Raha zen̈y tsy mandeha ho azy. Mila mianatra modeliny Jesosy atsika ndreky mangala tahaka raha nataony, erakany mety ho vitantsika. (1 Pet. 2:21) Tsy ho very bôriny ezakantsika. Izikoa atsika manetry ten̈a, ho sambatra tokantran̈ontsika, hiray sain̈y fiangonan̈a, avio ho haintsika hampiasa amy fomba tsara tranonkala fifaneraseran̈a. Ny raha ten̈a maventy, hahazo hatsaran̈a amy Jehovah atsika sady hahazo rady aminany.