1. Ino antony araiky nahavy Jesosy nampiran̈a pianatranany aby io aminy ondrikondriky?

NAMPITOVISINY Jesosy taminy ondrikondriky iro pianatranany aby io, ke izy piambin̈y iro. (Jaona 10:14) Mety tsara raha zen̈y, fotony ondrikondriky mahay olo piambin̈y izy sady mitandren̈y feony piambin̈y io. Nisy lelahy pizahatany araiky zay nahita fahamarin̈anizen̈y. Ho izy: “Zahay taminio tihangala sary ondrikondriky aby zay, ke nikahianay nan̈aton̈o zahay iro; fa iro tsy nety nan̈araka zahay fotony tsy haindro feonay. Baka io navy piambin̈y iro, manafolahy hely zay; niaraka izy nikaiky iro, direkty iro nan̈araka izy.”

2-3. a) Akory an̈aboahany pan̈aradia Jesosy fa iro mitandren̈y feonany? b) Ino raha hianarantsika amy lahatsoratra ty ndreky lay man̈araka?

² Raha nitantarainy lelahy pizaha tany io mampatsiaro atsika raha nivolan̈iny Jesosy momba ondrikondrikinany, tsy azovy zen̈y fa pianatranany. Ho izy: “Iro hitandren̈y feonaka.” (Jaona 10:16) Fa Jesosy iziô efa andan̈itry, ke akory ataontsika mitandren̈y feonany? Mitandren̈y izy atsika izikoa man̈araka raha nampianariny.—Mat. 7:24, 25.

³ Hianatra raha sasany nampianariny Jesosy atsika amy lahatsoratra ty ndreky amy lay man̈araka. Ke an̈isany raha hidinihintsika, sasany amy raha nivolan̈iny Jesosy fa tokony hivolezantsika ndreky raha hafa mila ataontsika. Fa alohanizen̈y, hizahavantsika antsendriky raha aroe tsy tokony hataontsika eky, eraka raha nampianariny piambin̈y ten̈a tsara io.

4. Izikoa zahan̈a Lioka 12:29, ino raha mety hahavy atsika ‘hiasaloha be’?

⁴ Vakia Lioka 12:29. Jesosy nampirisiky pianatranany ‘tsy hiasaloha be eky’ amy raha ilaindro andavanandra. Haintsika fa mbala marin̈y fo sady feno fahendrena torohevitriny Jesosy zen̈y. Tiantsika han̈araka izio, kanefa ndraikindraiky raha zen̈y tsy mora. Ino antony?

5. Nan̈ino olo sasany miasaloha mare amy velonten̈a?

 ⁵ Misy olo miasaloha mare amy raha hoanin̈y, lamba ndreky tany pitrahan̈a. Mipetraka amy tany masikiny donko iro, ke sarotro mahita asa ndreky vola hamilaoman̈a fianakavian̈a. Ny raha misy koa, mety naty lay olo pamelon̈o ke sahiran̈a mare fianakavian̈anany. Sôsoko zen̈y, maro koa olo nanjary tsisy asa rango nisiany valan̈aretin̈y COVID-19. (Mpito. 9:11) Mety zen̈y donko raha iain̈anao amy zioty, na koa misy raha hafa manahiran̈a anao. Ke akory hahavy anao ‘tsy hiasaloha be eky’ karaha nivolan̈iny Jesosy in̈y?

6. Ino ma raha nandalo taminy apostoly Petera?

⁶ Tandraraiky, apostoly Petera ndreky apostoly hafa niondran̈a sambo hely. Iro taminio tamy Ranomasin̈iny Galilia, nisy andra ratsy mare tamy zen̈y. Tiô fo, Jesosy hitandro nandeha tan̈abony rano. Ho Petera: ‘Izikoa anao ankitin̈y io Tômpo, kahia man̈aton̈o anao an̈abony rano io zaho.’ Jesosy baka tiô nivolan̈a taminany ‘mavia.’ Niala tan̈aty sambo i Petera, baka io izy ‘nandeha tan̈abony rano sady nan̈aton̈o Jesosy.’ Ino amy zay raha niboaka? Tafifantoko taminy andra ratsy io Petera, ke nanjary navozo. Nanomboko nideky izy, ke nandronton̈o karaha ty: ‘Tômpo, vonjia zaho ô!’ Nisambôriny Jesosy izy ke  avotro. Ty raha tsara alaintsika onon̈o: Petera koa fa nifantoko tamy Jesosy, vitany nandeha tan̈abony rano. Fa izy koa fa nifantoko taminy andra ratsy in̈y, nanjary navozo izy avio nisalasala, ke zen̈y nahavy izy nanomboko nideky.—Mat. 14:24-31.

