1. Ino raha hankahery atsika, izikoa atsika mahatsiaro miady manokan̈a amy problemo mahazo atsika? (Salamo 118:5-7)

METY miaritry raha sarotro koa donko anao, ke mety mahatsapa anao fa karaha miady manokan̈a amy problemo mahazo anao? Maro olo mahatsapa karaha zen̈y koa, an̈isanizen̈y panompony Jehovah tsy mivadiky. (1 Mpanj. 19:14) Izikoa zen̈y raha mahazo anao, tsaraova volan̈any Jehovah ty: “Zaho tsy hiala anao foeky. Tsisy andra han̈ariako anao!” Ke atsika masaky mivolan̈a karaha ty: “Jehovah han̈ampy zaho, ke tsy havozo foeky zaho.” (Heb. 13:5, 6) Iro Kristianin̈y ta Jodia tan̈y nanoratany apostoly Paoly volan̈a aby io, kadiriny tamy taon̈o 61. Volan̈anany aby io mampatsiaro atsika raha nisoratiny panoratra salamo araiky amy Salamo 118:5-7.​—Vakia.

2. Ino raha hidinihintsika ato, baka io nan̈ino?

² Karaha panoratra salamo io, tsapany Paoly fa Jehovah ten̈a nan̈ampy izy. Nandalo raha sarotro mare i Paoly, kadiriny taon̈o aroe talohany nanoratany taratasinany nandeha tamindro Hebreo aby io. Sendra andra ratsy mare izy tamy zen̈y izikoa fa nandeha sambo. (Asa. 27:4, 15, 20) Sahiran̈a mare Paoly, kanefa niporofoeny Jehovah taminany tsarabe taminio ndreky talohanizio, fa iô fo izy man̈ampy i Paoly. Akory nataony Jehovah nan̈ampy i Paoly? Handiniky fomba telo nan̈anaovany zen̈y atsika ato. Voanalohany, nampiasa Jesosy ndreky anjely hafa izy. Faharoe, nampiasa olo manan̈a fahifan̈a izy. Fahatelo, nampiasa piaramanompo koa izy. Handiniky raha niain̈any Paoly aby zen̈y atsika, amy zen̈y atsika hatoky tsarabe  fa ten̈a han̈ampy atsika ankitin̈y Jehovah, lera atsika mitady vonjy aminany.

3. Mety ho ino ma raha tan̈atiny dinikiny Paoly? Nan̈ino?

³ Kadiriny tamy taon̈o 56, nisy raha sarotro koa nandalovany Paoly. Neloko taminany mare vahoakany Jerosalema ke nantsoritsoritindro tambelan̈a tempoly tan̈y izy, tseky hivonendro. Kiakandra, Paoly koa fa nindesin̈y nan̈oloan̈a Fitsaran̈a Avo Jiosy fo, iro fahalavonany aby io efa nitady hevitry hamonoan̈a izy. Setry izy tamy zen̈y! (Asa. 21:30-32; 22:30; 23:6-10) Mety rôso diniky izy taminio: ‘Firaka ombian̈a zaho hiaritry raha karaha ty fo?’

4. Jehovah nampiasa Jesosy nan̈ampian̈a Paoly. Akory nan̈anaovany zen̈y?

⁴ Akory nataony Jesosy nan̈ampy Paoly? Taminy alin̈y nanamboran̈a Paoly, nitsangana tankilanany tiô Jesosy Tompo, sady nivolan̈a karaha ty: “Korazy anao! Fotony karaha nataonao nan̈azava tsara raha momba zaho ta Jerosalema in̈y, karaha in̈y koa tsy maintsy ataonao, lera anao hitory a Roma an̈y.” (Asa. 23:11) Nankahery izy mare raha zen̈y! Niderainy Jesosy baka izy fotony nazoto nitory mare izy ta Jerosalema tan̈y. Namezany Jesosy toky koa izy fa tsy hofoaty, fa mbala hahavita hitondra volan̈any Zan̈ahary a Roma an̈y koa. Ino vokatranizen̈y tamy Paoly? Nanjary tsy navozovozo foeky izy, mira tsaiky araiky hinjoniny babany in̈y.

