1. Ino ma raha mety hataontsika tanjon̈o izikoa atsika efa mahaimatoe?

ATSIKA koa fa mahaimahazoazo taon̈o, mety havozo atsika tsao efa tsisy raha ilavany Jehovah atsika eky. Mety hihen̈y marin̈y angovontsika izikoa atsika efa matoe, kanefa atsika mbala afaka mampiasa fahendrena ndreky traikefantsika han̈ampian̈a tanora, baka iro ho azony fandaminan̈any Jehovah ampiasain̈a ndreky hahazo andraikitry fan̈ampiny. Karaha ty nivolan̈iny antipan̈ahy araiky efa ela: “Zaho koa fa nahainahazo taon̈o, misy raha sasany efa tsy vitako eky. Ke ravoravo zaho mahita rahalahy tanora maro mahafeno fepetra sady afaka manohy asa aby zen̈y.”

2. Ino raha hidinihintsika ato?

² Lahatsoratra taloha in̈y nikoran̈a momba hatsaran̈a ho azony tanora izikoa iro mikamarady aminolo matoe. Araiky ty ndraiky hikoran̈a momba toetry sasany tokony hanan̈anolo matoe beky iro hahay hiaraka hiasa amy tanora. Ohatra iziô, iro mila manetry ten̈a, mahay mandanjalanja, mahay mankasitraka, ndreky tsy matity. Ho maro hatsaran̈a ho azony fiangonan̈a izikoa iro man̈ano zen̈y.

3. a) Koa Filipianina 2:3, 4 zahan̈a, karakory ma olo araiky manetry ten̈a zen̈y? b) Nan̈ino ma Kristianin̈y mila manetry ten̈a?

³ Mila manetry ten̈a iro matoe aby io izikoa iro tihan̈ampy tanora. Karakory ma zen̈y? Manetry ten̈a olo araiky, izikoa izy mihevitry olo hafa an̈abon̈abo tozay izy. (Vakia Filipianina 2:3, 4.) Izikoa iro matoe aby io manetry ten̈a, ho moramora amindro han̈eky fa maro fomba mety han̈anaovan̈a asa araiky, ary fomba aby zen̈y tsy mifanohitry amy Soratra Masin̈y. Ke iro tsy tokony han̈anten̈a fa ho miran̈a amy fomba fan̈anaovany izio taloha fo fomba han̈anaovanolo hafa raha araiky. (Mpito. 7:10) Marin̈y ndraiky fa, manan̈a traikefa mety zarain̈y amy tanora  iro. Kanefa, mila alaindro onon̈o fa miovaova raha amy donia ty. Mety mila ivoan̈a donko fomba fan̈anaovan̈a raha sasany, ke tokony ho von̈ono hianatra fomba fiasa vaovao zen̈y koa iro matoe aby io.​—1 Kor. 7:31.

4. Akory han̈aboahandro piandraikitry faritry aby io fa manan̈a toetsain̈y mitovy amindro Levita aby io iro?

⁴ Manetry ten̈a iro matoentsika aby io izikoa iro man̈eky fa, efa tsy mahavita be karaha taloha in̈y eky iro. Diniha baka iro piandraikitry faritrintsika aby io. Iro koa fa feno 70 taon̈o, iro mahazo fanendren̈a vaovao. Mety tsy mora amindro fiovan̈a zen̈y, fotony tiandro mare nan̈ano asany faritry. Ravoravo koa iro nan̈ampy piaramanompo. Ke mbala tiandro tohizan̈a fo izio. Fa ndray zen̈y, hitandro fa sitrany olo mbala tanotanora man̈ano asa io. Ke miezaka iro hanan̈a toetsain̈y mitovy amindro Levita aby taloha tan̈y. Iro Levita aby io koa fa feno 50 taon̈o, iro tsy nanompo tamy tran̈olay masin̈y tao eky. Fa iro ravoravo fo ndray ino ndray ino fanendren̈a nazondro. Nataondro tsara aby zay raha mbala azondro natao, baka io ireo nan̈ampy iro Levita tanora aby io. (Nom. 8:25, 26) Karaha zen̈y koa iro piandraikitry faritry aby io. Marin̈y ndraiky fa iro efa tsy mitsidiky fiangonan̈a marobe karaha taloha eky, izikoa iro efa feno 70 taon̈o. Fa iro ten̈a man̈ampy ndreky mampahery fiangonan̈a anendrena iro.

