1. Ino mahavy olo maro very hevitry?

FIVAVAHAN̈A kadiriny 10 000 mivolan̈a fa iro Kristianin̈y sady manompo Zan̈ahary amy fomba ankasitrahiny. Ke maro olo very hevitry, fotony tsy haindro aia ny marin̈y. Lôso diniky iro: “Izio ma araiky fo fivavahan̈a marin̈y? Sa ikeny Zan̈ahary aby fivavahan̈a jiaby?” Anao ke? Mbala resy lahatra ma anao fa mampianatra ny marin̈y ankitin̈y atsika Vavolombelon̈o Jehovah sady manompo Jehovah amy fomba ankasitrahiny? Alô atsika handiniky porofo.

2. Izikoa 1 Tesalonianina 1:5 dinihin̈y, nan̈ino ma Paoly resy lahatra fa nahita ny marin̈y?

² Ten̈a resy lahatra Apostoly Paoly fa nahita ny marin̈y izy. (Vakia 1 Tesalonianina 1:5.) Nan̈ino ma izy resy lahatra? Fotony izy taitaitry, sa izio hitany metimety aminany? Aha! Nazoto nianatra Volan̈a Zan̈ahary izy. Nikeny fa ‘Soratra Masin̈y jiaby io baka amy fan̈ahy masin̈y Zan̈ahary.’ (2 Tim. 3:16) Izy koa fa nianatra izio, izy nahita porofo maro mankamarin̈y fa Jesosy ankitin̈y Mesia nampan̈antinain̈y, ndray tsy nikendro pitondra fivavahan̈a aby io raha zen̈y. Iro pitondra fivavahan̈a mitsaravelatsihy aby io miaboko misoloten̈a Zan̈ahary, kanefa iro nan̈ano raha halany. (Tit. 1:16) Fa Paoly tsy karaha iro. Izy tsy nifidy raha tiany hinoan̈a ndreky raha tsy tiany hinoan̈a amy Volan̈a Zan̈ahary ao. Von̈ono fo koa izy hampianatra olo hahay raha momba “sitrapôny Zan̈ahary jiaby” ndreky han̈ampy iro han̈ano raha mifan̈araka amy zen̈y.​—Asa. 20:27.

3. Izio ma tsy maintsy mahavaly fan̈ontanian̈a jiaby atsika vo ho resy lahatra fa nahita ny marin̈y? (Zahava “ Asany Jehovah Ndreky Fikasan̈anany ‘Farandraha Maro eky ke Tsy Avoakonty’ ”)

 ³ Maro olo mihevitry fa fivavahan̈a marin̈y zen̈y tokotro mahavaly fan̈ontanian̈a jiaby apetrakanolo, ndray tsy hita mivantan̈a amy Baiboly ao valiny. Marin̈y ma zen̈y? Diniha ndraiky baka i Paoly. Izy nampirisiky Kristianin̈y ‘hangala antoko raha jiaby’, kanefa nan̈eky koa izy fa maro raha tsy nazava taminany. (1 Tes. 5:21) Ho izy: ‘Tapatapany fo raha haintsika, avio raha manjavozavon̈o fo hitantsika amy fitaratra metaly.’ (1 Kor. 13:9, 12) Tsy raha jiaby zay nazava tamy Paoly aby, ary karaha zen̈y koa atsika. Fa ndray zen̈y, nazava taminany tsarabe fahamarin̈ana fototro momba Zan̈ahary ndreky fikasan̈anany. Ke raha zen̈y efa ampy hahavy izy resy lahatra fa nahita ny marin̈y.

4. Akory hahavy atsika hahaiho resy lahatra fo fa nahita ny marin̈y atsika? Ino aby raha hidinihintsika ato?

⁴ Akory hahavy atsika hahaiho resy lahatra fo fa nahita ny marin̈y? Mila dinihintsika izikoa ten̈a mifan̈araka amy raha nampianariny Jesosy momba fivavahan̈a marin̈y raha ataontsika Vavolombelon̈o Jehovah aminandra iziô. Ke hizaha raha efatra ahaizan̈a olo ten̈a Kristianin̈y atsika ato: 1) Tsy manompo sampy, 2) man̈aja an̈aran̈any Jehovah, 3) tia fahamarin̈ana, baka io 4) mifankatia amy fô jiaby.