5. Akory nataony Jehovah nampiasa anjely nan̈ampian̈a Paoly? (Zahava sary amy fon̈ony gazety ty.)

⁵ Ino koa raha sarotro hafa nandalovany Paoly? Taon̈o aroe tafarany raha nahazo izy ta Jerosalema in̈y, Paoly niondran̈a sambo nengo ta Italie. Nihetsiky mare ranomasin̈y taminio ke olo jiaby, an̈isanizen̈y iro piasany sambo ndreky olo tao, nieritreritry fa iro efa tsy ho avotro eky. Fa Paoly tsy navozo foeky. Nan̈ino ma? Ho izy tamindro: “Zan̈aharinaka, araiky an̈anaovako fanompoan̈a masin̈y, nan̈iraka anjely araiky alin̈y in̈y. Ke anjely io nitsangana tankilanaka, sady nivolan̈a: ‘Paoly, anao aza mavozo. Anao tsy maintsy hitsangana man̈oloan̈a Kaisara. Zan̈ahary tsara fan̈ahy ke izy hiaro fahin̈ananolo jiaby sambo araiky aminao.’ ” Efa nan̈iraka Jesosy baka Jehovah taloha, han̈amezan̈a toky i Paoly. Kanefa mbala nimpody nan̈iraka anjely ndraiky koa izy, amy zen̈y ho hisy korazy tsarabe Paoly. Navy ta Roma ankitin̈y Paoly, eraka volan̈any Jehovah.​—Asa. 27:20-25; 28:16.

6. Ino ma raha nampan̈antin̈ainy Jesosy ke ten̈a mankahery atsika? Nan̈ino?

⁶ Akory han̈ampiany Jesosy atsika? Jesosy han̈ampy atsika, karaha nataony nan̈ampy i Paoly. Karaha ty iziô raha nampan̈antin̈ainy  lan̈iany olo man̈aradia izy: “Hiaraka aminaro fo zaho isanandra, firaka amy farany donia ty.” (Mat. 28:20) Ten̈a mankahery atsika volan̈any Jesosy zen̈y. Ino antony? Fotony ndraikindraiky atsika io miaritry raha sarotro. Ohatra, izikoa fa misy havantsika maty, alahelontsika mety tsy ho afaka an̈atiny andra vitsivitsy fa mety hahadin̈y taon̈o taon̈o. Sasany ndraiky sahiran̈a fotony mahaimahazo taon̈o. Misy koa mahatsiaro mijaly fotony misy raha mampakivy izy mare. Ndray mafy be karakory raha iaretantsika amy fiain̈ana, hahavita hiaritry fo atsika, fotony haintsika fa ‘hiaraka amintsika fo Jesosy isanandra.’​—Mat. 11:28-30.

7. Eraka raha koran̈iny Apokalypsy 14:6, akory han̈ampiany Jehovah atsika aminandra iziô?

⁷ Baiboly man̈amia toky atsika fa Jehovah hampiasa iro anjelinany aby io han̈ampian̈a atsika. (Heb. 1:7, 14) Anjely aby io man̈ampy atsika izikoa fa mitory ‘vaovao tsara mikasiky Fanjakan̈a Zan̈ahary’ aminolo baka amy “firenena jiaby, ndreky karazan̈a volan̈a jiaby.”​—Mat. 24:13, 14; vakia Apokalypsy 14:6.

8. Akory nampiasàny Jehovah sefony maramila araiky han̈ampian̈a Paoly?

⁸ Akory nataonolo nanan̈a fahifan̈a nan̈ampy i Paoly? Namezany Jesosy toky Paoly tamy taon̈o 56, fa ho avy soamantsara a Roma an̈y izy. Kanefa nisy Jiosy ta Jerosalema tao efa von̈ono hanafiky Paoly ndreky hamono izy. Izikoa fa ren̈iny Klaodio Lysia, sefony maramila romanin̈y, raha tiandro hatao io, izy direkty nan̈iraka maramila maromaro nandeha nan̈atriky Paoly ta Kaisaria tan̈y. Lalan̈a kadiriny 105 km izy nandihanandro io. Paoly koa fa navy tan̈y, nirahiny Governera Feliksa ‘nasian̈a gardy niambin̈y izy tamy zombany Heroda tao.’ Avotro Paoly!​—Asa. 23:12-35.