7. Ino raha ianarantsika baka amy Petera?

⁷ Ino raha ianarantsika baka amy Petera? Taminizy niala tan̈aty sambo ndreky nandeha tan̈abony ranomasin̈y in̈y, tsy tan̈atiny jerinany foeky havozo andra ratsy io. Ny raha tan̈atiny dinikinany, akory handihanany an̈abony rano ke haviany amy Jesosy. Ino amy zay ny raha nisy? Tsy nifantoko tamy Jesosy eky izy; zen̈y nahavy izy navozo andra ratsy in̈y ke nideky. Ho dobo amy lafiny arapan̈ahy na halemy finoan̈a atsika izikoa mifantoko amy raha manahiran̈a atsika, fa tsy mifantoko amy Jehovah ndreky fampan̈antinan̈anany. Na maventy be karakory problemontsika, atsika mila mitavandra Jehovah fo ndreky matoky fa Jehovah mahavita man̈ampy atsika. Akory hahavitantsika zen̈y?

8. Ino raha han̈ampy atsika tsy hiasaloha dila loatra momba raha ilaintsika?

⁸ Mila matoky Jehovah atsika izikoa fa miatriky problemo maventy fa tsy hiasaloha be eky. Tsaraova fa Jehovah Babantsika io ten̈a tia atsika, ary izy efa nampan̈anten̈a fa hamiany atsika raha ilaintsika, izikoa fanompoan̈a izy ny raha ataontsika amy toeran̈a voanalohany. (Mat. 6:32, 33) Raha koa fa volan̈iny, tsy maintsy tantirahiny fo. (Deot. 8:4, 15, 16; Sal. 37:25) Ndray vôron̈o ndreky folera fo karakarainy Jehovah, ke intsaka eky atsika! Atsika tsy tokony hiasaloha foeky momba raha hoanintsika na raha sikinintsika. (Mat. 6:26-30; Fil. 4:6, 7) Raimandreny iziô man̈amia raha ilainy zanakandro fotony tiandro zanakandro. Han̈amia raha ilaintsika panomponany koa Jehovah, fotony atsika tiany. Ny raha azo antoko, Jehovah tsy maintsy hikarakara atsika.

9. Ino raha ianaranao baka amy pisava lalan̈a fivadiany?

⁹ Ty misy tantara ahitan̈a fa Jehovah ten̈a man̈amia raha ilaintsika. Nisy pisava lalan̈a fivadiany zay nitondra tomôbily efa kay. Iro taminio handeha hangala ranabavy aroe tamy tobiny pitsoaponenan̈a, baka io hitondra iro handeha hivory. Karaha ty ho rahalahy io: “Zahay koa fa ravan̈a baka nivory, nikahianay hihina miaraka aminay iro roe mirahavavy. Kanefa tiô fo, tontohitry zahay fa kaiky tsisy hanin̈y foeky zahay, avio ndray parata tsisy!” Akory nataondro roe fivadiany? Ho rahalahy io: “Zahay efatra koa fa navy tantran̈o, efa nisy tanty be aroe feno hanin̈y tambaravaran̈anay. Tsy hainay olo nan̈atriky izio fa ny raha hainay fo, Jehovah nikarakara zahay.” Tafara tatỳ koa, robaka tomôbilindro fivadiany io, kanefa izio nilaindro mare tamy fanompoan̈a; iro tsisy vola han̈amboaran̈a izio foeky. Nindesindro tamy mekanisiain antsendriky tomôbily io, misy ahaizandro ôtrino man̈amboatra izio. Tiô fo nisy lelahy zay nandalo sady nan̈ontany karaha ty: “Ninjovy eky tomôbily io?” “Ninaka”, ho rahalahy io, “izio handeha hamboarin̈y.” Karaha ty ho lelahy io: “Tsy problemo zen̈y. Alafaosa aminaka edy izio. Karaha io tsarabe tomôbily tadiaviny vadiko, sady io kolera tadiaviny! Ôtrino ma handafaosanao izio aminaka?” Nalafony rahalahy io taminany izio, ke vola nazony nahampy nivangan̈a tomôbily hafa. Ho rahalahy io: “Haravoan̈a ma ninay taminy andra io! Hainay tsarabe fa tsy navinavy ho azy raha zen̈y fa ten̈a Jehovah nan̈ampy zahay!”