5. Izikoa dinihin̈y modely nambelany Jesosy, akory fomba tokony hanompoan̈a Zan̈ahary? Akory mety han̈arehantsika raha nampianariny?

⁵ Jesosy ten̈a tia Jehovah, ke zen̈y nahavy izy nanompo Jehovah zaraiky fo, na taminizy tandan̈itry tan̈y zen̈y na izy tambony tany teto. (Lioka 4:8) Nampianariny han̈ano karaha zen̈y koa pianatranany. Na izy na  iro pianatranany tsy nivadiky aby io, samby tsy nampiasa sary koa fa nanompo Zan̈ahary. Jehovah tsy hitany maso, ke tsisy olo afaka man̈ano sarinany. (Isaia 46:5) Misy ndraiky olo mampiasa sary masin̈y koa fa mivavaka. Mety ma man̈ano zen̈y? Didy faharoe amy Didy Folo mivolan̈a: ‘Aza man̈ano sary sokitry ninao, na ino zen̈y na ino, na sarindraha amy lan̈itry an̈abo an̈y zen̈y na sarindraha amy tany ambany atỳ. Aza mankôhoko amindro.’ (Eks. 20:4, 5) Ke mazava aminolo tihamparavoravo Zan̈ahary fa tsy tiany Jehovah hampiasa sary atsika koa fa manompo izy.

6. Modelinjovy ma arehany Vavolombelon̈o Jehovah, iro koa fa manompo Zan̈ahary?

⁶ Mivolan̈a iro manampahaizan̈a momba tantara fa Zan̈ahary zaraiky fo nitompoeny Kristianin̈y tamy taonjato voanalohany. Misy bokiny tantara araiky iziô mivolan̈a fa ndray mieritreritry hampiasa sary amy tany fivavahandro fo efa ‘nampangaroharo’ iro Kristianin̈y voanalohany aby io mare. Man̈araka modely nambelandro koa Vavolombelon̈o Jehovah aminandra izioty. Atsika tsy mampisa sary foeky koa fa mivavaka, na sarinolo hiverin̈y fa “masin̈y” zen̈y, na sariny anjely, na sariny Jesosy. Atsika koa tsy manangantsain̈y na man̈ano raha hahavy atsika karaha manompo tanindrazan̈a. Mety hiforsenolo han̈ano raha aby zen̈y atsika, kanefa tapakevitry fo atsika han̈araka volan̈any Jesosy ty: ‘Jehovah Zan̈aharinao zaraiky fo tsy maintsy tompoenao.’​—Mat. 4:10.

7. Ino aby raha tsy mampiran̈a Vavolombelon̈o Jehovah amy fivavahan̈a hafa?

⁷ Maro olo avahizo tia mitandren̈y toriteny ataony pitondra fivavahan̈a malaza. Efa kalikaly hivavaka amindro pitoriteny aby io foeky olo sasany. Maro olo mandeha mivavaka an̈y. Iro man̈amia volabe pitoriteny aby io, ndreky mivanga boky nisoratindro. Ikendro aby zay raha volaniny pitondra fivavahan̈a aby io. Ndray tio donko Jesosy, mety mbala tsy nahataitry iro mandilatra iro pitondra fivavahan̈a aby io! Tsy honohono atsika foeky han̈ano karaha zen̈y, fotony amintsika tsisy pitondra fivavahan̈a. Atsika man̈aja iro olo mitariky asantsika aby io, kanefa tsy adin̈antsika raha mazava nampianariny Jesosy ty: ‘Pirahalahy aby anaro.’ (Mat. 23:8-10) Atsika tsy manompo olombelon̈o, na pitondra fivavahan̈a io na pitondra fanjakan̈a, avio atsika tsy manohan̈a raha ataondro na ino zen̈y na ino. Atsika tsy man̈ano pôlitìky, baka io mifen̈y atsika tsy ho an̈isany donia ty. Ke hita baka amy zen̈y fa, tsisy raha itovizantsika amindro fivavahan̈a miaboko ho Kristianian̈y aby io foeky.​—Jaona 18:36.