9. Akory nataony Governera Festosy nan̈ampy Paoly?

⁹ Mbala nigadra ta Kaisaria fo Paoly tamy taon̈o 58. Festosy nanjary governera nisoatra plasiny Feliksa. Iro Jiosy aby io niangavy Festosy handefa Paoly hitsarain̈y a Jerosalema an̈y, fa Festosy tsy nan̈eky. Mety efa hainy donko fa iro Jiosy aby io efa ‘von̈ono hanafiky Paoly ndreky hamono izy tandalan̈a.’​—Asa. 24:27–25:5.

10. Ino raha nataony Governera Festosy, Paoly koa fa nangataka hitsarain̈a man̈oloan̈a Kaisara?

¹⁰ Ta Kaisaria fo Paoly nitsarain̈a. Tihamparavoravo iro Jiosy aby io baka Festosy, ke ho izy tamy Paoly: ‘Tsy mba tianao hanonga a Jerosalema an̈y, amy zen̈y zaho foeky hitsara anao?’ Hainy Paoly fa izy koa avy a Jerosalema, hivonendro Jiosy aby io izy. Ke nitady fomba izy han̈avotany ain̈inany baka izy ho avy a Roma, sady hahavita hitory fo. Ho Paoly tamy Festosy: ‘Hampakariko amy Kaisara an̈y afera ty!’ Festosy koa fa baka nikoran̈a taminolo pan̈amia hevitry izy aby io, ho izy tamy Paoly: ‘Nampakarinao amy Kaisara afera ty, ke handeha amy Kaisara an̈y edy anao!’ Nalefany Festosy ta Roma i Paoly, tsy ela tafaranizen̈y. Tan̈y izy lavitry iro Jiosy mila hamono izy aby in̈y.​—Asa. 25:6-12.

11. Ino raha nisoratiny paminan̈y Isaia ke ten̈a nankahery Paoly?

¹¹ An̈atiny Paoly miambikambin̈y lera handianany an Italie in̈y, izy mety tafandiniky faminanian̈a nirahiny Jehovah nisoratiny paminan̈y Isaia, aminy Isaia 8:10 ao. Izio mikoran̈a fampitandreman̈a mandeha amy vahoaka manohitry Jehovah. Koran̈iny ao: “Ataova fo tetikinaro, fa raha zen̈y tsy hahômby! Volàn̈a zay raha tianaro volan̈iny, fa raha zen̈y tsy ho tanteraka aby, fotony Zan̈ahary miaraka aminay!” Hainy Paoly fa Jehovah han̈ampy izy, ke mety nampisy korazy izy mare raha  zen̈y, intsaka eky taminio fotony sarotro raha mbala handalovany.

12. Akory nan̈ampiany Jolio i Paoly? Ino raha mety ho tsapany Paoly baka tamy zen̈y?

¹² Nanomboko nan̈ano dianany ta Italie i Paoly, tamy zen̈y. Nigadra izy ke Jolio, manamboninahitry araiky tamy tafiky romanin̈y, niandraikitry izy. Azony Jolio natao nampijaly Paoly, kanefa izy tsy nanjikiziky tamy fahifan̈anany. Tsara fan̈ahy tamy Paoly izy. Ino mahavy atsika mivolan̈a zen̈y? Iro koa fa navy tantety, nambelany Jolio nandeha tamindry kamaradiny i Paoly. Tafara helinizen̈y koa, Jolio nan̈avotro Paoly. Sambo niarahandro koa fa dobo marikitry tanànany Malta, tseky nivoneny maramila sasany gadra jiaby tao, an̈isanizen̈y Paoly. Navozo baka iro tsao iry Paoly hilefa. Fa tsy nimboany Jolio iro han̈ano zen̈y. Ino antony? Fotony izy tihiaro Paoly. Mety tsapany Paoly baka tamy zen̈y donko fa niaro izy Jehovah, ke nampiasa manamboninahitry tsara fan̈ahy io han̈ampy izy ndreky hiaro izy.​—Asa. 27:1-3, 42-44.