5. Ino raha ianaranao baka amy Dan ndreky Katie?

⁵ Diniha baka tantarany Rahalahy Dan. Piandraikitry faritry fo izy tan̈atiny 23 taon̈o.  Fa izy koa fa feno 70 taon̈o, nanjary pisava lalan̈a manokan̈a iro roeny Katie, vadiny. Akory nahavy iro ho ravoravo fo tamy fanendren̈a vaovao io? Nivolan̈a i Dan fa mbala tsiary maromaroniziô eky asanany. Man̈ano andraikitrinany an̈ivony fiangonan̈a izy, sady man̈ampy rahalahy hahafeno fepetra hanjary pan̈ampy amy fanompoan̈a. Tsy zen̈y fo, mampiofan̈a pitory koa izy baka iro hahay hitory amy tany maro olo ndreky amy prizon. Efa mahazoazo taon̈o ma anao? Na panompo manontolo andra anao zioty na tsy zen̈y, matokisa fa maro fomba mety han̈ampianao olo. Ankafìza fiovan̈a misy amy fiain̈ananao iziô. Manàn̈a tanjon̈o vaovao, baka io mifantaoha amy raha mbala vitanao fa tsy amy raha efa tsy vitanao eky.

6. Karakory ma olo mahay mandanjalanja zen̈y? Hazavà aminy ohatra.

⁶ Mahay mandanjalanja olo araiky izikoa aboakany amy raha ataony fa izy mahay erany raha mety ho vitany. (Fil. 4:5) Izy tsy mitaky be loatra aminy ain̈inany, ke tsy mihen̈y foeky haravoan̈anany sady mahavita raha tsara fo koa izy. Miniminia hely baka ty: Karakory ataony tomôbily izikoa fa mahazo fanongan̈a? Mbala mandeha fo tomôbily io fa izy fo tsy afaka mandeha mare. Karaha zen̈y koa olo mahay mandanjalanja. Ikeny fa misy limitiny raha vitany. Hainy ombian̈a izy mila man̈ano fan̈ovoan̈a ndreky mila mampihen̈y raha ataony amy fanompoan̈a. Tsy ho vôly manompo Jehovah izy izikoa man̈ano zen̈y, sady hahavita han̈ampy olo hafa koa.

7. Akory nan̈aboahany Barzilay fa izy mahay mandanjalanja?

⁷ Modely mety alaintsika tahaka i Barzilay. Efa 80 taon̈o izy tamy Panjaka Davida nitaon̈o izy hanjary an̈isany panolotsain̈inany. Kanefa, izy tsy nan̈eky fotony hainy baka fa izy efa matoe, ke efa tsy be eky raha ho vitany. Nangataka tamy panjaka izy baka Kimama hisoatra plasinany, fotony izy mbala tanora. (2 Sam. 19:35-37) Mangala tahaka i Barzilay iro rahalahy efa matoe, ke ravoravo iro man̈ambela rahalahy tanora han̈ano andraikitry amy fiangonan̈a.

8. Hainy Davida erany raha mety ataony. Akory nan̈aboahany zen̈y, taminizy tihiasa tempoly in̈y?

⁸ Panjaka Davida koa ten̈a ohatra tsara. Nikeny fa misy limitiny raha mety ataony. Izy ten̈a nan̈iry hiasa tran̈o hanompoan̈a Jehovah. Fa Jehovah koa fa nivolan̈a taminany fa i Solomona zanany hiasa izio, direkty nikeny Davida fanapahankevitriny Jehovah. Nan̈ano zay vitany izy baka ho ampy tsara raha jiaby nilain̈a hanohanan̈a tetikasa io. (1 Tan. 17:4; 22:5) Davida tsy nihevitry fa izy fo ten̈a mahavita asa io, fotony Solomona tamy zen̈y mbala ‘tanora salakady tsy ampy traikefa.’ (1 Tan. 29:1) Hainy Davida baka fa, tsy miankin̈y amy taon̈onolo mitariky asa io na traikefa anan̈any hampavita tempoly io, fa baka amy fitahiany Jehovah. Mangala tahaka i Davida iro matoentsika aby io izikoa man̈ano zay vitandro amy fanompoan̈a Jehovah, ndray miova andraikitrindro. Haindro fa hataony Jehovah mahômby iro rahalahy tanora nisoatra andraikitrindro aby io.

