1-2. Ino ma raha nambarany panoratra araiky, avio ino raha hidinihintsika ato?

MANDEHA antapitrisany olo mivolan̈a fa mino Jesosy, kanefa iro tsy man̈araka raha nampianariny. (2 Tim. 4:3, 4) Karaha ty ho panoratra araiky: “Akory eky izikoa misy olo karaha Jesosy in̈y amy zioty mikoran̈a amintsika, sady mitovy amy raha nivolan̈iny Jesosy raha volan̈iny ndreky fomba ivolan̈any izy? ... Tsy han̈eky izy ma atsika, karaha nataonolo tamy 2000 taon̈o loso zay? ... Izikoa zahan̈a raha ataonolo maro amy zioty, ia valiny!”

² Maro olo tamy taonjato voanalohany naharen̈y Jesosy nampianatra ndreky nahita fahagagan̈a nataony, fa iro mbala tsy nino izy fo. Fotony nampaneloko iro mare raha nivolan̈iny Jesosy ndreky raha nataony. Tamy lahatsoratra taloha in̈y, atsika efa nahita antony efatra nahavy zen̈y, fa mbala hahita antony efatra hafa koa atsika aminy araiky ty. Ho hitantsika ato koa nan̈ino olo aminandrantsika iziô tsy man̈eky hitandren̈y hafatra toriantsika, avio ino raha tokony hataontsika baka atsika tsy ho voly hanompo Jehovah.

3. Ino ma raha nataony Jesosy ke nahavy olo sasany neloko taminany?

³ Tamy Jesosy tambony tany teto, izy nanokan̈a fotoan̈a niarahan̈a tamy karazan̈anolo jiaby. Nisy fotoan̈a izy niaraka nihinan̈a tamy pan̈arivo ndreky tamy manampahifan̈a. Fa matetiky koa izy niaraka taminolo masikìny ndreky olo tsisy piaro. Tamy zen̈y koa nisy olo niheverinolo fa “panota”, kanefa Jesosy nan̈ano raha han̈ampian̈a iro. Neloko tamy raha nataony Jesosy aby zen̈y olo sasany, fotony iro nan̈ambony ten̈a loatra. Karaha ty ho iro tamy pianatrany Jesosy: ‘Nan̈ino ma anaro miaraka mihina ndreky miaraka migiaka aminolo pamory latety ndreky panota aby io?’  Ho Jesosy tamindro: “Tsy olo salama mila dokotera, fa olo marary. Sady diako atỳ tsy handeha hikaiky olo marin̈y, fa hikaiky olo panota baka iro hibebaka.”​—Lioka 5:29-32.

4. Izikoa raha nambarany paminan̈y Isaia io zahan̈a, ino ma raha efa tokony ho nampoizindro Jiosy aby io?

⁴ Ino ma raha koran̈iny Soratra Masin̈y? Efa ela be talohany naviany Mesia, paminan̈y Isaia efa nan̈ambara fa ho halanolo Mesia io. Karaha ty koran̈iny: ‘Izy tsy nasianolo fotiny sady nihatakatahanolo ... Miran̈a raha nasitriky taminay saoranany. Tsy nasian̈a fotiny foeky izy sady tsy nasianay kontiny foeky koa.’ (Isaia 53:3) Faminanian̈a io mivolan̈a fa Mesia io ‘hihatakatahanolo’, ke tokony efa nampoizindro Jiosy tamy taonjato voanalohany, fa ho maro olo tsy han̈eky Jesosy.

5. Karakory fiheveranolo olo man̈aradia Jesosy zen̈y izioty?

⁵ Misy raha karaha zen̈y koa ma iziô? Ia. Maro pitondra fivavahan̈a ravoravo koa fa misy olo manan̈a plasy an̈abo, na olo manandraha, na olo hiverinolo fa hendry amy donia ty, miditry ho an̈isany fiangonan̈andro. Ikendro ho an̈isany fiangonan̈a fo iro olo aby io, nata tsy mifan̈araka amy taridalan̈any Zan̈ahary fomba fiain̈anandro. Panompony Jehovah ndraiky miezaka fo hafana fô amy fanompoan̈a ndreky ho tsara fitondranten̈a, kanefa tsy asiandro pitondra fivavahan̈a aby io fotiny foeky iro, fotony iro io hiritriretindro fa olo ambany. Eraka koran̈any Paoly in̈y, ‘olo tsy nasiany donia ty fotiny’ edy nifidiny Zan̈ahary. (1 Kor. 1:26-29) Farandraha valera amy Jehovah eky panomponany tsy mivadiky.