10. Izikoa Salamo 37:5 zahan̈a, nan̈ino atsika tsy mila miasaloha be amy raha ilaintsika andavanandra?

¹⁰ Izikoa atsika mitandren̈y feony piambin̈y ten̈a tsara io ke efa tsy miasaloha be loatra amy raha ilaintsika andavanandra eky, mahazo  matoky atsika fa hamezany Jehovah atsika fo raha ilaintsika. (Vakia Salamo 37:5; 1 Pet. 5:7) Diniha ndraiky baka raha sarotro aby avoakoran̈a tamy  fehintsoratra faha-5 in̈y. Letrizay, Jehovah mety nampiasa lohany fianakavian̈a na patron araiky han̈amia atsika raha ilaintsika. Fa izikoa lohany fianakavian̈a efa tsy mahavita miasa eky na very asa, mety matoky atsika fa hahita fomba fo Jehovah hikarakaran̈a atsika. Hitantsika tiô raha nirahiny piambin̈y ten̈a tsara io hataontsika. Fa atsika iziô ndraiky hizaha raha nivolan̈iny fa tokony hivolezantsika.

11. a) Koa Matio 7:1, 2 zahan̈a, ino raha tokony hivolezantsika ho Jesosy? b) Nan̈ino raha zen̈y tsy mora?

¹¹ Vakia Matio 7:1, 2. Hainy Jesosy fa tsy lavorary olo nitandren̈y izy ke mora mahita raha tsy mety ataonolo. Zen̈y nahavy izy nivolan̈a: “Aza mitsara olo eky.” Mety efa mifen̈y mare atsika tsy hitsaratsara piaramanompo amintsika; fa ndraikindraiky mbala tafan̈ano zen̈y fo atsika, fotony atsika tsy lavorary. Ke izikoa atsika mahatsapa fa ndraikindraiky atsika mora mitsaratsara olo, ino raha tokony hataontsika? Tandrin̈esa Jesosy, avio mifen̈a angovo jiaby tsy hitsaratsara olo eky.

12-13. Nan̈ino fomba nitondrasany Jehovah i Davida man̈ampy atsika tsy hitsaratsara olo?

¹² Tsara koa atsika misaintsain̈y modely nambelany Jehovah. Izy mifantoko amy toetry tsaranolo fo. Zen̈y iziô raha nataony, tamy Panjaka Davida nan̈ano fahotan̈a maventy. Nijangajanga tamy Batseba izy, avio nivoneny i Oria, vadiny Batseba. (2 Sam. 11:2-4, 14, 15, 24) Ke niaritry ny mafy izy, ndreky lafamìnany, baka io iro vadiny aby io. (2 Sam. 12:10, 11) Tandraraiky koa, raha nataony Davida nahitan̈a fa izy tsy natoky Jehovah. Nan̈iraka olo izy hikônty lelahy mety halefa maramila, kanefa Jehovah tsy nan̈iraka izy han̈ano zen̈y aby. Mety nan̈ambony ten̈a donko Davida taminio, sady nieritreritry fa matanjaka mare maramilanany aby io ke iro fo efa afaka hiaro izy. Ino vokatrany raha nataony zen̈y? Kadiriny 70 000 Israelita natiny aretin̈y mamono!—2 Sam. 24:1-4, 10-15.

¹³ Izikoa anao tan̈y tamy zen̈y, akory fiheveranao i Davida? Hieritreritry ma anao fa tsy vain̈y famindrampôny Jehovah izy? Jehovah tsy nifantoko tamy raha ratsy vitany Davida, fa tamy tsy fivadihan̈anany tan̈atiny taon̈o maro ndreky tamy fibebahan̈anany. Ndray maventy be karakory fahotan̈a vitany Davida, nambelany Jehovah fo hadisovan̈anany, fotony hainy fa Davida ten̈a tia izy sady tihan̈ano raha tsara. Mamparavoravo mahay fa Jehovah mifantoko amy toetry tsarantsika ndreky raha tsara ataontsika. Sa akory hevitrinao?—1 Mpanj. 9:4; 1 Tan. 29:10, 17.

14. Ino raha han̈ampy atsika tsy hitsaratsara olo eky?

¹⁴ Jehovah tsy man̈anten̈a fa ho mety fo raha jiaby ataontsika. Atsika koa tokony han̈ano karaha zen̈y aminolo hafa. Toetry tsarandro fo tokony zahavantsika. Farandraha mora eky mahita raha tsy mety hataonolo ndreky man̈amia tsin̈y olo. Fa mangala tahaka Jehovah atsika, izikoa mifen̈y fo miaraka miasa aminolo io, ndray iô hadisovan̈anany. Diaman koa mbala tsy voatefy, karaha ratsy zahan̈a. Fa olo araiky koa mahaimandiniky, direkty hainy fa, ten̈a tsara sady valera diaman io lera izio voatefy ndreky voadio tsarabe. Karaha ataony Jehovah ndreky Jesosy, atsika tsy tokony hifantoko amy raha tsy mety ataonolo fa amy toetry tsarandro.