9. Akory nan̈aboahany Komitiny Sampan̈a araiky fa mahay mandanjalanja izy?

⁹ Modely tsara koa piaramanompo maro amy zioty. An̈isanizen̈y Rahalahy Shigeo. Voatendry ho an̈isany Komitiny Sampan̈a izy taminy 1976, taminizy 30 taon̈o. Taminy 2004 izy nanjary pandrindra Komitiny Sampan̈a. Izikoa fa nandeha fotoan̈a, tontohitry izy fa efa tsy nahavita nanompo karaha taloha eky izy, avio nanjary miadan̈a be izy man̈ano asanany. Nivavaka tamy Jehovah momba raha zen̈y izy. Tan̈atiny jerinany, tsara izikoa rahalahy  tanora man̈ano andraikitrinany io. Ke rahalahy hafa nanjary pandrindra. Ndray zen̈y, mbala an̈isany Komitiny Sampan̈a fo i Shigeo, sady ravoravo izy miaraka miasa amindro Komitiny Sampan̈a namany aby io. Ino raha ianarantsika baka amy Barzilay, Panjaka Davida ndreky Shigeo? Izikoa iro matoe aby io manetry ten̈a sady mahay mandanjalanja, iro tsy hifantoko amy raha tsy haindro tanora aby io, fa hifantoko amy toetry tsarandro ndreky raha efa haindro. Tsy hihevitry iro tanora aby io ho adversaira iro izikoa man̈ano zen̈y, fa piaramiasa.​—Ohab. 20:29.

10. Akory tokony ho fiheveranolo matoe iro tanora an̈ivony fiangonan̈a aby io?

¹⁰ Aminolo matoe, iro tanora aby io miran̈a kadô baka amy Jehovah. Zen̈y mahavy iro mankasitraka raha ataony tanora maro an̈ivony fiangonan̈a. Mahaimihen̈y fo baka angovonolo matoe izikoa fa mandeha taon̈o. Ke ten̈a ravoravo iro mahita tanora maro matanjaka afaka manohy asa ndreky man̈ampy fiangonan̈a.

11. Akory ahitan̈a fa mahazo hatsaran̈a olo matoe izikoa fa man̈eky ampiany tanora? (Rota 4:13-16)

¹¹ Naomy an̈isany olo koran̈iny Baiboly fa ten̈a nahay nankasitraka raha nataony tanora. Izikoa fa naty zanakanany, izy nampirisiky Rota vinantovaviny, hody aminiry havany. Rota tsy nan̈eky foeky fa nila nan̈araka izy ta Betlehema tan̈y fo, ke farany Naomy nan̈eky. Ravoravo mare Naomy nahita Rota von̈ono han̈ampy izy fo. (Rota 1:7, 8, 18) Ten̈a nahatsara iro roe vavy raha zen̈y! (Vakia Rota 4:13-16.) Manetry ten̈a olo matoe izikoa iro man̈ano karaha nataony Naomy in̈y.

12. Akory ahitan̈a fa ten̈a nankasitrahiny apostoly Paoly fan̈ampian̈a nazony?

¹² Apostoly Paoly ten̈a nankasitraka fan̈ampian̈a nazony. Ohatra iziô, nankasitraka  iro Kristianin̈y ta Filipỳ izy, fotony iro nan̈ampy izy hahazo raha nilainy. (Fil. 4:16) Nankasitraka fan̈ampiany Timoty koa izy, ary raha zen̈y naboakany tamy raha nivolan̈iny ndreky raha nataony. (Fil. 2:19-22) Nisy fotoan̈a koa Paoly nigadrain̈a ta Roma, nisy piaramanompo nampahery izy. Ke ten̈a nisaotra Zan̈ahary izy nohony fan̈ampiandro izy zen̈y. (Asa. 28:15) Paoly ten̈a olo navitriky sady nahavita nan̈ano dia andrivony kilometra nitory ndreky nankahery fiangonan̈a. Fa izikoa fa nisy piaramanompo navy nan̈ampy izy, nan̈eky hampian̈a izy. Hita baka amy zen̈y fa nanetry ten̈a izy.

13. Akory mety han̈aboahanolo matoe fa iro mankasitraka tanora?

¹³ Efa mahazoazo taon̈o ma anao? Maro fomba mety han̈ampiany tanora an̈ivony fiangonan̈a anao. Ndraikindraiky, mety hisy tanora han̈ampy anao handeha dokotera, han̈ano bazarinao, na han̈ano raha hafa ilainao. Ke akory han̈aboahanao fa mankasitraka iro anao? Ikia fan̈ampiandro anao, baka io ankasitraha iro. Tsaraova fa raha ataondro aminao zen̈y an̈isany fomba araiky an̈aboahany Jehovah fitiavany anao. Mety hanjary namanao iro tanora aby io. Anao koa afaka man̈ampy iro hanjary kamaradiny Jehovah. Amy fomba akory? Volàn̈a amindro fa ravoravo anao mahita iro mazoto man̈ano asany fiangonan̈a. Mety tantarainao amindro koa raha niain̈anao. Izikoa anao man̈ano zen̈y, ‘ho hita fa anao ten̈a mahay mankasitraka’ Jehovah nohonizy mitaon̈o tanora maro an̈ivony fiangonan̈a.​—Kol. 3:15; Jaona 6:44; 1 Tes. 5:18.