13. Akory mety hampiasàny Jehovah iro olo manan̈a fahifan̈a aby io?

¹³ Akory koa han̈ampiany Jehovah atsika? Ndraikindraiky Jehovah mety hampiasa fan̈ahy masin̈inany, amy zen̈y iro manampahifan̈a aby io han̈ano raha mifan̈araka amy sitraponany. Alaiva onon̈o baka raha nisoratiny Panjaka Solomona ty: “Fôny panjaka io miran̈a lakandrano ampelantan̈anany Jehovah, ke izy mahay tany tiany hamilian̈a izio.” (Ohab. 21:1) Ino ma dikanizen̈y? Olombelon̈o mety hangady lakandrano baka rano amizio ao mivily amy zay tany tiany hampimboan̈a izy. Ke izikoa fa misy raha iritriretindro manampahifan̈a aby io hatao, vitany Jehovah mampiasa fan̈ahy masin̈inany baka fanapahankevitrindro hifan̈araka amy fikasan̈anany ndreky hahatsara vahoakanany.​—Ampiràn̈a aminy Ezra 7:21, 25, 26.

14. Izikoa zahan̈a raha koran̈iny Asan’ny Apostoly 12:5, mety mivavaka momba azovy koa atsika?

¹⁴ Ino raha mety hataontsika? Atsika mety mivavaka ‘momba iro manampahifan̈a aby io’, intsaka eky izikoa fanapahankevitrindro io mety hisy vokany amy fanompoan̈antsika. (1 Tim. 2:1, 2; Neh. 1:11) Karaha nataondro Kristianin̈y tamy taonjato voanalohany tan̈y, mety miangavy Jehovah atsika baka izy han̈ampy iro rahalahy ndreky ranabavintsika mbala migadra an̈y. (Vakia Asan’ny Apostoly 12:5; Heb. 13:3) Azontsika atao koa mivavaka nindro piambin̈y prizon miandraikitry iro piaramanompo amintsika aby io. Mivavaka koa atsika baka Jehovah han̈ano raha hahavy iro  piambin̈y aby io ho ‘tsara fan̈ahy’ amindro rahalahintsika migadra aby io, karaha nataony Jolio tamy Paoly in̈y.

15-16. Akory nataony Jehovah nampiasa Aristarko ndreky Lioka nan̈ampian̈a Paoly?

¹⁵ Akory nataony piaramanompo nan̈ampy Paoly? Tan̈atiny fotoan̈a nan̈anaovany Paoly dianany ta Roma io, matetiky Jehovah nampiasa piaramanompo nan̈ampian̈a Paoly. Hizaha sasany amy zen̈y atsika iziô.

¹⁶ Nanapakevitry i Aristarko ndreky Lioka fa haterindro firaka a Roma i Paoly. Ten̈a naman̈a iro roe lahy io! * Izikoa dinihin̈y raha koran̈iny Baiboly, Jesosy tsy nampan̈anten̈a tamindro roe lahy io fa iro ho avy soamantsara a Roma. Sady efa iro tampan̈anaovan̈a dia io vo nahay raha sarotro nandalovandro. Kanefa iro tihan̈ampy Paoly mare, ke von̈ono fo iro nirisiky fahin̈anandro tamy dia nampavozo be io. Aristarko ndreky Lioka koa fa niondran̈a sambo io ta Kaisaria, misaora ravoravo Paoly! Hay be fa izy tsy maintsy nivavaka sady nisaotra Jehovah, fotony Jehovah nampiasa iro roe lahy nisy korazy aby io nan̈ampian̈a izy.​—Asa. 27:1, 2, 20-25.