8. Akory ahaizantsika fa tiany Jehovah hamian̈a voninahitry ndreky ho hainolo jiaby an̈aranany?

⁸ Tandraraiky, Jesosy nivavaka: ‘Baba, amia voninahitry an̈aran̈anao.’ Jehovah nandefa feo mare baka tandan̈itry namaly vavakanany io. Jehovah baka tio nampan̈anten̈a fa Izy tômpiny han̈amasin̈y an̈aran̈anany. (Jaona 12:28) Tamy Jesosy nan̈ano fanompoan̈anany, izy nan̈amasin̈y an̈aran̈any Babany fo. (Jaona 17:26) Ke olo ten̈a Kristianin̈y tsy tokony ho men̈atra mampiasa an̈aran̈any Zan̈ahary ndreky man̈ambara izio aminolo.

9. Akory nan̈aboahany Kristianin̈y tamy taonjato voanalohany fa iro nan̈aja an̈aran̈any Zan̈ahary?

⁹ Tafara heliny niforaon̈any fiangonan̈a kristianian̈y tamy taonjato voanalohany, Jehovah ‘nitsinjo firenena hafa, baka io izy nangala olo baka amy firenena aby io hitondra an̈aranany.’ (Asa. 15:14) Ravoravo iro nampiasa an̈aran̈any Zan̈ahary ndreky nan̈ambara izio taminolo. Iro apostoly ndreky pianatrany Jesosy aby io koa nampiasa an̈aran̈any  Zan̈ahary fo lera iro nitory, ndreky lera iro nanoratra boky amy Baiboly. * Naboakandro tsarabe fa iro zaraiky fo vahoaka mitondra an̈aran̈any Zan̈ahary.​—Asa. 2:14, 21.

10. Ino porofo ahaizan̈a fa Vavolombelon̈o Jehovah zaraiky fo ny ten̈a mampiasa ndreky man̈ambara an̈aran̈any Zan̈ahary?

¹⁰ Vavolombelon̈o Jehovah koa ma mba man̈ano raha ahaizanolo an̈aran̈any Zan̈ahary? Alô atsika handiniky porofo. Maro pitondra fivavahan̈a amy zioty man̈ano fomba jiaby tsy hahaizanolo an̈aran̈a Jehovah io. Nadosondro amy Baibolindro ao foeky an̈aran̈a io, avio tsy himboandro hampiasain̈a foeky izio lera man̈ano fotoampivavahan̈a. * Azovy olo afaka hifamatra fa Vavolombelon̈o Jehovah zaraiky fo ny ten̈a man̈aja ndreky man̈amia hasin̈y an̈aran̈any Jehovah? Ambarantsika aminolo farany maro an̈aran̈a Jehovah, ary tsisy fivavahan̈a man̈ano zen̈y mandilatra atsika. Mifen̈y koa atsika miain̈y mifan̈araka aminy an̈aran̈a io, fotony atsika Vavolombelon̈onany. (Isaia 43:10-12) Nampodintsika amy tany tokony ho hisy izy an̈aran̈any Zan̈ahary io amy Soratra Masina—Fandikan-tenin’ny Tontolo Vaovao ao, fotony izio nadosony pandikateny sasany tamy Baiboly nadikandro. Efa mandilatra 240 milion isakany Baiboly efa naboakantsika! Ahitan̈a  an̈aran̈any Jehovah koa amy boky ndreky gazety adikantsika, ary iro io misy amy volan̈a mandilatra 1 000 aby!