14. Akory nan̈aboahany Panjaka Davida fa izy tsy natity?

¹⁴ Izikoa dinihin̈y modely nambelany Panjaka Davida, misy toetry hafa koa tokony hanan̈anolo matoe. Ino izio? Tsy matity. Nan̈ano fan̈amezan̈a marobe Davida nampiasain̈a tamy fan̈oren̈ana tempoly, ndray efa hainy fa tsy izy hahazo voninahitry baka amizio fa i Solomona zanany. (1 Tan. 22:11-16; 29:3, 4) Akory fo basy izikoa anao efa tsisy angovo indesin̈y hiasa amy fan̈oren̈ana eky? Mbala misy raha fo mety hataonao. Afaka manohan̈a amy tetikasa fan̈oren̈ana aby io anao izikoa anao man̈ano fan̈amezan̈a, erakany mety ho vitanao. Mety rasainao amindro tanora aby io koa traikefa anan̈anao, amy zen̈y iro hahavita raha tsara.

15. Ino kadô maventy nazony Timoty baka taminy apostoly Paoly?

¹⁵ Apostoly Paoly koa tsy natity fahaizan̈a. Izy nitaon̈o Timoty hiaraka taminany tamy dia misionera nataony. Zay raha hainy momba fomba fitorian̈a ndreky fampianaran̈a, nambarany tamy Timoty aby. (Asa. 16:1-3) Nazoto nampiofan̈a i Paoly, ke nanjary nahômby tamy fanompoan̈a i Timoty. (1 Kor. 4:17) Tafara, nampitainy Timoty taminolo hafa koa raha nampianariny Paoly izy.

16. Ino mahavy Shigeo nampiofan̈a olo hafa?

¹⁶ Maro koa zioty rahalahy matoe mazoto mampiofan̈a tanora han̈ano andraikitry nataondro taloha. Iro tsy mavozo foeky tsao iro tsy ilain̈a eky. Karaha zen̈y iziô i Shigeo, araiky nikoran̈intsika in̈y. Tan̈atiny taon̈otaon̈o izy niezaka nampiofan̈a tanora an̈isany Komitiny Sampan̈a, fotony izy tihan̈ano zay vitany hanohanan̈a asany Jehovah, amy tany misy izy. Ke lera izy efa tsy afaka nan̈ano andraikitriny pandrindra eky, efa nisy rahalahy voaofan̈a tsara von̈ono hisoatra izy tio. Efa mandilatra 45 taon̈o nampa Komitiny Sampan̈a i Shigeo, kanefa mbala ravoravo fo izy mandrasa raha hainy han̈ampian̈a iro rahalahy tanora aby io. Ten̈a ravoravo atsika manan̈a matoe maro karaha Shigeo io, fotony iro von̈ono fo han̈ampy vahoakany Jehovah.

17. Izikoa zahan̈a Lioka 6:38, ino raha mety hataonolo matoe han̈ampian̈a olo hafa?

 ¹⁷ Hitanay baka amy modely tsara ambelanaro rahalahy ndreky ranabavy efa matoe fa, tsisy raha tsara mandilatra manompo Jehovah, matoky izy ndreky tsy mivadiky aminany. Baka amy raha ataonaro koa ahitanay fa tsy perty foeky atsika mianatra toro lalan̈any Baiboly ndreky mampihatra izio. Efa maro raha niova, izikoa fomba fiasa raha koran̈iny, kanefa von̈ono fo anaro han̈araka zay fan̈ovoan̈a misy. Akory fo basy izikoa efa matoe anaro vo natao batisa? Mbala misy raha mety ataonaro fo. Tantarà amindro tanora aby io haravoan̈anaro taminy anaro nahay raha momba Jehovah. Misaora ho ravoravo iro maharen̈y anaro mitantara raha niain̈anaro ndreky raha nianaranaro baka tamy zen̈y. Ho maro hatsaran̈a ho azonaro baka amy Jehovah, izikoa anaro ‘zatra man̈amia’ ndreky mazoto mandrasa traikefa anan̈anaro.​—Vakia Lioka 6:38.

18. Ino hatsaran̈a ho azonolo matoe ndreky tanora izikoa iro mahay mifan̈ampy?

¹⁸ Ino ma vokany izikoa mifen̈y anaro efa mahazoazo taon̈o hikamarady amy tanora? Hahavita hifan̈ampy ndreky hifampahery amindro edy anaro. (Rom. 1:12) Atsika jiaby io, na tanora na matoe, samby amy raha tsara mampiavaka atsika. Olo matoe iziô manan̈a fahendrena ndreky traikefa, fotony iro efa ela niain̈ana. Tanora ndraiky matanjaka. Ke izikoa atsika jiaby miaraka miasa karaha ataonolo pinaman̈a in̈y, han̈amia voninahitry Babantsika be fitiavan̈a andan̈itry an̈y edy atsika, sady hitondra hatsaran̈a amy fiangonan̈a.