6. Ino raha nivolan̈iny Jesosy amy Matio 11:25, 26, baka io akory mety hangalantsika tahaka izy?

⁶ Ino raha tokony hataontsika baka tsy hihen̈y finoan̈antsika? (Vakia Matio 11:25, 26.) Aza ambela ho hisy vokany aminao fomba fiheveranolo amy donia ty panompony Jehovah. (Sal. 138:6) Miniminia hely baka hamarozandraha vitany Jehovah! Olo hiveriny donia ty fa bahara ndreky dindery edy ampiasainy Jehovah han̈ano sitraponany.

7. Nan̈ino Jesosy nivolan̈a fa iro Fariseo aby io pihatsaravelatsihy? Karakory nataondro koa fa naharen̈y zen̈y?

⁷ Tsy navozo foeky i Jesosy nan̈amia tsin̈y iro pitondra fivavahan̈a tamy zen̈y, fotony iro io nihatsaravelatsihy. Zen̈y iziô raha nataondro Fariseo aby io. Sarôtiny mare iro tamy fomba fanasan̈a tan̈ana, kanefa tsy nasiandro fotiny adidy tokony hatao amy raimandreny. (Mat. 15:1-11) Misaora lany fan̈ahy iro pianatra Jesosy aby io nahita Jesosy nan̈amia tsin̈y iro Fariseo aby io. Ke iro nan̈ontany izy karaha ty: “Hainao ndraiky ma fa neloko iro Fariseo aby io koa fa naharen̈y raha nivolan̈inao in̈y?” Fa ho izy tamindro: “Tsy maintsy himbotan̈a lan̈iany kakazo tsy natsabony Babako araiky andan̈itry an̈y. Ambilà an̈y iro, fotony iro io pitariky jamba. Izikoa olo jamba mitariky jamba, tsy maintsy hivarin̈y an̈aty lavaka fo iro.” (Mat. 15:12-14) Ndray iro pitondra fivavahan̈a aby io neloko tamy Jesosy, tsy nataony Jesosy sakana tsy han̈ambaran̈a ny marin̈y foeky raha zen̈y.

8. Akory nan̈aboahany Jesosy fa tsy kila raha inoanolo zay ikeny Zan̈ahary aby?

⁸ Naboakany Jesosy tsarabe fa diso raha nampianarindro pitondra fivavahan̈a aby io. Jesosy tsy nivolan̈a fa ikeny Zan̈ahary aby zay raha inoanolo. Nivolan̈a izy fa ho marobe olo han̈araka lalan̈a malalaka mengo amy fandripahan̈a, fa ho vitsy ndraiky olo han̈araka lalan̈a maletry mengo amy fiain̈ana. (Mat. 7:13, 14) Nataony Jesosy mazava tsarabe fa an̈arany fo olo sasany man̈ano manompo Zan̈ahary fa tsisy atà. Zen̈y nahavy izy nampitandrin̈y karaha ty: “Mitandrema fa hisy paminan̈y sandoko ho avy aminaro. Iro misikiny hoditriny zanaka ondrikondriky, kanefa iro io amboadỳ tsy mahay afapô fa mila mitady remby fo. Baka amy voany hahaizanaro iro tsarabe.”​—Mat. 7:15-20.

9. Ino aby raha tsy marin̈y nampianariny fivavahan̈a jiosy ke nabaribariny Jesosy?

 ⁹ Ino ma raha koran̈iny Soratra Masin̈y? Efa nambarany Baiboly tsialohaloha fa Mesia io hafana fô amy tran̈ony Jehovah. (Sal. 69:9; Jaona 2:14-17) Ke nafana fô i Jesosy nan̈abaribary fa diso raha nampianariny fivavahan̈a jiosy ndreky fombandro. Ohatra iziô, iro nino fa fan̈ahy zen̈y tsy mety maty. Jesosy ndraiky nampianatra fa olo maty miran̈a olo mandry. Dikanizen̈y, olo koa fa maty, maty! (Jaona 11:11) Sadoseo aby io ndraiky tsy nan̈eky fa misy ankitin̈y fitsanganan̈a amy maty zen̈y. Kanefa Jesosy nanangana Lazarosy kamaradiny. (Jaona 11:43, 44; Asa. 23:8) Nieritreritry koa iro Fariseo aby io fa efa lahatrany Zan̈ahary aby raha jiaby mandalo. Jesosy ndraiky nampianatra fa manan̈a safidy aby olo jiaby, na izy hanompo Zan̈ahary na izy tsy hanompo.​—Mat. 11:28.