17. Akory nataony Jehovah nampiasa iro piaramanompo aby io nan̈ampian̈a Paoly?

¹⁷ Matetiky iro piaramanompo aby io nan̈ampy Paoly, taminizy nan̈ano dianany. Ohatra iziô, sambo niondran̈aniry Paoly koa fa nijanon̈o hely ta Sidona, nambelany Jolio iro piaramanompo aby io nikarakara izy. Tafara helinizen̈y, iry Paoly koa fa navy ta Potioly, iro ‘nahita piaramanompo avio iro niangavy iro piaramanompo aby io hidôko hiaraka amindro tan̈atiny fito andra.’ Iro Kristianin̈y tamy faritry io ten̈a nikarakara raha nilainy Paoly ndreky iry namany. Misaora ravoravo mare Paoly nitantara raha mankahery tamindro! (Ampiràn̈a aminy Asan’ny Apostoly 15:2, 3.) Paoly ndreky iro namany aby io koa fa baka nifampahery tamindro piaramanompo aby io, loso iro nanohy diandro.​—Asa. 27:3; 28:13, 14.

18. Ino raha nampahery Paoly ke nahavy izy nisaotra Zan̈ahary?

 ¹⁸ Tamy dia nataony io, nisy fotoan̈a Paoly tsy maintsy nandeha vity. Mety nazony onon̈o donko taratasy nisoratiny tamindro fiangonan̈a aby tan̈y, telo taon̈o talohanio. Ty raha nisoratiny: ‘Efa maromaro taon̈o tihandihanako taminaro tan̈y!’ (Rom. 15:23) Tsy tan̈atiny dinikinany foeky fa mbala higadra a Roma izy. Misaora naresaka donko haravoan̈anany nahita piaramanompo marobe nandeha nitsena izy tandalan̈a! ‘Nankahery’ i Paoly mare raha zen̈y! Koran̈iny Baiboly fa ‘nan̈ano mersy Zan̈ahary lastio izy.’ (Asa. 28:15) Ino antony? Fotony tsapany Paoly fa nampiasa iro piaramanompo aby io Jehovah nan̈ampian̈a izy.

19. Koa zahan̈a 1 Petera 4:10, akory mety hampiasàny Jehovah atsika?

¹⁹ Ino raha mety hataontsika? Mety misy rahalahy na ranabavy fiangonan̈a araiky aminao donko mijaly fotony marary na miatriky raha sarotro hafa, na mety vo naty havan̈a. Akory mety han̈ampiantsika izy? Azontsika atao ohatra mivavaka baka Jehovah han̈ampy atsika hivolan̈a raha mampahery aminany ndreky han̈ano raha mifan̈araka amy zen̈y. Ndraindray, mety raha volan̈intsika ndreky raha ataontsika io edy ny raha ten̈a ilainy. (Vakia 1 Petera 4:10.) * Atsika koa man̈ano zen̈y, hahaihatoky fo koa piaramanompo nampiantsika io fa ‘Jehovah tsy hiala izy foeky. Tsisy andra han̈ariany Jehovah izy!’ Ho ravoravo mare anao amy zen̈y!

20. Ino mahavy atsika matoky fa ‘Jehovah han̈ampy atsika’ ankitin̈y?

²⁰ Maro raha sarotro iaretantsika amy zioty, karaha taminiry Paoly in̈y. Ndray izy man̈ano zen̈y, haintsika fa ho hisy korazy fo atsika fotony Jehovah miaraka amintsika sady von̈ono han̈ampy atsika. Mampiasa Jesosy ndreky iro anjely aby io izy amy zen̈y. Mampiasa olo manan̈a fahifan̈a koa izy, izikoa hitany fa ilain̈a ndreky mifan̈araka amy fikasan̈anany raha zen̈y. Tsy zen̈y fo fa mampiasa fan̈ahy masin̈inany koa izy, baka ho hisy rahalahy ndreky ranabavy fo han̈ampy atsika lera atsika an̈atiny problemo. Maro piaramanompo efa nahatsapa raha karaha zen̈y. Zen̈y mahavy atsika masaky mivolan̈a karaha nataony Paoly in̈y: “Jehovah han̈ampy zaho, ke tsy havozo foeky zaho. Ino ma raha mety ho vitanolo hatao aminaka?”​—Heb. 13:6.