11. Akory nan̈aboahany Kristianin̈y tamy taonjato voanalohany fa tiandro mare fahamarin̈ana?

¹¹ Jesosy ten̈a tia fahamarin̈ana, tsy ino zen̈y fa fahamarin̈ana momba Zan̈ahary ndreky Fikasan̈anany. Hita tamy fomba fiain̈anany Jesosy fa fahamarin̈ana io hainy, avio niezaka izy nan̈ambara izio taminolo. (Jaona 18:37) Tia fahamarin̈ana io koa olo ten̈a pan̈aradia Jesosy. (Jaona 4:23, 24) Zen̈y nahavy apostoly Petera nampitovy fivavahan̈a kristianin̈y amy ‘lalan̈any fahamarin̈ana.’ (2 Pet. 2:2) Tiandro mare fahamarin̈ana io, ke zen̈y nahavy iro Kristianin̈y tamy voanalohany tan̈y tsy nan̈araka hevitry na fampianaran̈a naparitakany fivavahan̈a, na fombafomba, na hevitrinolo mifanohitry amy fahamarin̈ana io. (Kol. 2:8) Amy zioty koa, miezaka ‘mandeha amy fahamarin̈ana fo’ ny ten̈a Kristianin̈y, ke mitandrin̈y mare iro baka hifan̈araka amy raha ampianariny Jehovah amy Volan̈anany ao fo raha jiaby inoandro ndreky fomba fiain̈anandro.​—3 Jaona 3, 4.

12. Akory ataondro mitariky asantsika aby io izikoa hitandro fa mila hahitsy raha sasany inoantsika? Nan̈ino iro man̈ano zen̈y?

¹² Vavolombelon̈o Jehovah tsy miaboko mahay raha jiaby an̈atiny Baiboly ao. Nisy fotoan̈a aby diso fomba nan̈azavantsika fampianaran̈a sasany ndreky fomba nandaminan̈a fiangonan̈a. Kanefa tsy tokony hampalany fan̈ahy atsika raha zen̈y. Fotony, koran̈iny Baiboly fa hazava tsihelihely fahamarin̈ana, izikoa fa mandeha fotoan̈a. (Kol. 1:9, 10) Ambarany Jehovah amintsika tsihelihely fahamarin̈ana, ke mila von̈ono hiambin̈y atsika firaka izio mazava tsarabe. (Ohab. 4:18) Izikoa fa hitany Filankevipitantan̈ana fa mila ahitsy fahazahoantsika raha araiky ampianariny Baiboly, na fomba fan̈anaovantsika raha, iro tsy mirekireky man̈itsy. Maro fivavahan̈a man̈aova fampianaran̈andro fotony iro mila sitraka aminolo mivavaka ao, na koa iro tihalaza amy donia ty. Vavolombelon̈o Jehovah ndraiky von̈ono han̈itsy raha sasany, fotony iro tiho tsara fihavanan̈a amy Zan̈ahary, avio iro tihanompo Jehovah amy fomba ankasitrahiny, karaha nataony Jesosy. (Jak. 4:4) Baka amy fitiavantsika fahamarin̈ana ndreky fahaizantsika ny marin̈y ampianariny Baiboly mahavy atsika man̈itsy raha sasany fa tsy atsika tihan̈aradrôron̈o donia ty, na nohony atsika tadiavindro han̈ano zen̈y.​—1 Tes. 2:3, 4.

13. Ino toetry mampiavaka ten̈a Kristianin̈y? Akory ahitan̈a fa toetry io ten̈a mampiavaka Vavolombelon̈o Jehovah?

¹³ Maro toetry mampiavaka ten̈a Kristianin̈y tamy taonjato voanalohany, fa fitiavan̈a ny ten̈a ahaizan̈a iro. Karaha ty ho Jesosy: ‘Anaro mifankatiava. Baka amy zen̈y ahaizanolo fa anaro pianatranaka ankitin̈y.’ (Jaona 13:34, 35) Amy zioty koa, mifankatia amy fô jiaby sady miray hina mare Vavolombelon̈o Jehovah erantany. Tsy mitovy amy fivavahan̈a hafa atsika, fotony atsika efa mira pihavan̈a, ndray samby amy tany faviany ndreky kolontsain̈inany. Hita tsarabe raha zen̈y, lera atsika mivory ndreky man̈aton̈o fivoriambe. Ke mahairesy lahatra fo atsika fa ankasitrahiny Jehovah fomba anompoantsika izy.