10. Nan̈ino mampameloko olo maro raha ampianarintsika?

¹⁰ Misy raha karaha zen̈y koa ma iziô? Ia. Maro olo meloko amintsika fotony atsika mahasaky man̈aboaka amy Baiboly fa tsy marin̈y raha sasany ampianarindro fivavahan̈a aby io. Ohatra, mampianatra iro pitondra fivavahan̈a aby io fa saziany Zan̈ahary amy môtrobe zen̈y olo ratsy fan̈ahy. Ke ampiasaindro amy zay raha zen̈y hamihifihezan̈a olo mivavaka amindro ao. Hainy vahoakany Jehovah ndraiky fa Jehovah io Zan̈ahary fitiavan̈a. Ke mifen̈y iro man̈ambara aminolo fa Zan̈ahary tsy man̈ôro olo amy môtrobe. Mampianatra koa fivavahan̈a diso aby io fa olo koa fa maty, fan̈ahinany zen̈y ho iro tsy maty. Kanefa izikoa marin̈y raha zen̈y, ino varany hananganan̈a olo maty? Ke aboakantsika olo fa tsy mifan̈araka amy Baiboly fampianaran̈a momba fan̈ahy tsy mety maty zen̈y, fotony izio baka amy panompo sampy. Mampianatra koa iro fivavahan̈a aby io fa efa lahatrany Zan̈ahary aby raha jiaby. Hazavaintsika aminolo tsarabe fa manan̈a safidy aby olo tsiaraikiaraiky: Na izy hanompo Zan̈ahary na izy tsy han̈ano. Matetiky meloko mare iro pitariky fivavahan̈a aby io, koa fa an̈aboahantsika fa diso raha ampianarindro!

11. Izikoa Jaona 8:45-47 dinihin̈y, ino raha tiany Jehovah hataony panomponany?

¹¹ Ino raha tokony hataontsika baka tsy hihen̈y finoan̈antsika? Mila man̈eky raha volan̈iny Zan̈ahary atsika izikoa tia fahamarin̈ana. (Vakia Jaona 8:45-47.) Atsika tsy man̈ano karaha  nataony Satana. Mifen̈y fo atsika tsy hiala amy fahamarin̈ana. Tsy man̈ano raha mifanohitry amy raha inoantsika foeky atsika. (Jaona 8:44) Ravoravo Jehovah izikoa panomponany ‘tsy tia ny ratsy’ fa ‘man̈ano ny tsara fo’, karaha nataony Jesosy in̈y.​—Rom. 12:9; Heb. 1:9.

12. Ino koa antony hafa nahavy iro Jiosy aby io tsy nino Jesosy?

¹² Ino koa antony hafa nahavy Jiosy sasany nino Jesosy? Karaha ty nambarany Paoly: ‘Atsika man̈ambara aminolo fa Kristy nivonen̈a taminy hazofijalian̈a. Fa amy Jiosy, raha zen̈y ten̈a manafintohin̈y.’ (1 Kor. 1:23) Maro Jiosy tsy nino fa Jesosy Mesia. Tan̈atiny jerindro, matoa Jesosy nahanton̈o taminy hazofijalian̈a, dikanizen̈y izy olondratsy sady panota.​—Deot. 21:22, 23.

13. Ino raha tsy nikendro Jiosy tsy nino Jesosy aby io?

¹³ Tsy nikeny sain̈indro Jiosy tafintohin̈y aby io foeky fa: Jesosy tsy nan̈ano raha ratsy, navoa raha tsy rariny izy, avio vandy areriky raha nan̈odiandro izy. Tsy rariny koa fomba nitsarandro i Jesosy, fotony nataondro tamy Fitsaran̈a Avo Jiosy aby io mekimeky fo fitsaran̈a izy, sady tsy nifan̈araka tamy lalàn̈a momba fitsaran̈a aby. (Lioka 22:54; Jaona 18:24) Iro olo nitsara izy aby io koa fa naharen̈y volan̈a fan̈aratsian̈a Jesosy, iro tokony nandiniky tamy fô madio porofo jiaby nan̈amezan̈a tsin̈y izy. Kanefa tsy zen̈y raha nataondro fotony iro efa von̈ono hamono Jesosy. Iro edy ‘nitady olo nankaratsy Jesosy’ misy hamonoandro izy! Izikoa fa tsy nahômby tetikindro zen̈y, nitady hevitry hafa koa pisoron̈obe baka Jesosy ho voaheloko hofoaty. Mifanohitry amy raha koran̈iny lalàn̈a raha nataony zen̈y. (Mat. 26:59; Mar. 14:55-64) Tsy zen̈y fo, Jesosy koa fa natsangana tamy maty, nirahindro pitsara tsy marin̈y aby io navandy iro maramila romanin̈y niambin̈y fasan̈anany. Nirahindro iro maramila aby io hivolan̈a taminolo fa nangalariny pianatrany Jesosy zen̈y fatinany. Avio iro namezandro vola “farantsa volafotsy marobe”, baka iro han̈aparitaka vandy io.​—Mat. 28:11-15.