15. Ino koa raha han̈ampy atsika tsy hitsaratsara olo? Man̈ameza ohatra.

¹⁵ Ankoatrany mifantoko amy toetry tsaranolo, ino koa raha han̈ampy atsika tsy  hitsaratsara olo? Ilaintsika mandiniky raha iain̈any namantsika io. Misy ohatra araiky ty: Tamy tempoly Jesosy tandraraiky zay. Tao izy nahita man̈angy araiky maty vady nandatsaka vola aroe farany madiniky tan̈atiny boatimbolany tempoly. Jesosy tsy nivolan̈a: “In̈y fo vola nalatsakany man̈angy io?” Tsy hamaraozany vola namezany man̈angy io nifantaohany Jesosy, fa lay antony nahavy man̈angy io nandatsaka vola io; nidinihiny Jesosy koa raha niain̈any. Nidera izy Jesosy, fotony nan̈ano zay vitany man̈angy io.—Lioka 21:1-4.

16. Ino raha ianarantsika baka amy raha nambarany Veronica?

¹⁶ Ten̈a ilain̈a mandiniky raha iain̈anolo. Hita tsara zen̈y baka amy raha nitantarainy Veronica. Nisy reny mitaiza manokan̈a zanany lelahy zay tamy fiangonan̈a nisy izy. Karaha ty ho Veronica: “Matetiky iro roe mianaka tsy afaka nivory ndreky nanompo. Ke nanjary tsy azoazoko iro. Fa zaho koa fa niaraka nitory tamy rahavavy io, nitantarainy taminaka raha sarotro iaretany. Zanany io baka misy aretin̈y amy loha, ke miezaka mare izy mamelon̈o iro ndreky mankafatatra fihavanan̈andro amy Jehovah. Koa fa niaho tsarabe raha mahazo zanany io, ndraikindraiky izy tsy afaka nivory niaraka taminay fa nandeha nivory tamy fiangonan̈a hafa.” Karaha ty ho Veronica baka tio: “Tsy tan̈atiny jeriko foeky fa zen̈y raha iain̈any rahavavy io. Ke iziô, nahaitiako fo rahavavy io sady hajaiko, fotony haiko fa  miezaka mare izy man̈ano zay vitany amy fanompoan̈a.”

17. a) Ino raha irahiny Jakoba 2:8 ataontsika? b) Akory havitantsika zen̈y?

¹⁷ Ino raha mila ataontsika izikoa tsapantsika fa mora mitsaratsara piaramanompo atsika? Mila alaintsika onon̈o fa atsika tsy raha tokony ho tia iro fo fa, tsy maintsy tia iro. (Vakia Jakoba 2:8.) Tokony hivavaka koa atsika, ke iangavy Jehovah amy fô jiaby han̈ampy atsika tsy hitsaratsara olo eky. Man̈ano raha mifan̈araka amy vavakantsika atsika izikoa miezaka man̈aton̈o olo tsy azoazontsika io ndreky mikoran̈a aminany. Atsika koa man̈ano zen̈y, ho haintsika ten̈a toetrinany. Atsika mety mitaon̈o izy hiaraka hanompo amintsika na kahiantsika hihinan̈a antran̈ontsika an̈y izy. Izikoa fa mahaimaro raha haintsika momba piaramanompo amintsika io, ho moramora amintsika hangala tahaka Jehovah ndreky Jesosy, ke hifantoko amy toetry tsaranany. Zen̈y koa fomba han̈aboahantsika fa mitandren̈y piambin̈y ten̈a tsara io atsika. Izy nivolan̈a fa tsy tokony hitsaratsara olo eky atsika.

18. Akory han̈aboahantsika fa mitandren̈y feony piambin̈y ten̈a tsara io atsika?

¹⁸ Karaha ataony ondrikondriky mitandren̈y feony piambin̈y izy in̈y, mitandren̈y Jesosy koa olo pan̈aradia izy. Izikoa atsika miezaka fo tsy hiasaloha be loatra amy raha ilaintsika ndreky ho vôly mitsaratsara olo, Jehovah ndreky Jesosy hitahy ezakantsika. Na an̈isany “ondrikondriky vitsy” atsika na an̈isany “ondrikondriky hafa”, irarian̈a atsika hitandren̈y ndreky han̈araka feony piambin̈y ten̈a tsara io fo. (Lioka 12:32; Jaona 10:11, 14, 16) Hidinihintsika amy lahatsoratra man̈araka raha aroe nirahiny Jesosy hataonolo man̈aradia izy.