14. Koa zahan̈a Kolosianina 3:12-14, akory fomba an̈aboahantsika fa atsika mifankatia ankitin̈y?

¹⁴ Soratra Masin̈y man̈iraka atsika ‘hifankatia mare.’ (1 Pet. 4:8) Fomba araiky an̈aboahantsika zen̈y, lera atsika mifan̈ambela hadisovan̈a ndreky mifandefitry fo. Miezaka koa atsika hazoto handray vahiny ndreky tsy hatity  aminolo jiaby an̈ivony fiangonan̈a, ndray aminolo nan̈ano raha halantsika. (Vakia Kolosianina 3:12-14.) Baka amy fifankatiavan̈a ahitan̈a tsarabe fa atsika ny ten̈a Kristianin̈y.

15. Akory koa ahitan̈a fa mitovy tamindro Kristianin̈y tamy taonjato voanalohany tan̈y fo fomba anompoantsika Zan̈ahary?

¹⁵ Misy raha hafa koa itovizantsika amindro Kristianin̈y voanalohany. Atsika man̈araka lamin̈y napetrakandro apostoly tamy taonjato voanalohany tan̈y. Taloha tan̈y iziô nisy piandraikitry pitety faritany, antipan̈ahy avio pan̈ampy amy fanompoan̈a. Karaha zen̈y koa aminandrantsika izioty (Fil. 1:1; Tit. 1:5) Fan̈ampinizen̈y, atsika man̈aja lalàn̈any Zan̈ahary momba firaisan̈a ndreky mariazy. Arehantsika koa volan̈any Zan̈ahary momba fampiasan̈a lio. Karaha nataondro koa, miezaka atsika miaro fiangonan̈a izikoa fa misy olo kinia mandika lalàn̈any Zan̈ahary, kanefa tsy mibebaka.​—Asa. 15:28, 29; 1 Kor. 5:11-13; 6:9, 10; Heb. 13:4.

16. Ino ma raha ianarantsika baka aminy Efesianina 4:4-6?

¹⁶ Nivolan̈a koa Jesosy fa ho maro olo hiaboko pan̈aradia izy, kanefa iro tsy man̈araka fampianaran̈anany foeky. (Mat. 7:21-23) Mivolan̈a koa Soratra Masin̈y fa aminandra farany, ‘an̈arany fo olo mivavaka fa tsy hita amy raha ataondro aby maha pivavaka iro.’ (2 Tim. 3:1, 5) Kanefa, Baiboly mivolan̈a fa ‘araiky fo finoan̈a’ ikeny Zan̈ahary.​—Vakia Efesianina 4:4-6.

17. Amy zioty, azovy ma ten̈a man̈aradia Jesosy sady manompo Zan̈ahary amy fomba ankasitrahiny?

¹⁷ Azovy zaraiky ma ten̈a man̈araka fivavahan̈a marin̈y amy zioty? Izikoa fa avory porofo jiaby tio in̈y, efa atsika Vavolombelon̈o Jehovah edy manompo Jehovah amy fomba ankasitrahiny. Atsika man̈araka modely nampianariny Jesosy sady narehandro Kristianin̈y tamy voanalohany tan̈y. Ravoravo tsisy ambaka izy atsika, fotony atsika an̈isany vahoakany Jehovah, avio atsika mahay ny marin̈y momba izy ndreky fikasan̈anany. Irarian̈a atsika ho resy lahatra fo fa nahita ny marin̈y ke tsy hiala amy fahamarin̈ana foeky!