14. Ino raha koran̈iny Soratra Masin̈y momba fifatesany Jesosy?

¹⁴ Ino ma raha koran̈iny Soratra Masin̈y? Maro tamindro Jiosy taminandrany Jesosy tsy  nieritreritry foeky fa Mesia io hofoaty. Kanefa diniha baka raha nivolan̈iny faminanian̈a ty: ‘Nahafoe ain̈inany firaka tamy fahafatesan̈a izy sady nikonten̈a an̈isany pandika lalàn̈a. Nitondra fahotan̈anolo maro koa izy, salakady pan̈elan̈elan̈a aminolo pandika lalàn̈a.’ (Isaia 53:12) Izikoa andininy io zahavan̈a, tsy tokony ho tafintohin̈y foeky iro Jiosy aby io, Jesosy koa fa nivonen̈a karaha olo panota in̈y.

15. Ino ma raha nan̈odian̈a Vavolombelon̈o Jehovah ke nahavy olo sasany tsy tia iro?

¹⁵ Misy raha karaha zen̈y koa ma iziô? Zen̈y tsarabe! Nan̈odian̈a raha tsy nataony i Jesosy sady voaheloko hofoaty tamy raha tsy rariny. Karaha zen̈y koa raha mahazo Vavolombelon̈o Jehovah avahizo. Ohatra iziô, tan̈elan̈elan̈a 1930 ndreky 1950, maro afaira amy tribinaly nalamin̈y tan Etazonỳ, hiarovan̈a zontsika hanompo Zan̈ahary. Tsy nen̈atra foeky sasany tamindro pitsara aby io nan̈avakavaka atsika. Nifan̈araka koa Leglizy ndreky Fanjakan̈a ta Québec, a Kanada, hanohitry asantsika. Narobe koa pitory nigadrain̈a fotony iro nikoran̈a momba Fanjakan̈any Zan̈ahary. Nan̈enjiky atsika mare koa Nazỳ tan Allemagne tan̈y. Tsy mavozo Zan̈ahary foeky fitondrasan̈a io, ke farandraha maro eky rahalahy tanora tsy nivadiky nivonendro Nazỳ aby io. Maro koa piaramanompo amintsika voaheloko ndreky migadra a Russie an̈y, fotony iro nikoran̈a momba Baiboly taminolo na nivolan̈iny manampahifan̈a fa olondratsy. Firaka amy Ny Soratra Masina—Fandikan-tenin’ny Tontolo Vaovao amy teny russe mbala nisakanandro fo, fotony izio zen̈y misy an̈aran̈a Jehovah ke atahaoran̈a hampikorontan̈a firenena.

16. Koa zahan̈a 1 Jaona 4:1, nan̈ino atsika tsy tokony ho voafitaka koa fa maharen̈y vandy momba vahoakany Jehovah?

¹⁶ Ino raha tokony hataontsika baka tsy hihen̈y finoan̈antsika? Tadiava ny ten̈a marin̈y. Efa nampitandrin̈y olo nitandren̈y izy i Jesosy taminizy nan̈ano Toriteny Tan̈abony Bongo, fa ho hisy olo ‘hamôron̈o vandy, ke hivolan̈a fa iro pianatranany aby io nan̈ano raha ratsy isankarazany.’ (Mat. 5:11) Baka amy Satana vandy aby zen̈y. Ataony raha hahavy olo han̈aparitaka vandy momba olo tia fahamarin̈ana. (Apok. 12:9, 10) Tsy tokony hinoantsika vandy aby zen̈y sady tsy tokony hambelantsika hampavozo atsika na hampihen̈y finoan̈antsika.​—Vakia 1 Jaona 4:1.

17. Ino aby raha nandalo talohany Jesosy naty, ke nahavy olo sasany tsy nan̈aradia izy eky?

¹⁷ Taloha heliny Jesosy hofoaty, namadiky izy araiky taminy apostolinany 12. Intelo aby koa pianatranany araiky nifamàtra fa izy tsy pianatranany. Niala izy koa pianatranany jiaby, taminy alin̈y talohany nifatesany. (Mat. 26:14-16, 47, 56, 75) Fa Jesosy ndraiky tsy gaga, fotony izy efa navy nivolan̈a fa zen̈y raha handalo aminany. (Jaona 6:64; 13:21, 26, 38; 16:32) Izikoa fa niboaka raha nambarany Jesosy aby zen̈y, olo sasany efa tsy nan̈aradia izy eky. Tan̈atiny jerindro tan̈y donko: ‘Ndray iro apostoly aby io fo nan̈ano karaha zen̈y! Tsisy karaha zaho eky mbala han̈aradia Jesosy!’

18. Ino aby faminanian̈a tanteraka taloha heliny Jesosy naty?

¹⁸ Ino ma raha koran̈iny Soratra Masin̈y? Zato taon̈o tsialohaloha, Jehovah efa nan̈ambara fa hisy olo hamadiky Mesia, amy vola farantsa volafotsy 30. (Zak. 11:12, 13) Ary olo hamadiky Jesosy io tsy olo lavitry izy fa namany marikitry. (Sal. 41:9) Karaha ty raha nisoratiny paminan̈y Zakaria: ‘Vangoa mare piambin̈y io, amy zen̈y ondrikondriky jiaby hiparitaka.’ (Zak. 13:7) Izikoa iro olo aby io manan̈a fô tsara, iro tsy mety ho tafintohin̈y nahita faminanian̈a aby io tanteraka tamy Jesosy. Mifanohitry amy zen̈y, tokony ho nankafatatra finoan̈andro raha zen̈y.

19. Ino ma raha efa hainolo manan̈a fô tsara?

 ¹⁹ Misy raha karaha zen̈y koa ma iziô? Ia misy. Fotony nisy Vavolombelon̈o Jehovah vitsivitsy sady hainolo maro, niala tamy fahamarin̈ana avio nanjary pivadipinoan̈a. Tsy vitanizen̈y fa, mbala mitaon̈o olo koa iro han̈araka iro. Miasa man̈aratsy atsika fo iro io, kanefa vandy areriky raha volan̈indro. Aparitakandro amy gazety, amy radio, amy tele ndreky aminy Internet vandindro aby zen̈y. Ndray zen̈y, olo manan̈a fô tsara tsy man̈eky ho voafitaka foeky. Haindro fa zen̈y ny raha handalo, ary raha aby zen̈y efa nambarany Baiboly tsialohaloha.​—Mat. 24:24; 2 Pet. 2:18-22.

20. Ino ma raha tokony hataontsika baka atsika tsy ho voataon̈onolo hiala amy fahamarin̈ana? (2 Timoty 4:4, 5)

²⁰ Ino raha tokony hataontsika baka tsy hihen̈y finoan̈antsika? Mila hankafatarintsika fo finoan̈antsika. Akory han̈anaovantsika zen̈y? Atsika mila mazoto mianatra Baiboly, mivavaka matetiky, avio mifen̈y han̈ano eraka ny farany be vitantsika aminy asa an̈irahany Jehovah atsika. (Vakia 2 Timoty 4:4, 5.) Izikoa atsika manan̈a finoan̈a, atsika tsy ho taitry foeky ndray misy olo mivolan̈a raha tsy marin̈y momba Vavolombelon̈o Jehovah. (Isaia 28:16) Ary atsika koa tia Jehovah, ndreky tia Volan̈anany avio tia iro piaramanompo amintsika aby io, atsika tsy mety ho voataon̈onolo hiala amy fahamarin̈ana!

21. Ino raha atokisantsika ndray tsy man̈eky hafatra toriantsika ankamaraozanolo aminandra iziô?

²¹ Tamy taonjato voanalohany, maro olo tsy nino fa Jesosy ankitin̈y Mesia. Ndray izy man̈ano zen̈y, maro koa olo nino izy. An̈isanizen̈y, olo araiky an̈isany Fitsaran̈a Avo Jiosy. Nisy ‘pisoron̈o marobe’ koa nanjary nino Jesosy. (Asa. 6:7; Mat. 27:57-60; Mar. 15:43) Karaha zen̈y koa amy zioty, maro olo tsy tafintohin̈y. Nan̈ino? Fotony haindro ndreky tiandro mare ny marin̈y amy Soratra Masin̈y ao. Karaha ty volan̈iny Baiboly: “Lan̈iany olo tia lalàn̈anao hiadan̈a mare, ke tsisy raha mety hampavoatsikon̈o iro.”​—Sal. 119:165.